YouVersion Logo
Search Icon

NAPPIYAREEGERAK 8

8
1At Tawulut kunduk Tepanut waruwak aret mbareegerak.
At Tawulut nen Ala apuri ale-pale eeginabit nege nagagerak wone
At wareegwaarak ti eyom paga, it Ala apuri o Yerutalem mendek nogo inooruwok nduk, ale-pale eeginabit nogo mbareegwa, o Yureya Tamariya inaagan-ambokan time kole ma'narit nogogwaarak kwe, it Yetut nappiyareegerak nogo perak, mbaganulik aret puk ogogwaarak. 2It aap Ala inagabiti warak ando nen Tepanut warak wonok, ndoome pi nogo nogogwaarik, alee'nggup maareegwaarak.
3Alee'nggup maakwi iigak kwe, at Tawulut nogo nen perak, it Ala apuri nogo kumi nen, aap nen, o ambi me unggwage, niigogo wumbiige, ti'nuk, ambi me unggwage, niigogo wumbiige, eerit wogoren keele maarogo mambiigo menggam nogome piya nage nagagerak.
Piliput nen obeelom wone o Tamariya lagi wagagerak wone
4It Ala apuri kole ma'narit nogogwaarak nogo nen, yi awi ndi awi wone obeelom wone yoranet nugu nogogwaarak. 5Ndi, at Piliput o Tamariya tini nggwok ambi me lagi wage nagagirik, aakumi time mendek Ala nen leenogo pereegerak nogo wone yoragagerak. 6Yorage me, aakumi ambik kuwak ogo nogogwaarik, Piliput nen yorage nogo inaruk konenggwi, eerubok mendek eeke nogo inigen kogwe, eeppogo nogogwaarik, iniki mondok kwippunuk wone yoragagerak nogo liirogon waganeegwaarak. 7It kugi ogole warak mendek inikime lik yegetak nogo kwak kunik yogwe iigak nggiginogo wumbiige, ineenggi-iniyok nggilik-nggelok aago inom, inendop maluk inom, obeelom eeginake, eeke kenok, wone yoragagerak nogo liirogon waganggo nogogwaarik, 8it o tini time mendek nogo iniki ale'nggen ambik mbareegwaarak.
9Ndi, aap ambi Timon, aa'nduk kugi eeginabit nege logonet, at mban iya negen eekkolage kenok, it Tamariya mendek nogo nen, ”Aap kugi eeke yi, wi!” yinuk, pi wako logonet, 10it kumi inom, aap inom, nggeneemalo abok aret, ”Ala omaawi ambik menggerak yogo monggoorak nogo ti, aap yi aret me, wi!” yinuk, at oone mban liirogon konenggo nogogwaarak. 11O maan nen kugi eeginabit nege kenok, pi wako nagaatik, at oone mban konenggo nogogwaarak kwe, 12at Piliput nogo nen, Ala abu'me piyoorak wone inom, Yetut Keritut eereegerak wone inom, yorage mbareegi, wone obeelom wone nogo iniki abet mbako mbareegwa, yiime wuppiyareegerak. 13At Timon nogo kunduk iniki abet mbareegerak kenok, yiime wuppege mbareegi, at Piliput imbirak nugu logonet, inagabiti warak eeke, eerubok mendek eeke, eerit nage kage nagagirik, ”Wi!” yinuk, pi wake nagagerak.
14Ndi, it Yetut nappiyareegerak nogo o Yerutalem logonet, it Tamariya mendek nogo nen Ala wone abet mbareegwaarak inaruk konembogo nogogwaarik, it Peterut Yaya imbirak peebi time nappiya wogogwaarak. 15Wogo nogogwaarik, it aakumi Tamariya mendek nogo Aberiniki wogoraawak nduk inake tamban eereegwaarak. 16It nogo inogoba Yetut endage paga yiime wuppiyareegerak kwe, Aberiniki awo inoba wuppiya waga'lek me, 17inanobak ineenggi tebembunuk, inake tamban eeko mbareegwa, Aberiniki wogoragagerak.
18Inanobak ineenggi tebeninako mbareegwa, Aberiniki wogorage at Timon nogo iige nagagirik, onggo wu wogoraakit nduk eeke logonet, 19”Inanobak neenggi tebembiinok, Aberiniki wogorage logokit nduk, an kit eekwi togop ndak-ndak eeke logokit nduk kinawone an ambi kili'ninip o,” yinuk, ngginooragagerak.
20Ngginoorage mbareegi, at Peterut nogo nen yoge logonet, ”Ala nen onggo lek we wo'nirage menggerak mendek kat onggo puurak nduk ari agandik ya? Kawu inom, keebe inom, mondok maluk eerogo pagagin me, kabuwa o! 21Ala nen maluk kinikime wonage keegerak me, wone yi mendek ambi unde arumunggun mondok lek aret o. 22Kat maluk eeriyak koonggendak nogo mbo punuk, kiniki mbakendak kogoba Ala nen lek eerogo pagawak nduk yoru o. 23Kat komaluk koba luurik maarak aago wonage kagak, wam ambiki aleegwi negen koone andiigwi ari keegi o.”
