Thangambere 27

Yakobo Gamu Mugisa pa Isak

1Man etimbre, nia kinde ma Isak e uti, man wang’e neno piny via via, ketho nia ecopo neno piny ungo, elwong’o Esau ma wode ma jadit, man ewacu ire kumae, Woda: man ewacu ire kumae, Anuti. 2Man ewacu kumae, Nen kawono, ati, ang’eyo ceng’ mi tho para ngo. 3Ka kumeno kawono, akwei, gam jambdwar peri, athero peri kud atum peri, man icidh i thim, man igam ira ring’o; 4e itim ira cemo ma mit, wadi m’amaru, man ikele i bang’a, kara acam; kara ng’eyong’ec para mi mugisa iri ma fokatho ngo.

5Man Rebeka winjo kinde ma Isak uweco kud Esau ma wode. E Esau cidho i thim kara eneg ring’o, man ekele. 6Man Rebeka yero ni Yakobo ma wode, ewacu kumae, Nen, awinjo wuru yero ni Esau m’umeru, ewacu kumae, 7Kel ira ring’o, man itim ira cemo ma mit, kara acam, man ami mugisa iri i wang’ Yehova ma fodi tho para kutundo ngo. 8Ka kumeno kawono, woda, wor dwanda calku lembe m’ang’olo iri. 9Kawono ci bang’ udul diegi, man igam ira nyithi diegi ario ma ber keca: man abitimogi ni cemo ma mit ni wuru, wadi m’emaru: 10man ibitere ba wuru, kara ecam, kara emi mugisa iri ma fodi tho pare kuwok ungo. 11E Yakobo wacu ni Rebeka ma min mire kumae, Nen, Esau m’umira en e jarayir, man an a jarayir ungo. 12Kuno nyo vwa bimulo kuma, man abibedo ire calu won abombi; man abigamu kwong’ i wia, mugisa re ngo. 13E min uwacu ire kumae, Kwong’ peri bed i wia, woda; iwor dwanda kende, man icidh ikelgi ira. 14E ecidho, man egamugi, man ekelogi ba min: e min mire timo cemo ma mit, wadi ma won umaru. 15Man Rebeka gamu kendi ma ber pa Esau ma wode ma jadit, ma bedo i bang’e i ot, man eroyogi i kum Yakobo ma wode ma nok; 16Man eketho lau nyithi diegi wi cinge, man wi ng’ute ma yir urabe i ie: 17man emio cemo ma mit ku kwen de, m’eyiko, i cing’ wode ma Yakobo.

18Man ebino ba won, ewacu de kumae, Vwa: man ewacu kumae, Anuti; in i ng’a, woda? 19E Yakobo wacu ni won kumae, An a Esau ma kayu peri; atimo calu iwacu ira: ai malu, akwei, ibed icam ring’o para, kara ng’eyong’ec peri mi mugisa ira. 20Man Isak uwacu ni wode kumae, Inwang’e pio pio kumeni nenedi, woda? Man ewacu kumae, Kum Yehova Mungu peri ketho woth para bedo miero. 21Man Isak uwacu ni Yakobo kumae, Akwei, bin ceng’ni kara amul kumi, woda, tek in i Esau ma woda mandha kadi ungo. 22E Yakobo eoro ceng’ni bang’ Isak ma won; man emulo kume, man ewacu kumae, Dwal en e dwand Yakobo, ento cingi re gi cing Esau. 23Man eng’ie ngo, kum cinge ju yir, calu cing Esau m’umin mire: kum kumeno emio ire mugisa. 24Man ewacu kumae, In i woda ma Esau andha? Man ewacu kumae, An a en. 25E ewacu kumae, Kele ceng’ni i bang’a, man abicamu ring’o moko pa woda, kara ng’eyong’ec para mi mugisa iri. Man ekele ceng’ni i bang’e, e ecamu: man ekelo ire pigulok, e emadhu. 26Man won ma Isak uwacu ire kumae, Cor ceng’ni kawono, man icwi limba, woda. 27#Ebr 11:20E ecoro ceng’ni, man ecwio limbe: man eng’wio ng’wic kendi pare, e emio mugisa ire, man ewacu kumae,

Nen, ng’wic woda

En e calu ng’wic thim ma Yehova mio mugisa i wie:

28Man Mungu mi iri kum thoi m’i polo, Man kum mio m’i ng’om,

Man cam dupa ku pigulok ma nyasa:

29 # Tha 12:3 Dong’ kodhidhanu gitim iri,

Man thek girum piny i beng’i:

Bed rwoth wi utumeru,

Man wek wot meru girum piny iri: Kwong’ ubed wi dhanu m’ukwong’i kubang’gi kubang’gi,

Man mugisa bed wi dhanu ceke m’umio mugisa iri kubang’gi kubang’gi.

