KEJADIAN 38
38
Yehuda ma Tamar
1Fafa'kama nai lelek ndia Yehuda la'oela tolanoon-nala de ana leo no Hira, fo touk esa ana da'di neme kota Adulam ma mai. 2Nai ndia, Yehuda nalelelaok no anafe'oana Kanaan esa, fo Sua anan-na, boema ala sao. 3Sila ana makasososan-na touanak de aman foin na'de Er. 4Ana ka dua boeo touanak, de ana foin na'de Onan. 5Ana ka telu boeo touanak, de ana foin na'de Syela. Lelek bongi Syela te Yehuda nai Kezib.
6Yehuda fe Er fo ana ulun-na sao Tamar. 7Er ha'da-tataon mangalauk nanseli, nalosa Manetualain namanasan de Ana taonisan. 8Boema Yehuda nafa'da Onan fo Er fa'di na nae, “Muu leo o ka'a manamatem-ma saon-na muu, fo sungu moon. Taom-matetu o hihii-nanaum soaneun, nana ndia saon-na fa'din-na nde o; no enok ndia, o ka'am-ma bisa hapu tititi-nonosik.” 9Tehu Onan bubuluk nae mahani te neukose anan-nala ta da'di ndia anan fa. Da'di metema ana sungu no ka'a manamate na saon ndia soona, ana po'aheni bini-nggen leo dae a neu, fo ela neukose ka'an-na ta hapu tititi-nonosik fa. 10Tatao-nono'in ndia tao na Manetualain namanasa, de Manetualain taonisan boe. 11Basa boema Yehuda nafa'da Tamar fo manafeun ndia nae, “Fali mu'u ma leo o ina-amam uman muu, fo leo meme ndia da'dileo inafalu losa au anang Syela namatua.” Ana nafa'da nae leondia nanahu ana bii boso nalosak neukose Manetualain taonisa Syela boe, sama leo ka'an duas. Boema Tamar fali ne'un leo ina-aman uman neu.
12Basa teuk de'ubee boema, mate Yehuda saon-na. Basa fai fafalu ka boema, Yehuda leleko Hira, fo nonon maneme Adulam ndia mai, fo leu leo Timna leu, mamanak fo ala nggute bi'ilopo la bulun-na. 13Tamar hapu halak lae Yehuda fo aliama na neukose neu leo Timna neu soaneu nggute bi'ilopo nala bulun-na. 14Boema ana nggatiheni papake inafalu na nenik papake fe'ek. Ana potiketu mata panan nenik lafa lalaak, boema nangatuuk neu lelesuina kota Enaim ma, fo nai enok leo Timna neu. Tamar bubuluk te'e-te'e nae Syela, fo Yehuda ana mulianan-na namatua so, tehu ala beita fen sao touanak ndia boen.
15Lelek Yehuda nita Tamar boema, naedaenga inak ndia ina manasosoa-piaok esa, nanahu mata-panan nanapotiketuk. 16Boema Yehuda neu deka non nai enok ndia su'un-na, de nae, “O moke de'ubee?” Ana ta bubuluk nae inak ndia, ndia manafeun fa.
Tamar nataa nae, “Neme ka'da Tuan mai.”
17Yehuda nafa'da seluk nae, “Neukose au fe o bi'ihii ana esa.”
Tamar nataa nae, “Bole, sa'di fe bua pepe'dak esa, losa Tuan haitua bi'ihiik ndia mai.”
18Yehuda natane nae, “Bua pepe'da beek?”
Tamar nataa nae, “Fe au Tuan cap pa no tali na ma Tuan aitete'en ndia boe.” Yehuda fen basa buas sila-la, boema duas sungu lakabubua, de Tamar nailu. 19Tamar fali leo uman neu de ana bukaheni tema popoti mata-panan, boema ana pake seluk papake inafalu na.
20Basa bulak de'ubee boema, Yehuda nadenu Hira, fo nono na soaneu neni bi'ihiik ndia neu, ma noke falik buas fo ana fe basan da'dileo bua pepe'dak esa, tehu Hira ta hapu natongon-no inak ndia fa. 21Hira natane hataholi manai Enaim mala nae, “Ina manasosoa-piaok fo biasa na nahani nai enok ia su'un-na, naibee?”
Hataholi sila-lataa lae, “Beita la'iesa fo hapu ina manasosoa-piaok nai ia fa.”
22Boema Hira falima'in leo Yehuda mai de nafa'da nae, “Au ta hapu atongo o inak ndia fa. Tunga hataholi manai naa la nafa'da na, beita la'iesa fo hapu manasosoa-piaok nai ndia fa.”
23Yehuda nae, “Neme na, fo ndia hapu buas sila-la, sa'di ita boso hapu mamaek. Au sanga enok soaneu baen so, tehu o ta hapu matongo moo fan.”
24Fafa'kama basa bulak telu boema, Yehuda hapu halak lae Tamar fo manafeu na da'di manasosoa-piaok ma nailu so.
Boema Yehuda fe paletan-na, “Meu malan fo hotumisan!”
25Lelek loo Tamar leo deak neu boema, ana haitua hala heheluk leo aliama na nae, “Buas ia la hataholi na tao nailu au so. Palisak see nuun cap ia no tali na ma aitete'ek ia.”
26Yehuda nalelak buas sila-la de nae, “Inak ndia ta nasala fa. Au ta tao atetu au bela ba'ung soaneu inak ndia fa; tunga ndoon-na au fen sao au anang Syela.” Yehuda ta sungu seluk no Tamar so'on.
27Lelek fai na losa fo Tamar bongi boema, nananitak neukose ana bongi ana takalapak. 28Ana bongi boema, ni'iana takalapak sila-la, esa kalua liman-na mai, boema inak mana makabobongi kana ho'un-na limak ndia, de ana pa'an nenik aba pilas. Nafa'da nae, “Ni'iana ia bongin nakahuluk.” 29Tehu ni'iana beuana ndia hela falik liman-na, de ni'iana beuana esa ka bongi nakahuluk-kana. Basa boema ina manamakabobongik-kanan-nae, “Da'di o eno ma leo ndiak fo o makaseti leo deak mai!” Boema ni'iana fo bongin-nakahuluk-kana ndia, nanafoik na'de Peres. 30Basa ndia boema, besak-ka bongi fa'din fo liman-na hapu aba pilas. Ni'iana ndia nanafoik na'de Zerah.
Currently Selected:
KEJADIAN 38: twu
Highlight
Share
Copy
Want to have your highlights saved across all your devices? Sign up or sign in
