YAYA 19
19
1Wone ti yogo mbareegwa, Yetut yawi waruwak nduk, Pilatut nen, it aap yigin unde nogo wogoragagerak. 2Wogoragagerak yawi wako nogogwaarik, alok komaarak waganogo Yetut anobak paga kwippunuk, mbogoyum maangga kunik negen yippereegwaarak. 3Yippogo nogogwaarik, ambi nen yogak eeko logonet, ”Aakumi Yakuri inowe endagembogut yi wa!” yinuk, ineenggi telak paga wako nogogwaarak.
4Wako mbareegwa, at Pilatut nogo nen ambinom endekem it aap Yakuri mendek iya wungge nagagirik, ”Wologwe! At maluk eekerak abu lek kagarak me, kit kineenu arubagip nduk, wonok wagi o.” 5Yorage mbareegi, at Yetut anobak paga alok komaarak mbogoyum maangga kunik negen yirik wundi wagagerak. Wundi wage mbareegi, at Pilatut nen, ”Aap nogo yi kaanip o.”
6Yorage mbareegi, it aap Ala unde inoweewi inom, aap keele maarinaka inom, nogo nen Yetut inigen kogo nogogwaarik, inoone nggwok paga yogo logonet, ”Eyo karo-karo paga nabenogo pu o! Eyo karo-karo paga nabenogo pu o!”
Yogo mbareegwa, Pilatut nen, ”Lek o. At maluk eekerak abu lek kagarak me, kit kinombaalombok waganogo eyo paga nabenogo pi nanip o.”
7Yorage mbareegi, it aap Yakuri mendek nen, ”Lek o. Nit Ala wone lengganogo yo'niragagerak liiru mbanak mugurok nogo monggoorak me, aap yi, An Ala aput aret o, yereegerak kenok, at wariyak aret mbako o.”
8Yogwi at Pilatut aruk konengge nagagirik, abunuk agabiti agagerak. 9Agabiti age nagagirik, ne ambi inowak loonggo menggam nogo me unggwi nanuk, Yetut yoge logonet, ”Kat kawi alom ngga nen wagagindak o?”
Yoreegerak kwe, at Yetut oone lek puk mban wonagagerak. 10Puk mban wonage mbareegi, at Pilatut nen, ”Kat onggo an yo'niriyak ambi mbaka'lek agandik? Piinogo teppagarak ilik, eyo paga nabenogo pagarak a, an unde nogo kat keenggo'lek agandik ya?”
11Yoge mbareegi, at Yetut nen, ”At mbogut paga mendek nen kat an eeppaniyak nduk unde eeppaganetak lek en, kat nen an eeppaniyak meek aret logonetak me, kat eeke nogo ti, maluk mbuuluk negen, ndi, at an neebe wo'niret kiri wagaarak nogo perak, maluk iya tit eekerak o,” yinuk, yoreegerak.
12Wone ti yoreegerak nogo at Pilatut nogo konembunuk, abunuk Yetut keele piinogo teppuurak eereegerak mendek, it aap Yakuri mendek inoone nggwok paga yogo logonet, ”Aap ambi nen, Nendagembogut aret o, ari kenok, aap ti Kayitat imbirak ogookkolage me, kat aap yi, piinogo teppege kenok, kat Kayitat kimbirak kunik lek aret kombarugun o,” yinuk, yoreegwaarak.
13Yogwi nogo at Pilatut aruk konembunuk, Yetut wonok wungge nagagirik, wone inowak loonggo menggam endage, Yugum ndoonak o, yogo nogogwam nogome aret kwi'nagagerak. (Yugum ndoonak o, yogo nogogwam nogo ti, it Iberani wone paga Nggabata aret.) 14Kwi'nagagerak nogo ti, ko'lu Ala ndomba warogo Patika lariyak pipuk eekwi iigak, liingge jam 12 paga aret kwi'nagagerak. Kwi'nage nagagirik, Pilatut nen it aap Yakuri mendek yorage logonet, ”Wologwe! Kinogoba endagembogut yi kaanip o.”
15Yorage mbareegi, ”Lek o. Wonok noorak aret o! Wonok noorak aret o! At eyo karo-karo paga nabenogo pi noorak aret o!”
