Varoma 1
1
Gulosa
1Eni Pawulo, githumi gya Jesu Kristo, nyi ranidwego gu khala Mupostoli, nyi hathidwe gasi gu tivisa Ivhangeli ya Nungungulu. 2Aya Nungungulu a ma tumbisidego gale khu vaprofeti omu nya Milowo nya Guage 3ma ganelago khu Mwanaye, a nga velegwago linyumbani la Dhavhidhe. 4Khu tshivba nya Liphuvbo nya Guage, Jesu Kristo Pfhumu yathu wonegisidwe gupwani Mwamana wa Nungungulu nya Tshivba Yatshavbo, khu guwuga gwaye khu ga vafudego 5Khu uye, hi hakhide wuhigo nya gukhale Vapostoli, gasi hi wuyisa vathu nya mahundzu yatshavbo va khodwa ga Nungungulu va dhumisa lina laye. 6Enu nenu, mu womo vbakari nya ava va ranidwego gu khala va Jesu Kristo. 7Nyi ngu mi losani enu mwatshavbo mu gumogo Roma, enu mu haladzwago khu Nungungulu, mu ranidwego gu khala va nya guaga vaye, kheni: Wuhigo ni gurula gu tago khu ga Nungungulu Babe wathu, ni ga Pfhumu Jesu Kristo gu na khale ni enu mwatshavbo.
Pawulo a ngu suva guya holela Varoma
8Khu guhegula, nya gubonga Nungungulu wangu khu ga Jesu Kristo. Nya gu mu bonga khu kotani yanu mwatshavbo, kholu mahungu nya gukhodwe gwanu ma pwade tigoni gwatshavbo. 9Nungungulu nyi mu thumelago khu monyo wangu watshavbo khu gu tshumayela Ivhangeli ya Mwanaye, khuye a gu fakazi yangu. A ngu dziti gwadi gukhuye nyi ngu mi dundruga 10gikhati gyatshavbo omu nya milombelo yangu, nyi lombago gukheni Nungungulu a nyi ninge wuhigo nyi katege liendroni gwangu kala nyi gu vboha iyo gwanu. 11Khu lisine, nyi ngu gola ngudzu guta mi wona, gasi nyita mi tshatshedza giningwa nya liphuvbo gi dzi kodzago gu mi tiyisela. 12Nya gu gola gukheni hita tiyiselana hatshavbo: Eni nyi tiyisedwa khu gukhodwa gwanu, ni enu mu tiyisedwani khu gwangu. 13#Wona gambe: Mith 19:21. Vandriyangu, nya guvbweta gukheni mu dziti gukhenu dzinyondro dzingi nyi yedzide guta iyo gwanu, aholu nyi tandregiswa kala olu. Nya gu gola gukheni thumo wangu wu ninge mihandro vbakari gwanu nga eyi yi ningidwego ga vambe va nya mayigo. 14Nyi hungidwe khu fanelo nya guphasedzele vathu vatshavbo: Avo va handzegidego ni avo nyamba handzega, va nya guti ni sipumbu. 15Khu kharato, eni nyi dzi emisede gambe guta mi tivisani Ivhangeli, enu mu vbanyelago Roma.
Gukhodwa khugo gu vbanyisago
16Eni kha nyi khali dzitshoni khu Ivhangeli, kholu iyo khiyo yi gu tshivba ya Nungungulu gasi gu vbanyisa vatshavbo vale va khodwago, guphela khu Vajudha kala va nya mayigo. 17#Wona gambe: Habh 2:4. Kholu khavbo nya Ivhangeli, hi tugula gikungo gya Nungungulu nya hi tshanganise naye khu tshivba nya gukhodwe, hi gu manago gukhugela guhegulani kala guhegisani, kha nga gu lovidwego gupwani: “Muthu a lulamidego a na vbanya khu gukhodwa.”
