LUKAT 12
12
Iniki laakot paga eerit nugwi iinok, yoragagerak wone
(Mat 10:26-27)
1Wone ti yorage me, it aakumi yi aap ndi aap apit ineenggi ribu-ribu aret kuwak eeppunuk, inobogom nen taga'mbit eerogo piigwi iigak, at Yetut nen at oone waganggwi mendek inaa'nduk yorage logonet, ”It aap Pariti nogo nen iniki laakot logonet, yokkirogo menggaarak me roti mbi piike minggi kwak inoone agan nugwi nogo waganggwi kiyo, tum wakkologo logonip o. 2Yi eekwi ndi eekwi nobarak wonage kenok, pilak ari, ndi, kiraarak wonage kenok, pagak ari, eerigin o. 3Togop me, kit o apit me logonet, yogo nogogutak nogo o eya paga konenggwi, ndi, oome logonet, yagakop wone yogo nogogutak nogo o kirin paga nen kuum-keek paga pagak ari, eeke kaamunggup o,” yinuk, yoragagerak.
Ala kenok ninagabiti mbako logorak wone
(Mat 10:28-31)
4Yorage nagagirik, ”Noreewi o. An wone ambi yokkira o. Aakumi nen kinagabolo mban kinooko menggaarak nogo ti, kinagabiti mbarugup o. Kinooppunuk, nonggop eeppinagarak mbakop? 5Kit kinagabiti mbarumunggup nduk, kurumbi yokkira o. At kinagabolo mondok kinooppunuk, kani omoonuk wunuk mban ari minggim nappinagarak unde menggerak ti perak, kinagabiti mbako logonip o. At mondok kinagabiti mbako logonip o, yinuk, yokkirage agarik o.
6 Rupiah mbuulogwe mbere paga towe yiluwe ineebe 5 lambuk togon kunggo menggaarak nogo lek a? Togop aret kunggo menggaarak kwe, at Ala nen ambit iluk ambi kobak eerogo pege menggerak abu lek o. 7Kineeruwak kunduk abok aret at Ala nen eenggi lingginik menggerak. Towe mbuulogwe ineebe apit lambuk togon at iniki kundugu lek negen kwe, kit perak, at iniki kundugu nggwok lombok mbake menggerak me, kinagabiti mbako logogup o.”
”Yetut ninowe aret o”, kin paga yogo logorak wone
(Mat 10:32-33, 12:32, 10:19-20)
8Wone yorage nagagirik, ambinom yorage logonet, ”Kit aakumi inenggaanom, Yetut ninowe aret o, yinuk, paganggwi kiinok, an aap aret nda'nagagirak nogo nen it mbogut paga yonggo Ala nen nappiya wage menggerak melaikat nogo inenggaanom paga, Aap yi an nawuri aret o, yinuk, paganiraagin o. 9Ndi, kit aakumi inenggaanom paga, Yetut ti, nineenggo'lek o, yogwe kiinok perak, an kunduk, it mbogut paga yonggo Ala nen nappiya wage menggerak melaikat nogo inenggaanom paga, It aakumi ti, an neenggo'lek o, yinuk, ari neyaamunggup o, yinuk, yokkiragi o.
10An aap aret nda'nagagirak nogo kinoone miyuk-meya eerogo panugwi kiinok, kinomaluk ti, Ala nen lek eerogo pinagarak op aret kwe, Aberiniki miyuk-meya eerogo pugwi kiinok perak, kinomaluk ti, Ala nen lek eerogo pinagagin mondok lek aret o. Mondok iitok kunik aret logogin o.
11It aakumi Yakuri tamban eeko menggam kuwak aago inom, it aap inendagembogut inom, it aap iyo'nggok inom, inowagam wokkiret pinagi nogwe iinok, kiniki piirik logonet, Ninaana'le mbanggoloorak nduk, wone ngge yoraamun? yinuk, koonugup o. 12Ti eyom paga wone yoroorak nduk, Aberiniki nen yokkirage kaamunggup o,” yinuk, yoragagerak.
Aap eenggi warak kwe iniki wi pogom eegu laarogo yoragagerak wone
13Yorage mbareegi, it aakumi ambik kuwak aago nogo ambi nen Yetut yoge logonet, ”Ngguru wae. An noweeluk nen nogoba eyate ando mogonniruwak nduk, yoru o.”
