YAYA 4
4
Yetut kwe Tamariya mendek imbirak wone mbaneegwaarak wone
1Yetut nen at apuri ambik agago yiime wuppiige, ndi, Yaya perak, at apuri mbereeret negen agago yiime wuppiige, eekwi nogo, it aap Pariti mendek inaruk koneneegwaarak. 2(Ti koneneegwaarak nogo ti, at Yetut nen aakumi yiime wuppiyoolik kwe, at oone waganggwi nen mban yiime wuppiigwi iigak, yogwe nogo inaruk koneneegwaarak.) 3Inaruk koneneegwaarak at Yetut eenu age nagagirik, at o Yureya teppunuk, o Nggalileya aret wagagerak.
4Wage logonet, tu alik paga woroolik. Tu o Tamariya paga aret woroorak age mbareegi, 5wage logonet, aap Yakup nen at aput Yutup nggween wogoreegim korok kagak, o tini ambi endage Tikat aret panggo yi wagagerak. 6Aap Yakup niyo tookak yuurak nduk, nggween kabuneegim time aret wonagagerak. Ndi, at Yetut wage logonet, o liingge jam 12 negen age kagak, owak lek age mbareegi, niyo tooko menggam taa'nogo aret kwi'nari wagagerak.
7Time wonage me, it Yetut oone waganggwi mendek nen mbi onggo kunuwok ndu, 8o tini nogome unggwi nogwe iigak, at alik aret wonage me, kwe Tamariya mendek ambi niyo tookkolaakit nduk, wagagerak. Wage mbareegi, Yetut nen, ”Kwe yi wae. Niyo ambi too'niru o.”
9Yoge mbareegi, kwe Tamariya mendek nen, ”Ie! Kat aap Yakuri mendek me, an kwe Tamariya mendek nen niyo nonggop togon tookkiriyak nduk yo'negen o?” yinuk, yoreegerak. (Ti yoreegerak nogo ti, aakumi Yakuri mendek inom, aakumi Tamariya mendek inom, yiiwak ambit paga nunggulik me nduk, yoreegerak.)
10Yoge mbareegi, at Yetut nen, ”Ala nen onggo lek we wokkiriyak inom, ndi, aap nen, Niyo too'niru o, yokkege nogo eebe inom, kat keenu logonet, Niyo aakumi ineenik eeginake menggerak mendek wo'niru o, nggino yo'nenetak en, niyo ti mendek wokkenetak o.”
11Yoge mbareegi, kwe nogo nen, ”Nogoba o. Niyo yenggenak ogu teberogon wonage, ndi, kat kagiiwak lek me, niyo aakumi ineenik eeginake menggerak mendek ti, ngga nen too'niriyak nduk yagan o? 12At ninogoba Yakup niyo tookak yuurak nduk nggween kabunogo pinaneegerak nogo at inom, at apuri inom, at aanggumi inom, nonggo nogogwaarak kwe, at meek, ndi, kat iya me nduk yagan ya?”
13Yoge mbareegi, at Yetut nen, ”It aakumi niyo yi mendek nunggwi iinok, abu aganabigin kwe, 14niyo an nen wogoraminggirak nunggwi iinok perak, abu aganabigin mondok lek o. Niyo an nen wogoraminggirak nogo eneeri inikime nen kila-kila lagangge logonet, mondok-mondok ineenik aganake logogin o.”
15Yoge mbareegi, kwe nogo nen, ”Ai nogoba o. Niyo ti mendek wo'niru ubi! Wo'nege keenok, an niyo abu ee'nake, ndi, yime tookkola wage, eekak yigin lek aret o.”
16Yoge mbareegi, at Yetut nen, ”Kore yori nage logominggindik, kimbirak wa'nu o.”
17Yoge mbareegi, at kwe nogo nen, ”An nore lek o.”
Yoge mbareegi, at Yetut nen, ”Nore lek yagandak ti, abet aret yagan o. 18Kat kogonggelomini 5 wogonabeegindak nogo o. Ndi, yogondak aap kimbirak wonage nogo ti, kat kore lek me, yagandak ti abet aret yagan o.”
19Yoge mbareegi, kwe nogo nen, ”Ai nogoba! Kat Ala wone yorage menggendak mendek aret keegi o. 20Ninombomini puurom yi paga Ala alut eeko nogogwaarak kwe, kit nen, O Yerutalem mban Ala alut eeko logorak o, yogo monggotak.”