30Man etimbre, kinde ma Isak udaru mio mugisa ni Yakobo, man kinde ma Yakobo ai ku vut Isak ma won, nia Esau m’umin mire mondo m’eai yo dwar pare. 31Man en bende etimo cemo ma mit, man ekele ba won; man ewacu ni won kumae, Dong’ vwa ai, man ecam ring’o moko pa wode, kara ng’eyong’ec peri mi mugisa ira. 32Man Isak ma won uwacu ire kumae, In i ng’a? Man ewacu kumae, An a wodi, ma kayu peri, Esau. 33E kum Isak umiel dit apila, man ewacu kumae, E ka ng’a m’ugamu ring’o, man ekele ira, man adaru camu ceke ma fokiwok ungo, man amio mugisa ire? eyo, man ebibedo jamugisa. 34Kinde ma Esau uwinjo lembe pa won, eywak ku ywak ma dit apila man ku can de, man ewacu ni won kumae, Mi mugisa ira, an bende, E vwa. 35Man ewacu kumae, Umeru bino kud abombi, man edaru gamu mugisa peri. 36#Tha 25:29-34Man ewacu kumae, Jucaku nyinge Yakobo dre ngo? kum evuga wang’ ario maeni: ekabu ng’ol mi dit mi nyol para woko; man, nen, kawono ekabu mugisa para woko. Man ewacu kumae, Iweko mugisa moko ngo ira? 37Man Isak uloko lembe ewacu ni Esau kumae, Nen, aketho ebed rwoth peri, man utumin mire ceke amio ire ni jutic; man awacu ebed ku cemo man pigulok ma nyasa de: e kan ang’o m’abilund timo iri, woda? 38#Ebr 12:17Man Esau wacu ni won kumae, Vwa, ibedo ku mugisa acel kende? mi ira mugisa, an bende, E vwa. E Esau ting’o dwande malu, man eywak. 39#Ebr 11:20Man Isak ma won uloko lembe man ewacu ire kumae,

Nen, ka ma mio mi ng’om bibedo ni kabedo peri,

Man thoi m’uai malu i polo;

40 # Tha 36:8; 2 Ub 8:20 Man ibibedo ni kum palamularu peri, man ibitimo ni umeru;

Man ebitimbre, kinde m’ibigonjri,

Nia ibikiro mberembere pare woko kud i ng’uti.

Isak Uoro Yakobo i Haran

41Man Esau dagu Yakobo kum mugisa ma won umio ire: man Esau wacu i adundene kumae, Ceng’ mi ywagu vwa dhingo; e abilund nego Yakobo m’umira. 42E juyero lembe pa Esau ma wode ma jadit ni Rebeka; e eoro elwong’o Yakobo ma wode ma nok, man ewacu ire kumae, Nen, Esau m’umeru, ejukre gire piri, m’ekeco ko ya ebinegi. 43Ka kumeno kawono, woda, wor dwanda; man iai iring ba Laban m’umira i Haran; 44man wubed wukude nindo moko, maram kwinyo p’umeru kwi ko; 45maram ng’ecwiny p’umeru ai ko woko i kumi, man wie wil kum lembe m’itimo i kume: e abilund oro lembe, man abigemi ku kuca: nedi wun ario de wurwiny ira ceng’ aceli?

46Man Rebeka wacu ni Isak kumae, Kwo para ola kum nyig Heth: tek Yakobo gamu dhaku ma kind nyig Heth, wadi maeni, mi nyir m’i ng’ombe, kwo para biloko ang’o ira?

Currently Selected:

Thangambere 27: AB1970

Highlight

Copy