LUKAT 4
4
Ibilit nen Yetut abut mbaneegerak wone
(Mat 4:1-11, Mrk 1:12-13)
1At Aberiniki nogo nen Yetut inikime unggwage mbareegi, yi Yoreran aa'nggi paga nage me, Aberiniki nen wonok karume aakumi lek me time nagagerak. 2Nage nagagirik, time wonage me, Ibilit nen at abut mbanikit nduk, eeke kagak, nogo 40 yereegerak. Abut mbanikit nduk eeke kagak, Yetut mbi mondok nengga'lek aret nogo 40 yereegerak me, mbi abu eereegerak.
3Mbi abu eeke mbareegi, Ibilit nogo wage nagagirik, ”Kat Ala aput aret kenok, yugum yi mbi aruwak nduk, yoru o.”
4Yoge mbareegi, at Yetut nen, ”Ala nen ari logonet, Aakumi mbi mban nunggwi kenok, ineenik logogun lek o, yinuk, yereegerak liiru mbanak wonage o.”
5Yoge mbareegi, at Ibilit nogo nen Yetut wonok puut paga lagangge nagagirik, time nen nggween paga yime yi aap ndi aap inendagembogut unde menggam abok aret ne ambit mbigak togon aago nikkagagerak. 6Nikkage nagagirik, ”It aap inendagembogut unde menggam tiyanak kenok, aakumi nen, Wi, ugwi yi nogo an unde logokit nduk, wo'nereegerak me, ndi, an niniki koombunuk en wogorage minggirak me, 7kat nabu'me tebe yinuk, nayuk wuke keenok, kenegen kagandak nogo abok aret kat unde logonok nduk, wokkirigin o.”
8Yoge mbareegi, at Yetut nen, ”Ala nen ari logonet, Kinogoba endagembogut Ala mban ayuk wukwi, at obaalombok mban eerit nogwe, eeko logonip o, yinuk, yereegerak liiru mbanak wonage o.”
9Yoge mbareegi, Ibilit nen Yetut wonok o Yerutalem Ala awi wurik kirin paga pi lagangge nagagirik, 11yoge logonet, ”Ala nen it mbogut paga at ayonggo nappiige menggerak melaikat nogo karum logowak nduk, yoramenggerak wogo logomenggaarik, yugum paga kowak kalok yi wangge keyo, ineenggi ndoonak paga inaani wambi namunggun o, yinuk, yereegerak liiru mbanak wonage me, kat Ala aput abet aret keenok, yime nen wu'mbo wambu o.”
12Yoge mbareegi, at Yetut nen, ”Ala nen ari logonet, Kinogoba endagembogut an nabut mbanggwi mage yereegerak o,” yinuk, yoreegerak.
13Yoge mbareegi, at Ibilit Yetut abut mbanikit eereegerak nogo abok aret eeppege nagagirik, ”Peebi yoriminggirak ambi op ariminggi ilik?” yinuk, teppunuk, mbaganeegerak.
Yetut o Nggalileya iyok paga lagi wagagerak wone
(Mat 4:12-17, Mrk 1:14-15)
14Mbagangge mbareegi, at Yetut nogo Aberiniki omaawi paga iyok paga o Nggalileya lagi wagagerak. Lagi wage nagagirik, wonage me, at abok nogo o time abok aret wigak yereegerak. 15O Nggalileya time logonet, it Yakuri tamban eeko menggam wone mamuniranet nage nogo paga aakumi abok at endage wogoppogo nogogwaarak.
Aakumi Nataret mendek nen, ”Yetut nineebi o,” yinuk mbo pereegwaarak wone
(Mat 13:53-58, Mrk 6:1-6)
16Ti'nuk, peebi at Yetut tawe age nagagim o Nataret nogome nage nagagirik, it Yakuri tamban eekwi paga tamban eeko menggam unggwi nage menggerak me, unggwi nage nagagirik, Ala wone liiru mbanak paga pekkagak yoraakit nduk, mi'nagagerak. 17Mi'nage mbareegi, aap Ala wone yorage nagagerak nabi Yetaya nen Ala wone mbuku pirik-perek aago liiru mbanak nogo Yetut wogoreegwaarak. Wogogo mbareegwa, mbuku nogo mbiganogo punuk,
18”It aakumi inamendek lek nogo obeelom wone yorage logowak
nduk, mippaneegerak me, nogoba endagembogut Aberiniki noba wonage o.
