MARAKUT 6
6
Aap Nataret mendek nen, ”Yetut nineebi o,” yinuk, mbo pereegwaarak wone
(Mat 13:53-58, Luk 4:16-30)
1O time nen Yetut inom, at oone waganggwi nogo inom at awi alom paga nogogwaarak. 2Nogo nogogwaarik, it Yakuri tamban eekwi paga tamban eeko menggam unggwage nagagirik, wone mamuniragagerak. Wone awo mamunirage kagak, it at oone koneneegwaarak nogo nen, ”At wone yi ngga nen waganggerak paga ari agaarik mbakop? Aap iniki warak oone negen ari yi, wone nano wone waganggerak paga ari agaarik o? Eerubok eeke yi, nonggop togon eeke agaarik mbakop?” yogo nogogwaarik, ”Wi!” yinuk, pi wako logonet, 3”At kwe Mariya aagaluk o wuka yi, awuri Yakubut inom, Yotet inom, Yurat inom, Timon inom, at awurilogwe komologwe ninom monggoorak yi nogo lek a?” yinuk, at Yetut ineebi mbareegwaarak.
4Ineebi mbako mbareegwa, at Yetut nen, ”It aap Ala wone yorogo menggaarak ti, yi awi ndi awi nen konenggo menggaarak kwe, inawi alom paga inuwe-inawot inom, inom menggaarak mendek inom, inenggela'me logonet, Ala wone yorogwe iinok inaruk liirogon konenggulik o,” yinuk, yoragagerak.
5Yorage nagagirik, eerubok mendek time eeriyak meek kagak, ambiitak-ambiitak kugi andi me inanobak eenggi pippiinok, obeelom eeginabeegerak. 6Ndi, at Yetut nen it iniki at oba panggombunuk abet ombaka'lek iige nagagirik, ”Aakumi iya!” yinuk, inombareegerak.
Yetut nen at oone waganggwi 12 nogo nappiyareegerak wone
(Mat 10:5-15, Luk 9:1-6)
O tini lombok yanggwagak-ndanggwagak nege nagagirik, 7ti'nuk, awuri 12 nogo woraawak nduk wiiragagerak wogo mbareegwa, kugi ogole warak mendek nggiginogo wumbiinet nogo logowak nduk awone kilirirage nagagirik, mbere'ndak lombok nappiyaakit nduk, yorage logonet, 8”Kinambi inom, wokkirogwe iinok yonggoliyak yum inom, kinawu inom, kinayi mendek ndi mendek abu wonok nagup o. We, kit kinowaanggun mban ko'nok nanip o. 9Kiniyogogut yikkologwe ti op kwe, kineebe me mbogoyum mbere yiriyak ti perak, mage o,” yinuk, inaruk wareegerak. 10Inaruk wake nagagirik, wone ambi yorage logonet, ”O ambi me namonggotak me, wokkinakwi iinok, ambi me awo naga'lek logonet, kinom time logomonggotik, nanu o. 11Ndi, o ambi me nen kit wokkinaka'lek. Kinoone inom konengga'lek eekwi iinok perak, Kiniraaket o, yinuk, kiniyok paga liirubu a'nggan negen agago piinok, time nen wundi nanu o,” yinuk, nappiyareegerak.
12Nappiige mbareegi, nogo nogogwaarik, ”Kit maluk eeko nogotak nogo, kiniki koombunuk, mbo pinip o,” yinuk, yoranet nugu nogogwaarak. 13Nugu logonet, aakumi yi kugi ndi kugi inikime lik yegetak nogo nggiginogo wumbiigwi, kugi andi kunik kenok amburu inoba kilippiinok, obeelom eeginakwi, eeginabit nugu nogogwaarak.
