MARAKUT 15

Yetut wonok Pilatut owagam nogogwaarak wone

(Mat 27:1-2, 11-14, Luk 23:1-5, Ya 18:28-38)

1Kuubondendok it aap Ala unde inuweewi inom, inanggok inom, Ala wone liiru mbanak unde inom, it aap wone amburu mbanggo menggaarak mendek abok inom kuwak eeko nogogwaarik, wone mbaneegwaarak. Mbanggo nogogwaarik, at Yetut nogo keele maa'nuk, wonok, at Pilatut owagam pi nogo mbareegwa, 2at Pilatut nogo nen, ”It Yakuri inuwe endagembogut kat aret ilik?”

Yoge mbareegi, at nogo nen, ”Ti kat nen aret yagan o.”

3Yoge mbareegi, it aap Ala unde inuweewi nogo nen yi wone ndi wone oba lenggeneegwaarak. 4Oba lenggenggo mbareegwa, at Pilatut nogo nen, ”Yi wone ndi wone kat koba lenggenggwi yi iyet o. Kat wone onggo yoroorak ambi mbake agandik ilik, lek a?”

5Yoreegerak kwe, at Yetut oone lek puk wonage mbareegi, at Pilatut nogo, ”Aap yi, iya!” yinuk, yereegerak.

”Yetut mondok waruwok o,” yereegwaarak wone

(Mat 27:15-26, Luk 23:13-25, Ya 18:39-19:16)

6Ndi, it Yakuri laago lako logonet mban, ”Aap keele maarak ambi piinogo wo'niret o,” yogwe iinok, at Pilatut nen piinogo wogoragak eeke nagagerak me, 7nogome logonet, it ando, ”Ninuweewi inoone koneniyak nineebi o,” yinuk, wim eeko logonet, aap wako mbareegwa, keele maarogo oome mambiyareegwaarak nogo ambi endage Mbarabat inom wonagagerak 8At Mbarabat keele maarak wonage me, it aap kuwak aago nogo Pilatut owagam kuwak ari wogo nogogwaarik, laago nggwok lako logonet, ”Aap keele piinnirage menggendak kwak, yogondak ambi piinniret o.”

9Yogo mbareegwa, at Pilatut nen, ”Kit aap Yakuri mendek kinuwe endagembogut piinogo wokkiroorak mba'nuk, yogo ogotik ilik?” 10Yoragagerak nogo it aap Ala unde inuweewi nogo inanini agaket paga wonok wogwe yelok iige nagagirik, togop aret yoragagerak kwe, 11it aap Ala unde inuweewi nogo nen, ”Yetut obaane'me at Mbarabat keele piinogo wo'niraawak nduk yo'nip o,” yinuk, it aakumi kuwak aago wonogwe nogo inikime manako mbareegwa, 12at Pilatut nen ambinom yorage logonet, ”Ti kenok, kit nen, Aap Yakuri ninuwe endagembogut, yogo monggotak yi, an nonggop eerogo pigin o?”

13Yorage mbareegi, it nogo nen, ”Eyo karo-karo paga nabenogo wappiyet o.”

Yinuk, inoone nggwok paga yogo mbareegwa, 14at Pilatut nogo nen, ”At maluk ngge eekerak paga yogo ogotik o?” yorage mbareegi, ya-mba ogo logonet, ”Eyo paga nabenogo wappiyet o,” yinuk, abunuk inoone wonggok togon yoreegwaarak.

15Inoone wonggok togon yogo mbareegwa, at Pilatut nogo nen it aakumi kuwak aago nogo iniki yanggo yuwak nduk, Mbarabat nogo keele piinogo teppege nagagirik, at Yetut ti, ya'mburan nggora eerogo wappunuk, eyo paga nabenogo puwak nduk wogoragagerak.