It aakumi keele maarak wonogwe nogo piininaburak wone inom,
inigen mbuk nogo inigen obeelom eeginaburak wone inom,
yoranet nage, it aakumi tebembiirogo wonogwe nogo wondet eerogo piige, 19ndi, ninogoba endagembogut ale'nggen ninoba pinaniyak eyom nogo muk panggo yegerak o, yorage, eeke logowak nduk, nappani wagagerak o,”
yinuk, yereegerak liiru mbaneegerak nogo kwaakkage nagagirik, pekkagak yoragagerak.
20Wone nogo abu yorage nagagirik, mbuku nogo perenogo aap unde nogo wogoge nagagirik, kwi'nagagerak. Kwi'nage mbareegi, it aakumi aap Yakuri tamban eeko menggam wonogogwaarak nogo abok aret inigen at mban loogo nogogwaarak. 21Inigen loogwi me, Yetut nen it Yorage logonet, ”Ala wone liiru mbanak pekkagak yokkiragarak nogo yogondak aret kinaruk konenggwi kiigak, a'me lik yigi o.”
22Yorage mbareegi, it aakumi abok aret, ”Wone ti abet aret yigi o,” yinuk, at wone abe kigirikwe ari me, ”Wi!” yinuk, pi wako logonet, ”Yi aap Yutup aput nogo lek a?” yinuk, yogogwaarak.
23Yogo mbareegwa, at Yetut nen, ”It aakumi yogo logonet, Ndotet wae. Kat keebe obeelom eekkolet o. Ndi, ambi, O Kaperenaum eeke nagandak konenggoorak nogo kame nda'nagaginom yime togop aret eeru o, yogo menggaarak nogo an yo'niriyak nduk, eekwi kiigi o.” 24Yorage nagagirik, ”It aap inawi alom paga logonet, Ala wone yorogwe iinok, inowe-inawot inaruk liirogon konenggulik o, yinuk, abet aret yokkiragi o. 25Aap Eliya wonage eyom paga mayu waga'lek yi awi ndi awi apit mbi noogelo aganabeegerak kagak, 3 tahun eeppunuk, ambi eeriyak oolo paga Iterali iname time kumi togwe ineebe ambik wonogogwaarak kwe, 26Ala nen aap Eliya nogo kumi togwe Iterali iname wonogwe nogo ambi ka nawak nduk, nappulik o. Ata, kwe togwe alik ambi o Tiram time tini ambi Tareta wonage me, owagam nappereegerak. 27Ndi, Ala wone yorage nagagerak nabi Elita nogo eyom paga aakumi Iterali iname time apit aret inawin aaga'ne kunik wonogogwaarak kwe, it ambi inawin obeelom aganabeegerak abu lek aret. Aap Naaman anebunu Tiyam mendek nogo alik mban awin obeelom eereegerak o, yinuk, abet aret yokkiragi o.”
28Yoragagerak nogo it aap Yakuri tamban eeko menggam wonogogwaarak nogo abok aret inaruk konenggo nogogwaarik, inanini ambik ogogwaarak. 29Inanini ambik eeginake mbareegi, mi'na'nuk, at eebe iname nen pigogo endekem wumbogo nogogwaarik, inawi puurom yigeebu me wurik me, pelenogo wuppi nawok nduk, wonok nogwe me, 30inenggela'me nen mbo piinok aret mbaganeegerak.
