Genesisi 4
4
Kana na Abeli.
1Adamu i lo tiva Eva sati wakwe, na yena i lo xura nyimba, a beleka Kana, i te ngalo: Nzi kumile munhu hi kuvuna ka Jehova.
2I lo engeta a beleka Abeli nakulobye. Abeli i lo maha murisi wa tiyivu; kanilezi Kana i lova murimi wa mi
3Kute hi nzhako ka masiku yo kari, Kana i lo neha mihanzu ya misava akuva munyikelo ka Jehova.
4Na Abeli i lo neha a matewula ya tiyivu takwe, leyi yi nonileko. Jehova i lo xalala ha Abeli ni munyikelo wakwe; Maheb. 11:4
5kanilezi a nga xalalangi ha Kana ni munyikelo wakwe. Na Kana i lo zangara nguvu, ni nghohe yakwe yi lo tsuva.
6Jehova aku ngalo ka Kana: U zangarela yini ke? hi yini a nghohe ya wena yi tsuvileko ke?
7Loku u maha khwatsi u nga ta tlakuswa ke? kanilezi loku u nga mahi khwatsi a xionho xi xiyelela nyangwe-ni, kuxuva ka xona ku ta kuva ka wena; kanilezi wena u ta xi fumela. Rom. 6:12
8Na Kana i lo wulawula na Abeli nakulobye; na ku mahisile lezo, laha na va hi lahandle, Kana i lo vukela Abeli nakulobye, a mu daya.
9Jehova aku ngalo ka Kana: I kwihi Abeli nakuloni? Yena aku ngalo: A nzi mu tivi; hi mina muhlayisi wa nakulori ke?
10Jehova aku ngalo: U mahile yini ke? A gezu ga nkhata wa nakuloni gi rilile misaveni gita ka mina.
11Makunu u rukatelwe misaveni leyi yi ahlamileko a nomu wa yona yi amukela a nkhata wa nakuloni a mandleni ya wena.
12Laha u ta nga rima, a misava yi nga ta ha nyika mihanzu hi ntamu wa yona; u tava mupepetseki ni mufambafambi laha misaveni.
13Na Kana aku ngalo ka Jehova: A xitsayiso xa mina xa hombe ku hunza a ntamu wa mina.
14Languta, u nzi hlongole nyamutlha a nghoheni ya misava; nzi ta fihlala a nghoheni ya wena; nzi tava mupepetseki ni mufambafambi misaveni; ku taku kani himani a nzi kumako a nzi daya.
15Jehova aku ngalo ca yena: Ku taku kani himani a dayako Kana, Kana i ta photelwa hi ka ntlhanu ni kumbiri. Na Jehova i lo veka a xiwoniso ka Kana xakuva va nga mu dayi lavo va mu kumako.
16Kana i lo suka mahlweni ka Jehova, a ya tshama tikweni ga le Node, hi le Mutsuwuka-gambo wa Edeni.
17Kana i lo tiva sati wakwe; i lo xura nyimba, a beleka Enoki. Anzhako ka lezo i lo aka muti, a chula vito ga muti a vito ga nʼwana wakwe Enoki.
18Enoki i lo beleka Irade; Irade i lo beleka Mehujaeli: Mehujaeli i lo beleka Metuxaeli: Metuxaeli i lo beleka Lameki.
19Na Lameki i lo teka vasati vambiri: a vito ga munwe hi Ada, ni vito ga munwani hi Zila.
20Na Ada i lo beleka Jabale: loyi a ngava raru wa lava va tshamako lomu matendeni va fuya tihomu.
21A vito ga makabye wakwe hi Jubale: yena i raru wa lava va bako magubhu ni tinanga.
22Na Zila i lo beleka Tubal-kaini, loyi a nga hi mufuli wa zontlhe zo kariha, za ziketse ni za suku. Ni makabye wa xisati wa Tubal-kaini i wa hi Naama.
23Na Lameki aku ngalo ka vasati vakwe, Ada na Zila: Zwanani gezu ga mina! Nwina vasati va Lameki, zwanani kuwulawula ka mina! Nzi dele munhu hilezi a nga nzi balesa, ni jaha hakuva gi nga nziba.
24Loku Kana a photelwa hi ntlhanu ni kumbiri, Lameki yena i ta photelwa hi ka 70.
25Na Adamu i lo engeta a tiva a sati wakwe; i lo beleka a nisanyana, a no chula vito gakwe ku hi Sete, aku ngalo: Hakuva Nungungulu i nzi yimisele yinwani mbewu matshanweni ya Abeli loyi a nga dawa hi Kana.
26Yenawu Sete i lo beleka nisanyana, i lo mu chula vito gakwe ku hi Enoxi. Hi xikhati lexo a vanhu va lo sangula ku khozela Jehova.
Currently Selected:
Genesisi 4: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
