Gyenesis 25

Abraham Na Ketura Hɔn Mba

(1 Mbermunsɛm 1.32-33)

1Na Abraham waar yer kor so, ne dzin dze Ketura. 2Na ɔwoo Zimran, Joksan, Medan, Midian, Isbak, nye Sua maa no. 3Na Joksan woo Seba, nye Dedan. Na Dedan ne mba nye Assurim, Letusim, nye Leumim. 4Na Midian ne mba nye Efa, Efer, Hanok, Abida, nye Eldaa. Woyinom nyinara yɛ Ketura ne mba. 5Na Abraham dze dza ɔwɔ nyinara maa Isaak. 6Na mbasiafo nkaa no mba a Abraham wɔ no dze, Abraham kyɛɛ hɔn adze; na ogyaa hɔn kwan, boka afamu, fii ne ba Isaak ho, ber a ɔda ho tse ase no, ma wɔkɔr boka asaase no do.

Abraham No Wu

7Na Abraham no nkwaber mu mfe yɛ mfe ɔha eduosuon enum. 8Na Abraham gyaa no sunsum mu, na owuu nkɔdaaber pa mu, akɔdaa a, nna oedzi mfe pii; na wɔdze no kɛkaa no nkorɔfo ho. 9Na ne mba Isaak nye Ismael siee no wɔ Makepela ɔbo tu mu, wɔ Hetnyi Zohar ne ba Efron ne haban no mu, wɔ Mamre n’enyim; 10#Gye 23.3-16 haban no a Abraham tɔɔ no wɔ Hetmba nsamu no mu: hɔ na wosiee Abraham nye ne yer Sara. 11Na ɔbaa dɛ Abraham no wu ekyir no, Nyankopɔn hyiraa ne ba Isaak; na Isaak tsenaa Beer-lahai-roi ho.

Ismael Asefo

(1 Mbermunsɛm 1.28-31)

12Afei iyinom nye Abraham ne ba Ismael a Egyptnyi Hagar, Sara n’afonabaa no, woo no maa Abraham no n’ebusuasantsen: 13Ismael ne mba hɔn edzin a wɔdze frɛɛ hɔn, dɛ mbrɛ hɔn awoo ndzidzido tsetsee. Nebaiot nye Ismael n’abakan; na nkaa no nye Kedar, Adbeel, Mibsam, 14Misma, Duma, nye Massa 15Binom so nye Hadad, Tema, Jetur, Nafis, nye Kedema: 16iyinom nye Ismael ne mba, na iyinom nye hɔn edzin, dɛ mbrɛ hɔn nkuroba, nye hɔn nseraban no tsetsee; etsitsir duebien dɛ mbrɛ hɔn aman tsetsee. 17Na Ismael no nkwaber mu mfe a dzii nye yi, mfe ɔha eduasa esuon: na ogyaa no sunsum mu na owui; na wɔdze no kɛkaa no nkorɔfo ho. 18Na wɔtsenaa fi Havila kodur Sur a ɔwɔ Egypt enyim no, edze rokɔ Asiria afamu no: na ɔnye no nuanom no anntsena wɔ abodwee mu.

19Na iyinom nye Abraham ne ba Isaak n’ebusuasantsen: Abraham woo Isaak; 20na Isaak dzii mfe eduanan no, nna ɔwaar Rebeka, Sirianyi Betuel ne babaa a ofi Paddan-aram, Sirianyi Laban n’akyerɛbaa no. 21Na Isaak serɛɛ EWURADZE maa ne yer, osiandɛ ɔyɛ ɔbɔnyin: na EWURADZE tsiee no nkotoserɛ no, na ne yer Rebeka nyinsenii. 22Na mbofra no dzii aper wɔ no mu; na ɔsee dɛ, Sɛ ɔtse dɛm a, ebɛnadze ntsi na metse ase? Na ɔkɔree kebisaa EWURADZE. 23#Rom 9.12 Na EWURADZE see no dɛ,

Aman ebien na wɔwɔ wo yamu,

Na nkorɔfo ahorow ebien na wɔbɛpaa hɔnho mu efi wo yafun mu;

Na ɔman no mu kor bɛyɛ dzen asen kor;

Na ɔpanyin no bɔsom ekumaba no.

24Na aber a ne nda dur dɛ ɔbɔwo no, nna hwɛ, nta wɔ ne yamu. 25Na nyia odzi kan no ɔbae, no ho memennmen, no ho nyinara wɔ nhwi futuww dɛ nhwi atar; na wɔfrɛɛ ne dzin Esau. 26Na ɔno n’ekyir no no nua bae, na ne nsa dze Esau ne nantsir; na wɔfrɛɛ ne dzin Jakob na aber a wɔwoo hɔn no, nna Isaak edzi mfe eduosia. 27Na mbofra no nyinii: na Esau yɛɛ ɔbɔfo a onyim ahayɛ papaapa, ɔhamunyi a; na Jakob dze ɔyɛɛ nyimpa a ɔyɛ ɔdwe na ɔtsetse asese mu.

Esau Tɔn Ne Mpanyinyɛ

28Afei Isaak dɔɔ Esau, osiandɛ odzii ne hanam no bi: na Rebeka dɔɔ Jakob. 29Na Jakob yɛɛ edziban bi: na Esau fi hamu bae no, nna ɔatɔ bitsi. 30Na Esau see Jakob dɛ, Meserɛ wo, ma me edziban yi bi na mindzi; na matɔ bitsi: dɛm ntsi wɔdze too no dzin Edom. 31Na Jakob see dɛ, Tɔn wo mpanyinyɛ ma me ndɛ da yi. 32Na Esau see dɛ, Hwɛ, migyina wuso: na ebɛn mfaso na panyin yi bɛyɛ ama me? 33#Heb 12.16 Na Jakob see dɛ, Dzi nsew kyerɛ me ndɛ da yi; na odzii nsew kyerɛɛ no: na ɔtɔɔn ne mpanyinyɛ maa Jakob. 34Na Jakob maa Esau boodoo nye eduwa noae, na odzii na ɔnomee, na ɔsoɛree ɔkɔr no kwan: na Esau emmbu ne mpanyinyɛ no hwee.

Currently Selected:

Gyenesis 25: MFANBRPC

Highlight

Copy