KEJADIAN 47
47
Yakob neu nataa mane Masir-ra
1-2Basa boema, Yusuf no tolanoon lima, leu lataa manek-ka. Nae, “Ama ma atam-ma tolanoon-nala, ala mai leme Kanaan mai so, de leni basa sila bi'ihii bi'ilopon, sapi ma hata-heton-nala lala'en-na. Besak ia lai nusa Gosyen-na.” Boema nadenu tolanoon-nala lalelelaok loo manek-ka. 3Manek-ka natanes nae, “Emi ue-le'dim leobeek?”
Ala lataa lae, “Ami ia manafoo sama leo ami bei-ba'i kaim-mala. 4Ami mai fo leo nai nusak ia, nanahu nai dae Kanaan-na, la'a-ndoe matuaina nanseli, nalosa ta hapu na'u so'on soaneu ami bi'ihii bi'ilopom-mala fa. Fe ami loak leo nai nusa Gosyen-na.” 5Boema manek-ka nafa'da Yusuf nae, “Besak ia, o amam ma tolanoom-mala lai ia so. 6Dae Masir ia, nanasoik soaneu o. Nemen-na fo ala leo lahele leme nusa Gosyen-na, nusak fo malolen-na seli nai nusak ia. Ma metema o bubuluk nai sila dalek, hapu hataholi manamaue-male'di malelak soona, fes da'di au manamanea bana-manung.”
7Yusuf boeo nadenu aman nalelelaok no manek-ka. Yakob ba'e-pala manek-ka, 8de manek-ka natanen nae, “Ama teun de'ubee?”
9Yakob nataa nae, “Atam-ma naso'da teuk natun esa teluhulu, da'dileo manamaleu-malaak. Atam-ma so'dan ndia henuk no toto'a-tataak ma keke'uanak, metema nakasasamak-kana no atam-ma bei-ba'i kain teun-nala da'dileo manamaleu-malaak.” 10Basa ndia boema, Yakob nate'a sanga la'o, de ana fe baba'e-papala nasi'da-naba'ek. 11Yusuf fali aman, ma tolanoon-nala leo lahele lai Masir. Ana fes dae da'dileo pusaka nai dae malolehiik manai nusak ndia, nai deka no kota Rameses, nandaa no manek-ka paletan-na. 12Ma Yusuf nakaboboi aman, tolanoon-nala, ma basa tolanoo ka'a-fa'din lala'en-na, nenik nana'a-nininuk tunga sila anan-nala dede'un-nala.
Tepo-lelek la'andoes-sa
13La'andoes ndia matuaina nanseli, nalosa nai mamanak lala'en-na ta hapu nana'ak so'on. Laun Masir-ra ma laun Kanaan-nala malehenis ma tapandoe, nanahu la'as-sa. 14Nai lelek ala mai asa gandum, Yusuf nakabubuan-na gandum sila-la belin-na, doik makadotok, boema ana pe'das nai manek-ka uma manen-na. 15Lelek basa doik manai Masir ma manai Kanaan-na boema, hataholi Masir-ra mai leo Yusuf mai, de lae, “Fe ami nana'ak! Boso po'ilotak mate ami. Basa ami doim-ma so.”
16Yusuf nataa nae, “Metema basa emi doim-ma soona, fe emi bana-manum; fo neukose au fe emi nana'ak.” 17Boema ala fe bana-manun-nala leo Yusuf neu, fo ana fes nana'ak da'dileo ngganggatik neu sila ndala, bi'ilopo, bi'ihiik, sapi ma keledein-nala. Nai teuk ndia dalen-na, Yusuf fes nana'ak, fo ala bae lenik bana-manu.
18Neu teu manamaik-ka boema, ala mai seluk leo Yusuf mai, de lae, “Ami mafa'da no mangale'dok neu Tuan, mae ami doim-ma basan, ma Tuan nanuu basa ami bana-manum so. Ami ta manuu hata-hata so'on, fo ami fen neu Tuan, ela ka'da ami aoinam-ma mesak-kana ma ami dae-oem. 19Boso po'ilotak mate ami! Boso po'ilotak ami tina-osim da'di dae tokotiik. Asa-ma ami, ma ami dae-oem nenik gandum, da'dineu baba'en-na. Ami ma ami dae-oem, neukose ala da'di manek-ka nuun. Fe ami gandum fo ami mi'a, ma tao bini-ngges soaneu ami sele-nggali neu ami tina-osim!”
20Boema Yusuf asan-na basa dae manai Masir-ra lala'en-na, soaneu manek-ka. No nakasetik, basa hataholi Masir-ra lase'o dae-oen, nanahu tepo lelek la'andoes ndia matuaina nanseli; boema basa dae manai Masir-ra, da'di manek-ka nuun. 21Yusuf tao basa laun Masir-ra lala'en-na da'di ata. 22Ela ka'da imam-mala daen-na Yusuf ta asan-na fan. Ala ta paluu lase'o sila daen-na fa, nanahu manek-ka fes nana'ak soaneu sila so'da mandoofain-na. 23Yusuf nafa'da laun sila nae, “Mitak, emi ma emi dae-oem au asa alas soaneu manek-ka so. Ho'i-ma bini-ngges nde ia, fo meu sele-nggali neu emi tina-osim. 24Nai lelek ketu-kolu, emi muse fe baba'ek esa neme baba'ek lima leo manek-ka neu. Emi bole pake lenan-nala soaneu bini-ngges, ma soaneu emi ma emi teidale-bobongim nana'an-na.”
25Lataa lae, “Tuan soi-tefa-na ami so, de ami moke makasi ba'uk-ka. No dale hihiik, ami da'di manek-ka atan.” 26Basa boema, Yusuf tao dede'ak ndia da'di susula naketu-nala'dik nai nusa Masir-ra, fo nde nae baba'ek esa neme baba'ek lima neme keketu-kokoluk buna-boan, muse da'di manek-ka nuun. Losa besak ia, susula naketu-nala'dik ndia bei nanapakek. Ka'da imam-mala daen-na, nde ta da'di manek-ka nuun fa.
Yakob nonoken mate'ek-ka
27Hataholi Israel-la leo lahele nai Masir, fo nai nusak Gosyen-na, tutuin-na leondiak. Ala da'di kamasu'ik-kala, ma ala bongi upu-anak makadotok nai ndia. 28Yakob bei naso'da teuk sanahulu hitu, losa teun-na da'di teuk 147. 29#Kej. 49:29-32, 50:6Lelek faim-ma losa, fo sanga maten boema, naloo Yusuf fo anan ndia, boema nafa'da nae, “Metema o sue au soona tao o limam-ma neu au puu huung duas tala'da, fo soo-supa mae neukose o ta matoi au nai Masir ia fa. 30Au nau matoi au nai au bei-ba'i kaing-ngala mamanan-na; ho'imeni au popolang-nga neme nusak ia mai, fo matoin neu sila mamana laten-na.”
Boema Yusuf nataa nae, “Neukose au tao tunga hata fo ama nafa'dan ndia.”
31Yakob nae, “Soo-supa leona, mae neukose o tao tungan.” Yusuf soo-supa, de Yakob noke makasi nai pepe'un lain.
Currently Selected:
KEJADIAN 47: twu
Highlight
Share
Copy
Want to have your highlights saved across all your devices? Sign up or sign in