Aap ambi kugi ogole warak inikime lik yereegerak wone
(Mrk 1:21-28)
31Nage nagagirik, ti'nuk, o Nggalileya tini ambi Kaperenaum nagagerak. Nage nagagirik, it Yakuri tamban eekwi paga wone mamunirage nagagerak. 32Wone mamunirage logonet, at oone omaawi paga yorage me, aakumi nen, ”Iya!” yinuk, inagabiti ogogwaarak. 33Ne ambi paga aap ambi kugi ogole warak mendek inikime unggwagagerak me tamban eeko menggam wonagagerak. At aap nogo oone kwa kunit ari logonet, 34”Yetut wae Kat aap Nataret mendek me, nit nonggop ee'ninabikit nduk wagan o? Nit lek ee'ninaburak nduk wagan ilik? Kat Ala aput maluk eekeelik mondok obeelom alik leenak menggendak nogo, keebe an neenu aret o.”
35Yoge mbareegi, at Yetut nen mberege logonet, ”Koone puk a'nuk wundi nak o.” Yoge mbareegi, kugi nogo nen aap eebe aakumi inenggela'me nggween paga mbo nggimbege nagagirik, eebe andi yagan waka'lek kagak, nggigik togon wundeegerak.
36Nggigik togon wungge mbareegi, aakumi abok inagabiti nen, ”Wi!” yinuk, at ambi nen at ambi yogak eeko logonet, ”Wologwe! Aap yi, oone nonggop ari mbakop? Kugi wumbiyoorak at unde me, oone omaawi paga kugi ogole warak mendek, Wundi nanip o, yorage kenok, wunggo menggaarak iya!” yinuk, yogogwaarak. 37Ndi, Yetut eereegerak wone nogo o time abok aret wigak yereegerak.
Yetut nen aakumi ambik obeelom eeginabeegerak wone
(Mat 8:14-17, Mrk 1:29-34)
38At Yetut it Yakuri tamban eeko menggam nen wundi nage nagagirik, Timon ame aret unggwi nagagerak. Unggwi nage nagagirik, Timon owanggelo inikime kani nggwok pereegerak wonage me, Yetut nen obeelom eeruwak nduk, yoreegwaarak. 39Yogo mbareegwa, at eebe wonage me nage nagagirik, eraaninu mi'ndak logonet, ”Andi lek aru o,” awo yoge kagak, aret lek agagerak. Lek age mbareegi, kwe nogo mi'na'nuk, it inake eeke nagagerak.
40Ti'nuk, oonegen kilu yi nage kagak, it aap inoreewi kugi andi alitik-alitak kunik wonogogwaarak kenok, wogoret Yetut owagam piya wogogwaarak. Piya wogo mbareegwa, it abok aret at eenggi piginake logonet, obeelom eeginabeegerak. 41Ndi, it aakumi apit kugi inikime unggwagagerak nogo kunduk, obeelom aganabikit nduk eeko logonet, ”Kinoone puk en wundi nanip o,” yinuk, mberirage mbareegi, Ala nen leenogo mippereegerak Keritut nogo ineenu me, inoone kwa kunik yogo logonet, ”Ala aput kat aret o,” yinuk, wundit nogogwaarak.
It Yakuri tamban eeko menggam Ala wone yorage nagagerak wone
(Mrk 1:35-39)
42Ti'nuk, o wege mbareegi, Yetut o time nen wundi nage nagagirik, aakumi ineebe lek me nagagerak. Nagagerak kwe, it aakumi abok aret at kwaarit nugu logonet, kwaakkogo nogogwaarik, inom logowok nduk, tebeniyak eereegwaarak mendek, 43at Yetut nen it yorage logonet, ”Obeelom wone Ala abu'me piige minggim wone nogo o tini ando inom yoranet nege logokit nduk, nappani wagagerak me, mondok yoranet nege agarik o,” yinuk, yoragagerak.
44Yorage nagagirik, o Yureya tamban eeko menggam nogome aret yoranet nege nagagerak.
