YAYA 18
18
Yetut pigaganeegwaarak wone
(Mat 26:47-56, Mrk 14:43-50, Luk 22:47-53)
1At Yetut nen tamban togop eeke nagagirik, at oone waganggwi mendek inom niyo Kiteron wunda nogo nogogwaarik, time yabu yarak ambime unggwi nogogwaarak. 2At Yetut at oone waganggwi mendek inom yabu yarak me nogome kulinik aret nogo nogogwaarak me, at Yetut onggo mbanigin Yurat nogo kunduk yarak me time eenu wonagagerak. 3Eenu wonagagerak me, it aap Ala unde inoweewi inom, aap Pariti mendek inom, nogo nen inawuri yigin unde ambi aago inom, aap keele maarinaka mendek inom, nappiigo mbareegwa, yigin waganggwi, togowa waganggwi, eeko mbareegwa, Yurat nen wogoren ndi paga yarak me nogome aret nogogwaarak. 4At Yetut nen at eeppuurak abok aret eenu wonagagerak me, it nogo nen Yetut ka nogo mbareegwa, Yetut iya wage nagagirik, ”Kit ta kwaarit wogop o?”
5Yorage mbareegi, ”Lek o. Yetut Nataret mendek kwaarit wogo o.”
Yogo mbareegwa, Yetut nen, ”Ti an aret o,” yinuk, aap Yurat Yetut onggo mbanigin nogo inom aret me yoragagerak. 6”Ti an aret o,” yorage mbareegi, inakom niruk nogo logonet, nggween paga ngginnari nogogwaarak. 7Ngginnarit nogo mbareegwa, at Yetut ne ambinom yorage logonet, ”Kit ta kwaarit wogop ubi?”
Yorage mbareegi, ”Lek o. Yetut Nataret mendek kwaarit wogo o.”
8Yogo mbareegwa, Yetut nen, ”Muk an aret yokkiragarak nogo! Kit an aret kwaa'nabit wogotak kenok, it noreewi yi nawak nen teppiyaanip o,” yinuk, yoragagerak. 9Ti yoragagerak nogo ti, aa'nduk Yetut nen, ”Kat wo'nereegindak nogo it ambi kobak arulik o,” yinuk, Ala yoreegerak nogo a'me lik yuwak nduk, yoragagerak.
10Nogo yorage mbareegi, Timon Peterut nen paloowi porogo wonage me, nggigik togon agago aap Ala unde inowe ayeloman endage Malukut nogo aruk abe'nggan tabok togon nappereegerak. 11Aruk tabonggage mbareegi, at Yetut nen, ”Wulaga Peterut wae. Paloowi obaane'me yonggolu o. Niyo toolak kwak an ee'naburak nogoba nen koonogo paneegerak yi, an noorak lek nombakendak ya? Lek o. Nagin aret o,” yinuk, yoreegerak.
Yetut wonok aap Anat owagam pi nogogwaarak wone
12Yoge mbareegi, it aap yigin unde ambi aago inowe komandan inom, ndi, it aap Yakuri mendek aap keele maarinaka mendek inom, nen Yetut pigogo keele maareegwaarak. 13Keele maako nogogwaarik, aa'nduk at Anat owagam wonok nogogwaarak. Aap Anat ti, aap Ala unde inowe tahun ti paga eeke nagagerak aap Kayapat arugelo nogo aret o. 14Aap aa'nduk it aakumi Yakuri mendek yorage logonet, ”Aap ambit nit aakumi ninake kambuurak perak op o,” yoragagerak nogo ti, Kayapat nen aret yoragagerak.
