KEJADIAN 37
37
Yusuf ma tolanoon-nala
1Yakob leo nahele nai nusa Kanaan, fo aman mamana leleon-na, 2ma Yakob teidale-bobongin tutuin-na nde ia:
Nai lelek Yusuf, fo Yakob anan-na teun sanahulu hitu boema, ana mete-nakanae bi'ihii bi'ilopo bubuan-na la sama-sama no ka'an-nala, fo nde Bilha ma Zilpa fo aman sao makahatun duas anan-nala. Ana nafa'da aman, tatao-nono'i mangalauk fo ka'an-nala tao-no'in.
3Yakob sue Yusuf lena neme ana fe'e-fe'en-nala mai, nanahu bongi Yusuf nai lelek aman namalasi so. Faik esa boema, ana tao fe Yusuf ba'du manalu esa mana'ahiik nanseli. 4Lelek Yusuf ka'an-nala bubuluk lae sila aman sue Yusuf lena neme sila mai boema, lakamuu-lakadau Yusuf, nalosa ala ta nau kokolak loo fan.
5Nai le'odaek esa boema, Yusuf nalame'i, de lelek ana tui me'in ndia neu ka'an-nala boema, ala boetai lakamuu-lakadaun. 6Yusuf nafa'das dede'a ka nde ia nae, “So'ba mamanene! 7Au alame'i ita basa-basa tala bei puputu gandum nai tina, boema au gandum ma napadeik natetu. Emi gandum puputum-mala okofefeo la au gandum puputung-nga boema ala senek neun.”
8Ka'an-nala ka'in lae, “O maedaenga neukose o da'di manek fo o koasa ami do?” Boema ala boetai lakamuu-lakadaun, nanahu me'i nala ma nanahu hata fo nafa'dan.
9Basa boema Yusuf nalame'i seluk, de ana tuin neu ka'an-nala nae, “Au alame'i seluk de au ita le'do a, bula ka ma nduuk sanahulu esa senek neu au.”
10Ana tui me'is ndia neu aman boe, de aman ka'in nae, “Me'i leo beek ndia? Nai o dodoo ma, neukose au, o inam ma o ka'am-mala mai fo sene-do'ok neu o do?” 11#Hat. 7:9Yusuf ka'an-nala lape'da dalek neun, tehu aman dodoo nahele me'is ndia.
Yusuf nanase'ok ma nananok leo Masir neu
12Nai faik esa fo lelek Yusuf ka'an-nala leu leo Sikhem soaneu foo sila aman bi'ihii bi'ilopo bubuan-na la boema, 13Yakob nafa'da Yusuf nae, “Muu leo Sikhem muu, leo mamanak fo o ka'am-mala foo ita bi'ihii bi'ilopo bubuan-na la.” Boema Yusuf nataa nae, “Hei, Ama.”
14Aman nae, “Mete o ka'am-mala ma bi'ihii bi'ilopo bubua kala so'dan-nala tao leo beek, soona falima'i ma fo mafa'da au.” Boema ana po'i Yusuf la'oela Bafak Hebron na.
Basa boema Yusuf losa Sikhem. 15Lelek ana bei la'ok neu-mai nai mook ka te, natongon-no touk esa natanen nae, “O sanga beek?”
16Yusuf nataa nae, “Au ka'ang-ngala. Ala foo bi'ihii bi'ilopo. Ama bubuluk-kasa lai bee boe do?”
17Hataholi ndia nae, “Ala la'o leme ia mai so. Au amanenes lafa'da lae ala sanga leu leo Dotan leu.” Boema Yusuf neu tunga ka'an-nala de ana hapus lai Dotan.
18Yusuf bei dook-ka te litan so, de ana beita losa matan-nala fa te, ala lalahalak soaneu taolisan. 19Esa nafa'da esa nae, “Mitak, tou tuka malame'ik ndia mai. 20Ayo, ata taotisan fo tapa popolan-na leo oedolu ma'dak dale neu. Basa soona tafa'da tae bana makaak esa kaa nalan. Ata meten, neukse tao leo beek fo me'in sila-la ala da'di.”
21Ruben namanene sila dale tutu'un ndia, boema ana sanga enok soaneu soi-tefa na Yusuf. Ruben nae, “Boso taomisan.” 22“Ka'da ata tu'un leo oedolu manai moo maloa ia dalek neu, tehu ata boso fepan do tao tahinan.” Nafa'da dedeak ndia, nanahu ana tutu'u nae ana soi-tefa na Yusuf fo nadenun fali ne'un leo uma neu. 23Lelek Yusuf losa ka'an-nala boema, no balakaik ala o'duheni Yusuf ba'du manalun fo mana'ahiik nanseli ndia. 24Boema ala loso lenin de ala tapan leo oedolu ma'dak dale neu.
25Lelek ala bei la'a-linu te, no kaiboik lita hataholi Ismael bubuak esa sa'e onta bei lai leleo-lala'on-na la dalek leme Gilead leo Masir leu. Sila onta nala fua bumbu-bumbu, balsam ma luu-luu. 26Boema Yehuda nafa'da tolanoon-nala nae, “Sosoak hata ita taotisa ita fa'di na ma ita tafuni kanisak ndia? 27Mai fo ata tase'on leo hataholi Ismael sila-la neu. Ta paluu ita fen name'da he'dis fa. Tao leo beek boeo, ita fa'din ndia.” Tolanon-nala lakaheik, 28#Hat. 7:9de lelek manadangan Midian de'ubee la'ok tunga ndia boema, Yusuf ka'an-nala kaluahenin neme oedolu ndia dalek mai, boema lase'on leo hataholi Ismael ndia neu nenik doifulak duahulu. Basa boema manadangan sila-la loon leo Masir neu.
29Lelek Ruben fali leo oedolu ndia neu te, ta nita Yusuf nai ndia so'on boema, ana sii sii-lulu'i bua-lo'an nanahu dalen-na he'di sa. 30Ana fali leo tolanoon-nala neu de nae, “Ni'iana ndia taa kana ndia so! Hata fo au muse taon besak ia?”
31Boema ala do'do bi'ihiik esa de ala dope Yusuf ba'du manalun-na leo bi'ihiik ndia daan dale neu. 32Basa boema ala ladenu leni ba'du manalu ndia leo sila aman neu no hala heheluk-ka nde ia nae, “Ami hele ma ba'du manalu ia. Ade ama anan-na nuun ia do?”
33Yakob nalelak ba'du manalu ndia, boema nae, “Tete'ek-ka, au anang-nga ba'du manalun ia! Tao leo bee o bana makaak esa, kaa nalan so. Awii, bana ndia sii sii-lulu'enisa au anang Yusuf so!” 34Yakob siiba'e bua-lo'an nanahu dalen-na he'di sa ma ana pake bua-lo'a manafaluk. Ana kii-makaleleu anan ndia fai-faik. 35Basa anan-nala, nau touk do inak boe, ala mai kokoe-nanasin, tehu ana ta nau kokoe-nanasi fan. Nae, “Neukose au kii-makaleleu ahele au anang-nga losa au mate.” Leondiak ana falu nahele nanahu anan Yusuf.
36Ndia te nai Masir, hataholi Midian nala lase'oheni Yusuf leo Potifar, fo manek-ka malanga solda'du matuainan esa ana da'di malangan neu manamanea uma manek-ka.
Currently Selected:
KEJADIAN 37: twu
Highlight
Share
Copy
Want to have your highlights saved across all your devices? Sign up or sign in
