LUKAT 23

Yetut wonok Pilatut owagam nogogwaarak wone

(Mat 27:1-2, 11-14, Mrk 15:1-5, Ya 18:28-38)

1Yogo nogogwaarik, aakumi kuwak aago abok aret mi'na'nuk, Yetut piginok Pilatut owagam wonok nogogwaarak. 2Wonok nogo nogogwaarik, inoone pilit at oba pogo logonet, ”Aap yi, nit aakumi abok ninabut lagangge logonet, pemerintah ake aap endagembogut Kayitat wogoriyak mage o. Kinowe endagembogut Keritut an aret o, agan nege me, kwaakkogoorak o.”

3Yogo mbareegwa, at Pilatut nen, ”Aap Yakuri inowe endagembogut kat aret ilik?”

Yoge mbareegi, at Yetut nen, ”Yagandak ti aret o.”

4Yoge mbareegi, at Pilatut nen it aap Ala unde inoweewi inom, aakumi apit kuwak aago nogo inom, yorage logonet, ”Aap yi, maluk eekerak ambi an abu koolik o.”

5Yoragagerak kwe, it inoone panggok togon nabenak mban yogo logonet. ”Lek o. Aap yi, wone mamuninabit nege logonet, aakumi o Yureya mendek abok aret o Nggalileya nen nok kuli yime aret inabut wurit nege menggerak o,” yinuk, yoreegwaarak.

Yetut Keroret owagam nappereegerak wone

6Yogwi nogo at Pilatut aruk konengge nagagirik, ”At aap yi, Nggalileya mendek abet aret ilik?” aakumi yorage nagagirik, 7aap Keroret inarum minggim nogome mendek aret aruk konengge nagagirik, ti eyom paga at Keroret o Yerutalem nagagerak wonage me, at owagam nappereegerak. 8Nappereegerak nage mbareegi, aap Keroret nogo nen Yetut eeke aruk konengge nagaatik, ineenu ariyak inagabiti warak mendek ambi eeke kaakit lak ao, mbake nagagerak me, Yetut enegen kage nagagirik, iniki ale'nggen mbareegerak. 9Iniki ale'nggen mbake nagagirik, yi wone ndi wone apit Yetut kin wakkagagerak kwe, Yetut wone onggo yoga'lek puk aret wonagagerak. 10Puk aret wonage mbareegi, it Ala unde inoweewi inom, it aap Ala wone liiru mbanak unde inom, ta logonet, inoone kole mondok at oba pogo nogogwaarak. 11Ndi, at Keroret awuri yigin unde inom Yetut miyuk-meya eerogo pogo logonet, agi'ndok kambeegwaarak. Eeppogo nogogwaarik, yum abu kigirikwe yippunuk, iyok paga Pilatut owagam nappi wagagerak. 12At Keroret Pilatut aa'nduk imbirak ogoorak wonogogwaarak kwe, ti eyom paga imbirak lambunnogogwaarak.

”Yetut mondok wariyak o,” yereegerak wone

(Mat 27:15-26, Mrk 15:6-15, Ya 18:39-19:16)

13Yetut iyok paga nappi wagagerak wage mbareegi, at Pilatut nen it aap Ala unde inoweewi inom, Yakuri inanggok inom, aakumi ugun inom, wiirage nagagirik, wogo mbareegwa, 14yorage logonet, ”Aap yi, aakumi inabut lagangge me nduk, nowagam pi wogotak kwe, kinoone at oba pogotak nogo kit kiigak owak loonggirak kwe, maluk eekerak ambi an abu koolik o. 15Ndi, Keroret nogo nen iyok paga nappi wage logonet, at kunduk togop koolik aret me, maluk eekwi iinok, inooko menggaarak mendek at abu eerulik o, yinuk, yokkirage agarik o. 16Togop me, iniki koonuwak nduk, yawi mban warogo teppikit o,” yinuk, yoragagerak.

17Laago Patika lakwi iinok, aap keele maarak ambi piinogo teppege nagagerak me, 18wone nogo yorage mbareegi, it abok ambugwi aret, ”Mba!” yogo logonet, ”Aap yi nogo lek o. Aap Mbarabat nogo perak, piinogo teppinanu o,” yoreegwaarak. 19Aap Mbarabat nogo aakumi ando inom nen, ”Ninoweewi inoone koneniyak nineebi o,” yinuk, wim eeko logonet, aap ambi wake mbareegi, keele maarogo mambiigo menggam mambereegerak wone wonage me, yoreegwaarak.