Yaya Yiime Wuppiige Menggerak wareegerak wone
(Mat 14:1-12, Luk 9:7-9)
14Eeginabit nugu nogogwaarak nogo paga, at Yetut endage yi awi ndi awi inaruk koneneegwaarak me, at Keroret endagembogut nogo inom aret aruk koneneegerak. Inaruk konembogo nogogwaarik, it ando nen, ”At Yaya Yiime Wuppiige Menggerak nogo kanggo menggam nen eenik a'nuk, mi'nagaarak nogo paga nen eerubok mendek eerit nage kogo o,” yereegwaarak kwe, 15it ando nen, ”Lek o. Eliyat aret o,” yogwe, ndi, it ando nen, ”It maan Ala wone yorogo nogogwaarak nabi-nabi kwak a'nuk, yogondak yorage agaarik o,” yinuk, yogwe, eeko nogogwaarak.
16Yogwe nogo, at Keroret aruk konembege nagagirik, ”Wologwe! Yaya enggaanok mbanggirak nogo, eenik a'nuk mi'nagaarak kagi o,” yereegerak. 17-18Ti yereegerak nogo ti, at Keroret nen kwe Keroriyat Piliput awot akweeluk kagak, wagangge mbareegi, at Yaya nen Kerorek yoge logonet, ”Kat kawot akweeluk woorak lek kagak waganggendak me, kimbirak logorak mage o,” yinuk, yogak mban eeke mbareegi, Keroret nogo nen, ”Yaya warikit,” mba'nuk, keele maaruwak nduk nappiige mbareegi, nogo nogogwaarik, pippunuk aakumi keele maarogo mambiigo menggam mambereegwaarak.
19Mambereegwaarak me, at kwe Keroriyat nogo iniki pale agan nage logonet, ”Warikit,” mbake kagak, 20at Keroret nogo nen, ”Yaya nogo maluk eeka'lek iniki koonak aret kagi o,” yinuk, at Yaya nen wone yoge nogo aruk konengge logonet, iniki aaninggin age kagak, koneniyak inikilom mbake nagagerak me, agabiti mbake logonet, ”Wake kero,” yinuk, kumaapporogo wonagagerak me, wariyak meek agagerak.
21Kumaapporogo wonage me, at Keroret nda'nagagerak eyom ari wage mbareegi, at awuri kepala-kepala mippiyareegerak inom, it yigin unde inuweewi inom, it aap Nggalileya mendek inuweewi nagowan-nagowan inom, nggelak lakwi me, kwe Keroriyat nogo nen, ”E! Yogondak perak, nanonggwaan kuwak agaarak kagi,” mbake kagak, 22at Keroriyat aagaluk nogo unggwage nagagirik, kwirabit-kwirabok ari kenok, at Keroret oreewi inayonggo nappiyareegerak wogogwaarak nogo inom nogo nen, ”Kwe yi ari, iya!” yinuk, pi wako mbareegwa, at Keroret nogo nen kwe tawe nogo yoge logonet, ”Kat nano mendek uugwe mba'nuk nggino yo'nege keenok, wokkirigin o,” 23yoge nagagirik, ”Kat an nano wokkiriyak mbakendak o? O yime an unde minggirak me, Kuli ogoorogo panu o, yo'nege keenok, an nen peenok ogoorogo pagakit o,” yinuk, Ala owak mbaneegerak.
24Owak mbangge mbareegi, wundi nage nagagirik, kolaga nogo agalo kin wakkage logonet, ”An nano mendek wo'niruwak nduk, na?”
Yoge mbareegi, agalo nogo nen, ”At Yaya Yiime Wuppiige Menggerak anobak mbanggiruwak nduk yori nak o,” yoreegerak.
25Yoge mbareegi, at kolaga nogo puu'nuk aap endagembogut owagam unggwi nage nagagirik, ”Yogondak at Yaya Yiime Wuppiige Menggerak nogo anobak mbanak tenggap paga ndoonogo wo'niri mok o,” yinuk, yoreegerak.
