LUKAT 8

Kumi nen Yetut ake eeko nogogwaarak wone

1Ti'nuk, peebi at Yetut obeelom wone Ala abu'me piige minggim wone nogo tini nggwok me inom, mbuuluk me inom, yoranet nege nagagerak. Nege logonet, at oone waganggwi 12 nogo inom, 2it kumi ando kugi inikime unggwagagerak inom, andi-pandi aganabeegerak inom, at Yetut obeelom eeginabeegerak nogo ti, kwe Mariya endage ambi Ma'ndalena yogo nogogwaarak inikime nen kugi ineebe 7 wumbiyareegerak nogo inom, 3kwe Yokana Keroret ayeloman Kutat akwe nogo inom, kwe tutana inom, ndi, kumi alik apit inamendek paga Yetut at oreewi inom inake eeko nogogwaarak nogo inom, Yetut inom nogogwaarak.

Aap awi yumbunit nagagerak eegu laarogo yoragagerak wone

(Mat 13:1-9, Mrk 4:1-9)

4It aakumi apit yi awi ndi awi nen at owagam kuwak eeri wogwe iigak, at wone eegu laarogo ambi yorage logonet, 5”Aap awi yumbungge menggerak unde nen awi yumbunikit nduk, wundi nagagerak. Wundi nage nagagirik, yumbunit nage kagak, ando tu paga wambit nagagerak. Tu paga wambit nagagerak nogo aakumi iniyok paga aan lebenogo pit nogwe iigak, towe nenet nogogwaarak. 6Ando yugum eeri paga wambit nagagerak. Yugum eeri paga wambit nagagerak nogo ti, mbilaneegerak kwe, yi amburu lek me, mbuk aret agagerak. 7Ando iri'ngga alookwi me wambit nagagerak. Iri'ngga alookwi me wambit nagagerak nogo ti, iri'ngga inom laganeegerak me, iri'ngga nen mbanogo wuppereegerak. 8Ndi, ando nggween mili abe paga wambit nagagerak. Nggween mili paga wambit nagagerak nogo ti, mbilangge nagagirik, mili kwit agan lagangge logonet, ero ambit nen anggen 100 yege, ambi 100 yege, eereegerak o,” yoragagerak.

Wone ti yorage nagagirik, oone nggwok ari logonet, ”Wologwe! Kinaruk koneniyak kenok, liirogon aret konenggo logonip o,” yinuk, yoragagerak.

Nonggop nduk Yetut wone eegu laarogo yoragagerak wone

(Mat 13:10-17, Mrk 4:10-12)

9Yorage mbareegi, at oone waganggwi nogo nen Yetut kin wakkogo logonet, ”Kat wone eegu laarogo yo'niragandak nogo alom ngge nduk yo'niragan o?” 10Yogo mbareegwa, at Yetut nen, ”Ala abu'me pinagarak wone inikime lubuk mban wonagagerak nogo kineenu arubagip nduk, Ala nen kilikkiroorak mbake menggerak kwe, it aap ando nogo nen perak, inigen kogwe kwe, yelok kogwe, ndi, inaruk konenggwi kwe, inikime waganggwi, eeko logokwak, wone eegu laarogo mban yorage minggirak o.”

Aap awi yumbunit nagagerak wone nogo alom liirogon yoragagerak wone

(Mat 13:18-23, Mrk 4:13-20)

