Eksodusi 32
32
A role ga nzalama.
1Makunu laha a vanhu va nga wona lezaku Mosi wa hlwela ku relela hi le xitsungeni, va lo tsombana ka Aroni, vaku kakwe: Ngone u ta hi mahela vanungungulu lava va ta nga hi rangela mahlweni, hakuva Mosi loyi a hi humesileko le tikweni ga Gipite, a hi zi tivi lezi zi mu humeleleko. Miti. 7:40
2Zonake Aroni aku ka vona: Anyulani zingwavila za nzalama lezi zi nga lomu tindleveni ta vasati va nwina, ni ta vafana va nwina, ni ta vanhanyana va nwina, mu zi neha laha ka mina.
3Zonake a vanhu vontlhe va lo anyula a zingwavila za nzalama lezi zi nga hi tindleveni tabye, va zi neha ka Aroni.
4I lo zi amukela, a zi nyekisa, a zi vatla hi nzhemo, ku huma a role ga nzalama yi nyekisilweko. Zonake vaku: Hi loyi nungungulu wa wena, Israeli, loyi a ku humesileko tikweni ga Gipite. Tis. 106:19
5Makunu laha Aroni a nga wona lezo, i lo aka a alati mahlweni ka role; zonake Aroni i loba hungu, aku ngalo: Manziko ku tava mubuzo wa Jehova.
6Zonake va lo vuka ni mixo va maha miphahlo yo hiswa ni miphahlo ya ku khesa. Zonake va lo tshama lahasi vaga, vanwa, va suka va hlakana.
7Jehova aku ka Mosi: Suka u famba, hakuva a vanhu va wena lava u va humesileko tikweni ga Gipite, va onhile.
8Va hatlisile ku hambuka ndleleni leyi nzi va leleteleko yona; va ti mahele a role gi nyekisilweko, va khizama mahlweni ka gona, va gi khozela, va gi mahele miphahlo, vaku: Hi yena nungungulu wa wena, Israeli, loyi a ku humesileko tikweni ga Gipite!
9Jehova i lo wula kambe ka Mosi, aku: Nzi wonile lava vanhu, lezaku mbanhu va tinhamu to nonoha.
10Nzi tsike makunu nzi va zangarela, nzi va mbhetisa; zonake mina nzi ta maha lixaka la hombe ha wena.
11Kanilezi Mosi i lo khongela ka Jehova, Nungungulu wakwe, aku: O Jehova! Hikuyini u zangarela a vanhu lava u va humesileko le Gipite hi mintamu ya hombe?
12Hikuyini a vaGipite va ta ngaku ngalo: Ehe, i va humesile kasi a fela ku ya maha kubiha ha vona, hakuva i va dele le xitsungeni, niku i va lovisile laha misaveni. Tlhelisa a zanga ya wena, u tsika a kubiha loko u lavako ku maha ka vanhu va wena.
13Alakanya Abrahama, na Isaka, na Israeli, a malanza ya wena, lava u nga hlambanya ka vona uku ngalo: Nzi ta anzisa a pswalo wa nwina; wu ta kota tinyeleti ta tilo; nzi ta nyika ka pswalo wa nwina gontlhe tiko legi nzi gi wulileko, va ta gi fumela kala kupinzuka, Gen. 12:7; 15:5; Maheb. 6:13
14Zonake Jehova i lo tsika kubiha loko a nga wa alakanyile ku ku maha ka vanhu vakwe.
15Zonake Mosi i lo relela hi le xitsungeni, na khomile maribye mambiri ya milayo mandleni yakwe, na ma tsalilwe matlhelo mambiri, seno ni seno.
16A maribye lawa mambiri ma wa hi ntiro wa Nungungulu, ni kutsala loku ku tsalilweko ka maribye lawo ku wa hi kutsala ka Nungungulu.
17Makunu Joxua i lozwa a guwa ga vanhu va nga wa hlalela; zonake aku ka Mosi: Ku zwala a guwa ga kulwa lomu mixaxeni.
18Kanilezi Mosi aku: Lawo a hi magezu ya migiyo, ne a hi magezu ya tihuwa. Nzozwa magezu ya tisimu.
19Laha a nga wa chikele wugovelweni, i lo wona a role ni lava va nga wa kina. Zalezo Mosi i lo zangara, a hoxa maribye hi mandla yakwe, ma fayeka lahasi ka xitsunga.
20Zonake i lo teka a role legi va gi mahileko, a gi hisa hi nzilo, a gi sila gi maha mapa, a chela matini a nwisa a vanana va ka Israeli.
21Zonake Mosi aku ka Aroni: A vanhu lava va ku gohele yini lezi u va enghenisileko lomu xionhweni xa kunghahi?
22Aroni aku: Hosi yanga, ngha a zanga ya wena yi nga vindluki nguvu! Wa zi tiva lezaku lava vanhu va bihile.
23Va lota ka mina, va taku: Hi mahele vanungungulu lava va ta nga hi rangela, hakuva Mosi loyi a hi humesileko le tikweni ga Gipite a hi zi tivi lezi zi mu humeleleko.
24Zonake nziku ka vona: Loye a nga ni nzalama, a yi anyule. Zonake va lo nzi nyika, nzi yi hoxa nzilweni, zinghaho ku lo huma a role legi.
25Mosi i lo wona lezaku a vanhu va tsanzekile, na va tsanzekiswa hi Aroni, va soleka ka valala vabye.
26Zonake Mosi i lo yima hi laha nyangweni ya wugovelo, aku: Kani himani loye a ranzako Jehova, ate ka mina! Zonake a vanana va ka Levi va lo tsombana ka yena.
27Zonake aku ngalo kabye: Jehova, Nungungulu wa Israeli, i ngalo: Munwe ni munwani wa nwina a hlome matlhari yakwe, mu enghena lomu wugovelweni, mu tsemakanya a nyangwa yinwani ni yinwani, mu hlasela vamakabye va nwina, ni vanakuloni lava mu akileko navo.
28Zonake a vana va ka Levi va lo maha khwatsi hi kuwula ka Mosi, hi lego siku ku lofa kusuhani ka 3,000 wa vanhu.
29Zonake Mosi aku: Ti nyikelisiseni ka Jehova zalezi, hakuva munwe ni munwani i vukele nʼwana wakwe kutani makabye wakwe, a ka lezo mu ta kuma kukatekiswa inyamutlha.
30Hi manziko wa kona, Mosi aku ka vanhu: Mu onhile a xionho xa hombe. Kanilezi nzi ta kanziha ka Jehova, kutani nzi taya maha a nzhiho wa xionho xa nwina.
31Hikwalaho Mosi i lo tlhela aya ka Jehova, a yaku: O, lava vanhu va onhile nguvu hi ku ti mahela nungungulu wa nzalama.
32Kanilezi makunu tsetselela kuonha kabye! Loku zi nge ngaho, vinya a vito ga mina legi u gi tsalileko lomu bhukwini ga wena. Tis. 69:28; Rom. 9:3
33Jehova aku ka Mosi: Loye a nzi goheleko hi yena nzi ta nga mu susa lomu bhukwini ga mina.
34Suka makunu u rangela vanhu, u ya navo laha nzi ku leleteleko kona. Languta a ngelosi ya mina yi ta rangela mahlweni ka wena. Kanilezi a siku ga ku va tsayisa ka mina, nzi ta va tsayisa hi zionho zabye.
35Jehova i lo lamata a vanhu hi ndlela leyo, hakuva va rumile Aroni ku va mahela role.
Currently Selected:
Eksodusi 32: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