14Yoge mbareegi, at Yetut nen, ”Kinowak loonogo kineyate tumbukkiragak yuwak nduk, an aret mippaneegerak mbaken?” 15Yoge nagagirik, Yetut nen aakumi yorage logonet, ”Kinamendek apit wonage nogo paga kineenik eeko logorak lek me, uugwe-uugwe mbakwi kiyo, kiniki tum wako logonet, liippinip o,” yoragagerak.
16Yorage nagagirik, wone ambi eegu laarogo yorage logonet, ”Aap eenggi warak ambi nen iri'ngga awi nggween mili paga yareegerak me, anggen yugu ka'let agagerak. 17Anggen yugu ka'let age mbareegi, iniki koongge logonet, Yakirak anggen yugu mbanak puurak o lek me, nonggop eeri? 18Ari nagagirik, Yogobi eerikit. O yi mingge logominggirik, nggwok lombok wuppunuk, namendek inom, yakirak anggen yugu nogo inom, time aret pi unggwage logokit o. 19Pi unggwage logominggirik, Namendek apit kuwak eerak wonage kagak yi tahun ndi tahun eeriyak me, yogondak yonggonggolage logonet, mbi nenet nage, amburu nenet nage, i'ndok mban agan nage, eeke logokit o, yinuk, niniki wone yo'nuk eerigin o, yereegerak. 20Yereegerak kwe, at Ala nen, Kat aap wi yi, wae! Yogondak oonikiya yi paga aret kat kiniki wa wage me, kat pipuk eerogo pakendak nogo peebi ta nen unde logorak mbaken o?
21Yinuk, yorigin me, Ala nen it aakumi agi mendek paga ineenggi lek logonet, ogu mendek paga mban ineenggi warak eekkologwe iige kenok, at aap ti ndak-ndak aret wonogwe iige menggerak o,” yinuk, yoragagerak.
”Kiniki piirik eerugup o,” yoragagerak wone
(Mat 6:25-34)
22Yorage nagagirik, at oone waganggwi nogo yorage logonet, ”Nineenik logorak nduk, ninambi nano namun? Ndi, nineebe ninayum nano yikkolaamun? yinuk, kiniki koonggo logonet, kiniki piirik logogup o, yinuk, yokkiragi o. 23Nonggo monggotak ti meek negen kwe, kineenik logorak ti, iya o. Ndi, yikkologo monggotak ti, meek negen kwe, kineebe nogo ti, iya o. 24Towe nggindooni eeko menggaarak nogo liippinip o. Awi yakkologwe, anggen mbanggologwe, ti eekulik o. Ndi, anggen mbanogo pi unggwogo menggam o kunduk lek mban kwe, at Ala nen inambi wogorage menggerak. Towe ti, at iniki kundugu mbuuluk negen kwe, kit perak, at iniki kundugu lombok wonogwe yi kogo ogotik? 25Kit ambi kambuurak eyom panggoni wagaarak kagak, Neenik ambinom logonuk, kambikit, mba'nuk, kiniki koonit nugwi paga ndak-ndak eekkinake kaamunggup mbakop? 26Togop eekkinabigin lek me, abu mbuuluk eeriyak mendek eeriyak meek kogotak kenok, iya eeriyak mendek ti, Nonggop eeri? yinuk, kiniki piirik ogotik? 27Waambi anggen lagangge menggerak nogo liippinip o. Aap Talomo aap nggwok abu abe mban kenok, aakumi nen, Wi, ugu nogogwaarak nogo kwe, at meek negen o. Waambi anggen ti perak, yabu wagangge, ligi laangge, eekeelik kwe, Ala nen unde wake kagak, anggen mondok abe kigirikwe yege menggerak me nduk, yokkiragi o. 28Iri'ngga-kale'ngga endekem yogondak ki lagangge, ndi, ko'lu tek kani pugwi iinok, nengge, eeke menggerak kwe, at Ala nen enete abe eerogo pege menggerak me, at nen iri'ngga nogo mbuuluk eeppege, ndi, kit aap kiniki at Ala oba panggombunuk, liirogon abet mbaka'lek mendek yi, kit mondok nggwok lombok eeppinagage, eerigin lek mbakop? 29Ninambi-ninagi nano namun? yinuk, kiniki koonit nugwi ti, mage o. Kiniki piirik logogup o. 30It aakumi endekem mendek nogo nen ti mendek abok aret kwaarit nugu menggaarak kwe, kit perak, Nit ti mendek lek o, yinuk, uugwe mbakwi nogo at kinogoba nen eenu menggerak o. 31Kit aa'nduk Ala abu'me pinagarak nduk, Ao, mba'nuk, mugurok nogwe kiinok, ti mendek abok aret oba luunogo wokkirage kaamunggup o,” yinuk, yoragagerak.