11Yorage nagagirik, ”Wone eegu laarogo yokkiragarak nogo eebe yokkira. Awi yumbunit nagagerak nogo ti, Ala wone aret o. 12Tu paga wambit nagagerak nogo ti, aakumi nen Ala wone konembunuk, waganggwi iinok, Ibilit nen wage nagaatik, wone inikime waganggaatak nogo abet mbakwi paga inagap ndake kero, ndininuk wonok nggarek ari menggerak. 13Ndi, yugum eeri paga wambit nagagerak nogo ti, it aakumi Ala wone konembunuk, inale'nggen logonet, Ala wone waganggo nagaatik, luulu abet mbakwi kwe, inikime awi liirogon yakkoloolik me, peebi iniki abut mbangge eyom paga mbo pogo menggaarak nogo aret o. 14Iri'ngga alookwi me wambit nagagerak nogo ti, it aakumi wone inaruk konenggwi kwe, ambi eeriyak nduk, Ao, yinuk, iniki piirik wonogwe, ineenggi warak eekkoloorak mban iniki aberit nugwi, nggween paga ale'nggen logorak mban iniki koonit nugwi, eerit nugu logonet, wone yugu mbanogo wuppogo menggaarak nogo aret o. Anggen abe mendek abu yugulik aret menggaarak. 15Ndi, nggween mili paga wambit nagagerak nogo ti, it aakumi wone konembunuk, iniki abe lombok paga pipak waganggo nagaatik, nabenak mban eeko logonet, anggen yikkologo menggaarak nogo aret o,” yinuk, yoragagerak.

”Ndi wuninogo togolowak abu'me kiraappuurak mage,” yoragagerak wone

(Mrk 4:21-25)

16Yorage nagagirik, ”Ndi wuninogo punuk togolowak paga nobappugwi, nogo yugu menggam abu'me pugwi, ti eekulik o. Ata, wuninogo punuk, it aakumi tu unggwi wogwe nogo eya kaawak nduk, tena'me tiyarogon aret pogo menggaarak. 17Yi mendek ndi mendek kumaarak wonage kenok, pilak ari, ndi, wone inikime taberak wonage kenok, nggwok paga aret pagak ari, eerigin o.

18Togop me, wone nonggop konenggo monggotak nogo ti, kiniki liippinip o. It aap inamendek wonage kenok ti, ambinom luunogo wogorage, ndi, inamendek lek kenok ti, mbuuluk, Yi an o, mbakwi iigak, aret kolage, eeke kaamunggup o,” yinuk, yoragagerak.

”Nagalo-nawurilogwe yi aret o,” yoragagerak wone

(Mat 12:46-50, Mrk 3:31-35)

19Yorage me Yetut agalo-awurilogwe inom at owagam wogo nogogwaarik, aakumi ambik kuwak aago me, at owagam oome ungguurak meek age mbareegi, 20aakumi nen, ”Kagalo-kawurilogwe keyaawak nduk, wagaarak endekem wonogwe o.”

21Yogo mbareegwa, at nen, ”Nagalo-nawurilogwe ti, Ala wone konembunuk, eeko monggotak kit yi aret o,” yinuk, yoragagerak.

Wiya koba'le, ”Kabolok lek aru o,” yoreegerak wone

(Mat 8:23-27, Mrk 4:35-41)

22Peebi ne ambi paga at Yetut oone waganggwi inom yiiro paga unggwogo nogogwaarik, yorage logonet, ”Yi yenggenak ene paga wunda nawok o,” yinuk, wunda nogogwaarak. 23Wunda nogo logonet, at Yetut nogo, nogo yereegerak. Nogo yege kagak, yi yenggenak me o wiya koba'le nabuninuk wage logonet, yiiro inikime niyo yenggeni unggwage kagak, tebe agan wambuurak eereegerak. 24Tebe agan wambuurak eeke mbareegi, Yetut owagam nogo nogogwaarik, eenik eeppunuk, ”Ninogoba wae! Yi abu ndonggonninake agaarik o.”

Yogo mbareegwa, at eenik a'nuk, o wiya inom, yi kilaarakmogonik eeke inom, mberege mbareegi, puk a'nuk, yi yenggenak nogo abolok lek agagerak. 25Lek age mbareegi, at Yetut nen, ”Kiniki noba panggombunuk, abet nombakwi nogo ti, nonggop agaarak me, yogo ogotik o?”

Yorage mbareegi, inagabiti nen at ambi nen at ambi yogak yogo logonet, ”Wologwe! O wiya inom, yi inom, at oone konengge menggerak yi ta mbakop? Wi!” yinuk, pi wareegwaarak.

