LUKAT 18
18
Aap owak loongga inom, kwe togwe inom, eereegwaarak eegu laarogo yoragagerak wone
1Ti yorage nagagirik, aakumi iniki anggon-panggon eeginakaʼlek tamban mban eeko logowak nduk, Yetut wone yi eegu laarogo at oone waganggwi nogo yorage logonet, 2”O tini ambime aap wone owak loongga mendek ambi wonagagerak. Aap ti nen Ala agabiti mbake, ndi, aakumi inayuk wuke, eekaʼlek aret wonagagerak. 3Ndi, kwe togwe ambi time wonagagerak mban. Kwe ti nen nabenak mban aap wone owak loongga nogo yori nagak mban eeke logonet, At nimbirak ogoorak nogo an nobaalombok ugun eerit nege logokit nduk, kat nen non mbambaninuk logot o, yoge nagagerak. 4Yoge nagagerak nogo aap nogo nen aaʼnduk eebi mbareegerak kwe, peebi iniki koombunuk, An Ala nagabiti mbake, ndi, aakumi inayuk wuke, eekeelik kwe, 5kwe togwe yi, nabenik-nabenak mban ari me, piyaʼnabi wage logokwak, nggaruk togon noone non mbambunuk, logokit, mbareegerak o,” yoragagerak.
6Yorage nagagirik, at ninogoba endagembogut nogo nen, ”Aap wone owak loongga nen wone abe owak loongge logolik kwe, yereegerak nogo koneninip o. 7At Ala nen at apuri miirinabeegerak nogo inoone koʼlu-kiiʼme at yogwi iinok, inowak loonogo inawone abe amburu mbanigin lek mbakop? Logonuk negen inawone mbaniyak mbakop? 8Lek o. Mbet-mbet aret inowak loonogo inawone amburu mbanigin o, yinuk, yokkiragi. Togop aret eeginaburak kwe, an aap aret ndaʼnagagirak wage neenok, it aakumi nggween paga yime iniki noba panggombunuk, abet nombakwi iyaamun ilik, lek a?” yinuk, yoragagerak.
Aap Pariti inom, aap pemerintah inake kuwak eeka inom, eegu laarogo yoragagerak wone
9Yorage nagagirik, it aakumi ando iniki nen, ”Aakumi ando ti, abu meek o, ndi, nit perak, obeelom aret o,” mbako nogogwaarak me, Yetut nen wone yi eegu laarogo yorage logonet, 10”Aap mbere ambi tamban eeruwok nduk, Ala awi wurik me unggwi nogogwaarak. Ambi ti, Pariti mendek, ndi, ambi ti, aap pemerintah inake kuwak eeka mendek wonogogwaarak. 11Ala awi wurik me unggwi nogo nogogwaarik, aap Pariti nogo nen miʼnaʼnuk, tamban eekkolage logonet, Ai nogoba Ala! It aakumi ugun yogoot wagangga inom, maluk eeka inom, mbabi eeka inom, ndi, aap pemerintah inake kuwak eeka yi nogo inom, an togop kwak lek me, wa yokkege agarik o. 12An tamban ambi eerak paga ne mbere mbi nenggaʼlek nambe mage negen aret minggirak o. Namendek wonage kenok, ando mogonogo kat Ala kake pege minggirak o, 13yinuk, yoreegerak kwe, aap pemerintah inake kuwak eeka nogo nen perak, tayorogon miʼnage nagagirik, ena mbogut paga niʼnagaʼlek eebe wakkolage logonet, Ai, nogoba Ala! An maluk eeke minggirik me, nabuwa mbaru o, yinuk, yoreegerak. 14Imbirak tamban togop aret eereegwaarak kwe, tamban aaʼnduk eereegerak nogo lek o. Ata, peebi eereegrak nogo mban Ala nen iniki obeelom eeppege mbareegi, ame nagagerak. Aap ambi iniki tiyappake kenok, tebembege, ndi, iniki tebeppake kenok perak, tiyappege, eeke menggerak o, yinuk, yokkiragi o,” yoragagerak.