Inamendek kuwak eerogo mbogut paga patiyak wone
(Mat 6:19-21)
32Yorage nagagirik, ”Naanggumi logwe wae! Ala nen kit at abu'me pinagarak inikilom mbareegerak me, kinagabiti mbarugup o. 33Kinamendek paga wu kunggo logomonggotik, aap ineenggi lek kenok, wogoraanip o. It aap yogoot iyagalo kiraari unggwage, waalo yinuwo nibini unggwage, eekeelik minggim mbogut paga time kinamendek abe lek ariyak lek nogo mendek yonggolak logowak nduk, yumunggwok awi nibik yuurak lek nogo mendek yikkologo logonip o. 34Kinamendek kuwak eerak wonage me, kiniki kunduk, time aret logogin o,” yinuk, yoragagerak.
Ala ayeloman kenok li'luk eerak logorak wone
35”Kinayum-kinagabe'le nggirik-nggerok yirik logonet, ndi kineenggi me wuninik mondok li'luk aago logonip o. 36Aap kwe kolage me laago lakome nogome nen ame tu puk-puk eeri wage kero, ayeloman nen mbet-mbet tu paakkoorak nduk, tokkogo mengga kwak logonip o. 37Inogoba nen ayeloman ineenik logonet, tum wakwi iya wage kenok, inale'nggen mbarigin o. Tum wakwi wonogwe me iya wage kenok, ogoba nen ayumunggwok nggooppunuk, at awuri inanoniya larak nawak nduk, ambime kwippiinok, inake eeke logogin o, yinuk, abet aret yokkirage agarik o. 38Nogo iniki mbere eeke paga ilik, o wege paga a, wage logominggirik, ayeloman togop wonogwe iinok, inale'nggen mbarigin o. 39At aap awi unde nen yogoot iyagalo ne ndi eyom paga woraagin, ee'nu a'netak en, tu paappunuk, amendek kiraari unggwage kero, nogo yega'lek mondok-mondok tum wake logonetak o, yinuk, mbako logonip o. 40An aap aret nda'nagagirak nogo o ndiyom paga woroorak nombaka'lek kiigak, woraagin me, kit kunduk mondok li'luk eeppunuk, logonip o,” yinuk, yoragagerak.
Aap ambi nen ugun-ugun eeke, ambi nen li'lak eeke, eereegwaarak wone
(Mat 24:45-51)
41Yorage mbareegi, Peterut nen Yetut yoge logonet, ”Nogoba o. Wone eegu laarogo yo'niragandak yi ti, nit mban yo'niragan ilik, it aakumi abok aret yoragan a?”
42Yoge mbareegi, at ninogoba endagembogut nen, ”Ti kenok, aap nggwok ayeloman ambi nen ogoba apuri inarum logonet, inambi noorak wogorage logowak nduk, mippuurak ambi iniki warak yabu li'lak eeke menggerak ta o? 43Ogoba nen ayeloman ambi togop eeke me ka wage kenok, ayeloman nogo iniki ale'nggen arigin o. 44Ogoba nen ayeloman nogo togop eeke me ka wage kenok, amendek abok aret at unde logowak nduk, mippigin o, yinuk, abet aret yokkirage agarik o. 45Ndi, ayeloman nogo nen iniki ambi mbake logonet, An nogoba elaambirik logonuk woraagin mbakwi o, yinuk, at ogoba ayeloman kumi aap inom yawi inooke, yi mendek ndi mendek ugun lagap mban nenet nage, amburu kumili aganakwi mendek nengge logonet, kumili kunit nage, eerit nage kenok perak, 46ayeloman nogo nen, Nogoba ne ndi eyom paga woraagin o, ndi, Oonegen ndi paga woraagin o, mbaka'lek ugun kobak wonage me wage logominggirik, ayeloman eebe nibik-nobak mbanogo it aap iniki at oba panggombunuk, abet mbaka'lek piige minggim nogome aret nappigin o.
