Eksodusi 19
19
A xitsunga xa Sinai.
1Makunu anzhako ka tihweti tinharu, kusukela kuhumeni ka vaIsraeli hi le Gipite, va lo chikela xiwuleni xa Sinai hi siku lego.
2Laha na va sukile Refidime, va lo chikela xiwuleni xa Sinai, va zimeka matenda yabye lomo xiwuleni; Israeli i lo gova ko cuwukana ni xitsunga.
3Mosi i lo kanziha kuya ka Nungungulu; Jehova a mu vitana na hi lomu xitsungeni, aku: Wulawula ka yindlu ya Jakobe, u byela a vanana va ka Israeli, uku: Miti. 7:38
4Mu zi wonile lezi nzi zi mahileko ka vaGipite ni lezi nzi mu tlakukileko zona hi tipapa ta gama nzi mu tisa ka mina.
5Makunu lezi, loku mu ingisa a gezu ga mina, mu hlayisa a xivumelwano xa mina, mu tava tshomba ya mina nwinyi ku hunza manwani matiko hakuva a misava yontlhe nja mina. Deut. 5:2; 1 Kor. 10:28; Tit. 2:14
6Mu tava tiko ga vapristi, a tiko gi basileko. Leti hi timhaka leti u ta nga byela a vanana va ka Israeli. Deut. 7:6; 1 Ped. 2:9; Kuv. 1:6; 5:10
7Zonake Mosi i lo vitana a masingalakati ya vanhu, a va tlhamusela tontlhe leti timhaka Jehova a mu leleteleko tona.
8Vontlhe vanhu va lo hlamula khatiginwe, vaku; Zontlhe lezi Jehova a zi wulileko hi ta zi maha. Mosi i lo yisa timhaka ta vanhu ka Jehova.
9Zinghaho Jehova aku ka Mosi: Nzi tata ka wena hi refu ga ntima, kasi a vanhu va fela ku zizwa loku nzi wulawula na wena, va ta fela ku ku tsumba wontihe masiku. Zonake Mosi i lo tshama a hlawutela Jehova a timhaka ta vanhu.
10Jehova i te ngalo ka Mosi: Famba ka vanhu u ya va basisa nyamutlha na manziko, va hlaza tinguwo tabye;
11va ti longisela a siku ga wunharu, hakuva hi siku ga wunharu Jehova i ta relela le xitsungeni xa Sinai mahlweni ka vanhu vontlhe.
12Kambe u ta kombisa vanhu a mbhingano lowu wu renzetekelako xitsunga, uku: Ti woneleni, mu nga kanzihi le xitsungeni, hambu ni ku henya matlhelo ya xona, a munhu loye a ta nga khumba xitsunga i ta dawa.
13A nga kona a to mu khumba, kanilezi i ta gandliwa hi maribye, kutani ku gwaziwa hi tlhari; hambu xi hi xifuyo kutani munhu, a nga ta hanya. Laha na ku biwa punzu, va ta kanziha te xitsungeni. Maheb. 12:20
14Mosi i lo relela hi le xitsungeni, aya ka vanhu a ya va basisa, va hlaza tinguwo tabye.
15Mosi aku ka vanhu: Ti longiseleni siku ga wunharu; mu nga dzuki mu gamakana ni vavasati.
16Hi siku ga wunharu laha na gi cile, ku wa hi kona kudzinza ni kuhatima, ni refu legi ga ntima na gi hi hehla ka xitsunga; ni kuvuma loku ka hombe ka punzu ku lo tinga. Zonake a vanhu vontlhe lava va nga hi lomu wugovelweni va lo rurumela.
17Zonake Mosi i lo humesa vanhu lomu wugovelweni va famba ku ya tlhangana ni Nungungulu. Va loya yima lahasi ka xitsunga.
18Zonake a xitsunga xa Sinai xi lo tuvika musi matlhelo wontihe, hakuva Jehova i wa relele ka xona na hi lomu nzilweni. A musi wa kona wu lo tuvikela hehla kotisa musi wa phingo ga nzilo. Zonake a xitsunga xontlhe xi lo tsekatseka nguvu. Deut. 4:11; Maheb. 12:18
19A kuvuma ka punzu ku lo simamisa ku tinga ku hunza mpimo. Mosi i wa kari a wulawula, Nungungulu a mu hlamula hi gezu ga hombe.
20Zalezo Jehova i lo relela xitsungeni xa Sinai hi le hehla ka xitsunga; zonake Jehova a vitana Mosi kwa le hehla ka xitsunga. Mosi a kanziha aya kona.
21Jehova aku ka Mosi; Relela u ya byela vanhu lezaku va nga dzuki va tshinela ku ta wona Jehova, ku ngafa vanhu vo tala xikari ka vona.
22Hambu a vapristi lava va tshinelako ka Jehova, vonawu va fela ku ti basisa kasi Jehova a nga va dayi,
23Mosi aku ka Jehova: A vanhu cima va nga ta kanziha xitsungeni xa Sinai, hakuva u hi byelile lezaku; Renzelekela xitsunga hi mbhingano, u xi basisa.
24Zonake Jehova aku ka yena: Tlhela, u ta kanziha na Aroni; kanilezi a vapristi ni vanhu va nga kanzihi vaya ka Jehova, kasi va ngati va ta dawa.
25Mosi i lo relela a ya byela vanhu leti timhaka.
Currently Selected:
Eksodusi 19: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
