KEJADIAN 24
24
Abraham sanga inak fe Isak
1Abraham namalasi nanseli so, boema Manetualain ba'e-palan nai basa dede'ak lala'en-na dalek. 2Faik esa boema, Abraham nafa'da atan fo manakoasa basa hata-heton lala'en-na nae, “Tao o limam-ma neu au puu huung-nga. 3Fo soo-supa menik Amak, Manetualain, fo manakoasa lalai ma daebafak-ka, mae neukose o ta sanga fe au anang Isak, saoinak nai basa hataholi manai dae Kanaan ia-la fa. 4O muse fali leo au nusa-namong muu, fo sanga fen saoinak, nai au tolano ka'a-fa'ding-ngala dalek.”
5Boema, ata ndia natanen nae, “Tao leo beek, fo metema anafe'oanak ndia, ta nau la'o ela uman-na, ma ana ta nau tunga au leo, nusak ia mai fa? Au muse o Tuan anan ndia, leo Tuan nusa-namon neu do?”
6Tehu, Abraham nataa nae, “Masanene'dak! Boso moo au anang-nga leo naa neu makandondook! 7Manetualain, fo manakoasa lalai-a, no basa au eme au amang uman mai, ma neme au tolanoo ka'a-fa'ding-ngala mai, ma Ana soo-supa basa au, nae neukose Ana fe nusak ia neu au tititi-nonosing. Ndia boeo, neukose nadenu ata nusa so'dan-na, fo ana tulu-fali o, fo ela o hapu matongo moo saoinak esa nai naa, soaneu au anang-nga. 8Tehu, metema anafe'oanak ndia, ana ta nau tunga no o fa, soona o matapo'i neme soo-supak ndia mai. Leomae leo beek boe, boso moo anang ndia leo naa neu.” 9Basa boema, ata ndia tao liman-na neu ndia Tuan Abraham puu huun-na, de ana soo nae, ma neukose ana tao tunga Abraham nonoken ndia.
10Ata ndia, foo neni onta sanahulu, ma bua-lo'a kabeli mata-matak-kala neme ndia tuan-na pusakan-na mai, de ana la'o leo kota fo, Nahor mamana leleon-na, nai tepo-lelek fai maso'dan-na; mamanak ndia, nai Mesopotamia boboan kii. 11Lelek ana losa naa boema, ana fe onta sila-late'e, fo ela ala hahaeaon-nala, deka no oedolu esa, nai kota deak. Le'donoso boema, basa inak-kala mai aso oe nai oedolu ndia. 12Boema, ata ndia hule-haladoi nae, “Amak, fo au tuang Abraham Manetualain-na, fali-ma au dei, fo ela au bela-ba'ung, neni buna-boak nai faik ia; madale malole neu au tuang Abraham. 13Mitak au apadeik deka o oedolu ia. De ba'ihanak seluk te, neukose anafe'oanak manai kota ia, ala mai aso oe. 14Neukose au afa'da anafe'oanak sila-la esa ae, ‘Sue-na, makona o nggusim-ma, fo fe au oe faa dei.’ Metema, nataa nae, ‘Minu leona, ma au fe Ama onta nala linu boe!’ soona ndia nde, O helen soaneu O atam Isak. Metema, dede'ak ndia da'di soona, neukose au bubuluk, ae O madale malole neu au tuang Abraham.”
15-16Lelek ana bei hule-haladoi ndia te, Ribka fo anafe'oanak esa, mata makeek nanseli, ma bei matatema, losa oedolu ndia, neni nggusi nai alun lain. Betuel anan ndia, ma Betuel ina-aman nde been-na, nde Nahor ma Milka; Abraham ka'an Nahor ndia. Ribka neu leo oedolu ndia neu, de ana aso oe leo nggusin dale neu, fo ana sanga fali ne'un. 17Tehu Abraham atan-na, neu deka noon, de nafa'dan nae, “Fali-ma au dei, Anang-ngo, fe au inu neme o nggusim ndia mai.”
18Boema, anafe'oanak ndia nataa nae, “Minu leon Ama, boema no lai-laik, nakona nggusin-na neme alun lain mai, de ana ho'u nggusi ndia, ma ana fe ata ndia ninu.” 19Lelek ata ndia ninu basa boema; anafe'oanak ndia nae, “Au aso fe Ama ontan-nala linu boe, fo ela bana sila-la linu lakabete.” 20Basa boema, no lai-laik, ana po'a oe manai nggusi ndia dalek, leo onta-la mamana nininun-na dalek neu, boema nalai fali seluk leo oedolu neu, de neni oe ba'uk-ka seluk, losa bana sila-la linu losa lakabete. 21Ndia te, no denge-dengek, Abraham atan-na taoafik nakandoon. Ana hii bubuluk, ade Manetualain fe ndia ue-le'din nabuna-naboa do ta.
