KEJADIAN 45

Yusuf nafa'da tunga ndoon-na see ndia

1 # Hat. 7:13 Yusuf ta nakatatakak-nala dalen-na so'on nai hataholi mana'a ngga'din-nala matan fa. Hu ndia de nadenus, fo ala la'oela mamanak ndia, fo ela ana hapu nafa'da tolanoon-nala tunga ndoon-na, see ndia. 2Lelek basa hataholi mana'a ngga'din-nala la'oela mamanak ndia boema, Yusuf dola-dola mesan, nalosa hataholi Masir manai deak-kala lamanenen, de halak ndia losa uma manek-ka. 3Yusuf nafa'da tolanoon-nala nae, “Au ia, Yusuf. Ama bei maso'dak do?” Tolanoon-nala lita ndia boema, ala bii lanseli, nalosa ala ta hapu lataa fa. 4Boema Yusuf nafa'das nae, “Mai leo ia mai.” Leu deka loon boema, nafa'da seluk nae, Au Yusuf, emi tolanoom fo emi mase'ohenin leo Masir neu-a. 5Boso bii do masasale dale, hu kande emi mase'oheni au so. Tunga ndoon-na, Manetualain mesak-kana nde nakahuluk noo au leo ia mai neme emi mai, soaneu soi-tefa hataholi ba'u. 6Besak ia, besak-ka teuk la'andoes ka dua, de nai teuk lima seluk dalen-na, neukose hataholi-a ta foi-fala do ketu-kolu fa. 7Manetualain noo au, nakahuluk neme emi mai, fo soi-tefa emi nenik enok fo dodoo doak-kana ia, ma soaneu nanea emi so'dam-ma, ma emi tititi-nonosim manamaik-kala. 8Da'di, tunga ndoon-na, ta hu kande emi, de au losa ia fa, tehu Manetualain dei. Ndia nde fe au da'di hataholi mana'a ngga'di mademaina neu mane Masir-ra so. Ana fe au koasa basa uma loon oe-isin, ma basa Masir lala'en-na.

9 # Hat. 7:14 Besak ia, emi fali lai-lai leo ama meu, fo mafa'dan mae Yusuf, fo ndia anan-na, nafa'da nae leo ia, ‘Manetualain fe au da'di manakoasa neu basa Masir lala'en-na so; mai lai-lai leona. 10Ama bole leo nai nusa Gosyen-na, fo deka no au – ama no upu-anan-nala, bi'ilopo, bi'ihiik, sapi ma basa ama hata-heton lala'en-na. 11Metema ama leo nai Gosyen soona, au hapu akaboboi ama. Tepo-lelek la'andoes-sa bei la'ok nakandoo teuk lima seluk, de neukose au sanga enok fo ela ama, ama umaisin-nala, ma bana-manun boso to'a-taa hata esa boen.’ ”

12Yusuf nafa'da seluk nae, “Besak ia, emi mita matam, boeo o Benyamin, mae te'e-te'e Yusuf nde au. 13Mafa'da ita aman mae, au koasang-nga ba'un-na seli nai Masir ia, ma tuin basa hata lala'en fo emi mitan. Boema moon lai-lai leo ia mai.”

14Basa ndia boema, ana holu-na Benyamin fo fa'din ndia, boema ana kii; Benyamin boeo ana kii, ma ana holu Yusuf boe. 15Basa boema, bei no kii-kiik, Yusuf holu na basa tolanoon-nala, de ana de'is. Basa ndia boema, ala mulai kola-kola loon.

16Lelek nai mane masir uma manen-na, halak-ka nananamanenek, lae Yusuf tolanoon-nala mai boema, manek-ka ma hataholi mana'a ngga'din-nala lamahoko tunga boe. 17Boema manek-ka nafa'da Yusuf nae, “Madenu o tolanoom sila, fo ala fua gandum neu sila keledein-nala lain, fo ala fali leo Kanaan leu, 18soaneu leu lala sila aman ma umaisin-nala fo ala lali mamanak leo ia mai. Neukose au fes dae neulauk nanseli nai Masir, fo dae ndia buna-boan taon-na so'dan-nala dai ma lena. 19Madenus fo ala ho'ileni kaleta de'ubee neme ia mai boe, soaneu leu lala sila saon-na, ma ni'iana kome'doana-la, ma sila aman. 20Ta paluu sila dudu'a-dodoo, sila-la'oela sila bua-lo'an-nala no nakasetik fa, nanahu hata fo malole hiik nai Masir lala'en-na, neukose da'di sila nuun.”

21Yakob anan-nala tao tunga manek ndia paletan-na. Yusuf fes kaleta de'ubee, fo nandaa no manek-ka paletan-na, ma tua-lepa boe, fo la'a nai enok. 22Boeo ana fe sila esan-na bua-lo'a beuk pasan esa, tehu soaneu Benyamin soona, ana fen doifulak natun telu, ma boalo'a beuk pasan lima. 23Ana haitua fe aman bua-lo'a manahiik keledei sanahulu neme Masir mai, ma gandum keledei sanahulu seluk, loti ma nana'a-nininu fe'ek, fo la'a nai leleo-lala'on leo Masir leu. 24Basa boema, neu nafuli tolanoon-nala, de nafa'das nae, “Boso male'a nai enok.”

25Ala la'oela Masir de ala fali le'us leo Kanaan, fo leo sila aman Yakob leu. 26Lafa'dan lae, “Yusuf bei maso'dak. Ndia manakoasa nai basa Masir lala'en-na!” Yakob namanene halak ndia boema, ma'dak halan-na, de ta namahele fas.

27Tehu lelek ala tui basa hata fo Yusuf nafa'da neus, ma lelek nita Yusuf haitua kaleta soaneu leu lalan fo loon leo Masir neu boema, besak-ka dudu'a-aafin fali. 28Nafa'da nae, “Au anang Yusuf bei maso'dak!” Ka'da ndia nde, au ahiik-kana! Au muse u, fo au itan, beidai au beita mate fa.

Currently Selected:

KEJADIAN 45: twu

Highlight

Copy