KEJADIAN 28

1Basa boema Isak naloo Yakob, de ana ba'e-palan, ma nae, “O boso sao anafe'oanak manai Kanaan-nala. 2Muu leo o ba'im Betuel teidalen-nala nai Mesopotamia muu, fo saom-ma, o to'om Laban anafe'on esa. 3Sa'di leo been-na, Manetualain Fo Manakoasa ba'e-pala o sasaom-ma, ma Ana fe o upu-anak makadotok, nalosa o da'di leoina ba'uk-ka, bei-ba'i kain! 4#Kej. 17:4-8Sa'di leo been-na, Manetualain ba'e-pala o, ma o tititi-nonosim, sama leo Ana ba'e-pala basa Abraham so, ma sa'di leo been-na, o manuu dae fo o leon ia, fo Ana fe basan neu Abraham so!” 5Leondiak, Isak po'i Yakob neu leo Mesopotamia neu, leo Laban, fo Betuel hataholi Aram ndia anan-na. Laban nde been-na, Yakob ma Esau inan Ribka, ka'an-na.

Esau sao seluk

6Esau namanene lae Isak ba'e-pala basa Yakob so, de ana po'in neu leo Mesopotamia neu, fo ana sanga saoinak nai ndia. Boeo, lae nai lelek Isak ba'e-pala Yakob-pa, ana ka'i Yakob, fo boso sao anafe'oana Kanaan. 7Fe'ek neme ndia mai, Esau bubuluk, nae Yakob tunga ina-aman hala-kokolan, de neu leo Mesopotamia neu so. 8Boema, Esau bubuluk nae aman Isak, ta hii ina Kanaan fa, 9hu ndia de, Esau neu leo Ismael neu, fo Abraham anan-na, de ana saon-na Ismael anafe'on-na, na'de Mahalat, fo Nebayot fa'din-na.

Yakob nalame'i nai Betel

10Yakob la'o neme Bersyeba mai, de neu leo Haran neu. 11Nai lelek le'do-a tenak, boema ana losa mamanak esa, de ana sungu neme ndia. Ana nangape'uk de ana kailungu batu esa. 12#Yoh. 1:51Basa boema, nalame'i nita e'dak esa napadeik nai daebafak-ka, de pe'dan-na losa lalai, ma ata nusa so'dak-kala kona-kae nai e'dak ndia. 13#Kej. 13:14-15Ma Amak-ka napadeik nai boboan-na de nafa'da nae, “Au nde Manetualain, fo Abraham ma Isak sene-do'ok-ka. Neukose, Au fe o ma o tititi-nonosim, dae fo o mangape'uk nai lain ia. 14#Kej. 12:3, 22:18Neukose o tititi-nonosim, de'u afu manai daebafak-ka. Neukose, ala tao lamaloa sila nusan-na, leo boboak lala'en-na neu, ma neukose Au ba'e-pala basa leoina manai daebafak-ka. 15Mafandendelek te, neukose Au tulu-fali, ma asulu-ahapa o, su'di o muu leo bee muu, ma neukose, Au o falik o leo nusak ia mai. Neukose, Au ta la'oela o, losa Au tao basa hata lala'en, fo Au helu basan neu o so.”

16Boema, Yakob fo'a neme susungun-na mai, de nafa'dan nae, “Manetualain nai ia, fo nai mamanak ia, tehu besak-ka besak ia, au bubuluk-kana!” 17Ana bii, boema ana kokolak nae, Au kandoung-nga ndefa nanseli, nai mamanak ia! Tao leo bee-o, Manetualain uman ia, fo nusa so'dak-ka lelesuinan-na.

18Balahaa fafaianan-na, Yakob fo'a, boema ana ho'i-na, ana kailungu batu-a, de napadedeik-kana da'di batu nasanene'dak. Ana po'a mina setun neu batu ndia lain, fo ana fe hehelik-kana neu Manetualain. 19Ana foi mamanak ndia na'de Betel. (Makahulun-na, na'de Lus). 20Boema Yakob soo nae, “Metema, Manetualain tulu-fali, ma nasulu-nahapa au, nai leleo-lala'ok ia dalek, ma Ana fe au nana'a ma bua papakek, 21nalosa au fali leo au amang uman no so'da-molek soona, neukose Amak-ka da'di au Manetualain. 22Ma neukose, au fe Amak-ka baba'ek esa neme baba'ek sanahulu mai, neme basa hata lala'en fo Amak-ka fen neu au. Batu nasanene'dak fo au apadedeik-kana ia, neukose ana da'di mamana sene-do'ok ba'eneu Amak-ka.”

Currently Selected:

KEJADIAN 28: twu

Highlight

Copy