YouVersion Logo
Search Icon

KEJADIAN 34

34
Tou maho'u inak-ka ana ho'u Dina
1Nai faik esa boema Dina fo Yakob no Lea anan-na, donge-dama ina Kanaan de'ubee. 2Lelek Sikhem fo Hewi hataholi Hewi anan-na, fo ana da'di manek nai nusak ndia, nita Dina boema, nalai no anafe'oanak ndia, de ana sungu non. 3Tehu nahiik nanseli no Dina, nalosa susue ina anafe'on-na tu'da neun, de ana sanga enok, fo ela anafe'oanak ndia susue tou ta'en-na tu'da neu ndia boe. 4Sikhem nafa'da aman nae, “Au dokodoe, fo Ama sanga enok soaneu fe anafe'oanak ndia neu au. Au hii ana da'di au saong.”
5Yakob namanene lae nalutu anafe'on-na na'de anafe'oanan-na so, tehu hu kande anan-nala bei lanea bana-manun nai mook-ka, ma ala beita fali ma'is fa de, ana ta hapu ho'i nakeketuk hata esa boen.
6Hemor, fo Sikhem aman, neu leo Yakob neu, fo ana sanga kokolak non. 7Nandaa no faik ndia, Yakob anan-nala fali ma'is leme mook-ka mai. Lamanene manada'dik ndia boema, ala nggenge ma lamanasa lanseli. Nana no tou maho'u inak-ka ho'u Yakob anan ndia, de Sikhem nakamumulu-nakamamaek basa hataholi Israel-la. 8Hemor nafa'da Yakob nae, “Au anang Sikhem susue ina anafe'on-na tu'da neu Tolanook-ka anan-na; au dokodoe fo ela Tolanok-ka fe au anang-nga loak sao nan. 9Mai fo ata tao nakeketuk, tae Tolanook-ka leoinan-na ma ami leoinam-ma bole sao sese'do-babalik. 10Soona Tolano-tolanook-kala bole leo sama-sama moo ami nai nusak ia; tolanook-ka hii leo su'di nai bee boe. Tolano-tolanook-kala bole leo mahele su'di nai bee nai nusak ia dalek, ma bole manuu hata-heto.”
11Basa boema, Sikhem nafa'da Dina aman, ma ka'an-nala nae, “Metema emi sipok au nonoken ia, soona leomae emi mahiik su'di beek ndia boe, neukose au fe. 12Mafa'da palsen beek kande emi mahiik-kana, ma maketu memak belipaas. Emi moke su'di beek ndia boe, neukose au fe, sa'di emi nau, au sao anafe'oanak ndia.”
13Nanahu Sikhem tao nanggenggeo basa sila fa'din Dina na'den-na boema, Yakob anan-nala lasapepeko-lasandandali neu Sikhem ma aman Hemor. 14Ala lafa'da hataholi ka duak sila-la lae, “Ami ta nau ami fa'dim-ma sao hataholi fo ta nanasunat fa. 15Ami nau sipok o nonokem ndia, ka'da nenik nonokek esa, fo nde: Emi muse da'di sama leo ami, fo sosoan-na nae, basa touk manai emi dalek-kala muse nanasunat. 16Basa ndia soona, neukose ami sipok o nonokem la'eneu sasao sese'do-babalik ndia. Neukose ami leo mahele nai emi tala'da heom, ma ami da'di leoina esa moo emi. 17Tehu metema emi ta nau sipok ami nonokem-mala, ma ta nau nanasunat fa soona, neukose ami ho'i-ma falik ami fetom-ma fo ami la'o.”
18Hemor ma Sikhem lame'da nana, nonokek sila-la landaa, 19de no lai-laik Sikhem sadia tao natetu nonokek sila, nanahu ana sue Dina. Nai basa teidale-bobongin lala'en-na dalek, Sikhem nde nananita-nalelak nanseli-a.
20Basa boema, Hemor ma Sikhem leu leo mamana natotongok-ka nai kota lelesuinan-na, de ala kokolak loo laun manai sila kotan-na, lae leoia, 21“Hataholi Israel sila-la, ita tia-lain. Da'di, nemen-na fo ala leo sama-sama loo ita nai nusak ia, boema po'ilotak-kasa leu leo su'di bee leu fo lahiik-kana. Nusak ia loan-na dai, ba'eneu sila boe. Ita bisa sao sila anafe'oanan-nala, ma sila boeo bisa sao ita anafe'oanan-nala. 22Tehu hataholi sila-la ka'da nau leo sama-sama loo ita, ma da'di leoina esa loo ita, no nonokek esa, fo nde: basa touk manai ita dalek-kala muse nanasunat sama leo sila. 23Mahani te, basa sila bana-manun, ma hata-heton-nala lala'en-na da'di ita nuun. Da'di mai fo ata sipok sila nonoken-na, fo ela ala leo sama-sama loo ita.” 24Basa laun kota fo manalakabubua lai ndia, sipok Hemor ma Sikhem nonoken ndia, boema basa tou touinak manai kota ndia nanasunat.
25Basa faik telu, fo nai lelek touk sila-la bei lame'da he'dis nanahu sunat-ta boema, Dinak-ka'an fo mana'de Simeon ma Lewi ho'i-la sila tafainan-nala, de no denge-dengek, ala masok leo kota dale leu. Basa boema, ala taolisa basa touk manai sila-la, 26de Hemor ma Sikhem lai dalek boe. Boema ala leu ho'i-la Dina neme Sikhem uman mai, de ala la'o. 27Basa nado'do-napauk ndia boema, Yakob ana fe'en-nala, leu kae kota ndia, da'dineu ala balas sila nape'da dalen-nala nanahu ala tao langgenggeo sila fa'din-na na'den-na. 28Ala foo leni bi'ihiik bi'ilopo bubuak-kala, sapi, keledei, ma basa hata fo manai kota dale, ma manai mook-ka lala'en-na. 29Ala ho'i-la basa bua kabelik-kala, foo leni basa inak-kala ma ni'iana la, ma loso leni uma-uma manai kota ndia oe-isin lala'en-na.
30Yakob nafa'da Simeon ma Lewi nae, “Emi tao susa au. Besak ia, hataholi Kanaan-nala ma hataholi Feris-sala, ma basa nusak ia laun-nala, neukose lakamuu-lakadau au. Ita hataholin-nala ta ba'uk-ka fa; de metema basa laun-na teik esa-dalek esa, fo ala la'ban ma sapu-la au soona, basa ita teidalen-nala lala'en-na, neukose nanatao namate-namopok.”
31Tehu lataa lae, “Ami ta nau po'ilotak ami fa'dim-ma nanataok da'dileo manasosoa-piaok fa.”

Currently Selected:

KEJADIAN 34: twu

Highlight

Share

Copy

None

Want to have your highlights saved across all your devices? Sign up or sign in