47Aap ayeloman ambi ogoba eeriyak mbareegerak nogo eenu wonagagerak kwe, li'luk eeppunuk, eeka'lek kenok, yawi paga nggwiirit wake kaamunggup. 48Ndi, ayeloman ambi ogoba eeriyak mbareegerak nogo eenggo'lek logonet, alik eereegerak paga onggo yawi nggwiirit wariyak aret kwe, mbuuluk wake kaamunggup o. Nggwok aret wokkirogo logomenggaarik, peebi, Nggwok aret, wo'niraanip o, yinuk, yokkirogwe, ndi, unde logobagip nduk, nggwok aret wokkirogo logomenggaarik, peebi abunuk. Iya negen wo'niraanip o, yinuk, yokkirogwe, eekwi iyaamunggup o,” yinuk, yoragagerak.
Ogoorogo piyaakit nduk, wagagerak wone
(Mat 10:34-36)
49Yorage nagagirik, ”An o yi abok kani pikit nduk wagagirak me, mbet-mbet pigibok eekirak me, ao mbake agarik o. 50Aakumi yiime wuppiigwi kwak an ambi eeppaniyak nduk wonage kwe, eeppanega'lek me, niniki abu meek lombok ee'nake o. 51It aakumi o nggween paga yime menggaarak inom lambumbiyoorak nduk, wambi wagagirak mbakop? Lek o. Ogoorogo piyaakit nduk, wambi wagagirak o, yinuk, yokkirage agarik o. 52Yogondak nen aap ambi apuri 5 kenok, inom ogoorak logonet, kenagan nen mbere inom ogoorak, ndi, mbere nen kenagan inom ogoorak iyaamunggup o. 53Inom ogoorak logonet, ogoba nen aput wake, aput nen ogoba wake, agalo nen aagaluk wake, aagaluk nen agalo wake, eenggelo nen atuuluk wake, atuuluk nen eenggelo wake, eekwi iyaamunggup o,” yoragagerak.
O etenggen age paga liipppuurak wone
(Mat 16:2-3)
54Yorage nagagirik, it aakumi apit yorage logonet, ”Ndugwi oonegen kilu yi nage minggim barat pa'nggwe nen lagi wage kenok, E! Ti mayu woraakit nduk, eeke kagi, yogotetak me, mayu aret wage menggerak. 55Ndi, o wiya selatan pa'nggwe nen warit wage kenok, E! Ko'lu o kibi arigin kagi, yogotetak me, ko'lu kibi aret age menggerak. 56Kit kiniki laakot logonet, yogo monggotak yi wae! Nggween mbogut enete liippunuk, Ti togop eerigin kagi o, yinuk, yogo monggotak kwe, yogondak yi eyom paga eeriyak nogo kit nonggop nduk, liippunuk, E! Ti togop aret eerigin kagi, yinuk, yaga'lek aret ogotik?” yinuk, yoragagerak.
Inom ogoorak wonage kenok, mbet-mbet lambunggo logorak wone
(Mat 5:25-26)
57Yorage nagagirik, ambinom yorage logonet, ”Obeelom eeriyak yi aret kagi, yinuk, kinalitak lombok liipuurak op aret kwe, nano nduk liippega'lek aret ogotik? 58Aap kinom ogoorak kinom aret aap inowak loongga ka nogwe kenok, at kinom ogoorak nen nikkiret aap owak loongga owagam pinagi nage, ti'nuk, aap inowak loongga nen polisi owagam pinagi nage, ti'nuk, polisi nogo nen aap keele maarogo mambiigo menggam mambinagage, eekwi iyo, tu paga awo kinom nogo logonet, mbet-mbet paganogo kinom kiniki lambuniyak o. 59Keele maarogo mambiigo menggam mambinagagwi iinok, at kinom ogoorak wonage nogo anomat mbanak onggo ando awu wogoga'lek kiinok, time nen wumbinagagin mondok lek aret o, yinuk, yokkiragi o,” yoragagerak.
Currently Selected:
LUKAT 12: WNO
Highlight
Share
Copy
Want to have your highlights saved across all your devices? Sign up or sign in
