Genesisi 27
27
Isaka a katekisa Jakobe na Esau.
1Zonake laha Isaka a nga hi wa kale, ni mahlo yakwe ma hi zilutsu ma nga ha woni, i lo vitana Esau a nʼwana wakwe wa matewula, i te ngalo kakwe: Nwananga! Yena aku: Languta, nzi laha.
2I te ngalo kakwe: Languta, makunu nzi khosahele, a nzi gi tivi a siku ga kufa ka mina.
3A wa nga teka a matlhari ya wena, ni mipaxa ya wena ni wura ga wena, uya khwatini, u ya nzi hlotela a nyama;
4u ta nzi mahela kuga ko nanziha, loku nzi ku ranzako; u nzi nehela, nzi taga; kasi a moya wa mina wa ku katekisa na nzi nga se kufa.
5Rebeka i wa zizwa laha Isaka a nga kari a wulawula ni nʼwana wakwe Esau. Esau i loya khwatini ku ya hlota nyama, a yi neha.
6Rebeka i lo wulawula na Jakobe a nʼwana wakwe, aku: Languta, nzi zwile a raru wa wena na a wulawula na Esau nakuloni, aku:
7nzi nehele a nyama, u nzi mahela kuga ko nanziha, nzi taga nzi ku katekisa mahlweni ka Jehova, na nzi nga se kufa.
8Makunu nwananga, zwana a gezu ga mina legi nzi ta nga ku leletela gona.
9Yana le tlhambini, u ya nzi tekela zimbutana zimbiri lezi za zi nene; nzi ta longisa kuga ko nanziha ka raru wa wena, loku a ku ranzako.
10U ta heleketa ka raru wa wena, a yaga, a ku katekisa na a nga se kufa.
11Jakobe aku ngalo ka Rebeka mamani wakwe; Languta, Esau a nakulori munhu wa mafefeleti, kasike mina nzi munhu wa tikuluwa:
12kutani dadani i ta ya nzi ringetela, zonake nzi ta ya ku khwatsi nzi mukhohlisi mahlweni kakwe; nzi ti kokela nzhukano, mina na nzi nga hi na zikatekiso za nchumu.
13A nyine wakwe aku ngalo kakwe: A yive hehla ka mina a nzhukano ya wena, nwananga; wena zwana a gezu ga mina, famba u ya nzi tekela zona.
14I loya a ya zi teka, a zi neha ka nyine; a nyine i lo bhika a kuga ko nanziha ko khwatsi hi loku a ku ranzako a raru wakwe.
15Rebeka i lo teka tinguwo ta Esau, a nʼwana wakwe wa nhonzwa, leti to saseka, ti nga wa hi lomu ndlwini yakwe, i lo ti ambexa Jakobe a nʼwana wakwe wa nzisana.
16I lo mu ambexa madzowo ya zimbutana mawokweni yakwe ni lomu likuluweni la nhamu yakwe.
17Yena i lo nyika mandleni ya Jakobe a nʼwana wakwe a kuga loku ko nanziha loku a nga wa ku bhikile.
18I loya ka raru wakwe, a yaku: Dada! Yena aku: Nzi laha; hi wena mani nwananga?
19Jakobe aku ka raru wakwe: Hi mina Esau a matewula ya wena. Nzi mahile lezi wena u nzi pimileko; wa nga vuka, u tshama uga nyama ya mina, kasi a moya wa wena wa nzi katekisa.
20Isaka aku ka nʼwana wakwe; Hiyini u nga hatlisa ku yi kuma nwananga? Yena i te ngalo; Hakuva Jehova Nungungulu wa wena i yi mahile yita mahlweni ka mina.
21Isaka aku ka Jakobe: Hi nga tshinela nwananga, nzi ku ringetela loku u hi yena nʼwana wa mina Esau hakunene.
22Zonake Jakobe i lo tshinela ka Isaka a raru wakwe, i lo mu ringetela, aku: A gezu i gezu ga Jakobe, kanilezi a mawoko mawoko ya Esau.
23I wa nga mu tivi, hakuva a mawoko yakwe ma waku khwatsi hi mawoko ya Esau nakulobye, i lo mu katekisa.
24Yena i te ngalo: Futsi hi wena nʼwana wa mina Esau ke? I te ngalo kakwe: Hi mina.
25Yena aku ngalo: Yi nehe ka mina nziga a nyama ya nʼwana wa mina, kasi a muhefemulo wa mina wa ku katekisa. I lo yi neha kakwe, aga: i lo mu nehela a vinya, anwa.
26A raru wakwe Isaka i te ngalo kakwe: Wa nga tshinela u nzi pswopswa nwananga.