24Yinuk, mberege mbareegi, ”Ai! Kit yogotak nogo an ee'nake kero, an nake tamban mban eeko logonip,” yoragagerak.
25Ti eeko nogogwaarik, it Peterut Yaya imbirak nogo nen, ”Yetut togop eeke kogoorak o,” yinuk, paganogo yorogwe, inoba Yetut wone yorogwe, eeppogo nogogwaarik, iname Yerutalem iniyok paga wambi nogo logonet, Tamariya o tini ambik nogome wone obeelom wone yoranet nogogwaarak.
At Piliput nen aap Etiyopiya mendek yiime wuppereegerak wone
26Yoranet nogwe me, mbogut paga ninogoba Ala nen yonggo nappiya wage menggerak melaikat ambi nen at Piliput nogo yoge logonet, ”Tu o Yerutalem nen o Nggata nogo menggam o selatan pa'nggwe time nak o,” yinuk, yoreegerak. (Ti yoreegerak nogo ti, tu aakumi lek me karume time nawak nduk yoreegerak.) 27-28Nogo, yoge mbareegi, nage me, aap sida-sida aago ambi Etiyopiya mendek o Yerutalem tamban eeri wage nagagirik, ti'nuk, iyok paga nagagerak. Aap nogo it Etiyopiya mendek inuwigelo endagembogut kwe Kandake nogo awu unde logonet, ayeloman nogome inowe at aret me, iyok paga nage logonet, wam kuda nggween to niikkenok nage kagak, at nggween to paga kwi'na'nuk, at nabi Yetaya nen liiru mbaneegerak nogo pekkanet nagagerak. 29Nage me, at Aberiniki nogo nen at Piliput yoge logonet, ”To niikkenok nage ti, naberogon ka nak o,” 30yoge mbareegi, at Piliput nogo nen at owagam puu'nuk ka nage nagagirik, Ala wone yorage nagagerak nabi Yetaya nogo liiru mbaneegerak pekkage logonet ari aruk konembege nagagirik, ”Wulaga wae. Kat mbuku mbanak pekkenet nage yi liippege agandik a, lek a?”
31Yoge mbareegi, at nogo nen, ”Aakumi nen yogop-ndogop yorogwe iinok mban liippogo menggaarak me, an nonggop togon lippuurak o?” yinuk, ”Yo'ninok nduk, kwi'nari lagi mok o,” yoreegerak. 32-33Liiru mbanak maleneegerak nogo eebe yi aret o.
”Ndomba waruwak nduk wonok nogo mengga kwak,
pigogo wonok nogogwaarak o.
Ndomba aagaluk eeruwak mbanggwi iigak,
oone lek abolok lek puk wonage minggi kwak,
puk wonagagerak o.
Alom lek kagak, abet-abet paga enggali wareegwaarak kwe,
it ambi nen abet liirogon ambi yorulik aret o.
Muk iniki waganggerak me,
aap yi ngge mendek tenenak yogo logogun o?”
yinuk, liiru mbanak nogo malengge me, kwi'nari laganeegerak.
34Lagangge mbareegi, aap nogo nen Piliput yoge logonet, ”At Ala wone yoragagerak wone nabi nen yereegerak yi, at nen eereegerak me ari a, aap alik nen eereegerak me ari a? Yu o,” 35yi'nuk, yoge mbareegi, ”Yokkirikit o,” yoge nagagirik, at Yetut eereegerak wone obeelom wone nogo mbininogo yoreegerak. 36Yorit imbirak tu paga nogo logonet, yi mbuuluk aa'nggi paga nogo nogogwaarik, aap nogo nen, ”Niyo yi ket o. An yiime wuppaniyak maluk mbaken a?”
38Yoge nagagirik, kuda nogo puk aruwak nduk yoge mbareegi, puk agagerak. Puk age mbareegi, imbirak yiime unggwogo nogogwaarik, Piliput nen aap nogo yiime wuppereegerak. 39Wuppege nagagirik, wundi nawok nduk eeko mbareegwa, at Piliput nogo Aberiniki nen wonok nggarek ari mbareegi, at aap nogo enegen kaga'lek logonet, iniki ale'nggen mbarit ame nagagerak. 40At Piliput nogo o Atorot nogome wonage negen kage nagagirik, yi awi ndi awi o tini lombok time obeelom wone yoranet o Kayitareya unggwi wagagerak.

Currently Selected:

NAPPIYAREEGERAK 8: WNO

Highlight

Share

Copy

None

Want to have your highlights saved across all your devices? Sign up or sign in

Free Reading Plans and Devotionals related to NAPPIYAREEGERAK 8

Video for NAPPIYAREEGERAK 8

YouVersion uses cookies to personalize your experience. By using our website, you accept our use of cookies as described in our Privacy Policy