Currently Selected:
LUKAT 4: WNO
Highlight
Share
Copy
Want to have your highlights saved across all your devices? Sign up or sign in
LUKAT 4
4
Ibilit nen Yetut abut mbaneegerak wone
(Mat 4:1-11, Mrk 1:12-13)
1At Aberiniki nogo nen Yetut inikime unggwage mbareegi, yi Yoreran aa'nggi paga nage me, Aberiniki nen wonok karume aakumi lek me time nagagerak. 2Nage nagagirik, time wonage me, Ibilit nen at abut mbanikit nduk, eeke kagak, nogo 40 yereegerak. Abut mbanikit nduk eeke kagak, Yetut mbi mondok nengga'lek aret nogo 40 yereegerak me, mbi abu eereegerak.
3Mbi abu eeke mbareegi, Ibilit nogo wage nagagirik, ”Kat Ala aput aret kenok, yugum yi mbi aruwak nduk, yoru o.”
4Yoge mbareegi, at Yetut nen, ”Ala nen ari logonet, Aakumi mbi mban nunggwi kenok, ineenik logogun lek o, yinuk, yereegerak liiru mbanak wonage o.”
5Yoge mbareegi, at Ibilit nogo nen Yetut wonok puut paga lagangge nagagirik, time nen nggween paga yime yi aap ndi aap inendagembogut unde menggam abok aret ne ambit mbigak togon aago nikkagagerak. 6Nikkage nagagirik, ”It aap inendagembogut unde menggam tiyanak kenok, aakumi nen, Wi, ugwi yi nogo an unde logokit nduk, wo'nereegerak me, ndi, an niniki koombunuk en wogorage minggirak me, 7kat nabu'me tebe yinuk, nayuk wuke keenok, kenegen kagandak nogo abok aret kat unde logonok nduk, wokkirigin o.”
8Yoge mbareegi, at Yetut nen, ”Ala nen ari logonet, Kinogoba endagembogut Ala mban ayuk wukwi, at obaalombok mban eerit nogwe, eeko logonip o, yinuk, yereegerak liiru mbanak wonage o.”
9Yoge mbareegi, Ibilit nen Yetut wonok o Yerutalem Ala awi wurik kirin paga pi lagangge nagagirik, 11yoge logonet, ”Ala nen it mbogut paga at ayonggo nappiige menggerak melaikat nogo karum logowak nduk, yoramenggerak wogo logomenggaarik, yugum paga kowak kalok yi wangge keyo, ineenggi ndoonak paga inaani wambi namunggun o, yinuk, yereegerak liiru mbanak wonage me, kat Ala aput abet aret keenok, yime nen wu'mbo wambu o.”
12Yoge mbareegi, at Yetut nen, ”Ala nen ari logonet, Kinogoba endagembogut an nabut mbanggwi mage yereegerak o,” yinuk, yoreegerak.
13Yoge mbareegi, at Ibilit Yetut abut mbanikit eereegerak nogo abok aret eeppege nagagirik, ”Peebi yoriminggirak ambi op ariminggi ilik?” yinuk, teppunuk, mbaganeegerak.
Yetut o Nggalileya iyok paga lagi wagagerak wone
(Mat 4:12-17, Mrk 1:14-15)
14Mbagangge mbareegi, at Yetut nogo Aberiniki omaawi paga iyok paga o Nggalileya lagi wagagerak. Lagi wage nagagirik, wonage me, at abok nogo o time abok aret wigak yereegerak. 15O Nggalileya time logonet, it Yakuri tamban eeko menggam wone mamuniranet nage nogo paga aakumi abok at endage wogoppogo nogogwaarak.
Aakumi Nataret mendek nen, ”Yetut nineebi o,” yinuk mbo pereegwaarak wone
(Mat 13:53-58, Mrk 6:1-6)
16Ti'nuk, peebi at Yetut tawe age nagagim o Nataret nogome nage nagagirik, it Yakuri tamban eekwi paga tamban eeko menggam unggwi nage menggerak me, unggwi nage nagagirik, Ala wone liiru mbanak paga pekkagak yoraakit nduk, mi'nagagerak. 17Mi'nage mbareegi, aap Ala wone yorage nagagerak nabi Yetaya nen Ala wone mbuku pirik-perek aago liiru mbanak nogo Yetut wogoreegwaarak. Wogogo mbareegwa, mbuku nogo mbiganogo punuk,
18”It aakumi inamendek lek nogo obeelom wone yorage logowak
nduk, mippaneegerak me, nogoba endagembogut Aberiniki noba wonage o.
