KEJADIAN 42
42
Yusuf ka'an-nala leu leo Masir soaneu asa gandum
1Lelek Yakob namanene lae hapu gandum nai Masir boema, nafa'da anan-nala nae, “Taole'e de emi ka'da benee-belino? 2#Hat. 7:12Au amanene lae hapu gandum nai Masir; meu leo naa meu, fo asa gandum fo ela boso mate ita too la'andoes-sa.” 3Boema Yusuf ka'a ka 10-n sila-la, leu asa gandum nai Masir. 4Tehu Yakob ta po'i Benyamin, fo Yusuf fa'di bongin-na, neu sama-sama no fas, nanahu ana bii, boso nalosak anan ndia hapu soe.
5Nanahu la'andoes-sa nai nusa Kanaan-na boema, Yakob anan-nala loo hataholi fe'ek makadotok leu asa gandum nai Masir. 6Fo manamase'o gandum neu hataholi fo maleme daebafak-ka lala'en-na mai ndia, nde Yusuf, fo ana da'di filana nai Masir. Hu ndia de, Yusuf ka'an-nala mai, de ala senek leu matan-na. 7Lelek Yusuf nita ka'an-nala boema, nalelak-kasa, tehu ana tao nono'kabai ta nalelak-kasa fa. Natanes no balakaik nae, “Emi hataholi beek?”
Boema lataa lae, “Ami hataholi Kanaan. Ami mai asa nana'ak.”
8Leomae Yusuf nalelak ka'an-nala, tehu ala ta lalelak-kana fa. 9#Kej. 37:5-10Boema nafandele me'in-na la'e neus. De nafa'das nae, “Emi ia mata-mata; emi mai soaneu palisak matalolole ami nusam-ma malole-mangalaun.”
10Ala lataa lae, “Ta, Tuan. Ami, fo Tuan atan-nala mai, fo ka'da asa nana'ak. 11Ami ia tolanook-kala, Tuan. Ami ia hataholi malole, te ta mata-mata fa.” 12Yusuf nafa'das nae, “Emi pepeko! Emi mai leo ia mai, fo palisak matalolole nusak ia malole-mangalaun nai bee.”
13Ala lataa lae, “Ami ia, hataholi sanahulu dua, tolanook-kala Tuan, ami ama esa, de nai nusa Kanaan-na. Mate esa so, ma mate'a teisu'uk-ka, besak ia no ami amam nai Kanaan.”
14Yusuf nataa nae, “Memak tete'ek-ka, sama leo au halang-nga. Emi ia mata-mata. 15De au sanga fola emi: Au soo enik manek-ka na'den-na ae neukose emi ta la'o meme nusak ia mai fa, metema emi fa'dim mate'a teisu'uk ndia, emi ta moon leo ia mai fa. 16Emi esa muse fali neu nalan. Neukose au akanete ahele fe'e-fe'ek-kala, losa emi hala-kokolam ndia nananitak tete'ek-ka. Metema ta soona, no manek-ka na'den-na, emi ia musu-a mata-matan!” 17Basa boema, ala taos leo bui dale, faik telu dalen-na.
18Neu faik ka telun-na boema, Yusuf nafa'das nae, “Au hataholi fo bii ma tunga neu Manetualain. Neukose au po'i emi no nonokek esa. 19Soaneu da'di buti, nae emi ia hataholi ndoos soona, emi esa nahele neme bui dale; fo fe'ek-kala bole fali ma meni gandum fo emi asa maak-ka soaneu emi uma isim fo doidoso loo la'andoes-sa. 20Basa ndia soona, emi muse moo emi fa'dim mate'a teisu'um-ma leo au mai. Fo neukose ndia nde da'di buti, nae emi hala-kokolam ndia tete'ek-ka, ma neukose au ta hukuisa emi fa.”
Ala sipok filana ndia nakeketun-na. 21Boema sila esa kokolak no esa nae, “Naa, besak ia, ita nanahukuk, hu kande makahulun-na ita tao salak neu ita fa'din-na; ana noke tutulu-fafalik, tehu ita ta nau taoafik neu fan, leomae ita tita tae ana doidoso nanseli. Hu ndia de, besak ia, ita tame'da tita doidosok ia.”