Inoone nggwok paga yogo mbareegwa, at Pilatut nogo nen, ”An nen kinogoba endagembogut eyo paga nabenogo puurak mbakotak ya?”
Yorage mbareegi, it aap Ala unde inoweewi nen, ”Ninogoba endagembogut ti, Kayitat alik aret o!”
16Yogo mbareegwa, at Pilatut nen Yetut eyo karo-karo paga nabenogo puwak nduk, wogoragagerak.
Yetut eyo karo-karo paga nabenogo pereegwaarak wone
(Mat 27:32-44, Mrk 15:21-32, Luk 23:26-43)
Wogorage mbareegi, Yetut piginok nogogwaarak. 17Piginok nogwe iigak, Yetut nen at agayo karo-karo lombok aago nogo aret ko'nok, puurom ambi endage, Anobak Yelenak, nogo paga pati laganeegerak. (Puurom endage nogo ti, Iberani wone paga, Nggo'nggota aret.) 18Pati lagangge mbareegi, time aret Yetut oolo kagak, aap mbere ambi peenok ambi peenok inom eyo karo-karo paga nabenogo piyareegwaarak. 19Piigo mbareegwa, at Pilatut nen, ”Yetut Nataret mendek it aap Yakuri inogoba endagembogut yi o,” yinuk, liiru mbanogo eyo karo-karo aago paga nabembereegerak. 20Liiru mbanogo eyo paga nabembege mbareegi, Yetut eyo paga nabenogo pereegwam nogome ti, o Yerutalem korok wonagagerak me, aakumi Yakuri mendek apit aret liiru mbanak nogo inigen pekkogogwaarak. Wone mbaneegerak nogo ti, Iberani wone paga inom, Oroma wone paga inom, ndi, Yunani wone paga inom, mbaneegerak. 21Inigen pekkogo mbareegwa, it aap Yakuri mendek inoweewi Ala unde nogo nen Pilatut yogo logonet, ”It aap Yakuri mendek inogoba endagembogut yi o, yinuk, liiru mbangge mage o. Ata, It aap Yakuri mendek inogoba endagembogut an aret yegerak o, yinuk, mbanu o.”
22Yogo mbareegwa, at Pilatut nen, ”An liiru mbanggirak nogo ti, mondok mbanak aret logowak o,” yinuk, yoragagerak.
23Yorage mbareegi, it aap yigin unde nogo nen Yetut eyo paga nabenogo punuk, ambogoyum nggoorak nogo aap ineebe 4 nen, yum nogo ineengge ndak-ndak aret punogo kologogwaarak. Punogo kologo nogogwaarik, Yetut ambogoyum endekem mendek ambit tabak wonagagerak nogo wappunuk, 24it-it wone mbanggo logonet, ”Wologo wae! Ayum yi nibinogo alitak koloorak mage o. Ata, Ta koloorak kaamun? yinuk, yugum ogut wakkaawok o,” yereegwaarak. Ti yereegwaarak nogo ti, Ala yoge kagak aap ambi nen ari logonet,
”Nambogoyum nggoorak punogo kologwe, ndi, nayum endekem
mendek nogo perak kolaawok nduk, yugum ogut wakkogwe, eereegwaarak o.”
yinuk, Ala wone liiru mbaneegerak nogo a'me lik yuwak nduk, aret eereegwaarak o.
25Eekwi iigak, at Yetut agalo inom, at agaloluk inom, kwe Mariya aap Kelopat akwe nogo inom, ndi, Mariya awi Magaralena mendek nogo inom, Yetut eyo karo-karo aago abu'me taati aret wonogogwaarak. 26At Yetut nen at agalo inom, at oone wagangge mendek iniki kunik wonagagerak nogo inom, taati wonogwe enegen iige nagagirik, at agalo yoge logonet, ”Nagalo yi wae. Kaagaluk ti aret o.”
27Yoge nagagirik, at oone wagangge mendek nogo yoge logonet, ”Wulaga yi wae. Kagalo ti aret o,” yoge mbareegi, wone ti yoragagerak nogo eyom paga aret at Yetut oone wagangge mendek nogo nen Yetut agalo wonok ame nagagerak.