Peterut nen, ”Yetut an neenggo'lek o,” yereegerak wone
(Mat 26:69-70, Mrk 14:66-68, Luk 22:55-57)
15Aap Anat owagam wonok nogo mbareegwa, Timon Peterut inom, aap Yetut oone wagangge ambi inom, Yetut ambokan nogogwaarak. Ambokan nogo nogogwaarik, Peterut endekem tu nggambe paga kagak, Yetut oone wagangge ambi aap Ala unde inowe eenu wonagagerak me, Yetut imbirak aap Ala unde inowe nogo awore'nggam unggwi nogogwaarak. 16Unggwi nogo nogogwaarik, ti'nuk, Yetut oone wagangge ambi aap Ala unde inowe eenu nogo nen, kolaga tu arum wonagagerak nogo yoge nagagirik, kolaga nogo nen, ”E o”, yoge mbareegi, wundi woraanuk, Peterut wonok oome unggwi nagagerak. 17Wonok oome unggwi nage mbareegi, kolaga tu arum wonagagerak nogo nen Peterut yoge logonet, ”Wulaga! Kat kunduk at oone wagangge mendek nogo lek a?”
Yoge mbareegi, Peterut nen, ”An lek o,” yoreegerak.
18Yoge mbareegi, o time togwi wonagagerak me, aap Ala unde inowe ayeloman mini inom, aap keele maarinaka mendek inom, kani kumbunuk, togwi worakkologwe me, at Peterut inom togwi worakkolage nagagerak.
Ala unde inowe nggwok nogo nen Yetut kin wakkagagerak wone
(Mat 26:59-66, Mrk 14:55-64, Luk 22:66-71)
19Togwi worakkologwe iigak, at aap Ala unde inowe nogo nen Yetut kin wakkage logonet, ”Koone waganggwi mendek ti taani o? Ndi, wone mamuninake nagandak nogo ti, nonggop o?” yinuk, yoreegerak. 20Yoge mbareegi, at Yetut nen, ”An nen it aakumi o nggween paga yime menggaarak nogo wone mamuninake logonet, kote mamuninake logolik o. An nen tena'me mban yorage nagarak o. An nen tamban eeko menggam inom, Ala awi wurik me inom, it aakumi Yakuri mendek komaako menggam abok aret mamuninake nagarak kwe, 21kat nonggop nduk, an kin wa'nege agandik? An wone ngge mendek yorage nagarak nogo, it konenggo nagaarak ineenu me, yokkiruwak nduk, kin wagiyet o.”
22Wone ti, yoge mbareegi, aap keele maarinaka mendek ambi taati mi'ndak wonagagerak nen eenggi telak paga Yetut wake logonet, ”Aap Ala unde inowe nen wone yokkege me, togop yoriyak op mbaken?”
23Yoge mbareegi, at Yetut nen, ”An maluk ari neegendak kenok ti, Maluk yagandak, yo'niriyak kwe, abet aret ari neegak, kat nonggop nduk, nooken o?”
24Yoge mbareegi, at Anat nen Yetut keele maarak aret aap Ala unde inowe Kayapat nogo owagam nappereegerak.
Peterut nen ne ambi, ”Yetut an neenggo'lek o,” yereegerak wone
(Mat 26:71-75, Mrk 14:69-72, Luk 22:58-62)
25Owagam nappege mbareegi, nage kagak, at Timon Peterut nogo togwi worakkolage me, it aap nogo nen at yogo logonet, ”Kat kunduk at oone wagangge mendek nogo lek a?”
Yogo mbareegwa, at nen, ”An lek ubi!”
26Yorage mbareegi, aap Ala unde inowe ayeloman aap Peterut nen aruk tabonggagagerak nogo ore ambi nen Peterut yoge logonet, ”Kat kimbirak yabu yarak me taati keegirak nogo lek a?”
27Yoge mbareegi, at Peterut nen ambinom lik-lek ari mbareegi, ayam oone ku yereegerak.
Yetut wonok Pilatut owagam nogogwaarak wone
(Mat 27:1-2, 11-14, Mrk 15:1-5, Luk 23:1-5)
28Oone ku ari mbareegi, it aap nogo nen Yetut piginok aap Kayapat ame nen aap inowak loonggo menggam wonok nogogwaarak. O awo wigangga'lek kagak wonok nogogwaarak. Wonok nogo nogogwaarik, Ala ndomba warogo Patika lariyak ugun noorak me, ”Nit maluk eekkolookwak,” mba'nuk, inowak loonggo menggam unggwi noolik, endekem puk ogogwaarak. 29Endekem puk wonogwe me, at Pilatut nogo iya wungge nagagirik, ”Wologwe! Aap yi, nonggop eekerak kenok, yogo ogotik o?”