Yetut nen elege-aabologwe aleĘĽnggen inoba piyareegerak wone
(Mat 19:13-15, Mrk 10:13-16)
15Tiʼnuk, peebi aakumi nen elege-aabologwe nogo kunduk Yetut eenggi piginabuwak nduk, at owagam wogoret wogogwaarak. Wogoret wogwe at oone waganggwi nogo nen iigo nogogwaarik, mberirogogwaarak. 16Mberirogo mbareegwa, at Yetut nen elege-aabologwe nogo woraawak nduk, wiirage nagagirik, wogwe iigak, at oone waganggwi mendek nogo yorage logonet, ”It elege-aabologwe an nowagam wogwe me, teppiyaanip o. Ala abuʼme logorak ti, it yogop yi aret me, non mbambiigwi ti, mage o. 17It elege-aabologwe Ala abuʼme logorak nduk, unggwi nogo mengga kwak, kit togop aret unggwi nagaʼlek kiinok ti, unggwi namunggup lek aret o, yinuk, abet aret yokkiragi o,” yoragagerak.
Aap eenggi warak ambi eereegerak wone
(Mat 19:16-26, Mrk 10:17-31)
18Ti yorage mbareegi, it aap Yakuri inowe ambi nen Yetut yoge logonet, ”Ngguru wae! Kat obeelom mban menggendak yi, an mondok-mondok neenik logokit nduk, nonggop eeri o?”
19Yoge mbareegi, at Yetut nen, ”Yi aap ndi aap lek o. Ata, at Ala alik aret obeelom mban menggerak me, kat nonggop nduk, Kat obeelom mban menggendak o, yo'negen?” 20Yoge nagagirik, ”Wone yogop ee'nu, ndogop ee'nu, yokkirage logonet, Mbabi eeriyak mage o. Aap wariyak mage o. Aap inamendek yogoot woorak mage o. Pilit wone aap inoba piyoorak mage o. Kinagalo-kinogoba inoone konenggo logonip o, yinuk, yereegerak wone nogo kat keenu aret o.”
21Yoge mbareegi, aap nogo nen, ”An wone ti, abok aret wulaga mbuuluk paga nen liirogon aret eeke minggirak o.”
22Yoge nogo at Yetut konengge nagagirik, ”Ti abok eeke menggendak kwe, ambit iluk ambi eeka'lek keegirak nogo yokkiri o. Kat kamendek abok aret onggo mbanogo it aap inamendek lek nogo tumburira nak o. Tumburira nage keenok, kamendek mbogut paga wonage kaamunggun o. Ti eeke logominggindik, nimbirak nugu logowok nduk, wa'nu o,” yinuk, yoreegerak. 23Aap nogo nen Yetut yoge nogo aruk konengge nagagirik, eenggi warak lombok me, iniki abu wakkolagagerak.
24At Yetut nen iniki wakkolage kage nagagirik, ”It aap ineenggi warak iinok, at Ala abu'me piige minggim unggwi noorak meek negen kagi o. 25Unta wam liiru eno pelenak me unggwi noorak op negen kwe, aap ineenggi warak nogo perak, Ala abu'me piige minggim unggwi noorak ti, meek negen kagi o,” yoragagerak.
26Yoragagerak it koneneegwaarak nogo nen Yetut yogo logonet, ”Ndi, ti kenok, taani inagap ndariyak o?”
27Yogo mbareegwa, at Yetut nen, ”It aakumi nen eeriyak meek aret kwe, Ala nen eeriyak perak op o,” yinuk, yoragagerak.
28Yorage mbareegi, at Peterut nen, ”Nit ninamindik-ninamendek mbo punuk, kat ninom nugu logorak nduk, wogoorak nogora?”
