KEJADIAN 46

Yakob no umaisin-nala leu leo Masir leu

1Yakob nafafa'u basa hata-heton lala'en-na boema ala la'o. Losa Bersyeba boema, ana tunu-hotu tutunu-hohotuk fe Manetualain, fo aman Isak sene-do'ok-ka. 2Nai ninitak esa dalek, nai fai le'odaek, Manetualain nafa'dan nae, “Yakob, Yakob!”

Nataa nae, “Ou Manetualain.”

3Manetualain nae, “Au Manetualain, Manetualain fo o amam sene-do'ok-ka. Boso bii soaneu muu leo Masir muu. Neukose Au tao o tititi-nonosim da'di leoina matuaina nai naa. 4Neukose Au sama-sama o o, leo Masir muu, ma Au o falik o tititi-nonosim leo nusak ia mai. Metema o fai mamatem-ma losa soona, neukose Yusuf nai o boboam-ma”

5Boema Yakob la'o neme Bersyeba mai. Anan-nala lakasasa'ek sila aman boema sila sao-anan leo kaleta fo, manek Masir-ra haituak-ka lain neu. 6#Hat. 7:15Sila boeo leni bana-manu ma basa hata-heto lala'en fo ala hapus neme Kanaan-na, boema ala la'o leo Masir leu. Yakob no la'iesak tititi-nonosin lala'en-na, fo nde 7basa upu-anak toun ma inan-nala.

8Yakob teidale-bobongin fo manatunga leo Masir leu-a nde: 9Ruben, fo ana ulun-na; Ruben anan-nala nde: Hanok, Palu, Hezron ma Karmi. 10Simeon; anan-nala nde: Yemuel, Yamin, Ohad, Yakhin, Zohar ma Saul, fo saon, ina Kanaan-na anan-na. 11Lewi; anan-nala nde: Gerson, Kehat ma Merari. 12Yehuda; anan-nala nde: Syela, Peres ma Zerah, tehu Yehuda ana fe'e-fe'en-nala nde: Er ma Onan fo maten nai Kanaan. Peres anan-nala nde: Hezron ma Hamul. 13Isakhar; anan-nala nde: Tola, Pua, Ayub ma Simron. 14Zebulon; anan-nala nde: Sered, Elon ma Yahleel. 15Ni'iana sila-la basa-basas nde been-na Lea bongis ba'eneu Yakob neme Mesopotamia. Fe'ek neme ndia mai boe, ana inan-na na'de Dina. Da'di, basa Yakob tititi-nonosin lala'en fo neme Lea mai-a, dede'un-na hataholi teluhulu telu.

16Gad; anan-nala nde: Zifyon, Hagi, Syuni, Ezbon, Eri, Arodi ma Areli. 17Asyer; anan-nala nde: Yimna, Yiswa, Yiswi ma Beria, boema Serah, fo sila tolanoo inan-na. Beria anan-nala nde: Heber ma Malkiel. 18Hataholi ka sanahulu neek sila-la nde been-na, Yakob tititi-nonosin neme Zilpa mai, fo nde ata inak fo Laban fen leo Lea neu, anan-na inaanak.

19Rahel fo Yakob saon-na, anan dua, fo nde Yusuf ma Benyamin. 20#Kej. 41:50-52Yusuf bongin-na ni'iana dua nai Masir, fo nde Manasye ma Efraim fo nanabongik neme saon Asnat mai, fo Potifera fo ana da'di Imam nai Heliopolis, anan-na. 21Benyamin; anan-nala nde: Bela, Bekher, Asybel, Gera, Naaman, Ehi, Ros, Mupim, Hupim ma Ared. 22Hataholi ka sanahulu haak sila-la nde been-na, Yakob tititi-nonosin neme saon Rahel mai.

23Basa boema Dan; anan-na nde Husim. 24Naftali; anan-nala nde: Yahzeel, Guni, Yeser, ma Syilem. 25Hataholi ka hituk sila-la nde been-na, Yakob tititi-nonosin neme Bilha, ata inak fo Laban fen leo anan Rahel neu.

26Yakob tititi-nonosin fo leu leo Masir leu-a, dede'un-na basa-basan hataholi neehulu nee, te ta leke manafeun-nala fa. 27#Hat. 7:14Yusuf anan dua bongis lai Masir, de Yakob teidale-bobongin manalosa Masir-ra, dede'un-na, basa-basan hataholi hituhulu.

Yakob ma teidale-bobongin lai Masir

28Yakob nadenu Yehuda la'o nakahuluk soaneu naloo Yusuf, fo ela ana soluk-kana nai Gosyen. Lelek ala losa Gosyen boema, 29Yusuf sa'e-na kaletan-na, fo neu natongon-no aman nai ndia. Lelek ala latongo boema, Yusuf holun-na aman de ana kii-nala doon-na seli. 30Yakob nafa'da Yusuf nae, “Besak ia, au sadia mate, nanahu au ita o so, ma au bubuluk, ae o bei maso'dak.”

31Boema Yusuf nafa'da tolanoon-nala ma tolanoo ka'a-fa'di fe'en-nala nae, “Au muse la'o, fo au u afa'da manek-ka, ae au tolanoong-ngala ma basa au tolanoo ka'a-fa'ding fo ala leo lai Kanaan-na, ala mai so. 32Neukose au afa'da ae emi manafoo bi'ilopo ma sapi, de emi meni basa emi bana-manum ma hata-hetom lala'en-na. 33Metema manek-ka naloo emi, fo natane emi tatao-nono'im soona, 34mafa'dan mae emi ia manamakaboboi bana-manu neme emi bei anam-ma mai, sama-na leo emi bei-ba'i kaim-mala. No enok ndia, neukose nadenu emi leo nai nusa Gosyen-na.” Yusuf nafa'da dede'ak ndia, nanahu hataholi Masir-ra name'da nananakadadaek, metema ana leo-napalasa no manafoo bana-manu.

Currently Selected:

KEJADIAN 46: twu

Highlight

Copy