Gyenesis 19

Sodom Ne Nsɛɛe

1Na sor abɔfo beenu no baa Sodom ewimbir; nna Lot tse Sodom abotsen ano: na Lot hun hɔn, na ɔsoɛree kehyiaa hɔn kwan; na ɔkotowee dze n’enyim boom famu; 2na ɔsee dɛ, Afei hwɛ, mo wuranom, meserɛ hom, wɔmman hom akowaa fie, na wɔnkɔsoɛ hɔ anafua yi nyinara, na hom nhohor hom anan ho, na hom asoɛr anapaatu akɔ hom kwan. Na wɔsee dɛ, Dabida; na yɛbɛtsena gua do anafua yi nyinara. 3Na ɔserɛɛ hɔn ɔdzendo ara, na wɔmaan ne nkyɛn, na wɔkɔr ne fie; na ɔtoo hɔn pon, na ɔtoo epitsi ma wodzii. 4Na wonnyae nnkɛdae no, nna kurow no mu mba, mekyerɛ Sodomfo no, botwaa dan no ho hyiae, mbofra nye mpanyin, apaa nyinara mu nkorɔfo nyinara; 5#Atsɛ 19.22-24 na wɔfrɛɛ Lot na wɔsee no dɛ, Mbarimba a wɔbaa wo nkyɛn anafua yi no wɔ hen? Yi hɔn brɛ hɛn, ma yɛnye hɔn nda. 6Na Lot puei kɔr hɔn nkyɛn wɔ abow no ano, na ɔtoow abow no mu wɔ n’ekyir. 7Na ɔsee dɛ, Mo nuanom, meserɛ hom, mma wɔnnyɛ emumuyɛ a ɔtse dɛm. 8Afei hwɛ, mowɔ mbabaa beenu a wonnhun banyin: meserɛ hom, wɔmma minyi hɔn mbrɛ hom, na dza homara hwɛ a oye no ara hom nyɛ hɔn: mbarimba yi dze mma wɔnnyɛ hɔn biribiara; susuampa dɛ wɔaba me hatsɛw no nwin ase yi. 9Na wɔsee dɛ, Gyina nkyɛn. Na wɔsee dɛ, Akowaa kor yi ɔbaa hɛn amanyɛ, na ɔrohwehwɛ ɔayɛ ɔsɛndzifo: afei yɛnye wo bedzi no bɔn akyɛn hɔn. Na wɔhyɛɛ Lot no do dzendzenndzen, na wɔtwee pinii dɛ worubobubu abow no. 10Na mbarimba no tseen hɔn nsa, na wɔtwee Lot baa hɔn nkyɛn wɔ dan mu na wɔtoow abow no mu. 11#2 Ahe 6.18 Na wɔdze enyifura baa nkorɔfo a wogyinagyina ofi no n’abow n’ano no hɔn do, nkakraba nye akɛse nyina: ma wɔfonaa dɛ wobohu abow no n’ano kwan.