22Basa onta-la linu lakabete boema, Abraham atan-na ho'i-na ndeli lilopilas esa, de ana taon neu anafe'oanak ndia panan-na. Ma ana tao sue lilopilas dua neu lima lesun-na. 23Boema, ata ndia nae, “So'ba mafa'da su'dik, o amam na'den-na. Ade hapu mamana susunguk nai uman, soaneu ami do ta?”
24Anafe'oanak ndia nataa nae, “Au amang na'de Betuel, fo Nahor ma Milka anan-na.” 25“Nai ami umam, hapu mamana susunguk soaneu Ama, boema ha'deaik makadotok boe, ma nana'a bana.”
26Boema, ata ndia senek, fo ana sene-do'ok Manetualain. 27Nae, “Koa-kio Amak, fo au tuang Abraham Manetualain-na. Se'kona Manetualain manalilinekak, ma dalen-na malole neu au tuang Abraham. Ana hela-nole au tutik, leo tolanoo ka'a-fa'din neu.”
28Basa boema, anafe'oanak ndia, nalai leo inan uman neu, de ana tuin basa manada'dik sila lala'en-na. 29-30Ribka maka'ak, fo na'de Laban. Namanene fa'din-na tui la'eneu hata fo ata ndia nafa'dak-ka. Boeo nita ndeli lilopilas manai panan-na, ma sue lilopilas-sa nai fa'di ndia lima lesun-na. Boema, Laban nalai leo deak neu, fo natongon-no Abraham atan ndia, fo bei napadeik no ontan-nala nai oedolu matan-na. 31Boema Laban nae, “Ama nde been-na, hataholi fo, Manetualain ba'e-palan! Mai fo, ata teu leo ami umam teu. Ami sadia basa kama soaneu Ama so, ma mamanak soaneu Ama ontan-nala boe.”
32Boema ata ndia tunga, de ana leo uma dale neu. Laban nakona heni onta-la bua-lo'a fufuan-nala, de ana fes ha'deaik, fo bana sila-la la'a. Basa ndia boema, neni fe Abraham atan-na, no basa manatungan-nana oe, fo ala safe ein-nala. 33Lelek sadia nana'a-nininuk boema, ata ndia nae, “Metema, au beita anduku-alosak au ini hala heheluk-ka fa soona, au ta u'a fa.”
Boema Laban nae, “Na, kokolak leona.”
34Boema, Abraham atan-na mulai kokolak nae, “Abraham atan, au ia. 35Manetualain ba'e-pala au tuang ndia ba'un-na seli de Ana taon-nan, da'di namasu'i hatu-hatu. Manetualain fe basan bi'ilopo, bi'ihiik, sapi, onta, keledei ma lilopilas lilofulak boe, boema ata touk ata inak. 36Au tuang-nga saoinan Sara, nai fai lasin-na dalek, besak-ka ana bongi ana touk, de au tuang-nga, fe basa hata-heton lala'en-na neu anan ndia so. 37De nadenu au tao hehelu-balataak, pake soo-supak, fo ela au tunga paletan-na. Nae, ‘O boso hele fe au anang-nga, saoinak neme anafe'oanak manai dae Kanaan ia-la mai, 38tehu hele neme au amang teidale-bobongin-nala, do neme tolanoo ka'a-fa'din-nala mai. Da'di, muu lai-lai leo naa muu.’ 39Boema, au atanen ae, ‘Tao leo beek, fo metema anafe'oanak ndia, ta nau tunga no au fa?’ 40Boema, nataa nae, ‘Manetualain fo au tungan tataas esa, neukose nadenu ata nusa so'dan-na mai, fo ana tulu-fali, fo ela o bela-ba'um neni buna-baok. Neukose, o hapu saoinak ba'eneu au anang-nga, fo nde neme au amang teidalen-nala mai. 41Ka'da, metema ala ta sipok o fa soona, besak-ka o matapo'i meme o soo-supam mai.’