Yetut kambeegerak wone
(Mat 27:45-56, Mrk 15:33-41, Luk 23:44-49)
28Ti yorage nagagirik, at Yetut nen, ”Abok aret eeki,” mbake logonet, Ala wone liiru mbanak ambi a'me lik yuwak nduk, ”An yi abu o,” yereegerak.
29Ari mbareegi, time togolowak ambi anggur amburu ale mendek toolak wonagagerak me, amburu iri'ngga paga tamombunuk, yirok kunogo Yetut ambeme nigireegwaarak. 30Nigireegwaarak nogo nengge nagagirik, ”Abu eeki o,” yinuk, uut yuwak ari logonet, iniki woronggolage nagagirik, kambeegerak.
Yetut obate ndanuk togon wareegwaarak wone
31Ala ndomba warogo Patika lariyak pipuk eekwi iigak, ko'lu it Yakuri mendek tamban nggwok iniki liippunuk togon eeriyak nduk wonogogwaarak me, tamban eekwi paga ineebe eyo karo-karo aago paga wonogwe iyo, inowak kalenogo ineebe wogoret noorak nduk, it aap Yakuri mendek nen Pilatut yori wogogwaarak. 32Yori wogo mbareegwa, it yigin unde nogo, nogo nogogwaarik, it aap Yetut inom nabenogo piyareegwaarak nogo ambi peenok wonage nogo owak kalenggwi, ndi, peenok wonage nogo owak kalenggwi, eeko logonet, 33Yetut pekkogo nogogwaarik, muk kambeegerak mbareegi, owak kalenulik. 34Owak kalenulik kwe, aap yigin unde ambi nen perak, tuguwa paga Yetut obate ndanuk togon wake mbareegi, amiya niyo inom wundeegerak. 35At ambi enegen kagak eereegerak nogo nen paganeegerak me, at enegen kenok paganeegerak nogo ti abet aret o. Ndi, kit kunduk, abet mbarubagip nduk, paganeegerak nogo ti, abet aret eenu me paganeegerak o. 36Ti eereegwaarak nogo Ala nen yoge kagak aap ambi nen ari logonet, ”At owak ambi kalenigin mondok lek o,” 37ndi, alik ambi nen ari logonet, ”At eebe ndanuk togon wareegwaarak nogo inigen pekkaagun o,” yinuk, yereegwaarak Ala wone liiru mbaneegwaarak nogo a'me lik yuwak nduk, eereegwaarak.
Yetut eebe ndoome mambereegwaarak wone
(Mat 27:57-61, Mrk 15:42-47, Luk 23:50-56)
38Ti eeppogo mbareegwa, aap endage Yutup awi Arimateya mendek nen Yetut eebe waakit nduk, Pilatut yori wagagerak. At yutup nogo ti, Yetut oone wagangge nagagerak kwe, aakumi Yakuri mendek agabiti nen kote negen wagangge nagagerak. Yetut eebe waakit nduk, Pilatut yoge nagagirik, at Pilatut nen, ”E o,” yoge mbareegi, Yutup nage nagagirik, Yetut eebe wonok nagagerak. 39Wonok nage me, at Nikoremut aa'nduk oonikiya Yetut owagam nagagerak nogo nen iri'ngga obari abe mendek ambi eyo mut amburu inom, ndi, ambi nggo'nggop engga obari pogom nogo inom, nanggelak-kanggelak agago 40 kilo negen wonok Yutup imbirak nagagerak. 40Imbirak nogo nogogwaarik, Yetut eebe wonok it aap Yakuri mendek nen aakumi kanggwi iinok, eeko mengga kwak, yum laambu paga iri'ngga nogo inom perenogo nggerembereegwaarak. 41At Yetut eyo paga nabenogo pereegwam taa'nogo yabu aago wonagagerak. Nogome ndo ambi aakumi piya naga'lek awo ngget nendaarak wonagagerak me, 42ko'lu Ala andomba warogo Patika lariyak pipuk aago me, ndi, ndo ti korok aret wonagagerak me, Yetut eebe nogo time aret mambereegwaarak.
