KEJADIAN 27
27
Isak fe baba'e-papalak neu Yakob
1Nai faik esa, fo nai lelek Isak namalasi ma poken so boe boema, naloo na Esau fo ana ulun-na, boema nafa'dan nae, “Ana ngonei!”
Esau nataa nae, “Ou ama.”
2Isak nae, “O bubuluk mae au amalasi so de neukose au ta hapu aso'da ala dook-ka so'on. 3Da'di ho'i ma o kou-kou ma no kokou isi mala, fo muu sopu ma bana esa nai mook-ka. 4Nasun fo mala'da sama leo au dale hihii nga, soona menin leo au mai. Metema au u'a basa soona, neukose au fe baba'e-papalak neu o beidai au bei aso'da ia.”
5Ribka namanene Isak no Esau kokolan ndia. Boema lelek Esau la'o neu sopu boema, 6Ribka nafa'da Yakob nae, “Besa ka au amanene o amam nafa'da Esau nae leoia, 7‘Muu sopu ma bana esa fo nasu man mala'da soaneu au. Metema au u'a basa soona, neukose au fe baba'e-papalak neu o nai Manetualain matan, beidai au bei aso'da ia.’ ” 8Ribka nafa'da seluk nae, “Nah, anang-ngonei, mamanene ma tao hata fo au afa'dak ia leona. 9Muu leo ita bi'ilopo nala mamanan-na muu fo hele ma bi'ihii ana dua mao mesa-mesan fo ela au nasu an da'di o amam nana'an fo nahiik-kana. 10Basa soona, meni fen fo ela na'an fo basa ndia soona, neukose ana fe baba'e-papalak neu o beidai bei naso'da ia.”
11Tehu Yakob nafa'da inan nae, “Ina, ade Esau ao na kabubulus, te au ao nga ta hetu? 12Boso nalosak ama nafaloe au ao nga boema, ana bubuluk nae au ke'dindiun; soona neukose ana ta fe baba'e-papalak fa te, ana soo-supa au.”
13Inan nataa nae, “Boso bii, Ana ngo. Neme na fo au nde lu'a-lepa soo-supan lala'en-na. Ka'da tao hata fo au afa'da ka, fo muu ho'u ma bi'ihiik sila-la leona.” 14Boema Yakob neu ho'un-na bi'ihiik sila-la de nenis leo inan neu, boema Ribka do'de nasu Isak nana'an fo nahiik-kana. 15Basa boema Ribka ho'i na Esau bua papake mana'ahiin nanseli a fo ana pe'dan nai uma, boema ana o'dun neu Yakob. 16Boeo ana poti bi'ihii ana lou na neu Yakob lima boan-na ma botoliin fo bulu tak ndia. 17Boema ana fe nana'a mala'dahiik ndia no ana tao na loti a leo Yakob neu.
18Basa ndia boema, Yakob neu leo aman neu de nae, “Ama!”
Isak nataa nae, “o see, Esau do Yakob?”
19Yakob nataa nae, “Esau, fo ama ana ulun-na; au tao basa ama hala hehelun-na so. Mangatuuk fo mu'a paa sosopuk fo au inik ia, fo ela ama hapu ba'e-pala au.”
20Isak nae, “O hapun no lai-laik nanseli, Ana ngo.”
Yakob nataa nae, “Hu kande Manetualain fo ama sene-do'ok-ka tulu-fali au so.”
21Boema Isak nafa'da Yakob nae, “Mai deka-deka fo ela au hapu afaloe o. Tete'ek-ka Esau nde o do?” 22Yakob neu deka no aman, de aman ndia nafaloen boema nae, “O hala ma sama leo Yakob hala na, tehu o lima boam, ma sama leo Esau lima boan-na.” 23Isak ta nalelak Yakob fa, nanahu lima noan-na kabubulus sama leo Esau lima boan-na. Tehu nai lelek ana sanga fe Yakob baba'e-papalak te, 24ana bei natane la'iesa seluk nae, “Tete'ek-ka Esau nde o do?”
Yakob nataa nae, “Tete'ek-ka.”
25Boema Isak nae, “Fe au paa ndia leona. Au u'a basa soona, neukose au fe au baba'e-papalang neu o.” Yakob fen paa ndia no angol faaanak fo ninu. 26Boema aman nafa'dan nae, “Mai deka seluk, Ana ngo, fo de'i au.” 27#Ibr. 11:20Lelek Yakob deka soaneu de'in boema, Isak de'i hapu Esau bua papaken-na boo na, boema ana baba'e-papalan. Isak nae, “Au anang-nga boo na mala'dahiik sama leo mook fo Manetualain ba'e-pala basan, boo na. 28Sa'di leo been-na Manetualain fe o dinis neme lalai mai, ma Ana tao na o tina-osim leloaka! Sa'di leo been-na Ana fe o gandum ma angol la sasi kao-kao! 29#Kej. 12:3Sa'di leo been-na leoinak-kala da'di o atam, ma leoina leo nala lakatele neu o. Sa'di leo been-na o koasa basa o tolano ka'a-fa'dim-mala, ma o inam tititi-nonosin sene-do'ok nai o matam. Sa'di leo been-na nanasoo-supak neu basa hataholi fo ana soo-supa o, ma nanaba'e-palak neu basa hataholi fo ana ba'e-pala o.”