Yetut nen aap kugi inikime unggwagagerak me, wumbereegerak wone

(Mat 8:28-34, Mrk 5:1-20)

26Pi wako nogogwaarik, yi Nggalileya ene paga o Nggerata wunda nogogwaarak. 27Wunda nogo nogogwaarik, at Yetut yiiro paga nen nggween paga wundi nage mbareegi, aap ambi tini time mendek kugi inikime unggwagagerak nogo Yetut ka wagagerak. O maan nen oome wonaga'lek kobeewak mbanak ndoome aakumi kanggwi piigo menggam time aret wonagagerak. 28At nen Yetut kage nagagirik, abu'me ngginnari wage logonet, oone nggwok paga, ”Yetut wae! Ala tiyanak lombok menggerak aput yi, an nonggop ee'nabikit nduk wagan o? An nooke keyo nduk, yokkigi o,” yoreegerak. 29Ti yoreegerak nogo ti, at Yetut nen kugi kumili aap inikime nen wundi nawak nduk, yoge me, aap nogo nen Yetut yoreegerak. O maan togon kugi nen aap nogo piga wagak mban eeke kenok, eenggi-iyok mbuti keele paga maappunuk, arum wonogwe iigak, keele ndenenak-penenak eerogo mbo punuk, kugi nen aap nogo piyaninuk karume aakumi lek me time pi nagak eeke nagagerak.

30Kugi nogo nen Yetut yoge mbareegi, at Yetut nen, ”Kat kendage yu o!” Yoge mbareegi, kugi ineebe apit aap nogo inikime unggwogogwaarak me, ”An nendage Ambik o,” 31yinuk, ”Aap yi inikime nen wundi nanuk, mbuun me nappinaniyak ti mage o.

32Ata, puurom elan me time wam ambik ambime inogobak eerit nugwi me, wam inikime time unggwi nawok nduk, nappinanu o,” inoone nabek togon Yetut yogo mbareegwa, Yetut nen, ”E o. Time aret unggwi nanip o.” 33Yorage mbareegi, kugi nogo aap inikime nen wundit nogo nogogwaarik, wam inikime unggwogo mbareegwa, wam apit aret elan me nogome yuulu agan yi yenggenak inikime tabu-tabu unggwit nogo mbareegwa, yi nogo nen ndonggoninabeegerak.

34It wam ndegeninako nogogwaarak nogo nen wam yi ndonggoninake nogo kogo nogogwaarik, kole mbaganit nogo logonet, wam ndonggoninabeegerak wone nogo o tini nggwok me yorogwe, o owa'nggam-owa'nggam nogome yorogwe, eerit nugu nogogwaarak. 35Eerit nugu mbareegwa, eereegerak nogo it aakumi pekka nawok nduk, iname nen wundinuk Yetut owagam wogo nogogwaarik, aap kugi inikime nen wundi nagagerak nogo aap iniki a'nuk, yum yirik Yetut abu'me kwi'ndak wonage me ka wogogwaarak. Ka wogo nogogwaarik, inagabiti mbareegwaarak. 36Inagabiti mbako mbareegwa, kugi ambik aap inikime unggwogogwaarak Yetut obeelom eeke kogogwaarak nogo nen it wogogwaarak nogo yorogogwaarak. 37Yorogo mbareegwa, it aakumi o Nggerata yi awi ndi awi time abok inagabiti abu alik lombok aganabeegerak me, Yetut iname nen wundi nawak nduk, yoreegwaarak. Yogo mbareegwa, at Yetut yiiro paga unggunuk, iyok paga wagagerak. 38Wage me, at aap kugi inikime nen wundi nagagerak nogo nen, ”Nimbirak nawok o,” yinuk, oone nabek togon Yetut yoreegerak kwe, Yetut nen ame nappege logonet, 39”Kame kiyok paga nage logominggindik, Ala nen eekkakerak nogo mbininogo yorage a nak o.”

Yoge mbareegi, nage nagagirik, at ame time abok aret, ”Yetut ndogop ee'nakerak o,” yinuk, mbininogo yorage nagagerak.

