Nkanee 12
12
Miriam Nye Aaron Kasa Tsia Moses
1Na Miriam nye Aaron kasaa tsiaa Moses wɔ Kusnyi ɔbaa bi a ɔawar no no ntsi: osiandɛ nna ɔawar Kusnyi ɔbaa bi. 2Na wɔsee dɛ, Ana ampaara dɛ Moses nko na EWURADZE nye no akasa? Ana ɔnnye hɛn so nnkasae? Na EWURADZE tsee. 3Afei ɔbarimba Moses dze nna ɔdwe dodoodow, ɔbor nyimpa a wɔwɔ asaase do nyinara do. 4Na EWURADZE kasaa awerɛfir mu kyerɛɛ Moses, nye Aaron, nye Miriam dɛ, Hom baasa hom mfir edzi mbra ehyiadzibuw no ho. Na hɔn baasa no fiir edzi bae. 5Na EWURADZE sianee wɔ mununkum dum mu, na obegyinaa Buw no n’abowano, na ɔfrɛɛ Aaron nye Miriam: na hɔn beenu no fiir edzi bae. 6Na ɔsee dɛ, Afei hom ntsie me nsɛm: sɛ nkɔnhyɛfo bi wɔ hom mu a, emi EWURADZE mibeyi moho akyerɛ no wɔ enyido adzehu mu, adaaso mu na menye no bɛkasa. 7M’akowaa Moses nntse dɛm; ɔno na medze me fie nyinara ahyɛ ne nsa. 8Ano nye ano na menye no rekasa, mekyerɛ petee mu a, na nnyɛ abɛbu mu a; na ɔbɔhwɛ EWURADZE no su: na ɔyɛ dɛn ntsi na hom ennsuro dɛ hom bɛkasa etsia m’akowaa Moses? 9Na EWURADZE ebufuw fraam hɔn do; na ofii hɔ kɔree. 10Na mununkum no twee fii Buw no do; na, hwɛ, Miriam ayar kwata, ɔhoa dɛ esukwankyɛba: na Aaron hwɛɛ Miriam no, hwɛ, nna ɔayar kwata. 11Na Aaron see Moses dɛ, Ao mo wura, mepa wo kyɛw, mma mmfa bɔn nnto hɛn do, na yɛayɛ nkwaseadze, na ɔno ho yɛayɛ bɔn. 12Me kyɛw ara nye yi, mma ɔnnyɛ dɛ obi a oewu fi ne na yamu aba a woedzi no honam fa dada. 13Na Moses sui frɛɛ EWURADZE dɛ, Ao Nyankopɔn, meserɛ wo, sa no yarba. 14Na EWURADZE see Moses dɛ, Sɛ n’egya hina n’enyi do ntafi a, ana nkyɛ n’enyi nnwu nda esuon bi a? Ma wɔntow no mu nda esuon wɔ nseraban no ekyir, na n’ekyir no na wɔmfa no mbra mu bio. 15Na wɔtoow Miriam mu wɔ nseraban no ekyir nda esuon: na ɔman no enntu araa kodur dɛ wɔfaa Miriam baa mu bio. 16Na n’ekyir no na ɔman no tui fii Hazerot, na wɔkɛkyeer nsera wɔ Paran sar do.
Currently Selected:
Nkanee 12: MFANBRP
Highlight
Copy
Compare
Share
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.