27I lo tshinela, a mu pswopswa; i lozwa a masema ya tinguwo takwe, i lo mu katekisa, aku:
Languta masema ya nʼwana wa mina,
Ku khwatsi masema ya simu gi katekisilweko hi Jehova. Maheb. 11:20
28Nungungulu a ku nyike za nzhokati ya tilo,
Ni kunona ka misava,
Ni wunyingi ga mavele ni vinya.
29Ngha vanhu va ku tirela,
Ni matiko ma korama mahlweni ka wena;
Uva hosi ya vamakabye va wena,
Ngha a vanana va nyine wa wena va korama mahlweni ka wena.
Ngha va rukiwa lava va ku rukako,
Va katekiswa lava va ku katekisako.
30Zonake laha Isaka na a mbhetile ku katekisa Jakobe, na Jakobe a hi ku huma mahlweni ka raru wakwe Isaka, ku lo chikela Esau nakulobye, na a wuya hi le kuhloteni.
31Yenawu kambe i wa mahile kuga ko nanziha, i lo ku neha ka raru wakwe, aku ka raru wakwe: Ngha dadani a vuka aga a nyama ya nʼwana wakwe, kasi a moya wa wena wu ta nzi katekisa.
32A raru wakwe Isaka i te ngalo kakwe: Hi wena mani wena ke? Yena aku kakwe: Nzi nʼwana wa wena wa matewula, Esau.
33Isaka i lo dzuka hi kururumela ka hombe nguvu, aku: Himani yena loyi a nga nzi hlotela nyama, a yi neha ka mina? Nzi loga yontlhe na u nga se ku chikela wena, nzi lo mu katekisa. Hakunene a xikatekiso xi na yena.
34Laha Esau na a zwile timhaka ta raru wakwe i lo rila hi kurila ka hombe, aku ka raru wakwe: Dada, nzi katekisewo kambe.
35Yena aku ngalo: I tile a ta khohlisa, i tekile a xikatekiso xa wena.
36Yena i te ngalo: A gi chulwangi khwatsi a vito gakwe ku ngalo hi Jakobe ke? I nzi tekele zikatekiso zimbiri; i tekile a tshomba ya wutewula ga mina; languta, makunu i nzi tekele a xikatekiso xa mina. Aku ngalo: Wena a ku nzi vekelangi a xikatekiso ke?
37Isaka i lo hlamula, aku ka Esau: Languta, nzi mu yimisile a kuva hosi ya wena, a vamakabye vakwe vontlhe nzi va mahile malanza yakwe; nzi mu nyikile mavele ni vinya; makunu nzi ta ku mahela yini nwananga ke?
38Esau i te ngalo ka raru wakwe; Dada, wa kuva ni xikatekiso xinwe ntsena xana ke? Nzi katekise na minawu, dada. Esau i lo tlakusa a gezu gakwe a rila.
39Isaka a raru wakwe i lo hlamula, aku ngalo kakwe:
Languta, a kuaka ka wena ku tava kule ka tiko go nona,
Na ku hi hava a nzhokati ya tilo hi le hehla;
40u ta hanya hi supado ya wena, u mu khozela a nakuloni.
Zonake laha u ta nga kukutela a ntamu wa wena u ta phewula a gota gakwe nhanweni ya wena.
Jakobe a chavela Harani.
41Esau i lo venga Jakobe hi kota ya xikatekiso lexi a raru wakwe a nga wa mu katekisile ha xona. Esau i te ngalo lomu mbilwini yakwe: A masiku ya ku rilela dadani ma tshinele; zonake nzi ta daya nakulori.
42Rebeka i lo byelwa timhaka ta Esau a nʼwana wakwe wa matewula, i lo ruma ku ya vitana Jakobe a nʼwana wakwe wa nzisana, i te ngalo ka yena: Languta, Esau nakuloni i wulawula ha wena aku i ta ku daya.
43Makunu nwananga, ingisa a gezu ga mina; suka u chavela ka Labani makabye wa mina le Harani;
44u ya tshama kakwe masiku yo kari, kala gi bohla a khulo ga nakuloni;
45ku kala ku bohla a kuzangara ka nakuloni, ni ku kala a rivakelwa hi lezi u mahileko ka yena; zonake nzi ta rumela ku ta ku teka leyo; xana hikuyini nzi ta nga siyiwa hi nwina vambiri hi siku ginwe ke?
46Rebeka i te ngalo ka Isaka: Nzi swirilwe hi kota ya mahanyela ya vanhwana va ka Hiti, ni loku Jakobe a teka sati ka vanhwana va ka Hiti, wo kota vanhwana va legi tiko, a kuhanya ka mina ku ta nzi yini ke?
Currently Selected:
Genesisi 27: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
