MARAKUT 1

OBEELOM WONE MARAKUT NEN MBANEEGERAK YI O

At Yaya Yiime Wuppiige Menggerak nen Ala wone yorage nagagerak wone

(Mat 3:1-12, Luk 3:1-18, Ya 1:19-28)

1At Yetut Keritut Ala aput nen aa'nduk eereegerak obeelom wone yuwok o. 2At nabi Yetaya Ala wone yorage nagagerak nogo nen wone obeelom wone yorage logonet,

”Kat noorak tu yaruwak nduk,

an nen yonggo aa'nduk nappege neyaamunggun o.

3Aap ambi karume aakumi lek me kuum ari logonet,

ninogoba endagembogut at woroorak tu ogobakkigirogo yakwi,

ndi, at nage logorak tu koonogo yakwi,

eeko logonip o, yinuk, agan wage kaamunggup o,”

yinuk yoragagerak nogo liiru mbaneegerak.

4Liiru mbaneegerak nogo ndak-ndak, aap Yaya Yiime Wuppiige Menggerak nogo karume aakumi lek me wage nagagirik, aakumi yorage logonet, ”Kinomaluk lek eerogo pinagawak nduk, maluk eeko monggotak ti, kiniki koombunuk, mbo pinip o. Ti eekwi kiinok perak, yiime wuppinagarak o,” yinuk, yorage nagagerak. 5Yorage nogome wonage me, it yi aakumi ndi aakumi o Yureya inom, Yerutalem mendek inom, abok aret at Yaya owagam wogo nogogwaarik, inomaluk paganggo mbareegwa, niyo Yoreran inikime wuppiige nagagerak.

6At Yaya nogo unta wam eeruwak wiirogo ayum ogobakkigirogo yikkolage, agabee'le wam agabolo mendek yikkolage, eeppunuk logonet, at ambi yibila inom, teemok amburu inom, nengge nagagerak. 7It nogo wone yorage logonet, ”At peebi nambokan woraagin ti, aap nggwok aret o. Ndi, an we mbuuluk me, at iyogogut nggerenak tebe yinuk, piiniyak meek o. 8An nen we yiime wuppinagage minggirak kwe, at nen perak, Aberiniki kinoba wuppinagi woraagin o,” yinuk, yorage nagagerak.

Yaya nen Yetut yiime wuppereegerak wone

(Mat 3:13-17, Luk 3:21-22, Ya 1:32-34)

9Yiime wuppiige wonage me, at Yetut o Nggalileya tini Nataret nen nagagerak. Nage mbareegi, at Yaya nen yi Yoraran inikime wuppereegerak. 10Yi inikime wuppege mbareegi, wundi nage kagak, mbogut keyaake logonet, Aberiniki towe puume pogom wiga agan at Yetut oba nabi wage kagagerak. 11Kage mbareegi, Ala oone mbogut paga nen yoge logonet, ”Kat naput niniki kunik aret me, niniki ale'nggen eeke keegi o,” yoreegerak.

Ibilit nen Yetut abut mbaneegerak wone

(Mat 4:1-11, Luk 4:1-13)

12”Niniki ale'nggen eeke keegi o,” yoge mbareegi, Aberiniki nen wonok, karume aakumi lek me time nappereegerak. 13Karume nappereegerak wonage me, at Ibilit nen abut mbangge kagak, nogo 40 yereegerak. Pagi ame wonage me, it mbogut paga yonggo nugu menggaarak melaikat nen wogo nogogwaarik, iniki eyak wappi wogogwaarak.

Yetut nen aap ikan waganggo menggaarak mendek ineebe 4, ”Ninom nawok o,” yinuk, yoragagerak wone

(Mat 4:12-22, Luk 4:14-15, 5:1-11)

14At Yaya nogo keele maa'nuk wonok nogo mbareegwa, at Yetut nogo o Nggalileya wagagerak. Wage nagagirik, at Ala wone obeelom wone nogo yoranet nege logonet, 15”Ala eeriyak kooneegerak nogo eyom abu panggo yegerak o. At abu'me pinagarak nogo panggo yi wagaarak me, kinomaluk nogo, kiniki koombunuk, mbo pogo logomonggotik, obeelom wone abet mbako logonip o,” yinuk, yoranet nege nagagerak.

16Yoranet nege nagagirik, niyo Nggalileya yenggenak aa'nggi paga nage logonet, at Timon awot Andereyat imbirak ikan waganggo menggaarak me, ikan wawok nduk, yumunggok yugu yiime mbo wuppugwi enegen iyareegerak. 17Mbo wuppugwi enegen iige nagagirik, yorage logonet, ”Ikan waganggo monggotak ti kwak, aakumi wogonabit nugu logorak mamunggiraakit nduk ninom nawok o,” 18yorage mbareegi, yum ikan waganggo menggaarak nogo mbo punuk, inom nogogwaarak.

19Koorak time aret nage nagagirik, at Teberiyut apuri Yakobut awot Yaya imbirak inogoba inom yiiro paga logonet, yum ikan waganggo menggaarak nogo ogobakkigikwi enegen iyareegerak. 20Ogobakkigikwi enegen iige nagagirik, ”Ninom nawok o,” yorage mbareegi, it inogoba Tebereyut ayeloman inom yiiro paga time aret mbo piinok, Yetut inom nogogwaarak.

Aap ambi kugi ogole warak inikime unggwagagerak wone

(Luk 4:31-37)

21It nogo inom nogo nogogwaarik, o Kaperenaum unggwi nogogwaarak. Unggwi nogo nogogwaarik, at Yetut nen it Yakuri tamban eekwi paga it tamban eeko menggam nogome unggwage nagagirik, wone mamuniragagerak. 22It at oone mamunirage inaruk konenggo nogogwaarik, ”Iye!” Aap yi it Ala wone liiru mbanak unde nen yo'nirogo mengga kwak yo'nirage lek o. At oone omaawi paga mamunirage yi, ”Wi!” yinuk, pi wareegwaarak.