26Yoge mbareegi, aap endagembogut nogo iniki maluk agagerak kwe, it laago lakome wonogogwaarak inenggaanom paga Ala owak mbaneegerak me, teppunuk eebi mbakak, 27aap yigin unde ambi Yaya enggaanok mbanogo anobak wonok woraawak nduk nappege mbareegi, nage nagagirik, keele maarogo mambiigo menggam unggwage nagagirik, enggaanok mbanogo, 28anobak tenggap paga ndoonogo wonok wagagerak. Wonok wage nagagirik, kwe tawe nogo wogoge mbareegi, agalo wogoreegerak. 29At Yaya oone waganggwi nogo nen Yaya enggaanok mbaneegwaarak inaruk konembunuk nogo nogogwaarik, eebe wonok ndoome pi nogogwaarak kwe, agan nugwi Keroret konembunuk, ”Eenik a'nuk, mi'nagaarak kagi,” yinuk, yereegerak.
At Yetut nen aap ineebe 5000 mbi karerogo wogoragagerak wone
(Mat 14:13-21, Luk 9:10-17, Ya 6:1-14)
30At Yetut nappiyareegerak nogo iniyok paga at Yetut owagam wogo nogogwaarik, it eerit nogo nogogwaarak wone inom, mamuniranet nogo nogogwaarak wone inom, mbininogo yori wogogwaarak. 31Mbininogo yori wogo mbareegwa, aakumi ambik at ka nogwe-wogwe eekwi me, mbi noorak meek age mbareegi, at Yetut nogo nen, ”Yanggonggolaawok nduk, ninalik aakumi lek me nawok nen woraanip o,” 32yorage nagagirik, ”Aakumi lek me, ambi me nawok o,” yinuk, it nogo yiiro paga unggwogo nogogwaarik, nogogwaarak.
33Yetut oreewi inom nogwe nogo aakumi ambik nen iigo nogogwaarik, o tini lombok nen tu nggween paga it noorak mbareegwam nogome yelok iigo nogogwaarik, inaru nggaruk pegak inaa'nduk enaa'nari nogogwaarak. 34At Yetut oone waganggwi inom yiiro paga nen yi aa'nggi paga wundi nogo nogogwaarik, wam ndomba inarum wonogwe lek me, wam mban kuwak aago mengga kwak, it aakumi ambik togop kuwak aago iige nagagirik, ”Inabuwa o,” mba'nuk, yi wone ndi wone mamunirage nagagerak. 35Wone mamunirage kagak, o abu kiip age mbareegi, at oone waganggwi nogo at owagam wogo nogogwaarik, ”O wurik yime abu lek o. Ndi, o abu kiip ariyak age me, 36aakumi yi inambi onggo mbanggola nawak nduk, o tini nggwok me inom, o yambo-ndambo wurik time inom, nappiyet o.”
37Yogo mbareegwa, at Yetut nen, ”Inambi nawak nduk, kit nen aret wogoraanip o.”
Yorage mbareegi, it nen, ”Nit ninawu we 200 mban aret me, ti paga mbi kunogo magaroorak op me nduk yagan a?”
38Yogo mbareegwa, at Yetut nen, ”Kit kinambi mande wonage? Pekkanip o.”
Yorage mbareegi, pekkogo nogogwaarik, ”Mbi roti we 5, ndi, ikan 2 aret wonage o.”
39Yogo mbareegwa, at Yetut nen it yorage logonet, ”Aap inawuri lombok iri'ngga paga taati kunu wurogo kwi'nari nawak nduk, yoraanip o,” yinuk, 40yorage mbareegi, it aap aago nogo ando 100 paga ambi me kwi'nogwe, ando 50 paga ambi me kwi'nogwe, eerit nogogwaarak. 41Kwi'narit nogo mbareegwa, at Yetut nogo nen roti mbi 5 inom, ndi, ikan 2 inom wappunuk, ena mbogut paga ni'nage nagagirik, ”Nogoba Ala wa!” yinuk, roti mbi karerogo aakumi nogo tumburiraawak nduk, at oone waganggwi nogo wogoragagerak. Wogorage nagagirik, ikan 2 waganogo abok aret nawak nduk, tumburiragagerak. 42Tumburirage mbareegi, it nogo abok nonggo nogogwaarik, ndonggoppiyareegerak. 43Ndonggoppiige mbareegi, mbi inom, ikan inom, ando ndiinogo pereegwaarak nogo, mbirin yum 12 paga eno korok togon yonggologo pereegwaarak. 44It roti mbi nunggugwaarak nogo ti, aap ineebe 5000 aret nunggugwaarak.
