Genesisi 39
39
Josefa a valelwa poxtoeni.
1Josefa i lo yiswa Gipite; Potifare, a nduna ya Faro, a murangeli wa vanyakasani, a muGipite, i lo mu xava ka vaIxmaeli lava va nga mu yisa leyo.
2Jehova i wa hi zinwe na Josefa; i wa hi munhu a nga hi ni thomo; a tshama lomu ndlwini ya nwinyi wakwe a muGipite.
3A nwinyi wakwe i lo wona lezaku Jehova i zinwe naye, ni lezaku zontlhe lezi a zi mahako, Jehova wa zi vuvumisa canjeni gakwe.
4Hi kota ya lezo Josefa i lo kuma thomo mahlweni kakwe, a mu tirela. Zonake a nwinyi wakwe i lo mu yimisa ku maha muhlayisi wa yindlu yakwe, ni kuva muhlayisi wa zontlhe lezo a nga wa hi nazo.
5Ku suka hi laha na a mu yimisile a kuva muhlayisi wa yindlu yakwe ni zontlhe lezi a nga hi nazo, Jehova i lo katekisa a yindlu ya muGipite hi kota ya Josefa; a zikatekiso za Jehova zi wa hi hehla ka zontlhe lezi a nga hi nazo, lomu ndlwini ni le masinwini.
6Yena i lo veka zilo zontlhe a nga hi nazo canjeni ga Josefa, i wa nga ti karati ha nchumu, ntsena a kuga loku a nga waga. Josefa i wa hi lipswhitla.
7Zonake anzhako ka lezo a sati wa nwinyi wakwe, i lo navela Josefa, aku: Etlela zinwe na mina.
8Yena i lo ala, aku ka sati wa nwinyi wakwe: A nwinyi wa mina a nga ti karati hi zontlhe lezi zi nga lomu ndlwini yakwe, zontlhe lezi a nga nazo i zi vekile mandleni ya mina.
9I hava wahombe ka leyi yindlu ku hunza mina, a nga nzi tsimbeteli nchumu a handle ka wena, hakuva u nga sati wakwe. Nzi ta mahisa kuyini loku kubiha, nzi onha ka Nungungulu ke?
10Hambu lezo a nga wa wulawula na Josefa masiku ni masiku lezaku ngha a etlela naye, ni kuva zinwe naye, Josefa a nga vumelangi.
11Hi ginwani siku Josefa i lo enghena lomu ndlwini ku tira mitiro yakwe; lomo ndlwini ku wa hi hava munwani munhu.
12A wasati i lo khoma Josefa hi nguwo yakwe, aku: A hi etlele hontlhe! Kanilezi i lo siya nguwo yakwe canjeni gakwe, a tsutsuma a huma handle.
13Makunu laha wasati a nga wona lezaku i siyile a nguwo yakwe a tsutsuma a huma handle,
14yena i lo vitana a vanhu va yindlu yakwe, aku: Cuwukani, ku nehilwe a muHeberu laha ngangweni wa hina ku ta hi xengetela. Yena i lota ka mina aku ngha a etlela na mina, kanilezi nzi loba huwa.
15Zonake laha a ngazwa lezaku nzaba huwa, i lo siya a nguwo leyi yakwe canjeni ga mina a tsutsuma a huma handle.
16Yena i lo hlayisa a nguwo ya Josefa a kala a Wuya a nuna wakwe.
17I lo wulawula ni nuna wakwe; aku: A nanza legi ga muHeberu, loyi wena u hi neheleko, i wa tile ka mina a ku ta nzi xengetela.
18Laha nzi ngaba huwa, i lo siya a nguwo leyi yakwe a tsutsuma a huma handle.
19Laha a nwinyi wakwe a nga zwile timhaka ta sati wakwe, taku: A nanza ga wena gi nzi mahile lezi ni lezi, a zanga yakwe yi lo vindlukelana.
20A nwinyi wa Josefa i lo mu khoma a mu hoxa paxweni, lego ku khotselwako kona a tiperesu ta hosi; zinghaho i lo tshama paxweni.
21Kanilezi Jehova i wa hi zinwe na Josefa; i lo mu kombisa wuxinji, a mu maha lezaku a kuma thomo ka nduna ya paxo.
22A nduna ya paxo yi lo yimisa Josefa hehla ka tontlhe tiperesu leti ti nga wa hi paxweni; ni zontlhe lezi zi nga wa mahiwa lomo, zi wa mahiwa hi yena.
23Ni nduna ya paxo yi wa nga ha cuwuki nchumu xa lezi zi nga wa hi canjeni ga Josefa, hakuva Jehova i wa hi zinwe naye; ni zontlhe lezi a nga wa zi maha, Jehova i wo zi katekisa.
Currently Selected:
Genesisi 39: TSC72
Highlight
Share
Compare
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