21Yoge mbareegi, at Yetut nen, ”Kwe yi wae! Puurom yi paga inom, o Yerutalem inom, ninogoba alut eeriyak lek eyom panggoni woraagin o, yinuk, yokkege yi, abet aret mbake logot o. 22Kit alut eeko monggotak eebe kineenggo'lek logonet, alut eeko monggotak kwe, at ninagap ndaka nit aap Yakuri ninenggela'me nen mi'narigin me, nit alut eekwi nogo perak, nineenu logonet, alut eeko monggoorak. 23It aakumi ninogoba abet togon alut eekwi ti, at Aberiniki Ala ndogop menggerak yo'nirage menggerak nogo nen yorage kagak alut eeko logorak eyom peebi kwe, yogondak muk wagaarak o. At ninogoba nen it aakumi togop aret alut ee'nako logowak, mbake menggerak. 24Ala ti aakumi inogoma pogom me, it aap at alut eeriyak mbakwi nogo iniki paga nen abet mba'nuk, at alut eeko logowak o.”
25Yoge mbareegi, at kwe nogo nen, ”At Mesias endage Keritut yogo monggoorak nogo woraagin an neenu aret o. At nogo wage logominggirik, yi wone ndi wone apit aret yo'nirage logogin o.”
26Yoge mbareegi, at Yetut nen, ”At nogo kat nimbirak wone mbangge an aret o,” yinuk, yoreegerak.
27Yoge wonage me, Yetut oone waganggwi nogo wogogwaarak. Wogo nogogwaarik, at Yetut kwe imbirak wone mbanggwi kogo nogogwaarik, ”Wi!” yereegwaarak. ”Wi!” yinuk, ”Kat nonggop mba'nuk wagan?” Ndi, ”Kat kwe yi, kimbirak nonggop nduk wone mbangge agandik?” yoruwok mbareegwaarak kwe, yoga'lek aret wonogogwaarak.
28Yoga'lek wonogwe iigak, kwe nogo nen agiiwak mbo punuk, ame nage nagagirik, aakumi yoranet nage logonet, 29”Aap an yi eekak ndi eekak eeke nagagirak nogo abok paganogo yo'negerak me, kaabagip nduk wa'nip o. Ala nen leenogo mippereegerak nogo ti aret ilik?” 30Yorage mbareegi, iname nen wogo nogogwaarik, Yetut owagam wogogwaarak.
31Awo wogwe iigak, it Yetut oone waganggwi nen at Yetut yogo logonet, ”Ngguru wae! Mbi yi namen o.”
32Yori unggwogogwaarak mendek at Yetut nen, ”An nambi ti, kit kineenggo'lek mendek nengge agarik o.”
33Yorage mbareegi, at oone waganggwi it mban-mban wone mbanggo logonet, ”At noorak mbi ambi wogori wagaarak ilik?”
34Yogo mbareegwa, Yetut nen, ”At nappani wagagerak mbake menggerak eeriyak inom, ndi, at eeriyak mbake menggerak nogo an nen worok togon eeriyak inom, ti an nambi aret o. 35Kit nen, Tut 4 penembunuk, anggen yugu kole ariyak eyom panggoni wagaarak me, mbanuwok o, yogo monggotak nogo lek a? Yogo monggotak kwe, an nen yogondak aret yabu yarak me kinigen pekkaabagip nduk, yokkirage agarik o. Eebe kole age logonet, agari abu yi'nip agaarak me, mbaniyak aret agaarak o. 36Aap ambi awi yake, ambi anggen mbangge, eekwi nogo imbirak ambugwi aret iniki ale'nggen mbaruwak nduk, at anggen mbangge nogo onggo kolage menggerak aret o. At onggo kolage ti, it aakumi mondok-mondok ineenik logowak nduk anggen mbanak kwak kuwak eerogo piige nogo aret o. 37Aap ambi awi yake, ndi, ambi anggen yugu mbangge, eekwi o, yinuk, yogo menggaarak wone nogo ti abet aret o. 38An nen kit yabu yareegu'nom anggen yugu yi'nip agaarak mbanubagip nduk nappinagulik o. Ata, aap inambik yareegwam time aret nappinagagirak me, anggen yugu mbanggo ogotik o,” yinuk, yoragagerak.
