LUKAT 21
21
Kwe togwe eenggilek mendek nen Ala ake pereegerak wone
(Mrk 12:41-44)
1Ti yorage nagagirik, ena na'nage logonet, aap ineenggi warak nen inamendek. Ala ake wu pogo menggam pugwi iyareegerak. 2Pugwi me, kwe togwe eenggilek ambi wage nagagirik, mbuti wu mbuuluk mbere'ndak pege kagagerak. 3-4Pege kage nagagirik, yorage logonet, ”It aakumi abok wu pugwi yi, inamendek apit inaani kagak pegaarak me, mbuuluk aret pegaarak o. Ndi, kwe togwe amendek lek yi nogo perak, ambi onggo patiyak mendek tigitogon pegerak me, at nggwok aret pegerak o, yinuk, abet aret yokkiragi o,” yoragagerak.
”Ala awi wurik langgunogo nappugun o,” yoragagerak wone
(Mat 24:1-2, Mrk 13:1-2)
5Yorage nagagirik, it aakumi ando Ala awi wurik yugum kigirikwe inom, yi mendek ndi mendek abe Ala ake pugu inom, nogo paga, ”Abu kigirikwe wurik o,” yinuk, agan nugwi me. 6Yetut nen it yorage logonet, ”Kit kinigen kogwe yi nogo ti, yugum ambi obaga lu'luk aago logorak lek abu tigitogon langgunogo nappuurak eyom panggoni woraagin o,” yinuk, yoragagerak.
”Piyak-payak eerogo aaninggin-paaninggin eekkinabigin o,” yoragagerak wone
(Mat 24:3-14, Mrk 13:3-13)
7Yorage mbareegi, at kin wakkogo logonet, ”Ngguru wae. Kat yo'niragandak ti, mandenom arigin o? Ndi, ariyak eyom korok panggoni wage kenok, nineenu ariyak mendek nano eeke kaagun o?”
8Yogo mbareegwa, at Yetut nen yorage logonet, ”Aakumi nomongginakwi iyo, kiniki tum wakkologo logonip o. It aakumi apit an nendage kunit wogo logonet, Aap ambi woroorak nogo an aret wagi o, ndi, ambi, At woroorak eyom muk panggo yi wagaarak o, agan woraagun me, inoone konembunuk, muguren noobok o. 9Lek o. Wim nambukwi o. Lek o. Mugogo wumbiyaawak nduk, wim nggaganggwi o, yogwe kinaruk konenggwi kiinok, kiniki ma'narubok o. Ti eeriyak nogo ti, aa'nduk arit woramenggerak kwe, Age yobok eeriyak eyom muk panggoni wage logonet, eeke, yinuk, mbarubok o,” yoragagerak.
10Yorage nagagirik, ”Aakumi inanebunu ndegek wim nambukwi, o yime-ndime abok lambumbunuk, wim nggwok nambukwi, 11o mi mondok iya tit nuk ari, yi awi ndi awi mbi noogelo age, kugilingga iyak wu'nage, ndi, kit kiniki ma'naruwak nduk, mbogut paga kineenu ariyak kinagabiti warak mendek mondok alik negen eeke, eeke kaamonggotak kwe, 12eeka'lek kagak, aakumi nen pippinaganuk, kinookwi, it aap Yakuri tamban eeko menggam pinagi nogwe, keele maarogo mambiigo menggam mambinagagwi, ndi, an noone waganeegutak paga it aap inendagembogut inom, it aap iyo'nggok inom, inowagam wokkiret nogwe, eerugun o. 13Togop eekkinakwi iinok, eeke neego nogotak nogo, Yoroorak nanonggwan aga o, yinuk, yorogo logomunggup o. 14-15Kit kiniki warak logonet, it aap kinom ogoorak nogo wone obeelom kenaarogo yoramonggotak paga it inoone onggo yokkirogwe, kinoone taganggwi, eeriyak meek wone nogo mendek yokkiraminggirak me. Naana'le mbanogo ndogop yoraakit o, yinuk, wone kinikime koongga'lek ugun logorak nduk, eekkolaanip o. 16Kinagalomini-kinogobamini inom, kinowe-kinawot inom, kinoreewi inom, kinom kunik monggotak inom, it nogo nen aret wokkiret aap inowak loonggo menggam pinagi nogwe, kit ando kinookwi, eerugun o. 17Ndi, an noone waganeegutak paga aakumi abok aret ineebi lombok kinombarugun kwe, 18kineeruwak ambiiret kinake ti, kobak arigin abu lek me, 19kinogogumbuk logomonggotak paga kinagap ndakkolaamunggup o,” yinuk, yoragagerak.