30Yorage mbareegi, it nen, ”Lek o. Aap yi maluk eeke logonetak lek nen, nit wonok kiri wa'netak lek o.”
31Yogo mbareegwa, at Pilatut nen, ”Kit nen aap yi wonok Ala nen wone lengganogo yokkiragagerak liiru mbanak nogo ndak-ndak owak looni nanip o.”
Yorage mbareegi, it aap Yakuri mendek nen, ”Lek o. Nit nen aakumi mondok inooriyak mage me, aap yi owak looniyak lek o,” yoreegwaarak. 32Wone yoreegwaarak nogo ti, Yetut nonggop eerogo nookwi iinok, kambigin, yoragagerak nogo a'me lik yuwak nduk, yoreegwaarak.
33Togop aret yogo mbareegwa, at Pilatut nogo nen inowak loonggo menggam ambinom unggwi nanuk, Yetut wiige nagagirik, wage mbareegi, yoge logonet, ”Aakumi Yakuri mendek inogoba endagembogut kat yi aret ilik?”
34Yoge mbareegi, at Yetut nogo nen, ”Kat yo'negendak ti, kat kalik kiniki mba'nuk nen yo'negen ilik, it ando nen an nabok yokkegaarak paga yo'negen a?”
35Yoge mbareegi, at Pilatut nogo nen, ”Kat an aap Yakuri mendek nombakendak ya? Kat kowe-kawot inom, aap Ala unde inoweewi inom, nen keebe waganogo wo'negaarak me, nonggop eekendak o?”
36Yoge mbareegi, at Yetut nen, ”An nendagembogut logonet, nabu'me piige minggim nogo ti, o nggween paga yime lek o. Nabu'me piige minggim o nggween paga yime logonetak en, an neebe waganogo it aap Yakuri wogorogwe iyo, an nawuri inom wim nambuko logonetak o. An nabu'me piige minggim nogo ti, o yime mendek lek o.”
37Yoge mbareegi, at Pilatut nen, ”Ti kenok, kat aap kendagembogut aret ilik?” Yoge mbareegi, at Yetut nen, ”An nendagembogut ti, kat nen aret yagandak o. An togop logokit nduk nda'nagagirak. Ndi, Ala ndogop menggerak wone paganogo yokkirage logokit nduk, o nggween paga yime wambi wagagirak nogo o. It aap wone yi waganggwi iinok, Ala apuri aret me, an noone konenggo menggaarak o.”
38Yoge mbareegi, at Pilatut nen, ”Ti nano wone paganogo yo'niroorak yagan o?” yinuk, yoreegerak.
”Yetut mondok wariyak o,” yereegwaarak wone
(Mat 27:15-31, Mrk 15:6-20, Luk 23:13-25)
Yo'nuk, aap Yakuri mendek endekem iya wungge nagagirik, ”Wologwe! Aap yi maluk eekerak abu lek aret kagi o. 39Ala ndomba warogo Patika lako logonet, aap ambi piinogo teppuwak nduk, yo'nogo monggotak me, kit aap Yakuri mendek kinowe endagembogut yi, piinogo wokkiroorak mbako ogotik ilik, lek a?”
40Yorage mbareegi, it inoone nggwok paga yogo logonet, ”Aap yi lek o. Aap Mbarabat perak, piinogo wo'niret o,” yoreegwaarak. At Mbarabat nogo at yogot iyagalo wonagagerak kagak, yoreegwaarak.
Currently Selected:
YAYA 18: WNO
Highlight
Share
Copy
Want to have your highlights saved across all your devices? Sign up or sign in
