KEJADIAN 48

Yakob fe baba'e-papalak neu Efraim ma Manasye

1Basa ndia boema, hataholi nafa'da Yusuf nae aman namahe'di belak. Da'di no ana duas fo nde Manasye ma Efraim leu donge-dama Yakob. 2Lelek Yakob namanene lae Yusuf mai boema, naheheleaon, boema nangatuuk nai pepe'un lain. 3#Kej. 28:13-14Yakob nafa'da Yusuf nae, “Manetualain Fo Manakoasa, natu'du aoinan-na neu au neme Lus, nai dae Kanaan-na de Ana fe baba'e-papalak neu au so.” 4Ana nafa'da au nae, “Neukose Au fe o upu-anak makadotok, fo ela o tititi-nonosim da'di leoina ba'uk ka; neukose Au fe nusak ia neu o tititi-nonosim da'di leo sila pusakan losa dodoon-na.”

5Yakob kokolak nakandoon-nae, “Yusuf, o ana ka dua mala Efraim ma Manasye fo bongis lai Masir ia te au beita losa ia fa, au sipok kasa sama leo Ruben ma Simeon. 6Metema o hapu bongi seluk anak soona, neukose au ta sipok kasa da'dileo au anang fa tehu o anam; Sila baba'en-na, neukose ala sipon neme Efraim ma Manasye mai. 7#Kej. 35:16-19Au tao dede'ak ndia soaneu Rahel fo o inam. Nai au leleo-lala'ong fo fali eme Mesopotamia mai a, o inam maten nai dae Kanaan-na, fo ta dook-ka neme Efrata mai fa, de au daleng-nga he'di nanseli. Au atoin nai naa, fo nai enok leo Efrata neu, su'un na.” (Besak ia lalelak Efrata nde Betlehem.)

8Lelek Yakob nita Yusuf anan sila-la boema natane nae, “See anan ia la?”

9Yusuf nataa nae, “Au anang ia la, fo Manetualain fen neu au nai dae Masir ia.” Yakob nae, “Fes mai deka loo au, fo ela au fes baba'e-papalak.” 10Yakob nita nasalalalok nanahu namalasi de matan-na keluha'buk so. Yusuf fe anan sila-la leu deka loo Yakob, de ana holu nas boema ana de'is. 11Boema Yakob nafa'da Yusuf nae, “Te'e-te'e au ta dodoo losa, neukose au atongo seluk o o fa, tehu nakalenak besak ia Manetualain fe au loak ita o ana mala boe.” 12Basa boema Yusuf ko'o nalas leme Yakob ifan lain mai, boema ndia mesak-kana sene-do'ok neu aman matan-na.

13-14Basa ndia boema, Yusuf tao anan duas deka loo Yakob, de Efraim fo mate'a tei su'uk ka nai boboa kiin-na, ma Manasye fo uluk ka, nai boboa konan-na. Tehu Yakob lane liman-na de, ana tao lima konan-na neu Efraim langan lain, ma ana tao lima kiin-na neu Manasye langan lain. 15Basa ndia boema, ana fe Yusuf baba'e-papalak, nae,

“Manetualain, Ndia nde Amak, fo Abraham ma Isak lamahelen,

Ndia nde hela-nole au losa besak ia;

16Ndia nde ata nusa so'dak fo ana se'i-po'i au eme soe lala'en-na mai so.

Sa'di leo been-na Manetualain ndia, ba'e-pala ni'iana ia-la.

Sa'di leo been-na, au ma Abraham ma Isak na'dem mala nanakoa-nanakiok,

hu kande n'iana ia-la!

Sa'di leo been-na, ala bongi upu anak,

ma tititi-nonosin makadotok nai daebafak-ka.”

17Yusuf dalen-na he'dis-sa, nai lelek nita aman tao lima konan-na neu Efraim langan lain; boema ana ho'un-na aman liman-na, de ana lali henin neme Efraim langan lain leo Manasye langan lain neu. 18Nafa'da Aman nae, “Boso leondiak, Ama. Ana uluk ka nde ia dei; tao Ama lima konam-ma neu langan lain.”

19Tehu aman ta sipok fa, de nae, “Au bubuluk, anang-ngo, Neukose Manasye koasan-na ba'un-na seli, ma tititi-nonosin boeo neukose da'di leoina matua. Tehu fa'din na neukose koasan-na matua lena neme ka'an ndia mai, ma fa'din ndia tititi-nonosin neukose da'di leoina matua.”

20 # Ibr. 11:21 Boema ana fe seluk baba'e-papalak neu ni'iana sila-la nai faik ndia, nae, “Hataholi Israel-la neukose seseik o na'dem ma, metema ala fe baba'e-papalak neu hataholi. Neukose lafa'da lae, ‘Sa'di leo been-na Manetualain tao na o sama leo Efraim ma Manasye.’ ” No enok ndia, Yakob sue nakahuluk Efraim neme Manasye mai.

21Boema Yakob nafa'da Yusuf nae, “Sama leo o mita ka, au mamateng-nga deka so, tehu neukose Manetualain tulu-fali emi ma no falik emi leo emi be'i-ba'i kaim-mala nusan-na meu. 22Sikhem fo nusak maisi-maminak fo au loso an neme hataholi Amori la nenik tafaina ma kokouk ka, au fen neu o, te au ta fen neu o tolanoom-mala fa.”

Currently Selected:

KEJADIAN 48: twu

Highlight

Copy