Varoma 4
4
Abrahama a ngu hi hevbudza gukhodwa
1Hi na khethu ginani khu babe wathu Abrahama, a gu nyapandre wathu khu tumbunugo? Ginani gi nga mu dugelelago? 2Nari gupwani Abrahama a di wonwa khu Nungungulu kha nga muthu nya gululame khu kotani nya mithumo yaye nya yadi, a diri ni fanelo nya gu dzi zundze khu mithumo yaye nya yadi, aholu nasiri mbeli ga Nungungulu. 3#Wona gambe: Gen 15:6. Kha nga yi ganelago Milowo nya Guage, khiyo: “Abrahama khodwe ga Nungungulu, khu kharato, a sayedwe muthu a lulamidego.” 4Muthu watshavbo a thumago a na ni fanelo nya guhakhiswe, nasiri kha nga wule a ningwago giphaso nya gukari, aholu, kha nga wule a gu ni fanelo nya gulivbwe khu thumo a wu thumidego. 5Aholu, muthu a khodwago ga Nungungulu, a gu uye a hakhago gighohi, gukhodwa gwaye gu na mu gira muthu nya gululame. 6Khidzo kharato, Dhavhidhe a ganelago khu makategwa ya vale Nungungulu a va tshanganisidego lihaladzoni gwaye, nyamba khumbuga mithumo yawe, khuye:
7 # Wona gambe: Dzind 32:1-2. “Va kategide vale Nungungulu a va ditshedzago sighoho sawe,
vale sighoho sawe si futidwego!
8Ina, kategide wule Pfhumu a si theligo kota khu sighoho saye.”
9Ina, makategwa yaya khya Vajudha basi, mwendro ma gu lumba vambe navo, gani? Ethu hi ngu tiyisa nya gukhethu Abrahama wonidwe nari muthu nya gululame khu gukhodwa. 10Gasi gikhati muni si giregidego isoso ga Abrahama? Sayedwe muthu nya gululame na hanide wugwera mwendro na si gu hani wugwera, gani? Ahihi kha sa girega na hanide wugwera, aholu nasi a si gu hani. 11Khu hwane, khavbo a hanidego gwadi wugwera kha nga giyeyedzo nya gupwani Nungungulu a mu wone kha nga muthu nya gululame, a mu hakha a khala pari yaye khu kotani nya gukhodwe a nga bani ari nago, na si gu hani wugwera. Khu kharato, uye khade babe wa vatshavbo vale va khodwago ambari na va sa hana wugwera, gasi a avo navo va wonwa na va lulamide. 12Uye gambe khuye babe wa vale va hanago wugwera, vale va si hegeligo basi gu hana wugwera, aholu va landrago gambe gihevbudzo nya gukhodwe gwa Abrahama na si gu hani wugwera.
Gitumbiso ni gukhodwa gwa Abrahama
13Nungungulu tumbiside ga Abrahama ni ga sanana saye gu va ninga litigo rumba li khala thomba yawe, nasiri khu kota nya gulandrise Nayo, aholu khu gukhodwa gwaye. 14#Wona gambe: Gal 3:18. Kholu, nari gupwani thomba yeyi ya gu lumba basi vale va landrisago Nayo, gukhodwa gu diri mwalo giphaso, gambe gitumbiso gya Nungungulu gi di si phasi gilo. 15Nayo wa gu rana tsayiso wa Nungungulu, kholu avba wu gu mwalo Nayo, guhoha nugo gu mwalo. 16Khu kharato, thomba ha gu yi mana khu gukhodwa. Kharati, gitumbiso gi na ni giphaso ga satshavbo sanana sa Abrahama, nasiri basi ga vale va landrisago Nayo, aholu, ga vatshavbo va khodwago ga Nungungulu nga edzi Abrahama a nga khodwago khidzo. Khidzo kharati a gu babe wa ethu hatshavbo khu gukhodwa. 17#Wona gambe: Gen 17:5. Kha nga yi ganelago Milowo nya Guage, yi gukhiyo: “Eni nyi gu giride babe nya mayigo nya mangi,” Abrahama khade babe wathu mbeli gwa Nungungulu a gu uye a vbanyisago va nya gufa, a tumbunugisago silo si nga bani siri mwalo. 18#Wona gambe: Gen 15:5. Ni avba gu nga bani guri mwalo gutumba, Abrahama a di khodwa ni gutumba. Khu gukhodwa gwaye khade babe nya mayigo nya mangi, kha nga Milowo yi ganelago, khiyo: “Tengo nya sanana sago wu na bani wuri kharati.” 19#Wona gambe: Gen 17:17. Abrahama a diri vbafuvbi nya gutshanganise lizana myaga, aholu gima kha kanakana gukhodwani gwaye khu gu dzipwa givilini gwaye na vbeledwe khu tshivba, ni guti gukhuye mwangadzi waye Sara gyumba, kha velegi. 20Wulangani nya gukanakane ni gumba tumba ga gisambanyo gya Nungungulu, gukhodwa ga Abrahama gu di engedzelana gu tiya khu tshivba a gu rungudza Nungungulu. 21A di khodwa ni gu tumba gukhuye Nungungulu a na ni tshivba nya gutadzise gisambanyo gyaye. 22#Wona gambe: Gen 15:16. Khidzo kharati Abrahama a nga wonwago kha nga muthu nya gululame, khu kotani nya gukhodwe gwaye. 23Ogu nya gupwani: “Wonidwe kha nga muthu nya gululame” kha ga lowa basi khu kotani ya Abrahama. 24Aholu gu lovidwe nugo khu kotani gwathu. Kholu a ngu hi wona nethu kha nga vathu nya gululame, ethu hi khodwago ga wule a wugidego khu ga vafudego, Jesu Kristo, Pfhumu yathu. 25#Wona gambe: Isa 53:4-5. Uye a di ningedwa a gu songwa khu kotani nya sighoho sathu, aholu wugide gasi gu hi gira vathu nya gululame mbeli gwa Nungungulu.
Currently Selected:
Varoma 4: BGE2014
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
