LUKAT 10
10
Yetut nen aap 70 nappiyareegerak wone
1Ti'nuk, peebi ninogoba endagembogut nen aap alik 70 leenogo mippiige nagagirik, yi awi ndi awi o tini lombok noorak mbareegim nogome it inaa'nduk mbere'ndak lombok mban nappiyareegerak. 2Nappiige logonet, ”Eebe yugu ka'let agaarak kwe, mbanggo menggaarak ineebe mbereeluk me, at yabu unde nogo nen anggen yugu nogo mbaniyak nappiyaawak nduk, yo'nip o. 3Ndi, kit perak nanip o. An nen kit ndomba kwak yi, aakumi nggeewo endekem mendek pogom wonogwe me, inowagam nappinagage agarik o. 4Nappinagage me, kinawu nggerenak inom, wokkirogwe yonggoliyak yum nogo inom, kiniyogogut nggerenak inom, ti wonok nagup o. Ndi, tu paga nogo logonet, it aakumi iinok, keyage wappiinet nagup o. 5Aakumi iname ambime unggwogo logomonggotik, aa'nduk keyage wappiigo logonet, Wa! Kinale'nggen, yoranu o. 6Yorogo logomonggotik, it aakumi time nen kinale'nggen inoba piyamonggotak nogo paga, Yi nit ninoreewi aret o, yinuk, wokkinakwi iinok, kinale'nggen inoba aret logogin o. Ndi, wokkinaburak ineebi mbakwi iinok ti, kinale'nggen ti'nuk, kit kinoba aret ari woraagin o. 7It aakumi nen kit wokkinaburak mbakwi iinok, iname kinom time aret logonu o. Kinom logonet, it aap yabu eeko menggaarak yabu onggo woorak op aret me, kinambi yi mendek ndi mendek makkirogwe iinok, ti aret nonggo logonu o. Ya nogo yegak nda nogo yegak eerit nugu logobok o. 8Kit o tini ambime unggwi namonggotak me, keyage warogo wokkinakwi iinok, inambi makkirogwe ti aret nonggo logonu o. 9Ndi, aakumi time kugi andi wonogwe iinok, obeelom eeginako logonet, Ala abu'me pinagarak muk kinowagam panggo yi wagaarak o, yinuk, yorogo logonu o. 10O tini ambime unggwi namonggotak me, it aakumi nen keyage warogo wokkinakwi lek iinok perak, endekem tu nggwok paga wundi nogo logomonggotik, yorogo logonet, 11Nit kiname logonet, liirubu niniyok paga lenggenggerak nogo aret kineraaket nen yumbunogo pinagago ogoorik. Ala abu'me pinagarak muk kinowagam panggo yi wagaarak, mbako logonip yoranu o. 12Peebi age yobok ti paga it aakumi Torom mendek ti mbuuluk inoorigin kwe, it aap o tini time mendek nogo ti, mondok nggwok aret inoorigin o, yinuk, yokkirage agarik o,” yoragagerak.
Yi o ndi o abet mbaka'lek kenok, yoragagerak wone
(Mat 11:20-24)
13”Kit aakumi Koratim mendek yi kinabuwa o! Kit aakumi Mbetariya mendek yi kinabuwa o! Eerubok mendek kiname eeke kogotak nogo o Tirut Tiron time eeke logonetak en, it aakumi time mendek nen kwi'na'nuk inayum maluk yikkologwe, purok inagabolo paga yi kut eerogo pakwi, eeko logonet, inomaluk maan mbo penetak. 14Peebi inowak looniyak eyom paga aakumi Tirut Tiron mendek ti, we mbuuluk inoorigin kwe, kit perak, mondok nggwok aret kinoorigin o. 15Kit aakumi Kaperenaum mendek yi, kit mbogut paga nagawan me tiyappinanigin nduk, yogo ogotik? Mondok lek o. It kambunuk nogo menggam ogu time aret wuppinagarak mbako logonip o.”
