KEJADIAN 29
29
Yakob losa Laban uman
1Yakob la'ok nakandoo leleo-lala'on, fo neu leo nusak manai Kanaan boboan dulu neu. 2No kaiboik, nita oedolu esa nai mook-ka, ma bi'ilopo, bi'ihiik bubuak telu lu'u nai oedolu ndia boboan-na, fo biasan-na bi'i sila-la, linu oe lai ndia. Oedolu ndia, nanatatanak nenik batu matuaina. 3Metema, basa bi'ihiik bi'ilopo lakabubua lai mamanak ndia soona, basa manafoo-la, loliheni batu ndia leo boboak neu, fo ala fe bi'ihii bi'ilopo sila-la linu. Basa soona, basa manafoo-la, tatana falik oedolu ndia.
4Boema, Yakob natane basa manafoo manai sila-la nae, “Hai tia-laing-ngala lemin, emi meme bee mai?”
Ala lataa lae, “Ami meme Haran mai.”
5Yakob natane seluk nae, “Emi malelak Laban, fo Nahor anan-na do ta?”
Ala lataa lae, “Ami malelak-kana.”
6Boema, Yakob natane seluk nae, “So'da-molek do?”
Ala lataa lae, “So'da-molek. Mitak anafe'on mana'de Rahel-la, nde ndia. Ana foo neni aman bi'ihii bi'ilopon-nala leo ia mai.”
7Yakob nae, “Besak-ka le'dohana ia, de fain-na beita losa, ala foo falik bi'ihiik bi'ilopo leo lalae dale neu fa. Taole'e de, emi ta fe bana sila linu fa, ma emi po'ilota kasa la'a na'u seluk bai?”
8Ala lataa lae, “Makanaema basa bi'ilopo-la lakabubua lai ia so, ma oedolu-a batu tatanan-na, nanalolihenik soona, besak-ka ami hapu fes linu.”
9Yakob bei kola-kola nos, te Rahel foo neni bi'ihii bi'ilopon-nala mai. 10Lelek Yakob nita Rahel sama-sama no bana-manun sila-la boema, Yakob neu leo oedolu neu, de ana loliheni batu tatanan-na leo boboak neu, de ana fe bana sila-la linu. 11Basa boema, nate'a Rahel ma ana kii, nanahu name'da kasian neu Rahel. 12Nafa'da Rahel nae, “Ribka fo o amam feton-na, anan au ia.”
Boema Rahel nalai fali leo uman neu, fo ana tui dede'ak ndia neu aman. 13Lelek Laban namanene la'eneu Yakob, fo feton-na anan ndia boema, nalai neu fo sanga natongon-no n. Laban holu-na Yakob, de ana de'in, de basa boema, non leo uma neu. Yakob tui basa dede'an lala'en-na, neu Laban boema, 14Laban nae, “Memak tete'ek-ka, o ia teidalek fo, ana deka no au.”
Yakob leo neme ndia, bulak esa dalen-na.
Yakob naue-nale'di fe Laban, fo na hapu Rahel ma Lea
15Nai faik esa boema, Laban nafa'da Yakob nae, “Ta nandaa o maue-male'di neu au no louk fa, ka'da hu kande au tolano ka'a-fa'ding o. O nau ngga'di a de'ubee?” 16Laban ana inan dua; de ka'ak-ka na'de Lea, ma fa'dik-ka na'de Rahel. 17Lea matan-na, mana'a hiik, ma Rahel aon-na mana'ahiik ma mata makeek.
18Yakob dalen-na tu'da neu Rahel, hu ndia de, nataa Laban nae, “Metema to'o nau au sao Rahel soona, au nau aue-ale'di teuk hitu dalen-na.”
19Boema, Laban nae, “Malole lenak au fen leo o neu, neme au fen leo hataholi fe'ek neu; da'di, leo meme ia leona.” 20Boema, Yakob naue-nale'di teuk hitu dalen-na, fo ana sao Rahel, nana ba'eneun teu-teuk sila-la sapu-lalo, sama leo faik de'ubee mesan, nanahu susue ina anafe'on-na neu Rahel.
21Basa ndia boema, Yakob nafa'da Laban nae, “Teuk hitu seli so; de po'i au sao To'o anafe'on-na leon.” 22Boema Laban tao feta ka'bing, de ana ka'i basa hataholi manai kota ndia lala'en-na. 23Tehu le'odaek ndia, Laban no Lea leo Yakob neu, te ta no Rahel neu fa, de Yakob sungu non. ( 24Laban fe ata inan-na na'de Zilpa neu Lea, fo ana da'di atan-na.) 25Balahaa besak-ka, Yakob bubuluk, nae ana sao Lea nde ndia. Boema Yakob neu leo Laban neu, de nafa'dan nae, “Tao le'e de, To'o tao au leoiak? Ade, au aue-ale'di soaneu sao Rahel dei hetu? Tao le'e de, To'o ke'di-na au?”
26Boema Laban nataa nae, “Tunga ha'dak manai ia soona, fa'dik-ka ta bole sao nakahuluk neme ka'ak-ka mai fa. 27Mahani losa basa feta ka'bing fai ka hituk-ka soona, neukose au fe Rahel neu o boe, sa'di o nau maue-male'di teuk hitu dalen-na seluk.”
28Yakob nakaheik, de basa feta ndia boema, Laban fen Rahel, fo da'di saon-na. ( 29Laban fe ata inan-na na'de Bilha neu Rahel, fo ana da'di atan-na.) 30Yakob sungu no Rahel boe, ma ana sue Rahel lena heni Lea. Basa boema, naue-nale'di teuk hitu seluk.
Yakob anan-nala
31Lelek Amak-ka bubuluk, nae Yakob sue Rahel lena heni Lea, boema Ana fe Lea bongi anak, tehu Rahel ta hapu anak nahele fa. 32Lea nailu, boema ana bongi anatouk esa. Nafa'da nae, “Amak-ka nita basa au susang-nga so, de besak ia, neukose au saong-nga sue au.” Boema ana foi anan ndia na'de Ruben. 33Lea nailu seluk, boema ana bongi anatouk esa. Nafa'da nae, “Manetualain fe basa au ni'iana ia so, nanahu Ana bubuluk, nae au ta nanasue-laik fa.” Boema ana foi anan ndia na'de Simeon. 34Lea nailu seluk, de ana bongi ana touk esa. Nafa'da nae, “Besak ia, neukose au saong-nga nakadita no au, nanahu au bongi-a, anatouk telu so.” Boema ana foi anan ndia na'de Lewi. 35Basa boema, Lea nailu seluk, de ana bongi anatouk esa. Nafa'da nae, “Oek ia, neukose au koa-kio Amak-ka.” Boema ana foi anan ndia na'de Yehuda. Basa ndia boema, Lea ta bongi so'on.
Currently Selected:
KEJADIAN 29: twu
Highlight
Share
Copy
Want to have your highlights saved across all your devices? Sign up or sign in
