Luka 14
14
Jesu a hanyisa hi siku ga sabado.
1Ku te hi siku ga sabado laha a nga enghena ndlwini ya munwe wa vahombe va vaFarisi a ku yaga zakuga, va wa mu xiyelela.
2A mahlweni kakwe ku wa hi ni munhu a nga wa hi ni xitsamba.
3Jesu i te ngalo ka vagonzisi va nayo ni vaFarisi: Ku fanele ku hanyisa hi sabado, kutani a hi zona ke? Mat. 12:10
4Kanilezi vona va su tiwitiwi bhi! Jesu i lo khoma munhu hi canja, a mu hanyisa. Zonake i lo mu fambisa,
5aku ngalo kabye: Hi wihi wa nwina a na nga ni mbongola, kutani i homu, yi welako hlobyeni, loyi a nga hatlisiko a ku yi humesa hi siku ga sabado ke? Ekso. 23:5; Deut. 22:4; Xip. 13:15
6Va wa nga zi koti ku mu hlamula nchumu mhakeni leyi.
Lava va ti kukumukisako.
7Yena i lo kanela a mufananiso ka lava va rambilweko, laha a nga wona lezaku va hlawulisa kuyini a zitshamu zo ranga, aku kabye:
8Loku u rambilwe mubuzweni wa muchado, u nga tshami xitshanwini xa kuranga; ku nga taku loyi a dumileko a ku hunza wena a rambilwewo;
9zonake loyi a nga ku ramba, i tata a taku ka wena: Nyika wutshamu legi ka munhu loyi; zonake u ta suka hi tingana, u ya teka xitshamu xa lenzhako.
10Kanilezi loku u rambilwe, famba u ya tshama xitshanwini xa lenzhako; kasi laha a tako loyi a ku rambileko, a taku ka wena: Xaka, yana hi le mahlweni. Zonake u tava ni wudumo mahlweni ka vona lava va tshamileko zakugeni zinwe na wena. Mav. 25:6, 7
11Hakuva ni wihi a ti kulisako i ta koramiswa; ni loyi a ti koramisako i ta kuliswa. Joba 22:29; Tis. 18:27; Mat. 23:12
12Kambe i te ngalo ka loyi a mu rambileko: Loku u maha mubuzo laha hlikanhini, kutani wa laha gambyeni, u nga rambi vanghana va wena, hambu vanakuloni, hambu maxaka ya wena, hambu vaakelane va wena lava va fumileko; ku nga taku na vona va ku ramba, kasi wa tlheliselwa.
13Kanilezi laha u mahako a mubuzo, ramba zisiwana, ni zirela, ni zilema, ni zikhumu; Neh. 8:10, 12
14zonake u ta kateka, hakuva va vumala za ku ku tlhelisela ha zona; hakuva u ta tlheliselwa a kuvukeni ka valulamileko.
A mubuzo wa hombe.
15A munwe wa vona lava va nga tshamile kugeni, loku a zwile timhaka leti, aku: I katekile loyi a ta ngaga zakuga mufunweni wa Nungungulu. Kuv. 19:9
16Kanilezi Jesu aku ngalo kakwe: A munhu wo kari i lo maha mubuzo wa hombe, a ramba vo tala. Mat. 22:2
17I lo ruma a nanza gakwe hi xikhati xa mubuzo, a ku ya byela lava va rambilweko ku ngalo: Tanani, hakuva zontlhe zi longile. Mav. 9:2, 5
18Vona vontlhe va lo sangula ku maha makalavisa. A wa kuranga i te ngalo ka nanza: Nzi xavile simu, nzi fanele a ku ya gi wona; nza ku khongotela a kuva nzi tlhatlheka.
19A munwani aku ngalo: Nzi xavile ntlhanu wa mipatswa ya tinkavi, nzi famba nzi ya ti ringisa; nza ku khongotela a kuva nzi tlhatlheka.
20Ni munwani aku ngalo: Nzi tekile sati, hikwalaho a nzi zi koti kuta.
21A nanza gi lo wuya, gi ta byela a hosi ya gona timhaka leto. Zonake a nwinyi wa yindlu i lo zangara, aku ngalo ka nanza gakwe: Hatlisa u famba maphangweni ni tindleleni ta muti, u tisa laha a zisiwana, ni zirela, ni zikhumu ni zilema.
22Zonake a nanza gi te ngalo: Hosi, lezi u zi layileko zi mahekile, kanilezi ga ha hi kona wutshamu.
23A hosi yiku ngalo ka nanza: Famba magonzweni ni tihlavini, u kurumeta vanhu ku ta enghena, kasi a yindlu ya mina yi fela ku tala.
24Hakuva nziku ka nwina: a nga kona ni munwe wa vona lava va rambilweko a ta nga laza a mubuzo wa mina Mat. 21:43; 22:8; Miti. 13:46
Ku tsika zontlheni ku lanza Jesu.
25A zidlemo za hombe zi lo mu pangalata; yena i lo hunzuluka, aku ngalo ka zona:
26Loku a munhu ata ka mina, na a nga vengi a raru wakwe, ni nyine, ni sati, ni vana, ni vanakulobye, ni vamakabye, ina, hambu ni kuhanya kakwe, a nga zi koti ku maha mupizani wa mina. Xip. 16:13
27Kani himani a nga rwaliko a xihambano xakwe, a nzi lanzela, a nga zi koti ku maha mupizani wa mina. Mat. 16:24; Mar. 8:34; Xip. 9:23
28Hakuva hi wihi wa nwina, loyi a lavako ku aka likhokhola, a nga rangiko hi ku tshama a hlayela ntsengo, aku kutani i nawo lowu a ta nga mbhetisa ha wona ke? Mav. 24:27
29Ku nga taku, laha na a akile xiseketelo, a nga zi koti ku mbhetisa, zonake vontlhe lava va zi wonako va sangula ku mu tseketsela, vaku:
30Loyi munhu i lo sangula ku aka, kanilezi i tsanzekile ku heta.
31Kutani hi yihi hosi leyi yi fambako ku yalwa ni yinwani hosi, yi ta nga kala ku ranga hi ku tshama hasi, yi pima lezaku kutani yi ta zi kota hi 10,000 wa masochwa a ku tlhangana ni leyi yi tako ka yona hi 20,000 ke?
32Loku zi nge nghaho, yi ta rumela mitsumi, na ya ha hi kule a yinwani hosi, a ku ya kombela a kuva kona kutala.
33Zinghaho ni wihi wa nwina a nga tsikiko zontlhe lezi a nga nazo, a nga zi koti ku maha mupizani wa mina.
34A munyu wu sasekile; kanilezi loku a munyu wu pswhama, wu ta lungwa hi yini ke? Mat. 5:13; Mar. 9:50
35A wa ha vuni nchumu, hambu ku hunzuka misava, hambu kuva koho; wu hoxiwa lahandle. Loyi a nga ni tindleve ta kuzwa, ngha a ingisa.
Currently Selected:
Luka 14: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
