KELUARAN 9

Soe ka lima: Mate bana-manu

1 Manetualain nafa'da Musa nae, “Muu leo manek-ka muu, fo mafa'dan mae Manetualain, fo hataholi Ibrani-la Manetualain-na, nafa'da nae, ‘Nemen-na, fo Au anang-ngala la'o, fo ela ala hapu sene-do'ok neu Au. 2Metema, o ta nau po'i fas soona, 3neukose Au fe he'di-laus matuaina la'e o bana-manum, ndala, keledei, unta, sapi, bi'ilopo ma o bi'ihiim-mala. 4Neukose, Au ta'da fe'e hataholi Israel-la bana-manun, neme hataholi Masir-ra bana-manun mai. Neukose, hataholi Israel-la bana-manun, ta mate esa boen. 5Au, fo Manetualain aketu basa, balahaa soona, Au tao dede'ak ndia.’ ”

6Balahaa boema, Manetualain taon sama leo hata fo nafa'da basan so. Mate basa hataholi Masir-ra bana-manun, tehu hataholi Israel-la bana-manun soona, ta mate esa boen. 7Manek-ka natane hata fo ana da'di so, boema ala tuin lae ta mate hataholi Israel-la bana-manun esa boen. Tehu, manek-ka nalanga batu, de ana ta nau po'i leoina ndia la'o fa.

Soe ka nee: he'di bisu nggumak

8 Manetualain nafa'da Musa no Harun nae, “Ho'i-ma, afu nafanggetek de'ubee neme la'o dale mai. Fo Musa muse tapa afu ndia leo lalai neu, nai manek-ka matan. 9Soona afu ndia, neukose ana tapasasala leo basa dae Masir-ra lala'en-na neu. Neukose afu ndia, neni bisu nggumak fe hataholi ma bana-manu, fo ka'din soona, ana da'di bisu mananak.” 10#Nin. 16:2 Boema Musa no Harun ho'i afu, de leu leo manek-ka leu. Musa tapa afu ndia leo lalai neu. Afu ndia neni bisu nggumak fe hataholi ma bana-manu, fo ka'din soona, ana da'di bisu mananak. 11Basa hataholi malelak siula-tongonok-kala, ta bisa lasale leo Musa neu fa, nanahu basa aoinan-nala lala'en-na, henuk no bisu nggumak, sama leo hataholi Masir fe'ek-kala. 12Tehu Manetualain tao-na manek-ka da'di nalanga batu, de sama leo hata fo Manetualain nafa'da basan nae, manek-ka ta nau taoafik neu Musa no Harun hala-kokolan fa.

Soe ka hitu: U'da eis

13 Manetualain nafa'da Musa nae, “Fafaianak nanseli soona, muu leo manek-ka muu, fo mafa'dan, mae Manetualain fo hataholi Ibrani-la Manetualain-na, nafa'da nae, ‘Po'i Au anang-ngala, fo ela ala sene-do'ok neu Au. 14Oek ia soona, neukose Au fe soe-a ta la'e ka'da manapaleta-la, ma laun-nala mesak-kana fa, tehu neu o boe, fo ela o bubuluk, mae ta hapu hataholi nakasusu'dik no Au, nai daebafak-ka lala'en-na fa. 15Leounik-ka, Au nau huku o ma o laum-ma nenik he'di-laus soona, tao leo bee o, mopo-mate la'iesak emi so. 16#Rm. 9:17 Tehu, Au po'ilotak emi maso'da, fo ela Au hapu atu'du Au koasang-nga neu o, nalosa Au na'deng-nga da'di nanakoa-kiok nai basa daebafak-ka lala'en-na. 17Leomae leondiak boe, o bei koao-ndaeao boe, de o ta nau po'i Au anang-ngala la'o fa. 18Balahaa fafaik, nai li'u sama leo ia boe, neukose Au fe u'da eis matuaina mai, sama leo ana beita da'di nita nai Masir, neme makahulun eli losa besak ia fa. 19Boema fe paleta, fo ela basa o bana-manum, ma o hata-hetom manai kota deak-ka, lenis leo mamana nee-nee lino-linok-ka neu. Basa hataholi ma bana-manu manai kota deak, fo ala ta hapu mamana nasulu-nahapak fa, neukose u'da eis-sa tuni nisas.’ ” 20Nai hataholi manaho'u paleta-la dalek, hapu de'ubee bii-lamata'u neu Manetualain hala-kokolan. Loo atan-nala ma bana-manun-nala leu leo uma dale leu, fo ela ala hapu nasulu-nahapak. 21Tehu sila nggelok ta tao dalek neu hala nasanene'dak ndia fa, de ala po'ilotak atan-nala ma bana-manun lahele leme mook-ka.

22Boema, Manetualain nafa'da Musa nae, “So'uk o limam-ma leo lain neu, fo neukose u'da eis-sa mai nai basa dae Masir-ra lala'en-na. Neukose u'dan ndia, tuni-na hataholi daebafak-ka, bana-manu ma basa bubu'u-palusa manai tina lala'en-na.” 23Boema Musa so'uk aitete'en-na leo lain neu, de Manetualain nakona mangguluk-ka, ma u'da eis-sa, ma ta'tas-sa teen-na daebafak. Manetualain fe 24#Nin. 8:7, 16:21 u'da eis matuaina mai, sama-sama no ta'tas-sa tu'ti-nato. Ndia nde u'da eis matuainan nanseli, nai Masir susula tutuin dale. 25Nai basa nusak-ka lala'en-na, u'da eis ndia, ana tao namopo-namate basa hata lala'en-na nai tina, ma hataholi daebafak-ka no bana-manu boe. Nalutu basa bubu'u-palusa manai tina-la, ma ai-la tu'u leu. 26U'da eis-sa, ta tuni la'e ka'da nusa Gosyen-na, fo hataholi Israel-la mamana leleon-na fa.

27Boema, manek-ka naloo Musa no Harun, de nfa'da nae, “Au asala-asingo so. Manetualain nde ndoos-sa, te au ma au laung-ngala, tao salak so. 28Hule-haladoi neu Manetualain leona; ami doi-dosom-ma dai so, nanahu mangguluk ma u'da eis ia. Neukose, au po'i emi la'o. Emi boso boe leo meme ia bai.”

29Musa nafa'da manek-ka nae, “Au losa kota deak tutik-ka, neukose au so'uk au limang-nga, fo au hule-haladoi neu Manetualain. Neukose mangguluk-ka hahae, ma u'da eis-sa neukose nakamate, fo ela au Ama Maneng bubuluk, nae daebafak ia, Manetualain nuun. 30Tehu au bubuluk, ae au Ama Maneng-nga, ma basa manapaleta-la, beita bii-lamata'u neu Manetualain boen.”

31Nalutu bubu'u-palusa abas ma betek-kala, nanahu abas-sa nabuna, ma betek-kala mapulek. 32Tehu, ta nalutu gandum-ma, ma ai de'ek-kala fa, nanahu beita losa sila fain-na fa.

33Boema, Musa la'o leona, de neu leo kota deak neu; nai ndia, ana so'uk liman-na, fo ana hule-haladoi neu Manetualain. Hatematak ndia boe, mangguluk-ka, u'da eis-sa ma u'dan-na hahae. 34Lelek manek-ka nita manada'dik ndia boema, nasala-nasingo seluk. Ndia no manapaletan-nala, lalanga batu lahele. 35Sama leo hata fo Manetualain nafa'dan tunga Musa nae, manek-ka ta nau fe hataholi Israel-la loak, fo ala la'o fa.

Currently Selected:

KELUARAN 9: twu

Highlight

Copy