KEJADIAN 33
33
Yakob natongon-no Esau
1Yakob nita Esau no hataholi natun haa, ala mai. Hu ndia de ana ba'e anan-nala neu Lea, Rahel ma sao ka telun-na ma ka haan-na. 2Ana pe'da sao makahatuk ka duan-nala sama-sama loo anan-nala lai uluk, basa de Lea sama-sama no anan-nala, boema Rahel ma Yusuf lai dea lanseli. 3Yakob la'ok nai sila basa-basas uluk, de ana deka no ka'an-na boema, ana senek losa la'i hitu. 4Tehu Esau nalai neu nakanini Yakob, boema ana holu-nan, de ana de'in. Boema duas lakii ao-a. 5Lelek Esau nita basa inak-kala ma ni'iana sila-la boema, natane nae, “O moo hataholi ia-la, see sila?”
Yakob nataa nae, “Au anang sila-la. Manetualain fe basa ni'iana sila-la neu au so.” 6Basa ndia boema, basa sao ka telu ma ka haan-na tutulumatak loo sila anan-nala, boema ala senek. 7Basa boema, Lea no anan-nala, ma mate'en-na Yusuf, de Rahel losa boema basa-basas senek.
8Esau natane nae, “O dudu'am-ma leobeek neu hataholi bubuak fo, na'kasa au atongo os sila-la?”
Yakob nataa nae, “Suekande ala tao lamahoko Ka'a dalen-na.”
9Tehu Esau nafa'da nae, “Au hatang-ngala dai so, de ta paluu o fe au bua palsen fa.”
10Yakob nae, “Bosok! Metema au andaa no Ka'a dalen-na soona, sipo-ma au fee-feeng ia-la leona. Ba'eneu au, metema au ita Ka'a mata-panan soona, sama leo au ita Manetualain mata-panan, nanahu Ka'a dalen-na mangana'uk nanseli neu au. 11Au dokodoe, fo sipo-ma au uni fee feek ia-la. Manetualain nadale malole neu au so, de Ana fe au, basa hata lala'en fo au paluu-ka so.” Yakob nakaseti nahele, de losa mate'en-na boema, Esau sipo Yakob fee-feen sila-la.
12Boema Esau nae, “Mai fo taheheleao, fo ata la'o, te neukose, au la'ok akahuluk neme o mai.”
13Yakob nataa nae, “Ka'a bubuluk mae ni'iana ia-la tapandoes, ma au muse anea matalolole basa bana-manu bei manasu'uk-kala. Metema foo nakasetik, fo leomae ka'da faik esa mesak-kana boe, neukose mate la'iesak-kasa. 14La'ok makahuluk leona, fo au la'ok faa-faa tunga dea. Neukose au o bana-manu, ma au anang ia-la la'ok lai-lai, fo ami tunga hapu Ka'a nai Edom.”
15Esau nae, “Metema leondiak soona, au la'oela au hataholing de'ubee, fo sama-sama loo o.”
Tehu Yakob nataa nae, “Boso tao leondiak, te ka'da au hii tao amahoko Ka'a dalen-na.” 16Nai faik ndia boe, Esau fali ne'un leo Edom neu. 17Tehu Yakob neu leo Sukot neu, boema tao uman-na, ma bana-manun mamana hahaeaon-na. Hu ndia de, ana foi mamanak ndia na'de Sukot.
18Yakob la'ok neme Mesopotamia mai, de ana losa Sikhem, fo nai nusa Kanaan-na no so'da-molek, boema ana pasang uma ofun-na nai mook esa deka no kota. 19#Yos. 24:32; Yoh. 4:5Ana asa uma ofun-na mamanan ndia, neme hataholi fo, tititi-nonosin neme Hemor fo Sikhem anan-na, nenik doifulak natun esa. 20Basa boema, ana taon-na mei tunu-hotuk esa neu mamanak ndia, de ana foin na'de “El, fo Israel Manetualain-na.”
Currently Selected:
KEJADIAN 33: twu
Highlight
Share
Copy
Want to have your highlights saved across all your devices? Sign up or sign in