39Ndi, at kwe nogo, ”Aap an yi eekak ndi eekak eeke nagagirak abok aret paganogo yo'negerak o,” yinuk, yoranet nage nagagerak kwe nogo wonagagim paga aakumi Tamariya mendek ambik iniki Yetut oba panggombunuk, abet mbareegwaarak. 40It iniki Yetut oba panggombunuk, abet mbareegwaarak me, it aakumi Tamariya mendek nen Yetut owagam wogo nogogwaarik, ”Ninom logowok o,” yinuk, yogo mbareegwa, at Yetut ne mbere inom aret wonagagerak.
41Inom logonet, Yetut wone yoragagerak paga aakumi ambik iniki at oba panggombunuk, abet mbareegwaarak. 42Abet mbako nogogwaarik, it nen kwe nogo yogo logonet, ”Kwe yi wae! Yogondak kat yo'niragandak paga mban lek o. Nit nen aret at oone ninaruk konenggo nogoorik, aakumi abok inagap ndaka abet aret nineenu ogoorak me, ti paga niniki at oba panggombunuk, abet mbako ogoorik o,” yinuk, yoreegwaarak.
Yetut aap pemerintah mendek aput obeelom eereegerak wone
(Mat 8:5-13, Luk 7:1-10)
43-44Yogo mbareegwa, at Yetut nen, ”It aap inowe-inawot inenggela'me logonet, Ala wone yorogwe iinok, inaruk liirogon konenggulik o,” yinuk, yereegerak me, ne mbere iluk inom wonagagirik, time nen o Nggalileya aret wagagerak. 45It aap Nggalileya mendek nen o Yerutalem laago lakome wambi nogo nogogwaarik, nogome logonet, Yetut laago lakome eerit nage abok inigen kogogwaarak me, Yetut o Nggalileya unggwi wage mbareegi, keyage warogo waganeegwaarak.
46Waganggo mbareegwa, at Yetut o Nggalileya tini Kaana aa'nduk niyo anggur amburu eereegim nogome aret wagagerak. Wagagerak wonage me, aap pemerintah mendek ambi apuluk o Kaperenaum andi wonagagerak me, 47aap nogo Yetut o Yureya nen o Nggalileya wagaarak konembunuk, Yetut owagam wambi nage nagagirik, at apuluk andi abu kambuurak lombok eereegerak me, obeelom eeri nawak nduk, yoreegerak. 48Yoge mbareegi, at Yetut nen, ”Kit eerubok mendek eeke inom, kineenu ariyak kinagabiti warak mendek eeke inom, eeke neyaamunggup lek kenok, kiniki noba panggombunuk, abet nombarumunggup lek kiigi o.”
49Yorage mbareegi, at aap pemerintah mendek nogo nen, ”Ai nogoba o! Napuluk awo kangga'lek kagak aret mbet-mbet nawi o.”
50Yoge mbareegi, at Yetut nen, ”Kapuluk eenik arigin me, kiniki ugun aret kame nak o.”
Yoge mbareegi, aap nogo nen Yetut wone yoreegerak nogo abet mbake nagagirik, aret wagagerak. 51Awo tu paga wage mbareegi, at ayeloman tu paga yori nogwe me inom lambumbunuk, ”Kapuluk nogo muk eenik agaarak o,” yinuk, yoreegwaarak.
52Yogo mbareegwa, at nen, ”Oonegen ngga ari nage kagak, eenik agaarak o?” Yorage mbareegi, it nen, ”Kobit liingge jam 1 paga nen inikime kani pereegerak nogo lek agaarak o.” 53Yogo mbareegwa, wulaga ogoba nogo nen, ”Kobit liingge at Yetut nen, Kapuluk eenik arigin o, yo'negerak nogo ndak-ndak liingge aret eenik agaarak kagi,” yinuk, abeke nagagirik, at inom, at apuri inom, abok aret iniki Yetut oba panggombunuk, abet mbareegwaarak.
54At Yetut o Yureya nen o Nggalileya unggwi wage nagagirik, nogome logonet, aakumi ineenu ariyak inagabiti warak mendek aa'nduk ambi eereegerak me ambokan eereegerak ti aret o.
Currently Selected:
YAYA 4: WNO
Highlight
Share
Copy
Want to have your highlights saved across all your devices? Sign up or sign in
