LUKAT 15
15
Aap ambi aanggo kobak agagerak wone
(Mat 18:12-14)
1It aap pemerintah inake kuwak eeko menggaarak inom, maluk eeko menggaarak inom, abok aret Yetut oone konenuwok nduk, at owagam wogogwaarak. 2Owagam wogo nogogwaarik, Yetut inom wonogwe it Pariti mendek inom, it Ala wone liiru mbanak unde inom, nen iigo nogogwaarik, ineebi-ineeba yogo logonet, ”Aap yi, aakumi maluk eeka wogonake nagaatik, inom mbi nengge menggerak kiraap!” 3Yogo mbareegwa, at Yetut wone eegu laarogo it yorage logonet,
4”Kit ambi kinaanggumi ndomba ineebe 100 wonogwe me, ambiret kobak age kenok, 99 mban karume teppiinok, ambiret kobak agaarak nogo mbo pegaʼlek niʼnagak-wuʼnagak kwaarit nugu nogotik, kwaakkogo monggotak nogo lek a? 5Ndi, kwaappunuk, kinuum paga yaʼngge luʼnuk, keyage warit 6kiname wonok wogo nogotik, kinorewologwe inom, kinowe-kinawot inom, kuwak eeppiinok, Naanggo kobak agaarak nogo kwaakirak me, kit ninom aleʼnggen eeruwok o, yinuk, yorogo monggotak nogo lek a? 7Ti ndak-ndak aap 99 iniki nen, An maluk nano mbo puurak o? yinuk, iniki koonggaʼlek wonogwe iinok, it mbogut paga menggaarak iniki aleʼnggen mbarugun lek o. Ata, it aap maluk eeko menggaarak ambit iluk ambi maluk eeke nagagerak nogo iniki koombunuk, mbo pege kenok perak, it mbogut paga menggaarak melaikat nogo iniki aleʼnggen nggwok mbako logogun o, yinuk, yokkiragi,” yoragagerak.
Wu kobak agagerak wone
8Ti yorage nagagirik, ”Kwe ambi wu 10 porogo wonage me, ambiret kobak age kenok, ndi wunimbunuk, liirubu koorogo nagake logonet, puk agaʼlek kwaarit-mbaarit eeke nagaatik, kwaakkage menggerak nogo lek? 9Ndi, kwaappunuk, orewologwe inom, at inom menggaarak inom, kuwak eeppiinok, Nawu kobak agaarak nogo kwaakirak me, ninom aleʼnggen eeruwok o, yorage menggerak nogo lek a? 10Nogo ti ndak-ndak aap maluk eeko menggaarak ambit iluk ambi maluk eeke nagagerak nogo iniki koombunuk, mbo pege kenok, it mbogut paga yonggo Ala nappiya wage menggerak melaikat nogo nen iniki aleʼnggen aret mbako logogun o, yinuk, yokkirage agarik o,” yoragagerak.
Aap aput ambi kobak agagerak wone
11Yorage nagagirik, wone ambi ari logonet, ”Aap ambi apuri mbere wonagagerak. 12Ambokan mendek nogo nen ogoba yoge logonet, Nogoba o. Keyate an woʼniriyak mbakendak nogo mbet woʼniru o, yoge mbareegi, ogoba nen amendek eyate nogo mogonogo wogoreegerak. 13Wogoge mbareegi, nogo mbereret yinuk, ageerok ogoba wogoreegerak nogo abok kuwak eerogo onggo mbanggolage nagagirik, awu koʼnok o nda time nagagerak. Nagagerak time logonet, iniki liippegaʼlek ugun eerit nage logonet, awu nogo tigippateegerak. 14Awu nogo tigippake nagagirik, wonage me, o nogome mbi noogelo ambik age mbareegi, at mbi abu ambik eereegerak. 15Mbi abu eeke mbareegi, aap awarak ambi awi time mendek ake yabu eerikit nduk, ka nagagerak. Ka nage mbareegi, at aanggumi o endekem time arum a nawak nduk, nappereegerak. 16Nappereegerak nage nagagirik, arum wonage logonet, Naanogum pele yuwak nduk, mbi agabolo yibirik wam nengge yi, an nengge logokit lak ao, mbareegerak kwe, aanggo unde nogo nen mbi agabolo at wogogaʼlek aret wonagagerak. 17Togop aret mbake logonet, iniki liippege nagagirik, A puk! An nogoba ayeloman onggo kologwe nogo ineebe apit logonet, mbi ndiinogo pegak nonggo menggaarak kwe, an perak, mbi abu nen kambigin kagi. 18An yime nen nogoba ka nage logominggirik, Nogoba o. At mbogut paga mendek inom, kat inom, maluk eeppinagareegirak o. 19Maluk eeppinagareegirak me, Yi an naput, yoʼniriyak ti meek o. Ata, kayeloman onggo kologwe nogo pogom eeʼnabu, yori naakit mbareegerak. 20Mbake nagagirik, o time mbo punuk, ogoba ka nagagerak.
