Ai 11

Jiinyutho nia Kayu Ceke Bitho

1E Yehova wacu ni Musa kumae, Fodi abikelo masendi acel kendo wi Farao, man wi Misiri; yo ng’eye ebiyio wuai ku kuno: kinde m’ebiyio wucidhi, ebicwaluwu wuai ku kuno andha. 2Kawono yer i ith dhanu, man wuwek dhanu ma co ceke kubang’gi kubang’gi ng’atuman ukwai piny ba jadhugola pare, man ku ba mon ceke ng’atuman ba jadhugola pare, jamb mola ma tar, man jamb mola ma kwar. 3E Yehova mio bero ni dhanu i wang’ Jumisiri. Man ke ng’atu ma Musa dit hai i ng’om Misiri, i wang’ jutic pa Farao, man i wang’ dhanu.

4E Musa wacu kumae, Yehova wacu kumae, Ceng’ni diewor ma ling’ abicidho i kind Misiri: 5e kayu ceke m’i ng’om Musiri bitho, ugambre kum kayu pa Farao ma jany wi komker pare, cil kum kayu pa bong’ ma ni yo ng’ei pom; man kayu ceke mi lim. 6E ywak ma dit bibedo nuti i ng’om Misiri ceke ndri, wadi ma fodi uwok ungo, kadi ma bibedo nuti kendo de ngo. 7Ento i kind nyithindho mir Israel gwok moko mbe ma biw’odho lebe, kum dhanu kadi lim: kara wung’ei maram Yehova poko ko kind Jumisiri ku Juisraeli. 8Man jutic peri maeni ceke biloro piny i bang’a, man gibirum piny ira, gibiwacu kumae, Ai, ku dhanu ceke m’ulubi: e yo ng’ei maeni abiai. Man eai woko ku ba Farao ku ng’ecwiny ma lieth. 9E Yehova wacu ni Musa kumae, Farao biwinjowu ngo; kara musana para medre i ng’om Misiri. 10Man Musa giku Harun gitimo musana maeni ceke i wang’ Farao: e Yehova dwoko adunde Farao nwang’, man eyio ngo ya nyithindho mir Israel uai kud i ng’om pare.

Currently Selected:

Ai 11: AB1970

Highlight

Copy