KEJADIAN 40

Yusuf nafa'da mangalele'do hataholi bui la me'i nala sosoa-ndandaan

1Basa faik de'ubee boema, mane Masir-ra malalau-maoonon dua, fo nde manaito-ato nininuk-ka ma manaito-ato loti na, ala tao salak soaneu manek-ka. 2Boema manek-ka namanasa malalau-maoonon ka duak sila-la, 3boema ana tao duas leo bui dale leu fo nai manamanea uma manek-ka malangan-na uman, nai mamanak fo Yusuf nanahukuk. 4Duas lai bui ndia, dook-ka boe, de manamanea uma manek-ka malangan-na fe Yusuf nalalau-naoonos.

5Nai le'odaek esa boema, manaito-ato nininuk-ka ma manaito-ato loti ndia esa-esak nalame'i. Duas me'in sila-la sosoa-ndandaan ta sama fa. 6Lelek Yusuf neu leo duas nai balahaa fafain-na te, nita duas susa. 7Boema anan-natane nae, “Taole'e de faik ia, tolanok-kala susa tao leondiak?”

8Duas lataa lae, “Le'odae ka ami malame'i, de ta hapu esa boen bubuluk sosoa-ndandaan fa.”

Yusuf nae, “Ka'da Manetualain nde hapu fe hataholi nafa'da mangalele'do mi'is ala sosoa-ndandaan. So'ba tui su'dik emi me'im ndia.”

9Manaito-ato nininuk ndia nae, “Nai me'is ndia dalek, au ita ai angol esa nai au matang-nga. 10Ai ndia ba'ek telu. Ba'ek sila-la besak-ka mulai ladoo boema, no lai-laik bunan-nala lakapela, boema boan-nala lamalatu. 11Nai lelek ndia, au bei ho'u manek-ka nggalaa nininu na, da'di au ho'i a angol ndia boan-na, de au he'en leo manek-ka nggalaa nininun dale neu, boema au fen leo manek-ka neu.”

12Yusuf nae, “Nafa'da mangalele'do na nde ia nae: Ba'e ka teluk sila-la sosoan-na nae, faik telu. 13Nai faik telu dalen-na ia, neukose manek-ka po'i o, neukose ana fe do'o do ampon neu o ma ana fe falik o leo o ue-le'di makahulun-na. Neukose o sadia fe manek-ka nggalaa nininu na sama leo makahulun-na. 14Tehu mafandele neu au, metema o so'da ma malole. Sue na manduku-malosak au dede'ang ia ne manek-ka, fo ela au nanapo'ik neme bui ia mai. 15Nana, tunga ndoon-na makahulun-na au nanaho'i namanakok neme hataholi Ibrani la nusan-na mai ma nai ia fo nai Masir boe, au beita tao ita tatao-nono'i mangalauk hata esa boen, losa muse nanataok leo bui dale neu fa.”

16Lelek manaito-ato loti ndia bubuluk nae manaito-ato nininu ndia me'i na sosoa-ndandaan malole, boema ndia boeo nafa'da Yusuf nae, “Au alame'i boe, au su'u olik loti telun-nai au langang lain. 17Nai olik manai lain na dalek, hapu koki mata-matak-kala soaneu manek-ka, tehu manupui la mai de la'a kokis sila-la.”

18Yusuf nataa nae, “Me'is ndia nafa'da mangalele'do na nde ia nae, Olik ka teluk sila la sosoan-na nae faik telu. 19Nai faik telu dalen-na ia, neukose manek-ka nadenu hataholi te'teheni o langa ma, boema o popola ma nanalonak nai dii esa lain, de neukose manupui la la'a o aoisi ma.”

20Faik telu manamaik-ka nde been-na faik fo manek-ka fai bobongin-na, de ana tao feta matua ba'eneu hataholi mana'a ngga'din-nala. Ana paleta fo ela kalua manaito-ato nininuk-ka ma manaito-ato loti a neme bui dale mai, fo loos leo basa uma manek-ka hataholi mana'a ngga'din-nala matan neu. 21Manaito-ato nininuk-ka nanafe falik leo ue-le'di makasososan-na neu. 22Tehu manaito-ato loti a nanahukunisak. Basa sila-la ala da'di nandaa no hata fo Yusuf nafa'dak-ka. 23Tehu manaito-ato nininuk ndia ta nafendele Yusuf so'on, Ana nafandele henin makandondook.

Currently Selected:

KEJADIAN 40: twu

Highlight

Copy