KEJADIAN 27

Ishaken Allah unuk fam amloho Yakub hi ribag ane

1Ishak ino mondabi sabal atfareg il siyag atfagma amloho wandabon Esau ino ma ulug wol tibagma Esauen, ”Yu, nikni,” ibag.

2Ibagma Ishak inowen hiyag utuk lit, ”An mondabi sabal atikikteg war atuk ane horog toho welahi. 3Ari fahet sehen wamihinteg farema pak eke warik lamihinteg watmihin. 4Watmihinteg nahiyeg toho naminen ahil toho isag nitmihinmu naminteg an uwan war am fug lit Allah unuk fam hat hi hapmin,” ulug hiyag itfag.

5Ishaken Esau hiyag utukmu Ribkan hol hibareg Esau ino pak watmin ulug libagma 6Ribka inowen Yakub hiyag utuk lit, ”Namloho, hikniyen Esau hiyag utukmu holihi ane tu holeg lamin, 7’Pak misig warik lamihinteg ahil toho isag nirik watmihinmu naminteg an uwan war am fug lit Ninikni Allah unuk fam hi hapmin,’ ehekon holihi. 8Ari fahet namloho, anden hiyag hitminon hikit toho timihin. 9Wam endetuk lahe ambeg lamihinteg wam kambing umalik fanowon piren wamihinteg an og nirik watmihinmu hikni ahiyeg toho namisiyen esetminmu 10haren walug lamihin. Walug lamihinmu namisireg at uwan war am fug lit Allah unuk fam hi hapmisi,” ulug hiyag itfag.

11Hiyag itfagma Yakub inowen hiyag utuk lit, ”Nisinga, Esau ino amenderuk anggolo weregma an namenderuk eleg angge re 12nikniyen an nahap sen haruk lit nele yong nabehek ulug oluk atmisireg Allah unuk fam hi nabuk fug angge huluwap napmisi lit teg,” ulug hiyag itfag.

13Hiyag itfagma isingan, ”Namloho, huluwap hapmisi ane an nubam atmisiyen hindi se roho anden ihiyon hikit toho wam kambing itano wak lamihin,” ibagma 14Yakub inowen wam kambing itano wak libareg isinga og irik watfagma Ishaken ahiyeg toho nawag ulug ahil toho esetfag. 15Esetfareg Ribka inowen sum Esauen wan tarukon mondabi fanowon aren olma fet enesug latfahon wibareg Yakub wan tibibag. 16Wan tibibareg wam kambing esetfahon ahap fungguloho imbibahon itano wibareg Yakub inggikmu men anggolopma men ikniyen amenderuk pukag ulug hililip toho pug tibibag. 17Pug tibibareg ahil toho esetfag angge men roti wiratfahon men og itfagma 18ikni ambeg walug libareg nikni ulug hi ribagma Ishak inowen, ”Namloho, hat Esau ano Yakub ano?” ibag.

19Ibagma Yakub inowen, ”An hat hamloho Esau wandabon ino wahi. Haren hiyag nerehenon hikit toho pak osoko walug wahireg in atmihinteg heriyeg lit naruk lamin! Namihinteg Allah unuk fam hi napmihin,” ulug hiyag itfag.

20Hiyag itfagma Ishak inowen, ”Namloho, folo-folo warehenteg walug wahen,” ibagma Yakuben, ”Hikni Allah inowen siloho nolohotma imbik wahama walug wahi,” ibag.

21Ibagma Ishak inowen Yakub fam, ”Hat hahap fag hiyaminteg we tem Esau waha ulug noluk atmisiyen niraham tiya ma!” ibag. 22Ibagma Yakub ikni iraham libagma ahap fag haruk lit, ”Hele Yakub ele hag toho holtuk lahi angge famen hinggik Esau inggik hag toho fag haruk lahi,” ibag. 23Yakub inggik wam oruk fam hililip tegma Esau inggik amenderuk wilibihon hag toho werehen Ishaken Esau waha pibareg Allah unuk fam hi rimin ulug wenggel hibag anggeyen 24nin eke kapal haruk lit, ”Hat we tem toho Esau wahen?” ulug kapal hibagma Yakub inowen, ”Nikni, we tem toho an Esau wahi,” ibag.

25Ari ibagma Ishaken, ”Esetug wahen angge og nitmihinmu naminteg Nikni unuk fam hi hapmin,” ulug hiyag itfagma pak osoho ino men anggur ahaluwe tot men og itfagma nibag. 26Nibareg, ”Namloho, an horogma tiya watmihinteg mako pug toho sen nasug latmihin,” ulug hiyag itfagma 27#Kej 12:3; Ibr 11:20Yakub ikni horogma libareg mako pug toho senegma Ishaken amben pal harukmen Esau asum amben turuk latfagma amloho Allah unuk fam hi ruruk lit, ”Namloho, Ninikni Allahn yabuk fam osit pilabik waharukmu amben fano roho turuk hag toho hat hamben oho fano roho turukmu pal haruk lahi. 28Pohol filen Allahn hibilil pilap hirik waharukmu kinang haren tohon sei atukmu suburu roti anggen men anggur anggen men anggolo roho wilip atuk laruhu. 29Ap o pumbuk humon welamuhubon hat halukema kunuk toho hur atuk lit hamingmingangge welamuhup. Hori arimano inikni roho hat werehen holohotma sahung atuk lamuhup. Hat huluwap haptukon arimano ininggareg siyag amuhup. Allah unuk fam hi haptukon arimano Allahn indi enesug laruhu,” ulug hiyag itfag.