Ka nage nagagirik, awo wok yi nage me, ogoba nogo nen kage nagagirik, abuwa nen nggare agan linggik-kambuk eeppunuk, aleenggu maareegerak. 21Aleenggu maake kagak, aput nen ogoba yoge, Nogoba o. At mbogut paga mendek inom, kat inom, maluk eeppinagareegirak o. Maluk eeppinagareegirak me, Yi an naput, yoĘĽniriyak ti mage o. 22Yoreegerak kwe, ogoba nen ayeloman yorage logonet, Yum abu kigirikwe lombok waganogo yippugwi, tenggen at eenggi paga yippugwi, sepatu yippugwi, mbet-mbet togon eeĘĽnip o. 23Eeppunuk, wam sapi aagaluk amok warak ambi wa nogo logomonggotik, warogo anoniya lako logonet, aleĘĽnggen eeruwok o. 24An naput yi, kambeegerak negen kwe, eenik agaarak, Ndi, kobak agagerak kwe, kwaakkogo o, yinuk, aleĘĽnggen eereegwaarak.
25Aleʼnggen eekwi iigak, oweeluk nogo yabu yarak me wonagagirik, ame wok yi wage logonet, ndawi lubuk wakwi aruk koneneegerak. 26Konengge nagagirik, ayeloman ambi wiireegerak wage mbareegi, Yi nonggop eeko agaarik o? yinuk, 27kin wagangge mbareegi, ayeloman nogo nen, Lek o. Kawuluk nogo muk wagaarak o. Ndi, eebe obeelom aret wagaarak me, kogoba nogo nen aanggo sapi aagaluk amok warak ambi warogo lako logonet, aleʼnggen eeko agaarik o. 28Yoge mbareegi, anini age nagagirik, ame ungguurak eebi aʼnuk, wonage me, ogoba wundi nage nagagirik, oone nabek togon, Unggwi mok ubi, yoreegerak. 29Yoreegerak kwe, oweeluk nogo nen ogoba yoge logonet, Kat karuk logot o. An yi tahun ndi tahun apit yi, kake yabu eeke minggirak o. Ndi, eeke logonet, Yogop eeʼnu, ndogop eeʼnu, yoʼnege menggendak nogo neebi yagaʼlek mondok eerit mban nege minggirak kwe, wam aagaluk ambit iluk an noreewi ninom niniki aleʼnggen logonet, laago noorak nduk, abu woʼnegaʼlek aret menggendak kwe, 30kaput yi perak, kumi ugun wurinabit nege logonet, kawu wogoreegindak nogo tigippagit nege nagaarak nogo wage mbaki, wam sapi aagaluk amok warak lombok warogo lagagendak o. 31Yoge mbareegi, ogoba nen, Naput o. Kat mondok-mondok nimbirak menggendak me, namendik-namendek apit ti, kat kamendek aret o. 32Ndi, kat kawot yi nogo perak, kambeegerak negen kwe, eenik agaarak o. Ndi, kobak agagerak kwe, kwaakkogoorak me, niniki aleʼnggen logonet, laago yi op aret lako, yoreegerak o,” yinuk, Yetut nen it aakumi yoragagerak.
Currently Selected:
LUKAT 15: WNO
Highlight
Share
Copy
Want to have your highlights saved across all your devices? Sign up or sign in