22 #
Kej. 37:21-22
Ruben nae, “Makahulun-na au afa'da emi, fo daenga boso tao hata-hata neu ni'iana ndia. Tehu emi ta nau mamanene fa. De besak ia, mamaten-na nanabalas neu ita.” 23Yusuf nalak sila dede'an-na, tehu ala ta bubuluk fa, de ala kokolak loo Yusuf soona, ala pake hataholi manasalin dede'ak esa. 24Yusuf la'oelas, de ana kii. Lelek ana kii nate'e boema, ana fali ma'in, boema naloo Simeon, de ana hengen nai basa tolanoon-nala matan-na.
Yusuf ka'an-nala fali leo Kanaan leu
25Yusuf paleta fo daenga tao lahenu ka'an-nala kalong-nala nenik gandum, ma ana tao falik sila esa-esak doin-na leo kalong sila-la dalek neu. Ana fe paleta boe, fo ela ala fes nana'ak soaneu tua-lepa nai enok. Lakalala'ok Yusuf paletan ndia. 26Basa ndia boema, Yusuf ka'an-nala fua gandum fo ala asa laak-kala leo sila keledein lain neu, boema ala la'o leme mamanak ndia mai leona. 27Nai mamanak fo ala sungu-a, esa se'i ndia kalong gandum-ma, fo ana hani keledein-na. Ana nita doin-na nai gandum ndia poin-na. 28Ana bouk tolanoon-nala nae, “Ala fe falik au doing-nga. Mitak, nai au kalong dale.” Tenen-na dele, no bibii-namata'uk, esa natane esa nae, “Manetualain tao ita le'e ia?”
29Lelek ala losa Kanaan boema, ala tui sila aman, basa hata lala'en fo ala la'ola'din. Lafa'da lae, 30“Filana Masir-ra kokolak no hala belak neu ami, ma nakasasa'ek dede'ak neu ami, nae ami mata-matan nai nusan-na. 31Ami mataa mae, ‘Ami hataholi malole, te ta mata-mata fa, ami hataholi fo tunga ka'da ndoon-na. 32Ami basa-basam-mala hataholi sanahulu dua, ama esa, de mate 1 so, boema mate'a teisu'uk-ka no ama nai Kanaan.’ 33Filana ndia nafa'da nae, ‘Au sanga fola emi, fo au bubuluk, ade emi hataholi fo, manatao tunga ndoon-na do ta: Muse ela emi hataholim esa; fo fe'ek-kala bole fali le'us, leni gandum soaneu emi uma isim fo mates loo la'andoes-sa ndia. 34Emi fali fo, moo emi fa'dim mate'a teisu'uk-ka mai soona, neukose au bubuluk ae emi ta mata-mata fa, te emi hataholi fo manatao tunga ndoon-na. Soona neukose au fe falik emi tolanoom fo au akataka ahelen ndia leo emi neu, ma emi bole leo nai nusak ia, ma emi bole dangan no su'di bebe'ik-ka.’ ”
35Basa boema, nai lelek ala po'a sila kalong-nala boema, esa-esak nita tas doin-na, doik nai dalek; boema ala bii lanseli, ma sila aman boeo ana bii. 36Boema sila aman nafa'da nae, “Emi nde taom-ma au amopo basa au anang-ngala. Yusuf tak-kana so; Simeon tak-kana seluk so; ma besak ia, neukose emi ho'i-ma Benyamin boe. Au doi-dosong ba'un-na seli!”
37Boema Ruben nafa'da aman nae, “Fe Benyamin leo au mai, Ama; mahani te, neukose au o falik-kana, metema ta soona, Ama bole taomisa au ana toung duas.”
38Tehu Yakob nae, “Ta! Emi ta bole moo Benyamin fa; ka'an-na maten so, de besak ia ela ka'da ndia so. Boso nalosak ana hapu soe nai leleo-lala'ok ndia dalek. Au ia, amalasi so, ma dale he'dik fo neukose emi menin neu au ndia, neukose neni au mamateng-nga.”
Currently Selected:
KEJADIAN 42: twu
Highlight
Share
Copy
Want to have your highlights saved across all your devices? Sign up or sign in