29Yoge mbareegi, at Yetut nen, ”Aap ambi Ala abu'me logokit nduk, agalo-ogoba inom, owe-awot inom, akwe inom, aaganapuri inom, awi wurik inom, abok aret mbo piige kenok perak, 30yogondak obaane'me apit aret wogorigin o. Ndi, peebi age yobok eyom nogo paga at mondok-mondok eenik aret logogin o, yinuk, abet aret yokkiragi o,” yoragagerak.
Yetut nen, ”An noorugun o,” ne ambinom yoragagerak wone
(Mat 20:17-19, Mrk 10:32-34)
31Yorage nagagirik, ti'nuk, aap 12 nogo wogoret tayo yi nage nagagirik, ”Wologwe wae! Nit o Yerutalem wambi nogo ogoorik o. Wambi namonggoorak wonogwe me, it aap Ala wone yorogo nogogwaarak nabi-nabi nen an aap aret nda'nagagirak eeppaniyak liiru mbaneegwaarak nogo abok aret time aret a'me nggelok ari kaamunggup o. 32Ala nen kooneegerak paga an aap aret nda'nagagirak nogo nooruwak nduk, aakumi endekem mendek wogoraagin o. Wogorage mbariminggi, an nenggali wakwi, miyuk-meya eerogo panugwi, inawoori noba lenggenogo panugwi, eerugun o. 33Eeppaninuk, luulu yawi paga nooko logomenggaarik, neebe mondok aret noorugun o. Nooko mbarumengga, nogo mbere yinuk, neenik age logominggirik, mi'narigin o,” yinuk, yoragagerak.
34Wone alom nobarak negen yoragagerak me, wone nogo abok aret it yelok kaga'lek kobak aret wonogogwaarak.
Aap enegen mbuk me obeelom eereegerak wone
(Mat 20:29-34, Mrk 10:46-52)
35At Yetut o Yeriko wok yi nage kagak, aap ambi enegen mbuk me, tu nggwok ambet paga kwi'ndak ambe nggino ari nagagerak. 36At aap nogo it aakumi apit inoone agan wogwe aruk konengge nagagirik, ”Yi nano agan wogwe agaarik ubi?”
37Yorage mbareegi, it aakumi nen, ”Lek o! Yetut awi Nataret mendek nogo tu yi paga wage agaarik o.”
38Yogo mbareegwa, aap nogo oone nggwok paga ari logonet, ”Yetut wae. Kat Ndawut ombooluk yi, nabuwa mbaru o!”
39Yoge mbareegi, it inaa'nduk nogwe nogo nen aap nogo oone puk logowak nduk, mberereegwaarak kwe, kagak, abunuk oone nggwok nabenak mban ari logonet, ”Ndawut ombooluk yi, nabuwa mbaru o.”
40Yogak mban ari mbareegi, at Yetut puk age nagagirik, aap nogo at owagam wonok woraawak nduk, yoragagerak. Yorage mbareegi, wonok at owagam pi wogo mbareegwa, Yetut nen aap nogo yoge logonet, 41”Kat an nonggop eekkaburak mba'nuk, ari agandik?”
Yoge mbareegi, aap nogo nen, ”Nogoba o. Nenegen obeelom ee'naburak nduk, yokkigi o.”
42Yoge mbareegi, Yetut nen, ”Kat kiniki noba panggombunuk, abet nombakendak paga kenegen obeelom agaarak me, kenegen pagak yu o.”
43Nogo awo yoge kagak, at enegen pagak yereegerak. Enegen pagak ari mbareegi, Yetut imbirak nage logonet, Ala endage wogoppit nagagerak. Ndi, it aakumi abok eereegerak nogo kogo nogogwaarik, Ala alut eereegwaarak.
Currently Selected:
LUKAT 18: WNO
Highlight
Share
Copy
Want to have your highlights saved across all your devices? Sign up or sign in
