YAYA 21
21
Yetut nen at oone waganggwi mendek ineebe 7 nigiyareegerak wone
1Ti eeke nagagirik, peebi Yetut nen at oone waganggwi mendek yi yenggenak endage Tiberiyat paga wonogwe me, at eebe ambinom nigiya wagagerak. Nigiya wage logonet, eereegerak nogo yi o. 2At Timon Peterut inom, Tomat endage ambi Kulu'mbere ndarak toonak nogo inom, Nataneyen o Nggalileya awi Kaana mendek nogo inom, at Taberi apuri inom, aap Yetut oone waganggwi mbere inom, ambit me kuwak aago logonet, 3at Timon Peterut nen, ”Wologwe wae! An ikan wa na o.”
Yorage mbareegi, ”Ninom nawok o,” yogo nogogwaarik, wundi nanuk, yiiro paga unggwi nogo nogogwaarik, oonikiya ne ambit ti paga inayum wuppegaatak kwe, ikan yonggo'naga'lek aret wonagagerak. 4Inayum wuppugwi tit iigak, o wiganiyak aret eeke mbareegi, at Yetut nogo yi aa'nggi paga mi'nari wagagerak wonage kagak, at oone waganggwi nogo nen, ”Ti Yetut aret,” mbaka'lek wonogwe me, 5at Yetut nen, ”Napuri wae. Kit ikan ambi waganggotak ilik, lek a?”
Yorage mbareegi, ”Abu wagangga'lek tit ogoorik o.”
6Yogo mbareegwa, at Yetut nen, ”Yum ti, to abeenok kineenggi abe'nggan nggwe time wuppinip o. Wuppugwi kiinok, ikan ambik waamunggup o.” Yorage mbareegi, wuppogo nogogwaarik, ikan ambik yonggo'nagagerak me, niigogo to paga nippi woroorak abu meek aret agagerak.
7Nippi woroorak meek age mbareegi, at oone waganggwi mendek Yetut iniki kunik wonagagerak nogo nen Peterut yoge logonet, ”Wulaga! Aap ti ninogoba aret kagi o,” ari mbareegi, at Peterut aruk konembunuk, ambogoyum endekem mendek nggoorak nogo yikko'nok yiiro nogo mbo punuk yiime tabuk yi wambeegerak. 8Wangge nagagirik, nage kagak, yi aa'nggi paga korok we 100 meter negen wonagagerak me, Yetut oone waganggwi mendek ando nogo nen yum ikan eno korok togon yonggolak nogo yiiro paga niikkenok wundi nogogwaarak. 9Yi aa'nggi paga wundi nogo nogogwaarik, kani kunik anggen paga ikan inom, mbi inom, muk wora'nage mban inigen kogogwaarak. 10Inigen kogo mbareegwa, at Yetut nen, ”Wologwe wae. Ikan waganggotak nogo ando wonok wa'nip o.”
11Yorage mbareegi, at Timon Peterut yiiro paga unggwi nanuk, ikan ineebe 153 yum eno korok togon yonggolak nogo, niigogo yi aa'nggi paga pi wundeegerak. Ikan ambik yonggolak wonagagerak kwe, yum nibik yaga'lek aret wonagagerak. 12Yum nogo yi aa'nggi paga pi wungge mbareegi, ti'nuk, at Yetut nen, ”Kinambi na wa'nip o,” yorage mbareegi, ”Ninogoba aret o,” yinuk, yelok kogogwaarak kwe, it ambi nen, ”Kat ta o?” yoriyak inagabiti nen puk wonogogwaarak. 13Inagabiti nen puk wonogo mbareegwa, at Yetut nen mbi wagangge nagagirik, tumburiragagerak. Tumburirage nagagirik, ikan togop aret wagangge nagagirik, tumburiragagerak.
14Ti eereegerak nogo ti, Yetut kambunuk nogo menggam nen eenik a'nuk mi'nage nagagirik, at oone waganggwi mendek at eebe nigiyareegerak nogo ti, aa'nduk ne mbere paga nigiige nagagirik, peebi ne ambi paga nigiyareegerak nogo yi aret.
Yetut nen Peterut yoreegerak wone
15Mbi nonggo mbareegwa, at Yetut nen Timon Peterut nogo yoge logonet, ”Timon Yaya aput wae! Kat koreewi yi, iniki mbuuluk kunik ee'nakwi iigak, kat kiniki kunik nggwok togon ee'nake a lek a?”