Lot Tu Fi Sodom

12Na mbarimba no bisaa Lot dɛ, Ana ewɔ obiara so wɔ ha? Asew, na wo mbabanyin, na wo mbabaa, na obiara a ewɔ no wɔ kurow yi mu; yi hɔn fi ha: 13na yɛrebɛsɛɛ ha, osiandɛ hɔn nkekamu ayɛ kɛse wɔ EWURADZE n’enyim; na EWURADZE asoma hɛn dɛ yɛmbɛsɛɛ no. 14Na Lot puei, na ɔkɛkasaa kyerɛɛ ne nsewnom a wɔawarwar ne mbabaa no, na ɔsee dɛ, Hom nsoɛr mfi ha; na EWURADZE rebɛsɛɛ kurow yi. Na ɔyɛɛ ne nsewnom no enyiwa do dɛ obi a oridzi fɛw. 15Na adze kyee no, sor abɔfo no guu Lot do, dɛ, Soɛr, fa wo yer nye wo mbabaa beenu a wɔwɔ ha yi kɔ; amma aannhyew wɔ kurow yi n’emumuyɛ mu. 16#2 Pet 2.7 Na okyinkyimii; na EWURADZE hun no mbɔbɔr ntsi, nkorɔfo no suoo ɔno nye ne yer nye ne mbabaa beenu no hɔn nsa mu na wɔdze hɔn puei, na wɔdze hɔn kesii kurow no n’ekyir. 17Na ɔbaa dɛ, wɔdze hɔn puei no, wɔsee dɛ, Hom nguan wɔ hom nkwa ntsi; mma hom mmbu hom kɔn ekyir, mma hom nngyina Tɛtɛr yi mu beebiara so; hom guan nkɔ bepɔw no do, ɔno bɛyɛ na hom ahyew. 18Na Lot see hɔn dɛ, Ao! Mma ɔmmba no dɛm, mo wura. 19Afei hwɛ, w’akowaa enya w’enyim enyimpa, na ama w’ehumbɔbɔr a edze ehu me adɔɔ so, wɔ dɛ agye me nkwa; mbom munnkotum meguan akɔ mbepɔw no do, ɔno bɛyɛ na mbusu no ato me ma meewu. 20Hwɛ, kurow yi bɛn dɛ mubotum eguan akɔ mu, na osuar. Innhu dɛ osuar? Ao, ma munguan nkɔ hɔ, na me kra benya nkwa. 21Na ɔsee no dɛ, Hwɛ, metsie wo wɔ adze kor yi so mu, dɛ monnkɔbɔ kurow a aka ho asɛm no. 22Ka woho ɛ, guan kɔ hɔ; na murunntum biribiara yɛ, gyedɛ edu hɔ ana. Dɛm ntsi wɔfrɛɛ kurow no ne dzin Zoar ase nye dɛ kakraba. 23Na aber a Lot dur Zoar no, nna ewia epue asaase do. 24#Mat 10.15; 11.23, 24; Luk 10.12; 17.29; 2 Pet 2.6 Nna EWURADZE tɔɔ brestɔn nye ogya fi EWURADZE hɔ wɔ sor guu Sodom nye Gomora do; 25na ɔbɔɔ nkurow no, nye Tɛtɛr no nyinara, nye hɔn a wɔtse nkurow no mu nyinara, nye dza ofifir asaase no do no. 26#Luk 17.32 Na Lot ne yer buu no kɔn ekyir, na ɔdaan nkyensiw. 27Na Abraham soɛɛr anapaatu kɔr mbrɛ ogyinae wɔ EWURADZE n’enyim no: 28na ɔdaan n’enyi kɔr Sodom nye Gomora, nye Tɛtɛr no mu asaase no nyinara do, na, hwɛ, asaase no do wusiw foow sor dɛ fononoo wusiw.

29Na ɔbaa dɛ, aber a Nyankopɔn sɛɛ Tɛtɛr no mu nkurow no, Nyankopɔn kaa Abraham, na aber a ɔbɔɔ nkurow a Lot tse mu no, oyii Lot wɔ ɔsɛɛ no mu.

Lot Ne Mbabaa Beenu No

30Na Lot fii Zoar fowee, na ɔkɛtsenaa bepɔw no do, na ne mbabaa beenu no ka no ho; osiandɛ osuroo dɛ ɔbɛtsena Zoar: na wɔtsenaa ɔbo tu mu. 31Na abakan no see ekumaba no dɛ, Hɛn egya ayɛ akɔdaa, na ɔbanyin biara nnyi asaase do a ɔbɛba hɛn nkyɛn dɛ mbrɛ asaase nyinara yɛ no: 32Bra, ma yɛmma hɛn egya nnom nsa, na yɛnye no nkɛda, ama yeenya hɛn egya no ho mba. 33Na wɔmaa hɔn egya noom nsa anafua no: na abakan no kɔr mu, na ɔnye n’egya kɛdae; na oennhu ne ndaa mu, eso no nsoɛree mu. 34Na ɔbaa dɛ n’adzekyeenyim no, abakan no see ekumaba no dɛ, Hwɛ, menye m’egya daa anafua yi: ma yɛmma ɔnnom nsa anafua yi so; na kɔ mu, na enye no nkɛda, ama yeenya hɛn egya no ho mba. 35Na wɔmaa hɔn egya noom nsa anafua no so; na ekumaba no soɛree, na ɔnye no kɛdae; na oennhu ne ndaa mu, eso no nsoɛree mu. 36Dɛm na Lot ne mbabaa beenu no nyina wɔnye hɔn egya nyinsenii. 37Na abakan no woo babanyin, na ɔtoo no dzin Moab: ɔnoara nye Moabfo hɔn egya ɔdze bodu ndɛ da yi. 38Na ekumaba no so woo babanyin, na ɔtoo no dzin Benammi: ɔnoara nye Ammonfo hɔn egya ɔdze bodu ndɛ da yi.

Currently Selected:

Gyenesis 19: MFANBRPC

Highlight

Copy