Currently Selected:
YAYA 19: WNO
Highlight
Share
Copy
Want to have your highlights saved across all your devices? Sign up or sign in
YAYA 19
19
1Wone ti yogo mbareegwa, Yetut yawi waruwak nduk, Pilatut nen, it aap yigin unde nogo wogoragagerak. 2Wogoragagerak yawi wako nogogwaarik, alok komaarak waganogo Yetut anobak paga kwippunuk, mbogoyum maangga kunik negen yippereegwaarak. 3Yippogo nogogwaarik, ambi nen yogak eeko logonet, ”Aakumi Yakuri inowe endagembogut yi wa!” yinuk, ineenggi telak paga wako nogogwaarak.
4Wako mbareegwa, at Pilatut nogo nen ambinom endekem it aap Yakuri mendek iya wungge nagagirik, ”Wologwe! At maluk eekerak abu lek kagarak me, kit kineenu arubagip nduk, wonok wagi o.” 5Yorage mbareegi, at Yetut anobak paga alok komaarak mbogoyum maangga kunik negen yirik wundi wagagerak. Wundi wage mbareegi, at Pilatut nen, ”Aap nogo yi kaanip o.”
6Yorage mbareegi, it aap Ala unde inoweewi inom, aap keele maarinaka inom, nogo nen Yetut inigen kogo nogogwaarik, inoone nggwok paga yogo logonet, ”Eyo karo-karo paga nabenogo pu o! Eyo karo-karo paga nabenogo pu o!”
Yogo mbareegwa, Pilatut nen, ”Lek o. At maluk eekerak abu lek kagarak me, kit kinombaalombok waganogo eyo paga nabenogo pi nanip o.”
7Yorage mbareegi, it aap Yakuri mendek nen, ”Lek o. Nit Ala wone lengganogo yo'niragagerak liiru mbanak mugurok nogo monggoorak me, aap yi, An Ala aput aret o, yereegerak kenok, at wariyak aret mbako o.”
8Yogwi at Pilatut aruk konengge nagagirik, abunuk agabiti agagerak. 9Agabiti age nagagirik, ne ambi inowak loonggo menggam nogo me unggwi nanuk, Yetut yoge logonet, ”Kat kawi alom ngga nen wagagindak o?”
Yoreegerak kwe, at Yetut oone lek puk mban wonagagerak. 10Puk mban wonage mbareegi, at Pilatut nen, ”Kat onggo an yo'niriyak ambi mbaka'lek agandik? Piinogo teppagarak ilik, eyo paga nabenogo pagarak a, an unde nogo kat keenggo'lek agandik ya?”
11Yoge mbareegi, at Yetut nen, ”At mbogut paga mendek nen kat an eeppaniyak nduk unde eeppaganetak lek en, kat nen an eeppaniyak meek aret logonetak me, kat eeke nogo ti, maluk mbuuluk negen, ndi, at an neebe wo'niret kiri wagaarak nogo perak, maluk iya tit eekerak o,” yinuk, yoreegerak.
12Wone ti yoreegerak nogo at Pilatut nogo konembunuk, abunuk Yetut keele piinogo teppuurak eereegerak mendek, it aap Yakuri mendek inoone nggwok paga yogo logonet, ”Aap ambi nen, Nendagembogut aret o, ari kenok, aap ti Kayitat imbirak ogookkolage me, kat aap yi, piinogo teppege kenok, kat Kayitat kimbirak kunik lek aret kombarugun o,” yinuk, yoreegwaarak.
13Yogwi nogo at Pilatut aruk konembunuk, Yetut wonok wungge nagagirik, wone inowak loonggo menggam endage, Yugum ndoonak o, yogo nogogwam nogome aret kwi'nagagerak. (Yugum ndoonak o, yogo nogogwam nogo ti, it Iberani wone paga Nggabata aret.) 14Kwi'nagagerak nogo ti, ko'lu Ala ndomba warogo Patika lariyak pipuk eekwi iigak, liingge jam 12 paga aret kwi'nagagerak. Kwi'nage nagagirik, Pilatut nen it aap Yakuri mendek yorage logonet, ”Wologwe! Kinogoba endagembogut yi kaanip o.”
15Yorage mbareegi, ”Lek o. Wonok noorak aret o! Wonok noorak aret o! At eyo karo-karo paga nabenogo pi noorak aret o!”
