Levitikɔs 20
20
Asoɔdzen Ho Asotwe
1Na EWURADZE kasaa kyerɛɛ Moses dɛ, 2Afei so se Israelmba dɛ, Obiara a ofi Israelmba mu, anaa ofi ahɔho a wɔabɔsoɛ Israel mu a ɔdze n’asefo mu bi ma Molek no; okum na wonku no: asaase no do nkorɔfo no mfa abo nsiw no. 3Mo so mebɛma m’enyi asa nyimpa no, na metwa no efi ne man mu akyen; osiandɛ ɔdze n’asefo mu bi ama Molek, dze egu m’ahotseweebea ho fi, na oehura me dzin krɔnkrɔn no ho. 4Na sɛ ɔdze n’asefo mu bi rema Molek no, na asaase no do nkorɔfo nam kwan biara do kata hɔn enyiwa fi nyimpa no do, na woennku no a: 5ɔno mebɛma m’enyi asa nyimpa no, na asa n’ebusuafo, na mubotwa no, ɔno nye hɔn a wodzi n’ekyir ndwamanyɛ mu, dɛ wɔnye Molek bɛyɛ ndwamandze no, efi hɔn man mu egu. 6Na obiara a ɔdan no ho kɔ hɔn a wɔyɛ adzebisafo, na esumamfo hɔ kedzi hɔn ekyir ndwamanyɛ mu no, mebɛma m’enyi asa dɛm nyimpa no, na metwa no efi ne man mu akyen. 7Dɛm ntsi hom ntsew homho, na hom nyɛ krɔnkrɔn: na emi nye EWURADZE hom Nyankopɔn. 8Na hom ndzi m’ahyɛdze do, na wɔnyɛ: emi nye EWURADZE a metsew hom ho no. 9Na obiara a ɔdom n’egya anaa ne na no, oku na wonku no: osiandɛ ɔadom n’egya anaa ne na; no bɔgyaa ngu n’etsifi. 10Na ɔbanyin a ɔfa ɔbanyin bi so ne yer no, mekyerɛ nyia ɔfa ne nyɛnko ne yer no, oku na wonku ɔyefafo nye okumfafo no. 11Na ɔbanyin a ɔnye n’egya ne yer da no, oeyi n’egya n’adagyaw do, oku na wonku hɔn beenu nyina; hɔn bɔgyaa ngu hɔn etsifi. 12Na sɛ ɔbanyin nye n’asew a ɔyɛ ne ba ne yer da a, oku na wonku hɔn beenu nyina: wɔayɛ sakasaka; hɔn bɔgyaa ngu hɔn etsifi. 13Na sɛ banyin nye banyin bi da, dɛ mbrɛ ɔnye ɔbaa da a, hɔn beenu nyina ayɛ ekyiwadze: oku na wonku hɔn; hɔn bɔgyaa ngu hɔn etsifi. 14Na sɛ banyin bi fa yer nye ne na nyinara a, ɔyɛ ebusudze: wɔmfa gya nhyew hɔn, ɔno nye hɔn nyinara; amma ebusudze aammba hom mu. 15Na sɛ ɔbanyin nye abowa bi da a, oku na wonku no: na hom nku abowa no. 16Na sɛ ɔbaa bi kɔ abowa biara hɔ, na ɔkɛda hɔ ma no a, ku ɔbaa no, nye abowa no: oku na wonku hɔn; hɔn bɔgyaa ngu hɔn etsifi. 17Na sɛ banyin fa n’akyerɛbaa, n’egya ne babaa, anaa ne na ne babaa, na ohu n’adagyaw, na no so hu n’adagyaw a, ɔyɛ enyimguase adze; na wontwitwa hɔn ngu wɔ hɔn man mba enyim: oeyi n’akyerɛbaa n’adagyaw do; ɔnsoa no mbusu. 18Na sɛ ɔbanyin bi nye ɔbaa ɔbrafo bi da, na oyi n’adagyaw do a; na oebue no bura ano, na ɔno so oeyi no bɔgyaa bura do; wontwitwa hɔn beenu nyina mfi hɔn man mu ngu. 19Na mma nnyi wo na n’akyerɛbaa anaa w’egya n’akyerɛbaa n’adagyaw do: ɔno so oeyi no bɔgyaa a ɔbɛn n’adagyaw do: wɔnsoa hɔn mbusu. 20Na sɛ ɔbanyin bi nye no wɔfa ne yer da a, oeyi no wɔfa n’adagyaw do: wɔnsoa hɔn bɔn; wɔronnwo ba na woewu. 21Na sɛ ɔbanyin bi fa no nua ne yer a, ɔyɛ adze fi: oeyi no nua n’adagyaw do; worinnya ba.
22Dɛm ntsi hom ndzi m’ahyɛdze nyinara, nye me ntsɛmbu nyinara do, na wɔnyɛ: amma asaase no a medze hom rokɔ hɔ akɛtsena do no aammfe hom enngu. 23Na mma hom mmfa ɔman a murubotu hɔn wɔ hom enyim no hɔn amambra do: na wɔyɛɛ ndzɛmba iyinom nyinara, na dɛm ntsi hɔn ho yɛɛ me mfon. 24Na mese hom dɛ, Hom na wonnya hɔn asaase no ndzi, na medze mema hom dɛ hom enyadze, asaase a numfonsu nye wo pem wɔ do: emi nye EWURADZE hom Nyankopɔn a mapaa hom efi amanaman mu no. 25Dɛm ntsi hom mpaa mbowa a hɔn ho tsew nye dza hɔn ho nntsew mu, nye nnoma a hɔn ho nntsew nye dza hɔn ho tsew mu: na mma hom mmfa abowa, anaa anoma, anaa adze biara a ɔwea famu a mapaa no wɔ hom ho dɛ no ho nntsew no nngu hom akra ho fi. 26Na hom nyɛ krɔnkrɔn mma me: na emi EWURADZE meyɛ krɔnkrɔn, na mapaa hom efi amanaman mu dɛ hom mbɛyɛ medze.
27Ɔbanyin bi so anaa ɔbaa bi a ɔyɛ adzebisafo, anaa ɔyɛ esumamfo no, oku na wonku no: wɔmfa abo nsiw hɔn: hɔn bɔgyaa ngu hɔn etsifi.
Currently Selected:
Levitikɔs 20: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.