23At wone mamunirage kagak, aap ambi kugi ogole warak inikime unggwagagerak nogome, it tamban eeko menggam nogome unggwi wage nagagirik, 24kwa kunik ari logonet, ”Yetut wae. Kat aap Nataret mendek me, nonggop ee'ninabikit nduk wagan o? Nit lek eerogo pinanikit nduk wagan ilik? Kat Ala aput maluk eekeelik mondok obeelom alik leenak menggendak nogo keebe an neenu aret o.”

25Yoge mbareegi, at Yetut nogo nen mberege logonet, ”Koone puk a'nuk, wundi nak o.”

26Yinuk, yoge mbareegi, at kugi inikime unggwagagerak nogo nen eebe nuk ege, kwa ari, eeppege nagagirik, nggigik togon wundeegerak. 27Wungge mbareegi, it abok nen, ”Iya!” yinuk, inagabiti ambik age nagagirik, ambi nen yagak, ambi nen yagak yogo logonet, ”Wologwe! Nonggop eerogo wumbigi o? Wone alik ngget mamunik paga oone omaawi paga yoge kenok, wunggi ilik? Oone omaawi paga kugi ogole warak mendek, Wundi nanip, yorage kenok, konembunuk aret wunggo menggaarak yi iya!” yinuk, yereegwaarak.

28Yogo nogogwaarik, nogo eereegerak wone wonok, o Nggalileya enaagan-ambokan nogome mbet-mbet aret wigak yereegerak.

Yetut nen aakumi ambik obeelom eeginabeegerak wone

(Mat 8:14-17, Luk 4:38-41)

29It Yakuri tamban eeko menggam nogome nen wundi nogo nogogwaarik, it Yaya Yakobut imbirak Timon Andereyat iname inom unggwi nogogwaarak. 30Unggwogo mbareegwa, at Peterut owanggelo inikime kani pereegerak andi windak wonage me, ”Kwe andi yogop agaarik o,” yinuk, Yetut yoreegwaarak. 31Yogo mbareegwa, owagam nage nagagerik, eenggi pigogo mippereegerak. Pigogo mippege mbareegi, andi nogo lek age nagagirik, kwe nogo nen inake eeke nagagerak.

32Kiyoma-kiyoma oonegen kilu yi nage kagak, it kugi andi inom, it kugi inikime lik yereegerak inom, wogoren at owagam piya wogogwaarak. 33Piya wogo nogogwaarik, it aakumi time mendek abok aret tu ngga'nggi paga kuwak ari wogogwaarak. 34Kuwak ari wogo mbareegwa, it yi kugi ndi kugi kunik nogo abok obeelom eeginake, kugi inikime lik yereegerak kenok abok nggiginogo wumbiige, eeke kenok, it kugi nogo at Yetut eebe ineenu wonogogwaarak me, at Yetut nen, ”Kinoone yuurak lek o,” yinuk, yorage mbareegi, inoone puk nen aret wundit nogogwaarak.

At Yetut nen o Nggalileya obeelom wone yorage nagagerak wone

(Luk 4:42-44)

35O kilim nagabikit nduk apit eeke kagak, Yetut eenik a'nuk wundi nage nagagirik, aakumi ineebe lek me time tamban eeri nagagerak. 36Tamban eeke nogome wonage kagak, at Timon oreewi inom nen kwaarit nogo nogogwaarik, at eebe kwaakkogogwaarak. 37Eebe kwaakkogo nogogwaarik, ”It aakumi abok aret kat keebe kwaakkabit nugu agaarik o,” yoreegwaarak.

38Yogo mbareegwa, at Yetut nen, ”O tini koorok-koorok time kunduk yora naakit nduk wagarak me, nawok o,” 39yorage nagagirik, o Nggalileya yi awi ndi awi time it Yakuri tamban eeko menggam yorage, kugi inikime unggwagagerak kenok, nggiginogo wumbiige, eerit nege nagagerak.

Yetut nen aap awin aagane kunik obeelom eereegerak wone

(Mat 8:1-4, Luk 5:12-16)

40Eerit nege me, aap awin aagane kunik nogo at Yetut owagam wagagerak. Wage nagagirik, abu'me tebe yinuk ngginooge logonet, ”An nawin aagane kunik yi, kat obeelom ee'naburak mbake keenok, obeelom ee'naburak op o.”

41Yoge mbareegi, at Yetut nen abuwa mba'nuk, eenggi nderogon pigagangge nagagirik, ”An obeelom eekkaburak mbakirak me, obeelom agago pagagi o,” yinuk, 42awo yoge kagak, awin nogo lek age nagagirik, obeelom agagerak. 43-44Obeelom age mbareegi, oone aagi wuk togon yoge logonet, ”Aakumi abu yoraagun o. At aap Ala unde nen enegen keyaawak nduk, owagam nak o. Kat obeelom eekkakirak me, at Muta nen, Ala ake ndogop eerogo pogo logorak o, yinuk, yereegerak nogo ti, it aakumi nen keyaawak nduk pi nak o,” yinuk, aruk warogo nappereegerak.

45Nappereegerak mendek, oome nogome nen wungge nagagirik, at eeppereegerak wone nogo abok aret yi awi ndi awi paganogo yoranet nege mbareegi, at Yetut nogo aakumi inenggaanom tena'me nege logorak meek kenok, aakumi ineebe lek me time aret wonage me, aakumi yi awi ndi awi nen at owagam kuwak ari wagak mban eeko nogogwaarak.

Currently Selected:

MARAKUT 1: WNO

Highlight

Copy