At Yetut yi ogombaga nagagerak wone
(Mat 14:22-33, Ya 6:16-21)
45 Roti mbi nogo nonggo mbareegwa, at Yetut nen it aakumi o time nen nappiyaakit nduk wonage logonet, at oone waganggwi nogo yiiro paga unggwi nanuk, inaa'nduk o Mbetayira yi enebagan wunda noorak nduk oone omaawi paga yoragagerak. 46Yorage nagagirik, nogwe iigak, aakumi nogo iname nappiinok, tamban eerikit nduk puurom time laganeegerak. 47Nogome tamban eeke kagak, o kiip agagerak me, yiiro nogo yi yenggenak oolo ari wagagerak mbareegi, at Yetut nogo ti'nuk, wage nagagirik, alik yi aa'nggi paga wonagagerak. 48Yi aa'nggi paga time wonage logonet, o wiya initeemenggwe nen mban nabuninuk wage logonet, yiiro nogo ogobak nomoninuk wagak mban eeke kagak nogwe iyareegerak. At Yetut o kilim nagake kagak, yi ogombaga iyok pit inowagam nage nagagirik, it yiiro paga iigak, nok-nok naakit nduk eeke mbareegi, 49it nen yi ogombaga iyok pit wage inigen kogo nogogwaarik, inikime nen yi kugi aret mbako nogogwaarik, kwa yereegwaarak.
50It abok aret wage in gen kogo nogogwaarik, inaganak wake mbareegi, ”Kinogut li o,” yorage nagagirik, ”An neebe aret wage me, kinagabiti yugup o,” yoragagerak. 51Yorage nagagirik, yiiro paga iya unggwage mbareegi, o wiya nogo abolok lek aret agagerak. Wiya nogo lek age mbareegi, ”Iya!” yinuk, inagabiti ambik ogo nogogwaarik, pi wareegwaarak. 52At roti mbi karereegerak nogo iniki liippega'lek kobak wonogogwaarak me, peebi o wiya lek agagerak nogo kunduk iniki togop aret ugun kobak logonet, inagabiti ambik ogo nogogwaarik, pi wareegwaarak.
Yetut nen o Nggenetaret logonet, kugi andi warak me, obeelom eeginabeegerak wone
(Mat 14:34-36)
53Yi enebaga wunda o Nggenetaret ari wogogwaarak. Wogo nogogwaarik, yiiro yi aa'nggi paga taa'nogo mbarenogo punuk, 54endekem wundi nogo mbareegwa, it aakumi time nen at Yetut yelok kogogwaarak. 55Wundi nage yelok kogo nogogwaarik, o tini lombok time yonggo puu'nuk nogo nogogwaarik, Yetut time wonage inaruk koneneegwam nogome, kugi andi warak inagari'ngga ndoonak menggaarak nogo paga ewuguren Yetut owagam kuwak ari nogo nogogwaarak. 56O tini nggwok me inom, mbuuluk me inom, o yambo-ndambo time inom nege kagak, it kugi andi warak nogo mbi onggo kunggo menggam piya wagaatak nogo nen, we ambogoyum irip pigaawak nduk nggino yogo nagaatik, pigaganggwi iinok, at nen abok obeelom eeginake nagagerak.
Currently Selected:
MARAKUT 6: WNO
Highlight
Share
Copy
Want to have your highlights saved across all your devices? Sign up or sign in