Esau dokodoe baba'e-papalak neme Isak mai
30Isak fe basa baba'e-papalan de Yakob la'o totik boema, no lai-laik Esau, fo ka'an-na fali neme sopu-dangan mai. 31Esau boeo do'de-nasu nana'a mala'da, de neni fe aman, boema nae, “Mangatuuk Ama, fo au ini paa nde ia, de mu'a leona, fo ela Ama fe au baba'e-papalak.”
32Isak natane nae, “See o.”
Boema, Esau nataa nae, “Esau, fo ama ana ulun-na.”
33Boema, Isak aon-na lala'en-na, mulai dele ngge'be-ngge'be, boema natane nae, “Metema leo ndiak soona, see nde sopu-na bana ndia, de na'kasa nenin leo au mai? Au u'a henin so, te o beita losa fa. Boema, au fe basa au baba'e-papalang mate'eng-nga neun so, de besak ia, baba'e-papalak ndia, ana da'di ndia nuun, losa dodoon-na.”
34Esau namanene dede'ak ndia boema, ana kii napane'e, ma dalen-na he'dis nanseli, boema nae, “Ba'e-pala au boe, Ama!”
35Boema Isak nae, “O fa'dim-ma mai leo ia mai, de ana ke'di-na au so. Ana ho'i-na baba'e-papalak, fo tunga ndoon-na au fen neu o so.”
36 #
Kej. 25:29-34
Esau nae, “Ana ke'di-na au, neu ka la'i duan-na nde ia so. Hu ndia de, na'den-na, Yakob. Ana ho'i-na au hak ana ulung-nga so, de besak ia, ana ho'i-na au baba'e-papalang so boe?”
37Isak nataa nae, “Au taon da'di o tuam-ma, ma Au tao basa tolanoo ka'a-fa'din-nala, da'di ndia atan-nala so. Au fe basan, gandum ma angol so. Besak ia, ta hapu hata-hata so'on, fo au bisa fe o, Anang-ngo!”
38 #
Ibr. 12:17
Esau ta nau hahae dokodoe neu aman fa, de nae, “Ade, ama nanuu baba'e-papalak ka'da esa mesak-kana do? Ba'e-pala au boe, Ama!” Boema ana mulai kii seluk.
39Basa boema, Isak nafa'dan nae,
“Neukose, o ta hapu dinis neme lalai mai fa,
neukose, ta hapu tina manaleloakak, soaneu o fa.
40 #
Ibr. 11:20
#
Kej. 36:8; 2Raj. 8:20 Neukose o so'dam-ma, neme o tafainam-ma mai,
tehu o da'di ata, neu o fa'dim-ma,
tehu, metema o lena-la'ban-nana soona,
neukose o matapo'i neme koasan-na mai.”
41Boema, Esau namanasa Yakob, nanahu aman fe basa ndia baba'e-papalan neu fa'din ndia so. Ana dodoo nae, “Ta dook-ka seluk fa te, mate ama so, de basa fai fafaluk-ka soona, au taoisa Yakob!”
Isak nadenu Yakob neu leo Laban neu
42Lelek Ribka namanene Esau dale tutu'un ndia boema, nadenu leu laloo Yakob de nae, “Mamanene te, o ka'am Esau, sanga balas nape'da dalen-na, fo ana tao nisa o. 43Nah, tao hata fo au afa'dan ia leona. No lai-laik, muu leo au ka'ang Laban nai Haran, 44fo leo moon, faik de'ubee dalen-na, losa o ka'am-ma nasan-na tenak 45ma nafandeleheni, o tatao-nono'im neu ndia. Basa soona, au adenu hataholi neu nala falik o leo ia mai. Au ta nau mopo au anang duas, nai faik esa dalen-na fa.”
46Boema, Ribka nafa'da Isak nae, “Au pela-malua, mete Esau saon-nala leme leoina nusa dea sila-la mai fa. Metema Yakob boeo, ana sao anafe'oana Het soona, malole lenak ka'da mate au leona.”
Currently Selected:
KEJADIAN 27: twu
Highlight
Share
Copy
Want to have your highlights saved across all your devices? Sign up or sign in