It aakumi keele maarak wonogwe nogo piininaburak wone inom,
inigen mbuk nogo inigen obeelom eeginaburak wone inom,
yoranet nage, it aakumi tebembiirogo wonogwe nogo wondet eerogo piige, 19ndi, ninogoba endagembogut ale'nggen ninoba pinaniyak eyom nogo muk panggo yegerak o, yorage, eeke logowak nduk, nappani wagagerak o,”
yinuk, yereegerak liiru mbaneegerak nogo kwaakkage nagagirik, pekkagak yoragagerak.
20Wone nogo abu yorage nagagirik, mbuku nogo perenogo aap unde nogo wogoge nagagirik, kwi'nagagerak. Kwi'nage mbareegi, it aakumi aap Yakuri tamban eeko menggam wonogogwaarak nogo abok aret inigen at mban loogo nogogwaarak. 21Inigen loogwi me, Yetut nen it Yorage logonet, ”Ala wone liiru mbanak pekkagak yokkiragarak nogo yogondak aret kinaruk konenggwi kiigak, a'me lik yigi o.”
22Yorage mbareegi, it aakumi abok aret, ”Wone ti abet aret yigi o,” yinuk, at wone abe kigirikwe ari me, ”Wi!” yinuk, pi wako logonet, ”Yi aap Yutup aput nogo lek a?” yinuk, yogogwaarak.
23Yogo mbareegwa, at Yetut nen, ”It aakumi yogo logonet, Ndotet wae. Kat keebe obeelom eekkolet o. Ndi, ambi, O Kaperenaum eeke nagandak konenggoorak nogo kame nda'nagaginom yime togop aret eeru o, yogo menggaarak nogo an yo'niriyak nduk, eekwi kiigi o.” 24Yorage nagagirik, ”It aap inawi alom paga logonet, Ala wone yorogwe iinok, inowe-inawot inaruk liirogon konenggulik o, yinuk, abet aret yokkiragi o. 25Aap Eliya wonage eyom paga mayu waga'lek yi awi ndi awi apit mbi noogelo aganabeegerak kagak, 3 tahun eeppunuk, ambi eeriyak oolo paga Iterali iname time kumi togwe ineebe ambik wonogogwaarak kwe, 26Ala nen aap Eliya nogo kumi togwe Iterali iname wonogwe nogo ambi ka nawak nduk, nappulik o. Ata, kwe togwe alik ambi o Tiram time tini ambi Tareta wonage me, owagam nappereegerak. 27Ndi, Ala wone yorage nagagerak nabi Elita nogo eyom paga aakumi Iterali iname time apit aret inawin aaga'ne kunik wonogogwaarak kwe, it ambi inawin obeelom aganabeegerak abu lek aret. Aap Naaman anebunu Tiyam mendek nogo alik mban awin obeelom eereegerak o, yinuk, abet aret yokkiragi o.”
28Yoragagerak nogo it aap Yakuri tamban eeko menggam wonogogwaarak nogo abok aret inaruk konenggo nogogwaarik, inanini ambik ogogwaarak. 29Inanini ambik eeginake mbareegi, mi'na'nuk, at eebe iname nen pigogo endekem wumbogo nogogwaarik, inawi puurom yigeebu me wurik me, pelenogo wuppi nawok nduk, wonok nogwe me, 30inenggela'me nen mbo piinok aret mbaganeegerak.