Yoge mbareegi, at Peterut nen, ”E o, nogoba. An niniki kunik eekkake nogo, kat keenu aret o.”
Yoge mbareegi, at Yetut nen, ”An nandomba mbuulogwe ndegeninake logot o.” 16Yoge nagagirik, ti'nuk, ambinom yoge logonet, ”Timon Yaya aput wae. Kat an kiniki kunik ee'nake ilik, lek a?”
Yoge mbareegi, at Peterut nen, ”E o, nogoba. An niniki kunik eekkake nogo kat keenu aret o.”
Yoge mbareegi, at Yetut nen, ”An nandomba inambi liirogon wogorage logot o.” 17Ne mbere yoge nagagirik, ti'nuk, ne ambinom yoge logonet, ”Timon Yaya aput wae. Kat an kiniki kunik ee'nake ilik, lek a?”
Yoge mbareegi, at Yetut ne kenagan paga, ”Kat an kiniki kunik ee'nake ilik, lek a?” yoreegerak paga, at Peterut iniki maluk age nagagirik, ”Nogoba o. Kat yi abok ndi abok keenu aret me, an niniki kunik eekkake nogo kat keenu aret o.”
Yoge mbareegi, at Yetut nen, ”Nandomba ndegeninake, inambi wogorage, eeke logot o. 18Kat tawe logonet, kat kayum yikko'nok ambime noorak mbake'nom aret nage nagagindak kwe, peebi kanggok age logominggindik, keenggi ndek paga yorage kenok, kayum yippagago logomenggaarik, kat noorak keebi mbaremengge'nom nogome aret pagi nogo logogun o, yinuk, mondok abet aret yokkigi o”, yoreegerak. 19Ti yoreegerak nogo, at Peterut nonggop eeppugwi iinok, kambemenggerak nogo paga Ala tiyappuurak nduk, yoreegerak. Peterut nogo yoge nagagirik, ”Nimbirak nawok o,” yinuk, yoreegerak.
Yetut nen at oone wagangge ambi abok yereegerak wone
20Yoge mbareegi, nogo logonet, at Peterut ena logurogon pe'nage nagagirik, at Yetut oone wagangge mendek at iniki kunik aa'nduk mbi nunggwi me Yetut imbirak tebenak logonet, ”Nogoba wae. Ta nen konggo mbanigin o?” yoreegerak nogo inambokan wage enegen kagagerak. 21Kage nagagerik, Yetut yoge logonet, ”Nogoba o. Ndi, aap yi perak, nonggop o?”
22Yoge mbareegi, at Yetut nen, ”Wulaga! An nage logominggirik, peebi wage kuli ti paga, At yime eenik nege logorak op o, mbake kenok ti, nege logorak aret. Ndi, lek kenok ti, lek aret nogo ti kat kobaalombok lek me, kat perak, nimbirak nawok mban o,” yoreegerak.
23Ti yoreegerak nogo Yetut oone wagangge yi, ”Kambigin lek yigi,” yinuk, oreewi koneneegwaarak kwe, at Yetut nen, ”Aap ti kambigin lek o,” yinuk, ti yoroolik. Ata, at nen, ”An nage logominggirik, peebi an wage kuli ti paga at eenik yime nege logorak an op mbake neenok ti, kat kobaalombok lek me,” nduk, yoreegerak.
24Aap Peterut nen Yetut oone wagangge mendek enegen kenok, Yetut yoreegerak nogo ti, an neenok aret yoreegerak o. An nogo nen nenegen kenok, paganogo yokkirage, ndi, wone yugu liiru mbanogo pinagage, eekirak yi nogo ti, nit nineenu me, abet aret yokkiragi o.
Wone irip paga lombok liiru mbaneegerak wone
25At Yetut ambinom a'mban eeke nagagerak me, at eeke nagagerak nogo apit aret mbinuk-mbanak eerogo mbuku paga mbaninetak en, o nggween paga yi abu yagabit ngga pubok a'netak mbaki o.
Currently Selected:
YAYA 21: WNO
Highlight
Share
Copy
Want to have your highlights saved across all your devices? Sign up or sign in