Vathu vatshavbo va mane nandru mbeli gwa Nungungulu
18Nungungulu a ngu wonegisa khu Ndzadzini likhulo laye nya likhongolo, gasi gu tsayisa guyeyisa ni guvivba gu girwago khu vathu nya sighohi, khu mavbanyelo yawe nya guvivbe ma segelago vathu guti lisine laye. 19Kholu esi vathu va yelago gu siti khu mahungu ya Nungungulu somo gowonegelani: Kholu uye Nungungulu wurumba waye a va tulede gu siti. 20Kholu, makhalelo nyamba wonega ya Nungungulu, tshivba yaye nya gupindruge ni tumbunugo nya wu Nungungulu waye, si ngu wonegiswa gwadi gukhugela gu vangwa nya mafu, khu sigiro saye a si giridego. Khu kharato, va mwalo guditshedzwa. 21#Wona gambe: Efs 4:17-18. Va di gu dziti gukhavo Nungungulu womo, aholu kha va mu thela kota ni gu mu rungudza kha nga edzi gu vbwetegago khidzo. Va di pfhala khu mipimiso yawe nyamba phasa gilo, ni gu myonyo yawe yi gola gu landrisela silo nya gidema. 22Va gu dzi randra vathu nya guti, aholu na vari sipumbu. 23Va digide gu rungudza Nungungulu nya gupindruge, va gu khozela sifananiso nya vathu vafago, kala va gu khozela ni sifananiso nya sinyoni, nya dzinyoga ni simbe sirengo si khwirirago khu lididi.
24Khu kharato, Nungungulu a di va diga va gu thegela gunyenyezani nya gugole nya myonyo yawe, va gu gira mithumo ya dzitshoni, yi nyenyezisago sivili sawe. 25Va digide gu landrisa lisine la Nungungulu, va gu landrisela malipha. Va khozede ni gu thumela sivangwa, va diga gu khozela ni gu thumela uye mune Muvangi, uye a gu ni fanelo nya bongwe kala gupindruga. Amen!
26Khu kharato, Nungungulu a va digide va gu thegela gunyenyezani nya esi si tsakisago sivili sawe. Gu di dzega ni vagadzi vakone va diga vama vawe, gasi gu gira iso nyamba yela, si hambanago ni tumbunugo nya wunyamayi wawe. 27Khu magirelo ya mamowo, vama vakone navo, va di diga gutshangana ni vagadzi vawe, va fekana gu dogolelana khu gyawe. Mwama ni mwama va di gira silo nya gunyenyeze nya dzitshoni, khu kharato, va ngu yela gu hakha tsayiso nya sihonohono sawe.
28Kha nga avo va ngamba thela kota khu guti Nungungulu, Nungungulu nuye a di va diga va landra mapimo yawe nya guhandruge, gasi va gire iso nyamba yela. 29Khu kharato, va fumedwe khu guwegela gwatshavbo, ni gunyenyeza gwatshavbo, ni wugundreli, ni guvivba, ni lidiwo, ni wufu, ni wughevenga, ni vhilinganya, ni malipha, ni wulala ni milembo. 30Va di khala vathu nya guvale, va dzi gira valala va Nungungulu, va nya gu dzi gugumugisa, va nya matshandza, va nya gu nyenya vakwawe, vakutsedzeli nya mayunga, va nyamba yingela vavelegi, 31vathu nyambana gupima esi nya sadi ni esi nya guvivbe, vathu nyamba tumbega, nyambana lihaladzo, nyamba kodza gu pwela wuhindzi vathu vakwawe. 32Avo va ngu dziti, gukhuga ni guema gukhavo, nayo wa Nungungulu wa gu ruma gukhuwo vatshavbo ava va vbanyago kharalo, va ngu fanedwa khu gufa. Aholu, kha va hegeli basi gu gira silo sesi, va gu pata ni guzundza vale va vbanyago navo kharato.
Currently Selected:
Varoma 1: BGE2014
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