It aap yigin unde nogo nen Yetut miyuk-meya eerogo pereegwaarak wone

(Mat 27:27-31, Ya 19:2-3)

16Wogorage mbareegi, it aap yigin unde nogo nen it inuwe nggwok wonage minggim wone amburu mbanggo menggam nogome wonok unggwi nogo nogogwaarik, it nogo abok kuwak ari woraawak nduk inayonggo pereegwaarak. 17Inayonggo pereegwaarak nogo kuwak ari wogo nogogwaarik, at Yetut nogo mbogoyum maa'ngga warak yippugwi, alok komaarogo anobak paga yippugwi, 18eeppogo nogogwaarik, iniki laakot paga keyage wappogo logonet, ”Wa! It aap Yakuri inuwe kendagembogut kat aret keego o,” yinuk, 19yawi paga anobak telanggogwe, inowoori oba lenggenggogwe, eeppogo nogogwaarik, inindobanggun yindumbunuk, inuut wutik logonet, ayuk wureegwaarak. 20Togop aret agi'ndok kanggo nogogwaarik, mbogoyum maa'ngga warak nogo nggoorogo punuk, obaane'me at ambogoyum yippereegwaarak.

At Yetut eyo karo-karo paga nabembereegwaarak wone

(Mat 27:32-44, Luk 23:26-43, Ya 19:17-27)

Ambogoyum yippogo nogogwaarik, eebe eyo karo-karo paga nabenogo puwok nduk wonok nogogwaarak. 21Wonok nogwe me, it aap Alekatandet Uruput inogoba awi Kerene mendek endage Timon o tini koota nggwok nogome inikigun unggwi wage me, inom lambunggo nogogwaarik, ”Eyo karo-karo aago yi wamen o,” yinuk, inoone panggok togon yogo nogogwaarik, 22Yetut wonok, o endage it inoone paga Nggologota. Ndi, nit ninoone paga Anobak Yelenak nogome wonok pi nogogwaarak. 23Wonok pi nogo nogogwaarik, anggur amburu inom, nggami inom, nenggelak-kanggelak agago punuk, noorak nduk wogoreegwaarak mendek, teppereegerak. 24Teppege mbareegi, it nogo nen eyo karo-karo paga nabenogo pereegwaarak. Nabenogo pogo nogogwaarik, ”At ambogoyum nogo, ta kolage kamun?” yinuk, yugum anggen nggween paga mbo wuppegak eeko logonet, ”Abut loguk ari kenok, an kola o. Ndi, abut loguk yagapok kenok, kat kolet o,” yinuk, tumbukkologogwaarak. 25At Yetut eyo paga nabenogo pereegwaarak nogo ti, kuuben wundit nogwe jam 9 paga aret nabenogo pereegwaarak. 26Nabenogo pogo nogogwaarik, ”Yakuri inuwe endagembogut yi aret o,” yinuk, oba lenggeneegwaarak wone nogo liiru mbanogo eyo irip me nabembereegwaarak. 27Nabembogo nogogwaarik, aap yogot iyagalo mbere Yetut eebe peenok-peenok inalitak eyo paga nabenogo piyareegwaarak.

29-30Peenok-peenok piigo mbareegwa, it aakumi ando nogwe-wogwe nogo inuut walok yogo logonet, ”Keyik! An Ala awi wurik minogo punuk, obaane'me wuke neegak, nogo mbere yigin yagandak nogo, keebe eyo paga nabenogo pagagaarak ti, kagap ndakko'nok wambi mok ubi,” yinuk, yoreegwaarak.

31Yogo mbareegwa, it at Ala unde inuweewi inom, it Ala wone liiru mbanak unde inom, it nogo nen inom aret Yetut miyuk-meya eerogo pogo logonet, ”At nen it aakumi inagap ndake nagaarak kwe, at eebe agap ndakkoloorak perak, meek kogo o. 32Wambi wage ninigen kogo logomonggoorik, at abet mbaruwok nduk at Keritut it Iterali inuwe endagembogut nogo yogondak aret eyo paga nen wambi woraayok nda!” yinuk, agi'ndok kanggo mbareegwa, it aap mbere at inom eyo paga nabenogo piyareegwaarak nogo kunduk Yetut enggali wappereegwaarak.