42Ma lelek, na'kasa au losa oedolu-a, au hule-haladoi nai au daleng dale ae, ‘Manetualain, fo au tuang Abraham Manetualain-na, ela leo been-na Ana fe au bela-ba'ung, neni buna-boak. 43Neukose, au apadeik ahele nai oedolu ia su'un-na. Metema anafe'oanak esa, ana mai aso oe soona, neukose au oken oe, fo ela ana fe au inu. 44Metema, ana nau fe, ma noke boe, fo ana fe au ontang-ngala linu, soona sa'di leo been-na, ndia nde Manetualain helen, da'di au tuang-nga anan ndia saon-na.’ 45Au beita hule-haladoi basa nai au daleng dale fa, te Ribka mai, te ana su'u nggusi nai langan lain, boema ana aso oe neme oedolu dale mai. Basa boema, au afa'dan ae, ‘Sue-na, fe au inu dei.’ 46Boema, lai-lai nakona heni nggusi neme langan lain mai, de nae, ‘Minu leona, te au sanga fe Ama onta-nala linu boe.’ Boema au inu, de basa ndia boema, ana fe au ontang-ngala linu boe. 47Basa ndia boema, au atanen ae, ‘O amam nde see?’ Boema, nataa nae, ‘Au amang nde Betuel, fo Nahor no Milka anan-na.’ Boema au tao ndeli lilopilas neu panan-na, ma suek pasan esa neu lima lesun-na. 48Boema, au sene-do'ok ma koa-kio Amak, fo au tuang Abraham Manetualain-na, no au leo ia mai, fo leo au tuang-nga tolanoo ka'a-fa'din mai, nalosa au hapu atongo o inaanak ia, ba'eneu anan-na. 49Besak ia, metema emi nau tao au tuang-nga no malole, ma tao matetu emi lulu'a-lelepam soaneun, da'dileo tolanook soona, sa'di leo been-na mafa'dan neu au, tehu metema ta soona, mafa'dan neu au boe, fo ela au bubuluk, au muse tao beek.”
50Laban ma Betuel lataa lae, “Hu kande manada'dik ndia, ana da'di neme Manetualain mai, de ami ta mandaa fe nakeketuk fa. 51Mitak Ribka nde ia; nemen-na, fo ana tunga no Ama, fo ana da'di Ama tuan-na, anan-na saon-na, sama leo hata fo, Manetualain nafa'dan.” 52Lelek Abraham atan ndia namanene sila dede'an ndia boema, ana sene-do'ok Manetualain. 53Boema, ana kalua bua papakek, lilo-henu, lilofulak, lilopilas, de ana fe basa sila-la leo Ribka neu. Ana fe ka'an ma inan, bua palsen kabeliina-la.
54Basa ndia boema, Abraham atan-na, ma manatungan-nala, la'a linu boema ala sungu leme ndia. Balahaa fafaik, de ala fo'a boema, ata ndia nae, “Fe au loak, fo au fali leo au tuang-nga u.”
55Tehu Ribka ka'an-na, ma inan lae, “Nemen-na, fo Ribka leo no ami, fafa'kama mamasok esa do faik sanahulu seluk, fo basa ndia soona, besak-ka ne'i.”
56Tehu ata ndia nae, “Boso makataka mahele au. Te Manetualain taon-na au leleo-lala'ong neni buna-boak so; de fe au loak, fo au fali leo au tuang-nga u.”
57Boema lata lae, “Ata ta loo-ta Ribka, fo tatane, ndia hahapun-na.” 58Boema laloo Ribka, de latanen lae, “O nau tunga hataholi ia do ta?”
Inaanak ndia nataa nae, “Hei, au nau.”
59-60Boema ala po'i Ribka no inak mana nafadulin-nana, loo Abraham atan-na, ma manatungan-nala la'o leona. Boema ala fe Ribka baba'e-papalak nenik hala-kokolak ia-la:
“Sa'di leo been-na, o fo Ribka, da'di inak neu hataholi duta-duta-la!
Sa'di leo been-na, o tititi-nonosim tao-la kota musu-la lakatele neun!”
61Basa boema, Ribka no ata inak muli-solun-nala laheheleaon, boema ala sa'e onta, de ala tunga Abraham atan ndia.
62Ndia te, Isak mai neme moo solokaek-ka mai so, de ana tunga oedolu fo loken lae, “Ndia Fo Manataoafik Neu Au” de ana leo nai Kanaan boboa konan-na. 63Nai le'donosok esa boema, ana kalua neme uma ofun dale mai, fo sanga neu la'o-la'o nai tina, boema nita onta-la mai. 64Lelek Ribka nita Isak boema, ana kona neme onta lain mai, 65de natane Abraham atan ndia nae, “See touk manai tina ndia, de ana la'ok nasale leo ita mai?”
Ata ndia nataa nae, “Au tuang-nga nde ndia.” Boema, Ribka ho'i na lafa lalaan-na, de ana potiketu mata-panan, fo da'di leo ta'du-tana ha'da-holomata.
66Basa boema, ata ndia tui Isak, basa hata lala'en-na fo, ana tao-no'in so. 67Basa ndia boema, Isak no Ribka leo nai uma ofu, fo inan Sara leo hai neme dalek so, de ana tao Ribka da'di ndia saoinan. Isak sue Ribka; boema Isak dale manasusan, hu kande inan mamaten-na, da'di namahokok.
Currently Selected:
KEJADIAN 24: twu
Highlight
Share
Copy
Want to have your highlights saved across all your devices? Sign up or sign in