Kolaga aap Yariyut apuluk inom, kwe Yetut ayum pigaganeegerak nogo inom, obeelom eeginabeegerak wone

(Mat 9:18-26, Mrk 5:21-43)

40It aakumi apit aret Yetut woraawak nduk, tokkogwe me, iyok paga wage mbareegi, keyage warogo waganeegwaarak. 41Waganggo mbareegwa, it Yakuri tamban eeko menggam unde inowe aap ambi endage Yariyut Yetut owagam wage nagagirik, abu'me tebe yinuk, ”An name pe'neya mok o,” yinuk, oone nabek togon Yetut yoreegerak. 42At apuluk ambolom kolaga ndarak tawe kagak, 12 tahun eereegerak me abu kambuurak eeke me, yoreegerak.

Yoge mbareegi, Yetut nogo nage kagak, it aakumi ambik inom ninggi'nuk nogogwaarak. 43Nogwe me, kwe ambi amiya eeke kagak 12 tahun eereegerak me, obeelom aruwak nduk amendek abok aret Ndotet wogoragaatak kwe, obeelom aga'lek aret wonagagerak. 44Kwe nogo Yetut ambo'me wage nagagirik, ayum irip eenggi pigagangge kagak, amiya eeke nagagerak nogo lek aret agagerak. 45Lek age mbareegi, at Yetut nen, ”Ta nen pi'nakerak?”

Yorage mbareegi, it apit aret lik-lek yogwe iigak, Peterut nen at yoge logonet, ”Nogoba o. It aakumi apit yi, ninggikkiren wogo logonet, taga'mbit agago pagagwi iigi o.”

46Yoge mbareegi, at Yetut nen, ”Lek o. An nomaawi ambi lek negen age kagarak me, ta nen pi'nakerak?” 47Yoge mbareegi, kwe nogo nen, ”Muk yelok neegerak kagi o,” yinuk, agabiti nen aganak nugege logonet, Yetut abu'me tebe yinuk, aakumi abok inenggaanom paga alom ngge paga Yetut ayum pigaganeegerak inom, ndi, awo pigagangge kagak eebe obeelom agagerak nogo inom, mbininogo yoreegerak. 48Yoge mbareegi, at Yetut nen, ”Napuluk o. Kiniki an noba panggombunuk, abet nombakendak paga obeelom agandak me, kinikiigun kame nak o,” yoreegerak.

49Awo yoge kagak, aap ambi it Yakuri tamban eeko menggam unde inowe ame nogome nen wage nagagirik, aap Yariyut nogo yoge logonet, ”Kapuluk muk kanggerak me, ninogoba Ngguru yi, tu aanom warogo wonok nagun o.”

50Yoge nogo at Yetut aruk konembunuk, Yariyut yoge logonet, ”Kagabiti mbarugun o. Kiniki noba panggombunuk, abet nombake kenok, kapuluk obeelom arigin o,” yo'nuk, 51aap nogo ame aret nogogwaarak. Nogo nogogwaarik, it aakumi abok endekem logowak nduk, yorage nagagirik, Peterut kunduk, Yaya kunduk, Yakobut kunduk, kolaga agalo-ogoba kunduk, nogo mban wogoret ame unggwi nagagerak. 52Unggwi nage nagagirik, aakumi apit aret le yogwe, ineebe wakkologwe, eekwi iige nagagirik, ”Le yugup o. Kolaga yi, kanggerak lek we nogo yege me, le yugup o.”

53Yorage mbareegi, it aakumi nen kolaga nogo abu kanggerak ineenu me, at agi'ndok kambeegwaarak. 54Agi'ndok kanggwi iigak, Yetut nen kolaga nogo eenggi pigagangge logonet, ”Kolaga! Mi'naru o.” 55Yoge mbareegi, kolaga nogo iniki ya'nari wage logonet, mi'nagagerak. Mi'nage mbareegi, Yetut nen, ”Kolaga yi mbi nawak nduk, wogo'nip o.” 56Yorage mbareegi, kolaga agalo-ogoba nogo nen, ”Iya!” yinuk, pi wako mbareegwa, Yetut nen, ”Eeke neegotak nogo aakumi yoraagup o,” yinuk, inaruk wareegerak.

Currently Selected:

LUKAT 8: WNO

Highlight

Copy