Inoone nggwok paga yogo mbareegwa, at Pilatut nogo nen, ”An nen kinogoba endagembogut eyo paga nabenogo puurak mbakotak ya?”
Yorage mbareegi, it aap Ala unde inoweewi nen, ”Ninogoba endagembogut ti, Kayitat alik aret o!”
16Yogo mbareegwa, at Pilatut nen Yetut eyo karo-karo paga nabenogo puwak nduk, wogoragagerak.
Yetut eyo karo-karo paga nabenogo pereegwaarak wone
(Mat 27:32-44, Mrk 15:21-32, Luk 23:26-43)
Wogorage mbareegi, Yetut piginok nogogwaarak. 17Piginok nogwe iigak, Yetut nen at agayo karo-karo lombok aago nogo aret ko'nok, puurom ambi endage, Anobak Yelenak, nogo paga pati laganeegerak. (Puurom endage nogo ti, Iberani wone paga, Nggo'nggota aret.) 18Pati lagangge mbareegi, time aret Yetut oolo kagak, aap mbere ambi peenok ambi peenok inom eyo karo-karo paga nabenogo piyareegwaarak. 19Piigo mbareegwa, at Pilatut nen, ”Yetut Nataret mendek it aap Yakuri inogoba endagembogut yi o,” yinuk, liiru mbanogo eyo karo-karo aago paga nabembereegerak. 20Liiru mbanogo eyo paga nabembege mbareegi, Yetut eyo paga nabenogo pereegwam nogome ti, o Yerutalem korok wonagagerak me, aakumi Yakuri mendek apit aret liiru mbanak nogo inigen pekkogogwaarak. Wone mbaneegerak nogo ti, Iberani wone paga inom, Oroma wone paga inom, ndi, Yunani wone paga inom, mbaneegerak. 21Inigen pekkogo mbareegwa, it aap Yakuri mendek inoweewi Ala unde nogo nen Pilatut yogo logonet, ”It aap Yakuri mendek inogoba endagembogut yi o, yinuk, liiru mbangge mage o. Ata, It aap Yakuri mendek inogoba endagembogut an aret yegerak o, yinuk, mbanu o.”
22Yogo mbareegwa, at Pilatut nen, ”An liiru mbanggirak nogo ti, mondok mbanak aret logowak o,” yinuk, yoragagerak.
23Yorage mbareegi, it aap yigin unde nogo nen Yetut eyo paga nabenogo punuk, ambogoyum nggoorak nogo aap ineebe 4 nen, yum nogo ineengge ndak-ndak aret punogo kologogwaarak. Punogo kologo nogogwaarik, Yetut ambogoyum endekem mendek ambit tabak wonagagerak nogo wappunuk, 24it-it wone mbanggo logonet, ”Wologo wae! Ayum yi nibinogo alitak koloorak mage o. Ata, Ta koloorak kaamun? yinuk, yugum ogut wakkaawok o,” yereegwaarak. Ti yereegwaarak nogo ti, Ala yoge kagak aap ambi nen ari logonet,
”Nambogoyum nggoorak punogo kologwe, ndi, nayum endekem
mendek nogo perak kolaawok nduk, yugum ogut wakkogwe, eereegwaarak o.”
yinuk, Ala wone liiru mbaneegerak nogo a'me lik yuwak nduk, aret eereegwaarak o.
25Eekwi iigak, at Yetut agalo inom, at agaloluk inom, kwe Mariya aap Kelopat akwe nogo inom, ndi, Mariya awi Magaralena mendek nogo inom, Yetut eyo karo-karo aago abu'me taati aret wonogogwaarak. 26At Yetut nen at agalo inom, at oone wagangge mendek iniki kunik wonagagerak nogo inom, taati wonogwe enegen iige nagagirik, at agalo yoge logonet, ”Nagalo yi wae. Kaagaluk ti aret o.”
27Yoge nagagirik, at oone wagangge mendek nogo yoge logonet, ”Wulaga yi wae. Kagalo ti aret o,” yoge mbareegi, wone ti yoragagerak nogo eyom paga aret at Yetut oone wagangge mendek nogo nen Yetut agalo wonok ame nagagerak.