20Yogo mbareegwa, at Pilatut nen Yetut teppuurak mbake logonet, ne ambit it yoragagerak kwe, 21inoone ya-mba yogo logonet, ”Eyo karo-karo paga nabenogo pu o. Nabenogo pu o.”

22Yogo mbareegwa, at Pilatut nen ne mbere yoragagerak me, ambinom yorage logonet, ”At maluk ngge eekerak paga yogop o? Maluk eekaatak kenok mban inooko menggaarak kwe, maluk eebe ngge eekerak kenok. Wariyak, yogo ogotik? An koolik me, we iniki koonuwak nduk yawi mban warogo teppigin o.”

23Yoragagerak kwe, eyo karo-karo paga nabenogo puwak nduk, inoone nabenak mban ya-mba yogo logonet, Pilatut oone nogo taganogo pogo mbareegwa, 24at eeppuurak yoreegwaarak nogo Pilatut nen eebi mbake logonet, ”Op aret o,” yinuk, yoragagerak. 25Yorage mbareegi, at aap, ”Noweewi inoone koneniyak neebi o,” yinuk, wim eeke logonet, aap wake mbareegi, keele maarogo mambiigo menggam mambereegwaarak, ”Piinogo teppinanu o,” yoreegwaarak nogo aret piinogo wumbereegerak kwe, Yetut perak, it mbareegwaarak nogo ndak-ndak eeppuwak nduk, wogoragagerak.

Eyo karo-karo paga nabenogo pereegwaarak wone

(Mat 27:32-44, Mrk 15:21-32, Ya 19:17-27)

26Wogorage mbareegi, piginok nogo logonet, aap ambi endage Timon awi Kirene mendek me, endekem nen ugun o tini nogome unggwi wage me, pigogo eyo karo-karo mbanak nogo Yetut ambokan wonok nawak nduk, uum paga nggimbereegwaarak.

27It aakumi apit at mugurok nogo logonet, kumi ando nen aleenggu maakwi, ineebe wakkologwe, eerit inom nogogwaarak. 28Eerit nogwe me, at Yetut ena logurogon pegiige nagagirik, ”Kit kumi o Yerutalem mendek yi, an nale yugup o. Ata, kit kinaagalogwe kinom kinale yikkolaanip o. 29It aakumi nen yogo logonet, Kumi wubili inom, inaagalogwe ndaganakulik inom, inelak kuninakwi ineenggo'lek inom, inale'nggen mbarugun o, yinuk, yogo logorak eyom woraagin o, yinuk, yokkirage agarik o. 30Ti eyom paga it aakumi nen puut nggwok yogo logonet, Nineebe aan lebenogo pinanu o, yinuk, yogwi, ndi, puut mbuuluk yogo logonet, Nineebe taanogo pinanu o, yinuk, yogwi, eerumenggaarak kwe, 31aakumi nen eyo ki kagak togop yogwe iinok, mbuk age kenok, nonggop yogo logorak mbakop? Lek o. Ti abunuk aret yogo logogun o,” yinuk, yoragagerak.

32Yetut piginok nogo logonet, it aap maluk eeka lombok ineebe mbere Yetut inom inooruwok nduk, piginet nogogwaarak. 33Piginet o endage Anobak Yelenak nogome nogo nogogwaarik, at Yetut it aap maluk eeka nogo inom eyo karo-karo paga nabenogo piigo nogogwaarik, ambi eenggi abe'nggan pa'nggwe mippugwi, ambi eenggi kwaare'nggan pa'nggwe mippugwi, eerogo piyareegwaarak. 34Nabenogo piigo mbareegwa, at Yetut nen, ”Nogoba o. It ineenggo'lek logonet, eeppanugwi me, teppiyet o,” yoreegerak.

Ndi, it aakumi nogo nen yugum anggen nggween paga mbo wuppegak eeko logonet, ambogoyum nogo tumbukkologogwaarak. 35It aakumi nogo taati inigen loogwi iigak, it aap Yakuri inoweewi nogo nen at miyuk-meya agago pogo logonet, ”At aakumi inagap ndake nagaarak me, at Ala nen leenogo mippereegerak Mesias nogo abet aret kenok, agap ndakkolaayok ubi,” yinuk, yereegwaarak.

36Ndi, it aap yigin unde nogo kunduk, at agi'ndok kanggo logonet, anggur amburu ale mendek at iri wogogwaarak. 37Iri wogo logonet, ”Kat aap Yakuri inowe endagembogut keenok, kagap ndakkolet ubi!” yinuk, yogo nogogwaarak.