Aap ambi kugi ogole warak inikime lik yereegerak wone
(Mrk 1:21-28)
31Nage nagagirik, ti'nuk, o Nggalileya tini ambi Kaperenaum nagagerak. Nage nagagirik, it Yakuri tamban eekwi paga wone mamunirage nagagerak. 32Wone mamunirage logonet, at oone omaawi paga yorage me, aakumi nen, ”Iya!” yinuk, inagabiti ogogwaarak. 33Ne ambi paga aap ambi kugi ogole warak mendek inikime unggwagagerak me tamban eeko menggam wonagagerak. At aap nogo oone kwa kunit ari logonet, 34”Yetut wae Kat aap Nataret mendek me, nit nonggop ee'ninabikit nduk wagan o? Nit lek ee'ninaburak nduk wagan ilik? Kat Ala aput maluk eekeelik mondok obeelom alik leenak menggendak nogo, keebe an neenu aret o.”
35Yoge mbareegi, at Yetut nen mberege logonet, ”Koone puk a'nuk wundi nak o.” Yoge mbareegi, kugi nogo nen aap eebe aakumi inenggela'me nggween paga mbo nggimbege nagagirik, eebe andi yagan waka'lek kagak, nggigik togon wundeegerak.
36Nggigik togon wungge mbareegi, aakumi abok inagabiti nen, ”Wi!” yinuk, at ambi nen at ambi yogak eeko logonet, ”Wologwe! Aap yi, oone nonggop ari mbakop? Kugi wumbiyoorak at unde me, oone omaawi paga kugi ogole warak mendek, Wundi nanip o, yorage kenok, wunggo menggaarak iya!” yinuk, yogogwaarak. 37Ndi, Yetut eereegerak wone nogo o time abok aret wigak yereegerak.
Yetut nen aakumi ambik obeelom eeginabeegerak wone
(Mat 8:14-17, Mrk 1:29-34)
38At Yetut it Yakuri tamban eeko menggam nen wundi nage nagagirik, Timon ame aret unggwi nagagerak. Unggwi nage nagagirik, Timon owanggelo inikime kani nggwok pereegerak wonage me, Yetut nen obeelom eeruwak nduk, yoreegwaarak. 39Yogo mbareegwa, at eebe wonage me nage nagagirik, eraaninu mi'ndak logonet, ”Andi lek aru o,” awo yoge kagak, aret lek agagerak. Lek age mbareegi, kwe nogo mi'na'nuk, it inake eeke nagagerak.
40Ti'nuk, oonegen kilu yi nage kagak, it aap inoreewi kugi andi alitik-alitak kunik wonogogwaarak kenok, wogoret Yetut owagam piya wogogwaarak. Piya wogo mbareegwa, it abok aret at eenggi piginake logonet, obeelom eeginabeegerak. 41Ndi, it aakumi apit kugi inikime unggwagagerak nogo kunduk, obeelom aganabikit nduk eeko logonet, ”Kinoone puk en wundi nanip o,” yinuk, mberirage mbareegi, Ala nen leenogo mippereegerak Keritut nogo ineenu me, inoone kwa kunik yogo logonet, ”Ala aput kat aret o,” yinuk, wundit nogogwaarak.
It Yakuri tamban eeko menggam Ala wone yorage nagagerak wone
(Mrk 1:35-39)
42Ti'nuk, o wege mbareegi, Yetut o time nen wundi nage nagagirik, aakumi ineebe lek me nagagerak. Nagagerak kwe, it aakumi abok aret at kwaarit nugu logonet, kwaakkogo nogogwaarik, inom logowok nduk, tebeniyak eereegwaarak mendek, 43at Yetut nen it yorage logonet, ”Obeelom wone Ala abu'me piige minggim wone nogo o tini ando inom yoranet nege logokit nduk, nappani wagagerak me, mondok yoranet nege agarik o,” yinuk, yoragagerak.
44Yorage nagagirik, o Yureya tamban eeko menggam nogome aret yoranet nege nagagerak.
Currently Selected:
:
Highlight
Share
Copy
Want to have your highlights saved across all your devices? Sign up or sign in