Yetut kambeegerak wone
(Mat 27:45-56, Mrk 15:33-41, Luk 23:44-49)
28Ti yorage nagagirik, at Yetut nen, ”Abok aret eeki,” mbake logonet, Ala wone liiru mbanak ambi a'me lik yuwak nduk, ”An yi abu o,” yereegerak.
29Ari mbareegi, time togolowak ambi anggur amburu ale mendek toolak wonagagerak me, amburu iri'ngga paga tamombunuk, yirok kunogo Yetut ambeme nigireegwaarak. 30Nigireegwaarak nogo nengge nagagirik, ”Abu eeki o,” yinuk, uut yuwak ari logonet, iniki woronggolage nagagirik, kambeegerak.
Yetut obate ndanuk togon wareegwaarak wone
31Ala ndomba warogo Patika lariyak pipuk eekwi iigak, ko'lu it Yakuri mendek tamban nggwok iniki liippunuk togon eeriyak nduk wonogogwaarak me, tamban eekwi paga ineebe eyo karo-karo aago paga wonogwe iyo, inowak kalenogo ineebe wogoret noorak nduk, it aap Yakuri mendek nen Pilatut yori wogogwaarak. 32Yori wogo mbareegwa, it yigin unde nogo, nogo nogogwaarik, it aap Yetut inom nabenogo piyareegwaarak nogo ambi peenok wonage nogo owak kalenggwi, ndi, peenok wonage nogo owak kalenggwi, eeko logonet, 33Yetut pekkogo nogogwaarik, muk kambeegerak mbareegi, owak kalenulik. 34Owak kalenulik kwe, aap yigin unde ambi nen perak, tuguwa paga Yetut obate ndanuk togon wake mbareegi, amiya niyo inom wundeegerak. 35At ambi enegen kagak eereegerak nogo nen paganeegerak me, at enegen kenok paganeegerak nogo ti abet aret o. Ndi, kit kunduk, abet mbarubagip nduk, paganeegerak nogo ti, abet aret eenu me paganeegerak o. 36Ti eereegwaarak nogo Ala nen yoge kagak aap ambi nen ari logonet, ”At owak ambi kalenigin mondok lek o,” 37ndi, alik ambi nen ari logonet, ”At eebe ndanuk togon wareegwaarak nogo inigen pekkaagun o,” yinuk, yereegwaarak Ala wone liiru mbaneegwaarak nogo a'me lik yuwak nduk, eereegwaarak.
Yetut eebe ndoome mambereegwaarak wone
(Mat 27:57-61, Mrk 15:42-47, Luk 23:50-56)
38Ti eeppogo mbareegwa, aap endage Yutup awi Arimateya mendek nen Yetut eebe waakit nduk, Pilatut yori wagagerak. At yutup nogo ti, Yetut oone wagangge nagagerak kwe, aakumi Yakuri mendek agabiti nen kote negen wagangge nagagerak. Yetut eebe waakit nduk, Pilatut yoge nagagirik, at Pilatut nen, ”E o,” yoge mbareegi, Yutup nage nagagirik, Yetut eebe wonok nagagerak. 39Wonok nage me, at Nikoremut aa'nduk oonikiya Yetut owagam nagagerak nogo nen iri'ngga obari abe mendek ambi eyo mut amburu inom, ndi, ambi nggo'nggop engga obari pogom nogo inom, nanggelak-kanggelak agago 40 kilo negen wonok Yutup imbirak nagagerak. 40Imbirak nogo nogogwaarik, Yetut eebe wonok it aap Yakuri mendek nen aakumi kanggwi iinok, eeko mengga kwak, yum laambu paga iri'ngga nogo inom perenogo nggerembereegwaarak. 41At Yetut eyo paga nabenogo pereegwam taa'nogo yabu aago wonagagerak. Nogome ndo ambi aakumi piya naga'lek awo ngget nendaarak wonagagerak me, 42ko'lu Ala andomba warogo Patika lariyak pipuk aago me, ndi, ndo ti korok aret wonagagerak me, Yetut eebe nogo time aret mambereegwaarak.
Currently Selected:
:
Highlight
Share
Copy
Want to have your highlights saved across all your devices? Sign up or sign in