KELUARAN 10
10
Soe ka falu: Lamak
1 Manetualain nafa'da Musa nae, “Muu leo manek-ka muu. Au tao-an no manapaletan-nala lalanga batu so, fo ela Au hapu tao manada'di beuk-kala, nai sila tala'da heon, 2ma, fo ela o hapu tui o upu-anam tao leo beek, de Au tao akamiminak leoina Masir-rala nenik manada'di beuk sila-la. Boema emi basa-basam-mala bubuluk, mae Au nde Manetualain.”
3Boema, Musa no Harun leu leo manek-ka leu, de lafa'dan lae, “Leoina Ibrani-la Manetualain fo nde Manetualain-na, nafa'da nae, ‘O ta nau makatele neu Au fa, losa faihi'da? Po'i Au anang-ngala la'o, fo ela ala sene-do'ok neu Au. 4Metema o beita nau boen fa soona, balahaa te, neukose Au fe lamak-ka mai leo o nusam-ma mai. 5Lamak makadotok sila-la, neukose ala poti ketu daebafak-ka, nalosa hataholi-a ta hapu nita dae-a fa. Neukose lamak sila-la, la'a heni bei ela bubu'u-palusa-la, ma basa ai fo u'da eis-sa ta taonisa fas-sala. 6Neukose lamak henu o uma manem-ma, manapaleta-la uman-nala, ma laun-na uman-nala. Soe ia, neukose ba'u lena heni, hata fo o bei-ba'i kaim-mala la'o la'di hain so.’ ” Basa boema, Musa lepos de ana la'o.
7Basa manapaleta-la lafa'da manek-ka lae, “Hataholi ndia muse tao susa ita losa faihi'da? Po'i basa hataholi Israel sila-la ala la'o, fo leu sene-do'ok neu Manetualain, fo sila Manetualain-na. Mitak ita nusan-na nakalulutuk so!”
8Boema, laloo falik Musa no Harun, fo leu lataa manek-ka. Manek-ka nafa'das nae, “Emi bole la'o, fo sene-do'ok neu Manetualain, fo emi Manetualaim-ma. Tehu, emi hataholim see kande, neukose ana la'o-a?”
9Musa nataa nae, “Ami basa-basam-mala, nau mulik do lasik boe. Neukose, ami moo la'iesak ami anam-mala, ami sapim-mala, ami bi'ilopom-mala, ma ami bi'ihiim-mala, nana ami muse tao fai malole matua esa, soaneu fe ha'da-holomata neu Manetualain.”
10Manek-ka nae, “Au ta bisa po'i emi moo inak-kala, ma emi anam-mala fa! Hata fo emi moken ndia, ka'da sama leo emi mamahena au oke Manetualain, fo Ana ba'e-pala emi. Mangale'dok ba'eneu au so, nae emi manuu dudu'a mangalauk. 11Ta! Ka'da touk-kala bole la'o, fo leu sene-do'ok neu Manetualain, metema memak emi hii ka'da sene-do'ok mesak-kana!” Boema, ana usi heni Musa no Harun neme uma manek-ka mai.
12Boema Manetualain nafa'da Musa nae, “Leleuk o limam-ma leo dae Masir-ra lain neu. Neukose, lamak-kala mai, fo la'a heni basa bubu'u-palusa fo u'da eis-sa ta taonisa fas-sala.” 13Boema, Musa so'uk aitete'en-na, de Manetualain fe ani timu-a da'di nai nusak ndia, lele'do katemak esa ma le'odae katemak esa. Lolebalahaak boema, anin ndia fuu neni lamak 14#Nin. 9:2-3 makadotok nanseli, nalosa henu la'iesak nusak-ka. Beita hapu hataholi nita lamak de'u-de'u basa ndia fa, ma basa ndia boema, manada'di leondiak-ka ana ta da'di seluk so'on. 15Lamak-kala poti ketu dae bafan-na, nalosa meten soona nggeok. La'a heni basa u'da eis-sa taonisa ela bubu'u-palusa manai dae lain lala'en-na, ma basa ai boak manai ai-la lain. Nai basa dae Masir-ra lala'en-na, ta ela hata momo'dok esa boen, nai ai-la do bubu'u-palusa-la fa.
16No lai-laik, manek-ka naloo Musa no Harun, boema nafa'da nae, “Au asala-asingo basa neu Manetualain, fo emi Manetualaim-ma, ma neu emi so. 17Soaneu oek ia soona, fe do'o do ampon neu au sala-singong, ma hule-haladoi neu Manetualain, fo emi Manetualaim-ma, fo ela Ana ho'in-na huhuku-dodokik maneni mamates ia, neme au mai.” 18Musa la'o de ana hule-haladoi neu Manetualain. 19Boema Manetualain tao nasafali anin-na da'di ani balak, de nasan-na seli. Anin-na fuu neni lamak sila-la, de nenis leo Tasi Gelagah neu. Ta ela lamak esa boen, nai basa dae Masir-ra lala'en-na. 20Tehu Manetualain taon-na manek-ka da'di nalanga batu, de ana ta nau po'i hataholi Israel-la la'o fa.
Soe ka sio: Makiu-makahatuk-ka potin-na Masir
21 Manetualain nafa'da Musa nae: “So'uk o limam-ma leo lain neu leona, soona neukose makiu makahatuk-ka potin-na dae Masir-ra.” 22#Mzm. 105:28; Nin. 16:10 Musa so'uk liman-na leo lain neu, de nai faik telu dalen-na, makiu-makahatuk-ka poti-na dae Masir-ra lala'en-na. 23Hataholi Masir-ra, ta hapu lita hata-hata fa, de nai fai ka teluk sila-la dalek, ta hapu hataholi esa boen, neu leo su'di bee neu fa. Tehu, nai hataholi Israel-la uman-nala soona, mangale'dok nahele.
24Boema, manek-ka naloo Musa, de nafa'dan nae: “Emi bole meu sene-do'ok neu emi Manetualain-ma. Inak-kala ma ni'iana-la bole tunga. Tehu, ta bole meni emi sapim, bi'ilopom ma bi'ihiim-mala fa.”
25Musa nataa nae: “Metema leondiak soona, Tuan muse fe ami bana-manu soaneu tunu-hotuk, ma soaneu tutunu-hohotu nanatunuk soaneu Manetualain, fo ami Manetualaim-ma. 26Ami muse meni la'iesak ami bana-manum; neukose ami ta la'oela esa boen. Neme bana-manu sila-la mai, ami hapu hele beek-ka nde, neukose ami tunu-hotun soaneu Manetualain fo ami Manetualaim-ma. Ami losa naa soona, besak-ka ami bubuluk, ami hele bana beek-ka, fo ami tunu-hotun.”
27 Manetualain taon-na manek-ka nalanga batu, nalosa ana ta po'i hataholi Israel-la la'o fa. 28Manek-ka nafa'da Musa nae, “Ma'dook aoinam-ma neme au matang-nga mai! Metema, au ita seluk o mata-panam soona, neukose au taoisa o!”
29Musa nafa'da nae, “Sama leo Ama Manek halan-na. Tao leo bee-o, neukose au Ama Maneng ta nita seluk au so'on.”
Currently Selected:
KELUARAN 10: twu
Highlight
Share
Copy
Want to have your highlights saved across all your devices? Sign up or sign in