38Ndi, wone ambi, ”Yakuri inowe endagembogut yi aret o,” yinuk, liiru mbanogo anobak irimbaga nabembereegwaarak.

39Nabembunuk wonogwe me, aap mbere inom nabenogo piyareegwaarak nogo ambi nen at Yetut miyuk-meya eerogo pege logonet, ”Ala nen leenogo mippereegerak Mesias kat aret nogo lek a? Kat aret kenok, nit ninagap ndake, ndi, kat kagap ndakkolage, eeru o.”

40Yoreegerak kwe, ore nogo nen mberege logonet, ”At oba lenggenogo puurak koonggaarak ndak-ndak kat koba lenggenogo pagage me, kat Ala kagabiti mbaka'lek ya? 41Nit eeppinanugwi nogo ti, eekoorak onggo ndak-ndak eeppinanugwi me, op aret kwe, at yi perak, maluk abu eerulik o.” 42Yoge nagagirik, Yetut yoge logonet, ”Ai, nogoba. Kat kendagembogut logonet, wage kenok, an noba abeke logomunggun o.”

43Yoge mbareegi, at Yetut nen, ”Yogondak aret kat nimbirak kambunuk, nogo menggam o obeelom nogome wonage keyaagin o, yinuk, abet aret yokkigi o,” yoreegerak.

Yetut kambeegerak wone

(Mat 27:45-46, Mrk 15:33-41, Ya 19:28-30)

44-45Wone ti yogwe iigak, o liingge jam 12 negen wonagagerak kwe, ti'nuk, oonegen eya abu lek age mbareegi, o time apit agagerak kagak, o kiyoma jam 3 ari nagagerak. Jam abu 3 ari nage mbareegi, yum Ala awi wurik me oolo tugunik menggerak nogo oolo muundak nggoguk yereegerak. 46Nggoguk ari mbareegi, at Yetut oone nggwok paga ari logonet, ”Nogoba o. Niniki kat unde logonok nduk, wokkigi o,” yinuk, iniki woronggolage nagagirik, kambeegerak.

47At yigin unde inowe nogo nen eeke kage nagagirik, at Ala endage wogoppege logonet, ”Aap yi, oone lek me yeendo kagak eekoorak abet aret kagi o,” yinuk, yereegerak.

48Ndi, it aakumi abok inigen kaawok nduk, kuwak eeri nogogwaarak nogo eeke kogo nogogwaarik, iniyok paga yungguninuk iname wogo logonet, ineebe wakko'net wogogwaarak. 49Ndi, at Yetut oreewi inom, it kumi o Nggalileya nen at inom nogogwaarak nogo inom, tayorogon taati mi'ndak logonet, eeke nogo abok aret inigen kogogwaarak.

Yetut eebe ndoome mambereegwaarak wone

(Mat 27:57-61, Mrk 15:42-47, Ya 19:38-42)

50-51It Yakuri inawi endage Aremateya mendek aap ambi endage Yutup wonagagerak. At aap abe iniki abu koonak wone amburu mbangga nogo mendek aret wonagagerak me, oreewi wone amburu mbangga nogo nen, Yetut eeppuurak kooneegwaarak nogo at oone inom abu nabenulik o. ”Ala abu'me panuwak o,” yinuk, tokkage nagagerak. 52At aap nogo nen Pilatut owagam nage nagagirik, ”Yetut warak eebe wo'niru o,” yinuk, ngginooreegerak. 53Ngginooreegerak, ”E o,” yoge mbareegi, eebe warak piinogo wuppi wage nagagirik, mbogoyum laambu tabak paga perenogo yugum ndo ngget nendaarak aakumi awo mambiiga'lek iyaalok nogome mambi nagagerak. 54Ko'lu it Yakuri tamban eeriyak nduk, pipuk agago pugwi paga aret eereegerak.

55Ndi, it kumi. Yetut inom o Nggalileya nen nogogwaarak nogo Yutup mugurok nogo nogogwaarik, ndo inom, Yetut eebe logonogo pereegwaarak inom, inigen kogogwaarak. 56Kogo nogogwaarik, iniyok paga iname wogo nogogwaarik, eyoonggen amburu inom, amburu obari abe alik mendek inom, pipuk eerogo pereegwaarak.

Pipuk eeppogo nogogwaarik, Ala nen, Yogop ee'nu, ndogop ee'nu, yereegerak liiru mbanak nogo ndak-ndak it Yakuri tamban eekwi paga tat yanggoneegwaarak.

Currently Selected:

LUKAT 23: WNO

Highlight

Copy