Genesisi 17
17
Abrama i tsumbiswa a mugi wa tshomba.
1Laha Abrama a nga hi ni 99 wa malembe, Jehova i lo woneka ka Abrama, aku ngalo kakwe: Hi mina Nungungulu wa Ntamu wontihe; famba mahlweni ka mina na u longamile.
2Nzi ta yimisa a xivumelwano xikari ka wena na mina, nzi ku anzisa nguvu.
3Abrama i lowa hi nghohe yakwe, na Nungungulu i lo wulawula naye, aku:
4Languta, a xivumelwano xa mina zinwe na wena hi lexi: U tava raru wa matiko manyingi. Rom. 4:17
5A vito ga wena gi nga ta ha vitanwa ku ngalo, Abrama, kanilezi a vito ga wena gi ta kuva Abrahama; hakuva nzi ku mahile a raru wa matiko manyingi.
6Nzi ta anzisa nguvu a pswalo wa wena, nzi maha matiko ha wena, ni tihosi ti ta huma hi ka wena.
7Nzi ta tiyisa a xivumelwano xa mina zinwe na wena, ni ka pswalo wa wena anzhako ka wena ni ka zizukulwana za wena, xi tava xivumelwano xi nga gumesiko, nzi tava Nungungulu wa wena ni wa pswalo wa wena anzhako ka wena.
8Nzi ta nyika ka wena, ni ka pswalo wa wena anzhako ka wena, a tiko legi u nga muluveli ka gona, a tiko gontlhe ga Kanani gi, tava tiko ga nwina kala kupinzuka; nzi tava Nungungulu wabye.
9Nungungulu i te ngalo ka Abrahama: U ta hlayisa a xivumelwano xa mina, wena ni pswalo wa wena, anzhako ka wena ni ka zontlhe zizukulwana zabye.
10Lexi hi xivumelwano xa mina xikari ka mina na wena, ni pswalo wa wena anzhako ka wena: Vontlhelele vavanuna va nga xikari ka nwina va ta enghena wukwera. Miti. 7:8; Rom. 4:11
11Mu tava mikwera, mu susa a dewu ga le magumo ka nyama ya nwina, ku tava xifungo xa xivumelwano xikari ka mina na nwina.
12Loye a nga ni ntlhanu wa masiku ni manharu xikari ka nwina i tava kwera, vontlhelele vavanuna va zizukulwana za nwina, loyi a belekelweko lomu ndlwini, ni loyi a xabyilweko hi mali, ni ka valuveli vontlhe va nga hiko va pswalo wa wena.
13I ta kuva kwera yena loye a belekelweko lomu ndlwini ya wena ni loye a xabyilweko hi mali; a xivumelwano xa mina xi tava nyameni ya nwina, xiva xivumelwano xi nga gumesiko.
14A wanuna loye a nga khuna, a nga hiko kwera hi dewu ga nyama ya magumo kakwe, loye munhu i ta suswa xikari ka va ka kabye, hakuva i tshovile a xivumelwano xa mina.
15Nungungulu i te ngalo ka Abrahama: Sarai, a sati wa wena, u nga ta ha mu vita hi vito ga Sarai, kanilezi a vito gakwe i tava Sara.
16Nzi ta mu katekisa, hi ka yena nzi ta ku nyika a nisanyana; nzi ta mu katekisa, a maha mamani wa matiko, a tihosi ta vanhu ti ta huma hi ka yena.
17Zonake Abrahama i lowa hi nghohe yakwe, a hleka, aku ngalo mbilwini yakwe: A wanuna loyi a nga ni 100 wa malembe i ta beleka ke? na yena Sara loyi a nga ni 90 wa malembe i ta beleka ke? Rom. 4:19
18Abrahama i te ngalo ka Nungungulu: Ku ngaku Ixmaeli a hanya mahlweni ka wena.
19Nungungulu i te ngalo: Sara, a sati wa wena, i ta ku belekela a nisanyana, u ta mu chula vito gakwe ku hi Isaka; nzi ta tiyisa a xivumelwano xa mina na yena, ni ka pswalo wakwe anzhako kakwe, xi tava xivumelwano xi nga gumesiko.
20Kambe nzi ku zwile hi tlhelo ga Ixmaeli; languta, nzi ta mu katekisa nzi anzisa pswalo wakwe, wu anza nguvu, yena i ta beleka a 12 wa tihosana, nzi ta maha ha yena a tiko ga hombe.
21Kanilezi nzi ta tiyisa a xivumelwano xa mina na Isaka, loyi u ta nga pswalelwa hi Sara hi xikhati xa kona a lembe gi tako.
22Zonake laha Nungungulu na a mbhetile ku wulawula na Abrahama, i lo tlakukela hehla.
23Abrahama i lo teka Ixmaeli a nʼwana wakwe, ni vontlhe lavo va belekelweko lomo ndlwini, ni vontlhe lavo va xabyilweko hi mali yakwe, a vavanuna vontlhe va yindlu ya Abrahama, i lo va maha mikwera hi dewu ga nyama ya magumo gwalego siku, kota kuwula ka Nungungulu.
24Abrahama i wa hi ni 99 wa malembe siku lego a nga engheniswa wukwera a dewu ga nyama ya le magumo.
25Ixmaeli a nʼwana wakwe i wa hi ni 13 wa malembe a siku lego a nga engheniswa wukwera a dewu ga nyama ya le magumo.
26A siku gwalego i lo mahiwa kwera Abrahama, na Ixmaeli a nʼwana wakwe.
27A vavanuna vontlhe va yindlu yakwe, va belekelweko lomo ndlwini, lava va xabyilweko hi mali ka vamatiko, va lo mahiwa mikwera zinwe naye.
Currently Selected:
Genesisi 17: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
