MATIYUT 19
19
Aap inakuwi mbo pugwi wone
(Mrk 10:1-12)
1At Yetut wone nogo abok yorage nagagirik, o Nggalileya teppunuk, tu yi Yoreran enebagan nen o Yureya unggwi wagagerak. 2Unggwi wage mbareegi, aakumi ambik mugurok nogo mbareegwa, andi kenok, obeelom eeginabeegerak.
3Obeelom eeginake me, it aap Pariti mendek ando wogo nogogwaarik, Yetut abut mbanuwok nduk, yogwi, ”Muta nen ari logonet, Alom ngge eerumenggaarak paga, aap nen inakuwi mbo piyoorak op, yereegerak mbaken o?”
4Yogo mbareegwa, Yetut nen, ”At o aa'nduk togon yi mendek ndi mendek wakkage logonet, 5aap ogobakkigike, kwe ogobakkigike, eerogo piige nagagirik, ari logonet, Aap nen agalo-ogoba teppiinok, akweeluk imbirak lambunna'nuk, it ineebe mbere kwe, ambit aret arugun o, yinuk, yereegerak liiru mbanak nogo kit pekkaga'lek monggotak ya? 6Ti yoragagerak paga ineebe mbere lek ambit aret logowak nduk, Ala nen aret lambumbiige me, at Ala nen lambunogo piige nogo ti, aakumi nen ponggonogo piyoorak mage o.”
7Yorage mbareegi, it nogo nen Yetut yogo logonet, ”At Muta nen, Aap akwe mbo puurak nduk liiru mbanogo wogoge kenok, mbo puurak aret o, yoragagerak ti nonggop nduk yoragagerak?”
8Yogo mbareegwa, ”Lek o. Kiniki laakot kiinok, at Muta nen kinakuwi mbo piyoorak op aret, yereegerak kwe, o maan aa'nduk togon togop eeka'lek wonogogwaarak kwe, yereegerak o. 9Kinakuwi aap nen wurinaka'lek kagak, mbo piinok, alik ambi waganggwi kiinok ti, mbabi eekwi aret o.
10Yorage mbareegi, it Yetut oone waganggwi nogo nen, ”Aap inakuwi warak nen togop eekwi kenok, kumi alik wogonaka'lek mondok tawe aret logorak kogo o.”
11Yogo mbareegwa, at Yetut nen, ”Aakumi abok aret wone yi waagun lek o. Ata, Ala nen woorak kooneegerak mban aret waagun o. 12Aap ando inagalo inikime nen inakuwi wogonaburak lek, iniitok ndarak wonogwe o. Ndi, ando aakumi nen eeginabeegwaarak paga inakuwi wogonaka'lek aret menggaarak. Ndi, it ando yogo logonet, Nit nen aakumi Ala abu'me piyawam, ninakuwi wogonaburak lek o, yinuk, miikkologwe paga inakuwi wogonaka'lek aret wonogwe me, wone yi woorak kiinok, waanip o,” yinuk, yoragagerak.
Yetut nen elege-aabologwe ale'nggen inoba piyareegerak wone
(Mrk 10:13-16, Luk 18:15-17)
13Ti'nuk, it aakumi nen at Yetut elege-aabologwe inanobak eenggi pippiinok, tamban eeruwak nduk, wogoret at owagam wogo mbareegwa, at oone waganggwi nen aakumi nogo mberirogogwaarak. 14Mberirogo mbareegwa, at Yetut nen it yorage logonet, ”Ala abu'me logorak ti, it elege-aabologwe yogop yi kokwak aret me, an nowagam woraawam non mbambiigwi ti, mage o. Op aret yoraanip o.”
15Yorage nagagirik, eenggi inanobak paga tebembiinok, o alik me nagagerak.
Aap eenggi warak ambi eereegerak wone
(Mrk 10:17-31, Luk 18:18-30)
16At Yetut tu paga nage me, aap ambi imbirak lambungge nagagirik, Yetut yoge logonet, ”Ngguru wae. Neenik mondok mendek kolaakit nduk obeelom mendek ngge eeri o?”