16Yorage nagagirik, at oone waganggwi mendek yorage logonet, ”It aakumi kit kinoone konenggwi kenok ti, an noone aret konenggwi, kit mbo pinagagwi kenok ti, an aret mbo panugwi, ndi, it nen an mbo panugwi kenok ti, at nappani wagagerak nogo aret mbo pugwi, eeko menggaarak aret o,” yinuk, yorage nagagirik, nappiyareegerak.
It aap 70 nogo iniyok paga wogogwaarak wone
17Nappiyareegerak ti'nuk, peebi it aap 70 nogo inale'nggen mbakak iniyok paga wogo logonet, ”Ninogoba o! Kugi kunduk kat kendage kunogo yorogwe niinok, konenggwi iigoorak o.”
18Yogo mbareegwa, at Yetut nen, ”At Ibilit o yabok eeke nogo pogom mbogut paga nen wangge kagagirak o. 19Waalo nggitamuru kiniyok paga aan mbelenogo pugwi, at kinom wim mbanak nogo omaawi lek eerogo tebenogo pugwi, eeko logobagip nduk, an nawone kilikkiragarak. Nawone kilikkiragarak me, maluk ambi kinoba arigin mondok lek aret o. 20It kugi kinoone konenggo menggaarak nogo paga kiniki ale'nggen mbarugup o. Ata, kinendage agi mbogut paga liiru mbanak wonage nogo paga kiniki ale'nggen mbako logonip o,” yinuk, yoragagerak.
Yetut nen iniki ale'nggen logonet, Ala keyage wareegerak wone
(Mat 11:25-27, 13:16-17)
21Yorage nagagirik, ne ti eyom paga Aberiniki Yetut inikime wonage me keyage wake logonet, ”Mbogut nggween unde kat nogoba wa yokkege agarik o. Kat eeriyak yi nogo it aap iniki warak inom, iniki ngget inom, ineenu ogwe iyo, nobappunuk, mbuulogwe ngget ndarak pogom paganogo yoragagindak me wa! Kinikilom mba'nuk eereegindak me, nogoba wa yokkigi o.”
22Yoge nagagirik, ”An nogoba nen yi mendek ndi mendek abok aret an unde logokit nduk, wo'nereegerak. Ala aput ti ta o? It aakumi ineenggo'lek nogoba alik mban eenu menggerak. Ndi, nogoba ti ta o? Ti, at aput an nalik mban neenu minggirak. Ndi, aput an nen it aakumi nogoba ineenu aruwak nduk, paganogo yoroorak mbake neenok, it kunduk ineenu ogo menggaarak o,” yinuk, yoragagerak.
23Yorage nagagirik, at oone waganggwi enegen pegiige nagagirik, inaliget yorage logonet, ”Kit kinigen kogwe nogo, it aakumi kogwe kenok, iniki ale'nggen aret kogo logogun o. 24Kit kinigen kogwe nogo it Ala wone yorogo nogogwaarak nabi-nabi mendek inom, it aap inendagembogut inom, it apit nen, Kaawok lak ao, mbako nogogwaarak kwe, kaga'lek aret wonogogwaarak. Ndi, kit konenggwi nogo it nen, Konenuwok lak ao, mbako nogogwaarak kwe, konengga'lek aret wonogogwaarak o, yinuk, yokkiragi,” yoragagerak.
Aap Tamariya mendek iniki obeelom me, eegu laarogo yoragagerak wone
25Ti yorage mbareegi, peebi ne ambi paga aap Ala wone liiru mbanak unde ambi Yetut abut mbanikit nduk, wage nagagirik, yoge logonet, ”Ngguru wae. An mondok-mondok neenik logokit nduk, nonggop eeri o?”
26Yoge mbareegi, at Yetut nen, ”Ala wone lengganeegerak liiru mbanak ti, nonggop mbanak o? Kat nonggop pekkage menggendak?”
27Yoge mbareegi, aap nogo nen, ”Kineebe-kinomaawi inom, kiniki-kinogoma inom, abok aret kinogoba endagembogut Ala mban kiniki kunik eeko logonip o. Ndi, ambi, Kit kineebe kiniki kunik mbako monggotak nogo kwak, it kinom monggotak nogo togop aret kiniki kunik inombako logonip o,” yinuk, yoreegerak.