O Yerutalem pup eerogo puurak wone
(Mat 24:15-21, Mrk 13:14-19)
20”It aakumi ineegin warak apit aago o Yerutalem wanggerak wonogwe iigwi kiinok, O Yerutalem pup eerogo puurak eyom abu panggoni wagaarak kagi, mbarumunggup o. 21-22Ti eyom panggoni wage kenok, Ala wone yi eeriyak ndi eeriyak liiru mbanak abok aret a'me lik yuwak nduk, aakumi maluk eekwi onggo wogoroorak eyom ti aret me, kit o Yureya wonogwe kenok, puut paga kole mbaganggwi, o Yerutalem wonogwe kenok, o time mbo punuk, mbaganggwi, ee'nu o. Ndi, o tini endekem wonogwe kenok, oome unggubok o. 23Tiyom paga Ala nen o nggween paga yime aaninggin-paaninggin abu alik lombok eeppege logonet, it aakumi yi, anini eeppiyaagin me, kumi inabila wonogwe inom, inaagalogwe inelak kuninakwi inom, inabuwa o. 24Ando tege wooluwak paga inookwi iinok kanggwi, ando keele maarogo yi awi ndi awi piya nogwe, eerugun o. Ndi, at Ala nen, It aakumi endekem mendek unde iigak, Tahun ndogop eeko logogun o, mbareegerak nogo a'me lik yega'lek kagak, it aakumi endekem mendek nen o Yerutalem iniyok aan lebenit nugu logogun o,” yinuk, yoragagerak.
”An aap aret nda'nagagirak woraagin,” yoragagerak wone
(Mat 24:29-31, Mrk 13:24-27)
25Yorage nagagirik, ambinom yorage logonet, ”Kineenu arubagip nduk, oonegen inom, tut inom, laaluguragan inom, ti abu alik tam warak negen eeke kaamunggup o. Ndi, o nggween paga yime yi yenggenak oonebu mondok kilaarak-mogonik eeke kenok, it aakumi inanebunu lombok abok aret, Yi nonggop eerit wage iya! yinuk, iniki abu ma'narugun o. 26It mbogut oolo yime inomaawi menggaarak nogo inaganak nuk-nuk irage kenok, it aap abok nen yi mendek ndi mendek o nggween paga arit woroorak nogo, Yi aret arit wage kogo, yinuk, inagabiti nen iniki abu lek aganabigin o. 27Ti eeke kenok, an aap aret nda'nagagirak nogo nobaanggi-nobaangge li'luk eekko'nok nayuk warak logonet, ndugwi enggela'me wage neyaamunggup o. 28Eeriyak ti nogo waringge kenok, kinagap ndaka wok yi wage me, kinenggaanok tiya yinuk, kinigen nigagik logonu o,” yinuk, yoragagerak.
Eyo ara paga eegu laarogo yoragagerak wone
(Mat 24:32-35, Mrk 13:24-31)
29Yorage nagagirik, wone eegu laarogo yorage logonet, ”Yi eyo ndi eyo inom, eyo ara inom, eeke menggerak nogo liippinip o. 30Eyo anggup lebenikit nduk, eeke kinigen kogo nogotik, O abu kinikit nduk eeke kagi o, yinuk, yogo monggotak. 31Nogo ndak-ndak, Togop eerigin o, yinuk, yokkiragarak nogo eeke kinigen kogo logomonggotik, At Ala abu'me pinaniyak nogo muk panggo yegerak kagi, yinuk, mbako logomunggup o.
32Kit yogondak wonogwe yi, lek aga'lek kiigak, eeriyak abok yokkiragarak yi, a'me lik ari kaamunggup o, yinuk, abet aret yokkirage agarik o. 33Mbogut-nggween inom ti lek arigin kwe, an noone ti perak, lek arigin lek mondok aret logogin o,” yinuk, yoragagerak.
”Kiniki tum wakkologo logonip o,” yoragagerak wone
34-35”Yi mendek ndi mendek kinaanogoma'le ndenok yogoorak nenet nugwi, amburu kumili eeginakwi mendek nenet nugwi, namendek nonggop kolaakit o, yinuk, koonit nugwi, eeko logonet, kiniki ugun kobak arumonggotak wonogwe me, ta'na ne ambi paga pagi aan mbelek togon wake minggi kwak, wone yokkiragarak nogo kit aakumi o nggween paga abok aret ne ambit perak togon eekkinabi woraagin me, kiniki tum wakkologo logonip o. 36Yi eekkinaburak nogo kinomaawi lek aga'lek kinogogumbuk logonet, waganggo logomonggotik, an aap aret nda'nagagiraak nenggaanom paga mi'narubagip nduk, tamban mban eeko logonet, kiniki tum wakkologo logonip o,” yinuk, yoragagerak.
37At Yetut nen o liingge paga Ala awi wurik me wone mamunirage, ndi, o kiip age kenok, wundi nanuk, puut endage Tayitun nogome nogo yi nage, eeke nagagerak me, 38o kuubondendok lombok aakumi abok at oone konenuwok nduk, at owagam Ala awi wurik me kuwak ari wogo nogogwaarak.
Currently Selected:
LUKAT 21: WNO
Highlight
Share
Copy
Want to have your highlights saved across all your devices? Sign up or sign in