17Yoge mbareegi, Yetut nen, ”Aap ambiret mbn obeelom menggerak nogo kagak, nonggop nduk, Obeelom mendek ngge eeri, yinuk, an kin wo'nege agandik? Keenik mondok mendek kolaakit mbake keenok, Yogop ee'nu, ndogop ee'nu, wone yereegerak nogo aret mondok ndak-ndak eeke logot o.”
18Yoge mbareegi, aap nogo nen, ”Wone eebe ngge eeke logorak nduk yo'negen o?”
Yoge mbareegi, Yetut nen, ”Aap wariyak mage o. Mbabi eeriyak mage o. Yogoot kiraariyak mage o. Pilit wone aakumi inoba piyoorak mage o. 19Kinagalo-kinogoba inayuk wuko logonip o. Kit kineebe kiniki kunik eekkologo monggotak pogom, kinom monggotak togop aret kiniki kunik aganako logonip o.”
20Yoge mbareegi, aap tawe nogo nen, ”Wone ti, abok aret liirogon eeke minggirak kwe, ambit iluk ambi ngge eeka'lek neegendak me, yagan o?”
21Yoge mbareegi, Yetut nen, ”Wulaga. Kat aap abu obeelom lombok logokit, mbake keenok, kamendek abok aret onggo mbangge logominggindik, it inamendek lek nogo tumburira nak o. Tumburira nage keenok, kamendek mbogut paga nggwok aret kolaamunggun o. Ti abu eeke logominggindik perak, nimbirak nugu logowok nduk wa'nu o.”
22Yoge nogo aruk konengge nagagirik, at amendek ambik me, iniki puru agan ame nagagerak.
23Nage kagak, Yetut nen it at oone waganggwi nogo yorage logonet, ”Aap eenggi warak kenok, at mbogut paga mendek abu'me piige minggim unggwi noorak meek negen aret kagi o, yinuk, abet aret yokkiragi o. 24Ndi, ambi yi yokkira. Unta wam nggwok liiru eno mbuuluk pelenak me unggwi noorak op negen kwe, aap eenggi warak kenok perak, Ala abu'me piige minggim unggwi noorak ti, meek negen kagi o.”
25Yorage nogo it at oone waganggwi inaruk konenggo nogogwaarik, inagabiti ambik ogo logonet, ”Ti kenok, taani inagap ndariyak o?”
26Yogo mbareegwa, at Yetut nogo enegen pegiige logonet, ”It aakumi nen eeriyak meek aret kwe, Ala nen perak, yi mendek ndi mendek abok aret eeriyak op mban wonage o.”
27Yorage mbareegi, at Peterut nen, ”Nit yi mendek ndi mendek abok aret mbo punuk, kat ninom nugwi me, nano mendek kolaamun a?”
28Yoge mbareegi, Yetut nen, ”Kit ninom nugu monggotak yi, peebi o ngget ogobakkigirik me, an aap aret nda'nagagirak nogo tiyanak lombok wone lengganinake minggim wonage neegak, kit kunduk wone lengganinako monggo'nom 12 nogome logonet, aap Iterali inanebunu 12 nogo inowak looninako logomunggup o. 29An nendage nggwok aruwak nduk, kinagalo-kinogoba inom, kinowe-kinawot inom, kinaaganapuri inom, kinawi wurik inom, kineyabu aago inom, mbo pugwi kiinok, obaane'me kalo logonogo wokkirage logominggirik, mondok-mondok kineenik logobagip nduk, eekkinabigin o. 30Aap ambik inaa'nduk mendek nogo ti, peebi arugun, ndi, peebi mendek nogo ti, inaa'nduk arugun abet aret yokkiragi o,” yinuk, yoragagerak.
Currently Selected:
MATIYUT 19: WNO
Highlight
Share
Copy
Want to have your highlights saved across all your devices? Sign up or sign in
