Nkanee 10
10
Dwetɛ Ntotorobɛnto No
1Na EWURADZE kasaa kyerɛɛ Moses dɛ, 2Yɛ dwetɛ ntotorobɛnto ebien fa ma woho: ɔbor edwuma na fa yɛ: na dze aafrɛ mboanofo no aba, na dze ama woeetutu nseraban no akɔ. 3Na sɛ wɔhɛn n’ebien nyina a, mboanofo no nyinara hɔn ano nhyia wo nkyɛn wɔ ehyiadzibuw no n’abowano. 4Na sɛ wɔhɛn kor a, ɔno mbapɔmba no, Israel mpempem mu etsitsir no, hɔn ano nhyia wo nkyɛn. 5Na sɛ hom hɛn ewubɔ a, nseraban a ɔdeda boka afamu no ntutu nkɔ. 6Na sɛ hom hɛn ewubɔ toa do ebien a, nseraban a ɔdeda pomu afamu no ntutu nkɔ: worubotu no, wɔnhɛn ewubɔ. 7Mbom sɛ bagua no ribehyia a, hom nhɛn, na mma hom nnhɛn ewubɔ. 8Na Aaron ne mbabanyin asɔfo no, na wɔmfa ntotorobɛnto no nhɛn; na ɔnyɛ daa ahyɛdze mma hom wɔ hom ebusuasantsen nyinara mu. 9Na sɛ hom rokɔ ɔsa wɔ hom asaase do nye ɔtamfo a ohiahia hom ho akɔko a, ɔno hom mfa ntotorobɛnto no nhɛn ewubɔ; na wɔnkaa hom wɔ EWURADZE hom Nyankopɔn enyim, na wɔngye hom nkwa wɔ hom atamfo nsamu. 10Na hom enyigye nda mu, nye hom afahyɛ a wɔahyehyɛ mu, na hom abosoom ahyɛse mu so, hom mfa ntotorobɛnto no nhɛn no wɔ hom ɔhyew afɔr nye hom asomdwee afɔr no do; na ɔnyɛ nkaa mma hom wɔ hom Nyankopɔn enyim: emi nye EWURADZE hom Nyankopɔn.
Israelmba no Tu Fi Sinai Asaase Do
11Na ɔbaa dɛ afe a otsia ebien no, bosoom a otsia ebien no, wɔ bosoom no ne da a otsia eduonu no mu no, mununkum no maa noho do fii dase ntamadan no do. 12Na Israelmba no sii mu fii Sinai sar do dɛ mbrɛ hɔn akwantu no tse: na mununkum no kegyinaa Paran sar do. 13Na wodzii kan tuu hɔn akwantu no dɛ mbrɛ EWURADZE mbrasɛm a ɔwɔ Moses nsamu no tse. 14Na Judamba nseraban do frankaa na odzii kan tui dɛ mbrɛ hɔn dɔm no tsetsee: na Aminadab ne babanyin Nahson na ɔhwɛɛ no dɔm no do. 15Na Zuar ne babanyin Netanel na ɔhwɛɛ Isakarmba ebusuakuw dɔm no do. 16Na Helon ne babanyin Eliab na ɔhwɛɛ Zebulunmba ebusuakuw dɔm no do. 17Na wɔpaa ntamadan no; na Gerson ne mbabanyin nye Merari ne mbabanyin a wɔsoasoaa ntamadan no tui. 18Na Reuben nseraban do frankaa tui dɛ mbrɛ hɔn dɔm no tsetsee: na Sedeur ne babanyin Elizur na ɔhwɛɛ no dɔm no do. 19Na Zurisadai ne babanyin Selumiel na ɔhwɛɛ Simeonmba ebusuakuw dɔm no do. 20Na Deutel ne babanyin Eliasaf na ɔhwɛɛ Gadmba ebusuakuw dɔm no do. 21Na Kohatfo no soasoaa ahotseweebea no dze tui: na binom so sii ntamadan no dze kodur dɛ wɔbae. 22Na Efraimmba nseraban do frankaa tui dɛ mbrɛ hɔn dɔm no tsetsee: na Ammihud ne babanyin Elisama na ɔhwɛɛ no dɔm no do. 23Na Pedazur ne babanyin Gamaliel na ɔhwɛɛ Manaasɛmba ebusuakuw dɔm no do. 24Na Gideoni ne babanyin Abidan na ɔhwɛɛ Benjaminmba ebusuakuw dɔm no do. 25Na Danmba nseraban do frankaa a ɔyɛ nseraban nseraban nyinara ne nkyidɔm no, tui dɛ mbrɛ hɔn dɔm no tsetsee: na Ammisaddai ne babanyin Ahiezer na ɔhwɛɛ no dɔm no do. 26Na Okran ne babanyin Pagiel na ɔhwɛɛ Asermba ebusuakuw dɔm no do. 27Na Enan ne babanyin Ahira na ɔhwɛɛ Naftalimba ebusuakuw dɔm no do. 28Israelmba akwantu a wotui dɛ mbrɛ hɔn dɔm no tsetsee no nye yi; na wotui.
29Na Moses see Hobab, a ɔyɛ n’asew Midiannyi Reuel ne babanyin no, dɛ, Yerutu akɔ beebi mbrɛ EWURADZE kasaa ho dɛ, Medze mebɛma hom no: bra ma yɛnkɔ, na yɛbɛyɛ wo yie: na EWURADZE aka Israel ho asɛm pa. 30Na ɔsee no dɛ, Moronnkɔ; mbom mobɔkɔ mankasa m’asaase do, nye m’ebusua mu. 31Na ɔsee dɛ, Mepa wo kyɛw, mma nngya hɛn; susuampa dɛ ɔwo inyim mbrɛ yebesi akyer nsera wɔ sar no do ntsi, ɔwo yɛ enyiwa fa ma hɛn. 32Na ɔbɛba dɛ, sɛ ɔwo nye hɛn kɔ a, ampa, ɔbɛba dɛ papa kor a EWURADZE dze bɛyɛ hɛn no, ɔnoara na yɛdze bɛyɛ wo.
33Na wotutui fii EWURADZE bepɔw no ho tuu ndaansa kwan; na EWURADZE ahyɛmudaka no tui dzii hɔn enyim kɔr ndaansa kwan, dɛ ɔrokɔhwehwɛ ahomgyebea ama hɔn. 34Na sɛ wotu fi nseraban no mu a, nna EWURADZE mununkum no wɔ hɔn do adzekyee.
35Na ɔbaa dɛ, sɛ adaka no rutu a, Moses ka dɛ, EWURADZE, soɛr ɛ, na ma w’atamfo mbɔ mpetse; na ma hɔn a wokyir wo nguan w’enyim. 36Na sɛ ɔsoɛ a, ɔka dɛ, EWURADZE, san bra Israel mpempem no nkyɛn.
Currently Selected:
Nkanee 10: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.