Esau inowen an oho hi napmihin ulug ikni fam heng tibag ane

30Ishak inowen amloho Yakub Allah unuk fam hi ribagma wilip atug larukmu itano owe Esau ino fareman watfag. 31Aren oho pak ahil toho esetfareg ikni ambeg walug watfareg ele uruk lit, ”Nikni, in atmihinteg heriyeg lit hat fahet walug wahi angge aru naruk lamin! Namihinteg Allah unuk fam hi napmihin,” ulug hiyag itfagma 32Ishak inowen, ”Hat san uruk lahen?” ibagma Esau inowen, ”An hamloho Esau wandabon inowen uruk lahi,” ibag.

33Ibagma Ishak ino yuk lagmag ibareg ebene elek turuk lit, ”Hat uwan wam fugmu san pak waroho isag nirik waha? At inowen walug wahayon ninggireg namloho wandabon tem toho waha ulug Nikni Allah unuk fam hi rihi angge re un ane ihi uk fug teg lahi,” ulug hiyag itfag.

34Hiyag itfagma Esauen hol hibareg ahummu siyag anggolowen ele hum toho uba yatuk lit, ”Nikni, an oho Hikni unuk fam hi napmihin,” ulug heng tibag.

35Heng tibagma Ishak inowen, ”Hat hot ino wahareg ele si ane ehekma hat hubam hiyag hetle ane ino at ubam hiyag irihi,” ibag.

36 # Kej 25:29-34 Ibagma Esau inowen ele uruk lit, ”Tam at inowen hat wandabon welaruhun fug ulug nele ying naptisireg yoho oho inggik pirenehon nele yong naptuk lit haren an nubam hiyag netlen ane ino hilalug laha. Inggareg unuk Yakub suwalehon hikit toho ele si ane tehek.#Yakub: Ibrani enele fam unuk Yakub ino men, ele si ane urukon men ambi reg. Allah unuk fam an hi nabuk hahon winon eke wereg eleg?” ulug kapal hibagma 37Ishak inowen, ”Anden hot ino fam howe ikni hat welaruhun ulug unduhuk fihi. Hori hat hamingmingangge weregma hat fahet roti anggen men anggur anggen men anggolo aruhu ihi. Ari obog toho hot hiyag irihi angge re hat hubam nungge uk fug teg lahi,” ulug hiyag itfag.

38 # Ibr 12:17 Hiyag itfagma Esau inowen nin eke ele ine roho kapal haruk lit, ”Haren Allah unuk fam hi eneptuk ane misihim ehenteg pirenam uk fug teg ano? Nikni, an oho Allah unuk fam hi napmihin!” ibareg ele hum toho uba yatuk latfag.

39 # Kej 36:8; 2Raj 8:20; Ibr 11:20 Uba yatuk latfagma Ishak inowen hiyag utuk lit,

”Hat welaruhun ambeg hibilil pilabik waharuk elehen

hangginang sei reg laruhu fug.

40Ap enebe unusuruk lit eneg

aben tohon naruk laruhun.

Hat hot amingmingangge welaruhun angge famen

at apma welaruhuk fug ulug

hine roho in aruhun halug

aren inggik obog hiyahu,” ulug hiyag itfag.

41Esau inowen nikniyen Allah unuk fam not Yakub eneg hi rehek ulug Yakub fahet nirim peruk lit tot welamuhukteg nikni war aruhumu fong watuk lamuhuk ane arat atuk halug Yakub pinggi ware fusuhuk pibag.

Ishak inowen Laban ambeg lamihin ulug Yakub hiyag itfag ane

42Esauen not ware fusuhuk peruk urukmu hol hibareg Ribka inowen namloho Yakub wol tik aliyek ulug hiyag isibagma Yakub ino watfagma ele hiyag utuk lit, ”Namloho, howe Esau ino indi siyahap tirikinon fahet ayeg waroho huwaruhuk peruk lit wereg. 43Ari fahet anden iminon tu holeg lamin: Hirag-hirag lamihinteg nowe Laban ambeg o Haran lamihin. 44Lamihinteg at men weregman eneg howeyen olok toho wenggel haruk ane eleg aruhu. 45Haren indi siyahap tirikin ane apeleg atuk halug hat hondog habik wamag ulug ap mon enebik waruhuk. O misihim sambil an numalikisi pirenet angge longgo uruk ane nirim peruk lahi,” ibag.

46Tot welatfareg Ribka inowen Ishak fam ele uruk lit, ”Esauen Het hiyap kinang tu fam werehon itano eneg hilarisiyon fahet mondabi nirim peruk lahi. Yakuben oho Het hiyap eke hilahu halug anden yet isahuk tohon ulug war aruhuk fano,” ulug hiyag itfag.

Currently Selected:

KEJADIAN 27: YLI

Highlight

Copy