28Yoge mbareegi, at Yetut nen, ”Op yagan o. Yagandak nogo ndak-ndak eeke keenok, keenik aret logomunggun o.”
29Yoge mbareegi, aap nogo, ”An op aret yagarak,” nombaruwak nduk, Yetut yoge, ”Ndi, niniki kunik eeginabikit nen it ninom wonogwe ta o?”
30Yoge mbareegi, at Yetut nen, ”Aap ambi o Yerutalem nen o Yeriko lagi wagagerak. Lagi wage me, aap yogoot wagangga nogo nen pilak togon wunggo logonet, ayum ageerok apit ndinggo logonet, eebe wappogo nogogwaarik, taati kambuwak nduk, mbo punuk, mbaganeegwaarak. 31Mbaganggwi iigak, peebi aap Ala unde ambi we ugun tu ti paga nage me, aap warak nogo kage nagagirik, kagak nagagerak. 32Nage mbareegi, peebi aap Leewi mendek ambi togop aret tu ti paga ugun nage me, aap wareegwam wok yi wage logonet, eebe warak kage nagagirik, kagak mban nagagerak. 33Nage mbareegi, peebi aap Tamariya mendek ambi tu ti paga nage me, aap warak nogo enegen kagagerak. Enegen kage nagagirik, abuwa mba'nuk, owagam nage nagagirik, 34agabolo nibinik-ndelenak aago nogo anggur amburu nogo inom, amburu alik mendek inom, labunogo nggerembege, ndi, eebe waganogo at aango keledai nogo paga kwippege, eeke nagagirik, aakumi nogo yugu menggam ambime pi unggwagagerak. Pi unggwage nagagirik, time arum aret wonagagerak. 35Ko'lu at awu mbere waganogo aap nogo yugu menggam unde nogo wogoge logonet, Aap yi arum logot o. Arum logonet, wokkigirak yi nogo lek age kenok, kat kamendek ambinom nabenogo kungge logomenggendak kenok, an wage logominggirik, obaane'me wokkirigin yoreegerak o,” yinuk, Yetut nen aap Ala wone liiru mbanak unde nogo yoreegerak.
36Yoge nagagirik, ”Aap kenagan nogo it aakumi inom logonet, iniki kunik mbakwi pogom ambi ta nen aap yogoot wagangga nen wareegwaarak nogo iniki kunik mbareegerak mbaken o?”
37Yoge mbareegi, at aap nogo nen, ”Aap at abuwa nen obeelom eeppereegerak nogo aret o.”
Yoge mbareegi, at Yetut nen, ”Kat ti ndak-ndak aret eeri nak o,” yinuk, yoreegerak.
Yetut nen Mariya Marata imbirak pegiya nagagerak wone
38Yoge nagagirik, peebi Yetut oone waganggwi inom nogo logonet, o tini ambime unggwi nogo mbareegwa, kwe ambi endage Marata nen Yetut at ame unggwi woraawak nduk, yoreegerak. 39Yoge mbareegi, unggwi nagagerak wonage me, kwe Marata awuluk endage Mariya nogo Yetut abu'me kwi'ndak logonet, oone konengge kagak, 40Marata perak, Yetut ake yi wa nagak, ndi wa nagak ta'liila eerit nage nagagerak. Eerit nage logonet, Yetut owagam wage nagagirik, ”Nogoba wae. Nalik kat kake eeke logokit nduk, nawuluk teppanegerak kat neega'lek a? Yeenggwaniruwak nduk, yoru ubi!”
41Yoge mbareegi, Yetut nen, ”Marata wae. Kat yi eeriyak ndi eeriyak mban kiniki piirik logonet, koba aanggin-paanggin eekko'net nage keegi o. 42Ambiret mban miippunuk, eeriyak perak op o. Ndi, kat kawuluk Mariya nen eeriyak ti aret miikerak me, Mage, yoriyak ti, mondok lek o,” yinuk, yoreegerak.
Currently Selected:
LUKAT 10: WNO
Highlight
Share
Copy
Want to have your highlights saved across all your devices? Sign up or sign in