Yetut kambeegerak wone

(Mat 27:45-56, Luk 23:44-49, Ya 19:28-30)

33Enggali wappogo mbareegwa, o liingge jam 12 paga nen yi awi ndi awi time o apit agagerak kagak, nok, kiyoma jam 3 paga nen aret eya agagerak. 34Eya age nagagirik, o kiyoma age kagak, jam 3 paga at Yetut nogo kwa ari logonet, ”Eloyi. Eloyi lama tabakatani!” yoreegerak. Ti, nit ninoone paga, ”Nogoba Ala o! Nogoba Ala o! Nonggop nduk an teppanegen o?” yoreegerak.

35Togop yoge mbareegi, it ando we inikigun wonogwe nogo nen oone ari inaruk konembogo nogogwaarik, ”Wologo wae. At Eliya wiige agaarik o,” yinuk, 36yogo mbareegwa, aap ambi nen puu'nuk nage nagagirik, ta'mbit tirogut paga anggur amburu aleegwi mendek tabumbunuk, nawak nduk yigirok kunogo wogoge logonet, ”Eliya nen piinogo wurabi wage kaawam me, puk o,” yinuk, aap kuwak aago nogo yoragagerak.

37Yorage mbareegi, at Yetut nogo nen kwa ari logonet, iniki worok togon kambeegerak.

38Iniki worok togon kangge mbareegi, yum Ala awi wurik me aken nggwe tugunik wonagagerak nogo, agi nen oolo muundok nggoguk yi wambeegerak. 39Ndi, it aap yigin unde inuwe nogo ena koonogo nikkage logonet, Yetut togop ari logonet, iniki worongge kage nagagirik, ”Aap yi Ala aput abet aret kagak wakoorak kagi o,” yereegerak.

40Ndi, at kwe Mariya awi Magaralena mendek inom, wulaga Yakobut awo tawe Yotet imbirak inagalo Mariya inom, kwe Talome inom, 41it nen at Yetut Nggalileya wonage kagak, inaagaluk negen eeppunuk, wonogogwaarak nogo inom, it kumi weelek ambik at inom o Yerutalem unggwi nogogwaarak nogo inom, it abok aret tayorogon taati nen Yetut eyo paga nabenak wonage ina nakkogogwaarak.

Yetut eebe ndoome mambereegwaarak wone

(Mat 27:57-61, Luk 23:50-56, Ya 19:38-42)

42At Yetut nogo kangge mbareegi, ko'lu tamban eeriyak nduk pip-puk agago pugwi paga o kiip age mbareegi, 43it aap wone amburu mbanggo menggaarak nogo aap ambi endage Yutup, awi o Arimateya mendek ayuk warak lombok me, ”Ala abu'me panuwak o,” yinuk, tokkage wonage me, agabiti lek a'nuk, at Pilatut owagam nage nagagirik, ”Yetut eebe warak wo'niru o,” yinuk, ngginoori nagagerak. 44Ngginooge mbareegi, at Pilatut nogo nen, ”Abu kanggerak o,” yogwe aruk konembege nagagirik, ”Iye!” yinuk, it aap yigin unde inuwe nogo yonggo nappereegerak wage mbareegi, ”Yetut abu kanggerak a, lek a?” yinuk, kin wakkagagerak.

45Kin wakkage mbareegi, ”Abu kanggerak o,” yoge mbareegi, eebe warak nogo wa nawak nduk, at Pilatut nen Yutup nogo yoreegerak.

46Yoge mbareegi, mbogoyum laambu tabak ambi onggo punuk, wonok, eebe warak nogo piinogo wuppi wage nagagirik, mbogoyum laambu tabak nogo paga nggerenogo yugum ndo nendaarak me mambunuk, yugum laganogo tungga nappereegerak. 47Eebe mambereegerak nogo, at kwe Mariya awi Magaralena mendek nogo inom, Yotet agalo Mariya inom, inigen kogogwaarak.

Currently Selected:

MARAKUT 15: WNO

Highlight

Copy